ನಾಡ್ಲ್ ನಾಳ್ 13…
ಕೈಂಜ ವಾರತಿಂಜ….
ಅಚ್ಚಕ್ ನೇರ ಒಂದೂ ಪರೆಯತೆ ಶೋಕಪಟ್ಟಂಡಿಂಜ ನಂಜುಂಡ, ಪೊನ್ನಕ್ಕಂಡ ಅಪ್ಪಂಡ ಮೇಲೊಮ್ಮ ತರಾ…ತರಾ… ಂದ್ ಬೊರ್ತತ್. ಅಂವೊ ನಿಧಿಂಜ ಕಣ್ ಎಡ್ತಿತ್ ಚಿಮ್ಮಂಡ ಮೂಡ್ಕ್ ಥೂ…ಂದ್ ತುಪ್ಪ್ಚಿ..
ಇಕ್ಕ ಎಲ್ಲಾಡ ದೃಷ್ಟಿ ಅವೊಂಡ ಮೀದ ಬುದ್ದತ್. ಅಂವೊ ಪಲ್ಲ್ ಕಡ್ಚಂಡ್ ಎಣ್ಣ್ಚಿ. ”ಇಕ್ಕ ನಾಕ್ ಎಲ್ಲಾ ಅರ್ಥ ಆಯಂಡುಂಡ್. ಗೊಳೋಂದ್ ಎದೆ ಪೊಜ್ಜಂಡ್ ಮೊರ್ಡ್ವಕ್ ಸುರು ಮಾಡ್ಚಂವೊ.
ಚಿಮ್ಮಂಗ್ ಎಂತ ಎಣ್ಣುವಕೂ ಗೊತ್ತಾಕತೆ ತಪ್ಪಿತಸ್ತಂಡನೆಕೆ ನಿಂದಿತಿಂಜತ್.
ನಂಜುಂಡ, ಪೊನ್ನಕ್ಕಂಡ ಅಪ್ಪ ದುಃಖತ್ ತೊಂಡೆ ಕೆಟ್ಟಿಪೋಯಿತಿಂಜಾನ ತಡ್ತ್… ತಡ್ತ್… ತಕ್ಕ್ ಪೊರ್ಟತ್ – “ಈ ನೀಚಂಗ್ ಬಾರಿ ಮೂಢನಂಬಿಕೆ ಉಂಡ್. ಎಲ್ಲಿಯೋ ಪಣ ಉಂಡ್ಂದ್ ಅರಿಂಜಿತ್, ಅಂಞಣ ಬೆಪ್ಪ್ಚಿಟ್ಟಿತ್ ನೋಟ್ವಕ ನಿಧಿ ಉಳ್ಳ ಜಾಗ ಗೊತ್ತಾಯಿತಿಕ್ಕು ; ನಿಧಿನ ಸುಲಭತ್ ಎಡ್ಪ ಕಯ್ಯತಾಂಗ್ ನರಬಲಿ (ಮನ್ಷ್ಯಂಡ ಚೋರೆ) ಕೊಡ್ಕಂಡೂಂದ್ ಮಂತ್ರಕಾರಂಡಲ್ಲಿ ತಿರ್ಂಜಿತಿಕ್ಕು. ಅದ್ಂಗ್ ಇಂವೊ ನಂಗಡ ಕುಂಞಿಯಳ ಬಲಿ ಕೊಡ್ತಿತಿಕ್ಕೂ…ಹ್ಂ… ಹ್ಂ…!”
ಅಚ್ಚಕ್ ಬಲ್ಯ ಕೆಟ್ಟ ತಕ್ಕ್ನ ಕೇಟ ಪಿಂಞ ಮಾತ್ರ ಚಿಮ್ಮಂಗ್ ಮುಂಡತಿಪ್ಪ ಕಯಿಂಜಿಲೆ. ಅಂವೊ ಚೀರ್ಚಿ. “ಏ… ಪೊರ್ಕೀ… ಈ ಪಣ ಎನ್ನನೆ ಕ್ಟ್ಟಿಯೇಂದ್ ಕೇಕತೆ ಬಾಯಿಕ್ ಬಂದಾನ ಪರ್ಂದಕ ನೀ… ನೀಡ ಚೋರೆ ಕುಡ್ಚಿರುವಿ.”
ಅಕ್ಕಣೆಕ್ ಬಾಕಿ ಎಲ್ಲಾರೂ ಅಯಿಂಗಳ ತಡ್ತತ್.
ಚಿಮ್ಮ ಪಲ್ಲ್ ಕಡ್ಚಂಡ್ ಎಣ್ಣ್ಚಿ. “ಈ ಪಣತ್ನ ಕಾರಣಕಾರಯ್ಯಂಡ ಅವ್ವ ಚೋಮಕ್ಕ ತಾಯಿ ತಂದಿಯೆ.”
“ಚಿಮ್ಮಾ…. ಚೆನ್ನ ಸಮಾಧಾನ ಎಡ್ತರ. ನೀನ್ ಎನ್ನ್ಂಗೋ ಪೇಯಿ ಪರ್ದಂಡುಳ್ಳಿಯಾ?”
“ಇಲ್ಲೆಕ್ಕಯ್ಯಾ, ಅಮ್ಮಂಡ ಮಂಡೆ ತೊಟ್ಟಿತ್ ಎಣ್ಣುವಿ. ನಾಕ್ ತಾಯಿ ಈ ಪಣ ತಾತ್! ಗೌಜಿ ಮಾಡುವಕಲ್ಲ, ಒಕ್ಕ ನಂದ್ ಮಾಡುವಕ್.”
“ಆ ತಾಯಿ ಚತ್ತಿತ್ ಕಾಲ ಕಯಿಂಜತಲ್ಲ ಕುಂಞೀ…” ತಂಗವ್ವ ಏಂಗ್ಚಿ.
ಚಿಮ್ಮಂಡ ತಡಿಲ್ ದಾತ್ ಕುಂದ್ನನೆಕೆ ಆಯಿತ್ ನಾವ್ ಒಣಂಗ್ಚಿ.
“ಅಲ್ಲ ಕುಂಞೀ…. ನೀನ್ ಡೆಲ್ಲಿಂಜಿ ಚಾಕ್ರಿ ಬುಟ್ಟಿತ್ ಬಂದಿತ್ ಎಚ್ಚಕ್ ಸಮಯ ಆಚಿ ಎಣ್ಣ್.”
“ಒಂದರೆ ಕಾಲ!”
“ಹ್ಹ, ಇಕ್ಕ ಗೊತ್ತಾಚಿ ನೋಟ್: ನೀನ್ ಬಪ್ಪಕ್ ಒರ್ ದಂಡ್ ತಿಂಗಕ್ ಮಿಂಞ ತಾಯಿ ಚತ್ತಿಯೆ. ಅದೂ ಪಾಪತ್ರ ಮುದ್ಕಿನ ದಾರೋ ಮಾಲ್ ಮಟಕಾಯಿತ್ ಕೊಲೆ ಮಾಡಿಟಿಯಲೊ: ಅಚ್ಚಪ್ಪನೂ, ಅವಂಡ ಪೊಣ್ಣೂ, ಮೈಸೂರ್ಕ್ ಪೋನಯಿಂಗ ಬಪ್ಪಕ ತಾಯಿ ಕೊಲೆ ಆಯಿತ್ ಬುದ್ದಿತಿಂಜತ್.”
“ಹ್ಂ… ಇಕ್ಕ ಗೊತ್ತಾಚಾ? ಆ ಚತ್ತ ಮುದ್ಕಿ ಮೋರ್ ಕುತ್ತಿ ತಂದಿಯೇಂದ್ ಇಂವೊ ಇಕ್ಕಲ್ಲ ಎಣ್ಣಿಯೆ? ಇಂವೊ ಈ ತರ ಪೊಟ್ಟ್ ಬೊಗ್ಳಂಡಿಕೆ ಸಂಗತಿ ಜೋರಾಯಿತೇ ಉಂಡ್.” ಚಿಮ್ಮನ ಪಗೆಕಣ್ಣ್ಲ್ ನೋಟಿಯಂಡ್ ಎಣ್ಣ್ಚಿ, ಬಾವೊ.
ಎಂತಾನೋ ನೆನತಿಯಂಡ ಚಿಮ್ಮ, ಮೋರ್ಕುತ್ತಿನ ಒಂದ್ ಮಾಡಿತ್ ನಿಧಿನ ಕೋತಿ, ಕೋತಿತ್ ದುಂಬ್ಚಿಡ್ವಕ್ ಸುರು ಮಾಡ್ಚಿ.
ಪಣತ್ರ ಮಧ್ಯ ಇಂಜ ಕರ್ತದಾನ ಚೆರಿಯ ಸರ್ಪ ಡೊಂಕಿಯಂಡ್ ಪರ್ಂದಂಡ್ ಪೋಯಿತ್ ಕುತ್ತಿರ ಒಳ್ಕ್ ನುಗ್ಗಿಯಂಡತ್.
ಪಾಂಬುನ ನೋಟಿಯಂಡ್ ಒರ್ ಚೆರಿಯ ತೆಳಿ ತೆಳಿಚ ಚಿಮ್ಮ, ತಾಂಡ ಕೋಂಬರೆಲ್ ಬೆಚ್ಚಿರುವೀಂದ್ ಮೋರ್ಕುತ್ತಿನ ಎಡ್ಪಕ್ ಪಕ್ಕ ಪೋಚಿ.
‘ದಡಾ…’ಂದ್ ಮೋರ್ಕುತ್ತಿಕ್ ಒರ್ ಚೌಟ್ ಕೊಡ್ತತ್, ರಾಜ. ಆದ್ “ಚಳ ಬಳ… ಚಳ ಬಳಾ’ಂದ್ ಉರ್ಂಡಿಯಂಡ್, ನೇಲೆಲ್ ಬೊಳಚ ಬೆಪ್ಪಾಂಗ್ ನೇರೆ ಅಡಿಲ್ ನಿಂದತ್.
ಅಣ್ಣಂಡ ಮೂಡ್ನ ನೋಟ್ಚಿ, ಚಿಮ್ಮ. ಅವಂಡ ಮೂಡ್ ಚವುಂಡಿ ಕೊಂಡತ್ ಕತ್ತುವ ತಿತ್ತ್ರನಕೆ ಚೋಂದಿತ್ ಚೆಡಿಲ್ ಕತ್ತುವಯಿಂಜತ್. ಅಂವೋ ಎಣ್ಣ್ಚಿ – “ಏಯ್, ನಂಗಡ ಕುಂಞಿಯ ನಂಗಡ ಕೈಕ್ ಕ್ಟ್ಟನೆಕೆ ನೀನ್ ಈ ಪಣತ್ನ ತೊಟ್ಟ್ರುವ ಕಯ್ಯ.”
‘ನಾನ್ ತೊಡುಲೆ, ಆಚೇಂಗಿ ಪಣ ಪಿರಾಂದಂಗಕ್ ಅದ್ ಕ್ಟ್ಟತನೆಕೆ ಜೋಪಾನತ್ ಜಕ್ಕೀರ ಮಾಡಿತ್ ಬೆಪ್ಪಿ” ಎಣ್ಣ್ಚಿ, ಚಿಮ್ಮ.
”ಬೋಂಡಾ…., ನೀನ್ ಬೆಪ್ಪನ್ನತ ಅವಶ್ಯಕತೆ ಇಲ್ಲೆ ಅದ್ಂಡ ಎಚ್ಚರ ನಂಗಡ ಕೈಲಿರಡ್” ಪಣ ಪಿರಾಂದ ಕಳ್ಳ್ ಕುಡಿಯ ಪೆರಿಯ ಬಾವಂಡ ತಕ್ಕ ಕೇಟಿತ್ ಚಿಮ್ಮಂಡ ಮೇಲ್ ಉರ್ಂಜತ್.
“ಚಿಮ್ಮ ಒರೇ ತಕ್ಕ್ ಪರ್ಂದತ್, ಆ ಚೆಪ್ಪ್ಕ್ ದಾಡ ರಕ್ಷಣೆಯೂ ಬೋಂಡ. ಇರಂಡಿಯೆ ಜಾಗತ್ನ ಅದೇ ಆಂಜಿ ಎಡ್ತಂಡಿತ್. ಅದ್ ನೇಲೆರ ಅಡಿಲೇ ಇರಡ್.”
ರಾಜ ಚೆಡಿಲ್ ಎಂತಾನೋ ಪರೆವಕ್ ಬಾಯಿ ತೊರ್ಪಕ, ಅಕ್ಕ ತಂಗೆಯ ಎಲ್ಲಾ ಕೂಡಿತ್ ಅವನ ಪುಡ್ಚಂಡ್ ಕೋಂಬರೆಕ್ ಕೂಟಿಯಂಡ್ ಪೋಚಿ.
ಬಾವಂಗ ‘ಹ್ಂ!’ ಎಣ್ಣಿತ್ ಚಿಮ್ಮಂಡ ಮೂಡ್ಕ್ ತುಪ್ಪಿರುವನೆಕೆ ನೋಟಿತ್, ರಾಜ ಪೋನ ಕೋಂಬರೆಕ್ ಪೋಚಿ.
ಕಾಲೋದಿ ಬೇನಿ ರಜತ್ ಎಲ್ಲಾರು ಬಂದ್ ಕೂಡಿತ್ ಕಳಿತೆಳಿಲ್ ಮಂಗಲ ಮನೆರನೆಕೆ ಎಲಂಗುವಯಿಂಜ ಮನೆ ಇಂದ್ ಚಿಮ್ಮಂಗ್ ಒರ್ ಜೈಲ್ರನೆಕೆ ಕಂಡತ್. ಅಂವೊ ಬಾಡೆಲ್ ಕೊಡತ್ರ ಅಡಿಲ್ ಅಡ್ಡ ಬುದ್ದಂಡ್ ಎಕ್ಕಿ ಎಕ್ಕಿ ಮೊರ್ಟತ್.
ಕಣ್ಣ್ ನೀರ್ ಒಕ್ಕ್ನಚ್ಚಕ್ ಮನ್ಸ್ಸ್ ತೂವೆ ಆನನೆಕೆ ಆಚಿ. ಚೆನ್ನ ನೇರತ್ ಮೆಲ್ಲೆ ಎದ್ದಿತ್ ಅಳ್ತಂಡ್ ಸುತ್ತ ನೋಟ್ಚಂವೊ.
ಬಾಡೆ ಮೂಲೆಲ್ ಕಾಂಗತ ದೇವಕ್ ಕೈ ತೊತ್ತಂಡ್ ನಿಂದ ತಂಗವ್ವಂಡ ಕಣ್ಣ್ಲ್ ನೀರ್ ತುಳಿ ಕೂಟಿ ಬೂವಯಿಂಜತ್. ಕ್ರ್ ಮಕ್ಕೆಲ್ಲ ಅವ್ವಯ್ಯನ ತಬ್ಬಿಯಂಡ್ ಮೊರ್ಟಂಡಿಂಜತ್.
“ಅಮ್ಮಾ…” ಂದ್ ಕಾಕಿಯಂಡ್ ಅವ್ವಂಡ ಪಕ್ಕ ಓಡಿ ಪೋಚಿ, ಚಿಮ್ಮ, ತಂಗವ್ವ ಚಿಮ್ಮಂಡ ಮಂಡೆನ ತಾಂಡೆದೆಕ್ ಒತ್ತಿಯಂಡ್ ಅವಂಡ ಮಂಡೆಕ್ ಮೂಡ್ನ ಉದ್ದ್ಚಿ. ಚಿಮ್ಮಂಡ ನೆರಿಯಮಂಡೆ ಅವ್ವಂಡ ಕಣ್ಣ್ ನೀರ್ಲ್ ಪುಂಡೆ ಆಚಿ.
”ಅ… ಅಮ್ಮಾ, ನೀನೂ ನನ್ನ ಕೊಲೆಗಾರ ಎಣ್ಣುಲೆಲ್ಲಾ?” ಅವ್ವಂಡ ಪ್ರೀತಿರ ಮಿಂಞಲ್ ಚಿಮ್ಮ ಚೆರಿಯಂವೊನಾಯಿತಿಂಜತ್.
”ಇಲ್ಲೆ ದೊರೆ ಮೋನೆ! ಪಪ್ಪ ಚತ್ತದೇ ಒರ್ ನೆವನ ಎಣ್ಣಿಯಂಡ್, ಕೊಡಗ್, ಕೊಡವಾಮೆ, ಒಕ್ಕಾಮೆ – ತಕ್ಕಾಮೆ, ಪದ್ದತಿ- ಪರಂಪರೆ ಇಂಞೂ ಎಂತಾನೆಲ್ಲೋ ನೆನತಿಯಂಡ್, ಎಲ್ಲಾಂಗ್ಂಜಿ ಈ ಪೆತ್ತವ್ವನ ಇಲ್ಲಿ ತಬ್ಬಲಿ ಮಾಡುವಕಾಗಾಂದೆಣ್ಣಿತ್, ಡೆಲ್ಲಿಲಿಂಜ ಅಚ್ಚಕ್ ಬಲ್ಯ ಇಂಜಿನಿಯರ್ ಚಾಕ್ರಿಕ್ ಬೆನ್ನ್ಟ್ಟಿತ್ ಬಂದ ನೀನ್ ಈ ಒರ್ ಮೋರ್ಕುತ್ತಿ ಚೆಪ್ಪ್ಕಾಯಿತ್ ನೀಡ ಕಂದ್ಕರ್ನ ಕೊಲ್ಲುವಚ್ಚಕ್ ನೀಚ ಅಲ್ಲ ಮೋನೇ…! ನಿನ್ನ ಪೆತ್ತ್ ಚಾಕ್ನ ಈ ಅವ್ವಕರ್ ಇದೇ ನೇಲೆರಡಿಲ್ ಎದೆ ತಟ್ಟಿತ್ ಎಣ್ಣುವಪ್ಪಾ ನೀನ್, ಕುಂಞಿಯಳ ಕಾಂಗತೆ ಮಾಡಿತಿಲ್ಲೇಂದ್…!” ಮೊರ್ಟಂಡ್ ಎಣ್ಣ್ನ ತಂಗವ್ವ ದಂಡ್ ಕೈಲ್ ತಾಂಡ ಎದೆಕ್ ಗುದ್ದಿಯವಕ್ ಸುರು ಮಾಡ್ಚಿ.
ನೀನ್ ಬೊತ್ತತೆ ಚಿಮ್ಮ ಮಾಮ, ನಂಗೆಲ್ಲ ನಿನ್ನ ಬುಟ್ಟಿತ್ ಪಪ್ಪ ಮಮ್ಮಿರ ಕೂಡೆ ಪೋಪ್ಲೆ” ಗೊಂಬೆ ಓಡಿ ಪೋಯಿತ್ ಚಿಮ್ಮನ ತಬ್ಬಿಯಂಡತ್. ಬಾಕಿ ಮಕ್ಕೆಲ್ಲ ಓಡಿ ಪೋಯಿತ್ ಚಿಮ್ಮ ಮಾಮಂಡ ಕಾಲ್ನ ತಬ್ಬಿಯಂಡ್ ನಿಂದತ್.
ಗೊಂಬೆರ ತಕ್ಕ್ ಕೇಟ ಕೋಂಬರೆಲಿಂಜ ಅವಡ ಅಪ್ಪ ಓಡಿ ಬಂದಿತ್ ಮೋವಡ ಕುಂಡಿಕ್ ಚಟೀರ್ಂದ್ ಒಂದ್ ಕೊಡ್ತಿತ್ ಈತಂಡ್ ಪೋಚಿ. ಬಾಕಿ ಎಲ್ಲಾರು ಬಂದಿತ್ ಅಯಿಂಡಯಿಂಡ ಮಕ್ಕಳ ಈತಂಡ್ ಪೋಪದೂ, ಮಕ್ಕಡ ಮೊರೆಯೂ, ತಂಗವ್ವಂಡ ತಡ್ಕಾಟವೂ ಚಾವ್ ಎಡ್ಪ ನೇರಕ್ ಗೋವಿಂದಾ… ಎಣ್ಣುವನೆಕೆ ಇಂಜತ್ ಆ ಸದ್ದ್.
ಅಂಬಟೆ ಕಡ್ಚಂಡ್ ಎಲ್ಲಾನ ನೋಟಿಯಂಡ್ ನಿಂದ ಚಿಮ್ಮಂಡ ಕಿರಿ ದಂಡ್ ಪಲ್ಲ್ರ ಮದ್ಯ ಇರ್ಂಗ್ಚಿ. ತಾಂಡೆದರೆ ನೊಂಬಲ ತಡ್ಪಕಾಯಿತ್ ಕೈಲೊಂದೂ ಮಾಡುವಕ್ ಚೆಡೆಯತ ಚಿಮ್ಮ. ಕಿರಿನ ಇಂಞೂ ಜೋರಾಯಿತ್ ಇರ್ಕ್ಚಿ. ಕಿರಿಕ್ ಪಲ್ಲ್ ಇಳ್ಂಜಿತ್ ಚೋರೆ ತುಳಿ – ತುಳಿ ಆಯಿತ್ ಎದೆಕ್ ಬುದ್ಧತ್. ಅವಂಡ ಮಾಜ್ನ ಬೊಳ್ತ ಶರ್ಟ್ ನೆಲ್ಂದಂಡಿಂಜತ್.
ಏರ ಸುಸ್ತಾನ ಚಿಮ್ಮ ಮಂಗ್ನ ಕಣ್ಣ್ಲ್ ಮಂಡೆ ಎಡ್ತಿತ್ ಕೊಂಬರೆನೊಮ್ಮ ನೋಟ್ಚಿ. ಅವಂಡ ಶಕ್ತಿ ಇಲ್ಲತ ಕಾಲ್ ಅತ್ತಟಿ ನಡ್ಂದತ್.
“ಅಣ್ಣ- ಮಮ್ಮ, ಅಕ್ಕ ತಂಗೆ, ಬಾವ- ಮಚ್ಚಿಣಂಗಳೇ ಈ ಚೆಪ್ಪ್ ಮಾತ್ರ ಅಲ್ಲ ನ… ನಾನ್… ಚಾಕ್ರಿಲ್ ಸಂಪಾದನೆ ಮಾಡ್ನದ್, ಈ… ಆಸ್ತಿರ ನ… ನಾಡ ಪಾಲ್. ಇದ್ನೆಲ್ಲ ನಿಂಗಕ್ ಎಳ್ದಿತಪ್ಪಿ. ಆ ಆಚೇಂಗಿ ನಾಡ ಈ ಪು… ಪೂ… ಕುಂಞಿಯಡ ಮನ್ಸ್ಲ್ ಕೆ… ಕೆಟ್ಟ ಕುರುನ ಬಿತ್ತ್ಟ್ಟಿತ್, ಅಯಿಂಗಡ ದೃಷ್ಟಿಲ್ ನನ್ನ ಕೆಟ್ಟವನಾಯಿತ್ ಮಾಡಿತ್ ನ… ನನ್ನ ದು… ದೂರ ಮಾಡ….ತಿ!”
ಅಚ್ಚಕ್ ಎಣ್ಣ್ನ ಚಿಮ್ಮ, ಅಲ್ಲಿಯೆ ದಡಾರ್ಂದ್ ಬುದ್ದ್ ಪೋಚಿ. ಮಕ್ಕ ಕಾಂಗತಾನ ಪಿಂಞ ಅವಂಡ ಕೆಲ ದಂಡ್ ಚುತ್ತೆ ಕೂಳ್ ಕಂಡಿತಿಂಜಿಲೆ.
ತಾಂಡ ಸುತ್ತ ನಿಂದಂಡ್ ಸಮಾಧಾನ ಮಾಡಿಯಂಡಿಂಜಯಿಂಗಳೆಲ್ಲ ನೂಕಿತ್ ಚಾಡ್ನ ರಾಜ. ಓಡಿ ಬಂದಿತ್ ಕಣ್ಣ್ನ ಅಗಲ ಮಾಡಿತ್ ತಮ್ಮಣನೊಮ್ಮ ನೋಟ್ಚಿ.
“ಚಿಮ್ಮಾ SSS…” ತಮ್ಮ ಣಂಡ ಪೆದತ್ನ ಅರಂದ್ ಕಾಕ್ನ ರಾಜಂಡ ಸ್ವರ ಕಡ್ಚಿ ಚತ್ತ ಪಯ್ಯುರ ‘ಅಂಬಾ’ ಎಣ್ಣುವ ಕೂತ್ರನೆಕೆ ಇಂಜತ್.
ಚಿಮ್ಮಾSSS…, ನಾಡ ಕುಂಞಿ ಡಿಕ್ಕಿ ಬೋರೆ ಅಲ್ಲ, ನೀನ್ ಬೋರೆ ಅಲ್ಲ. ಕುಂಞಿ ಕಾಂಗತ ನೊಂಬಲತ್ ಎಂತೆಲ್ಲೋ ಪರ್ಂದ್ಟಪ್ಪಾ…., ನಾಕ್ ಮಾಫ್ ತಾ!” ಕಣ್ಣ್ಲ್ ನೀರ್ ಬುದ್ದಂಡಿಂಜನಕೇ ಚಿಮ್ಮಂಡ ಮೂಡ್ಕ್ ನೀರ್ ತಳ್ಚತ್, ರಾಜ.
ರಾಜ ಚಿಮ್ಮನ ಪರೀಕ್ಷೆ ಮಾಡುವಕ್ ಸ್ಟೆತೋಸ್ಕೋಪ್ ಎಡ್ಪಕ, ತಂಗವ್ವ, ತಡ್ತತ್. “ಅವಂಗ್ ಆ ತರ ಪರೀಕ್ಷೆ ಮಾಡಂಡಿಯ ರೋಗ ಒಂದೂ ಇಲ್ಲೆ, ಬುಡಪ್ಪ” ಎಣ್ಣಿರುವಂಜಿ ಬೆರಿಯ ಅಡಿಗೆಮನೆಂಜಿ ಒರ್ ಗ್ಲಾಸ್ ಕಟ್ಟಿಮೋರ್ ಎಡ್ತ ಬಂದಿತ್ ಚಿಮ್ಮಂಡ ಬಾಯಿಕ್ ಓರೊಂದೇ ಚಮಚ ಬೂಕ್ಚಿ. ಇಕ್ಕ ಚಿಮ್ಮಂಗ್ ಚೆನ್ನ ಜಿಂವ ಬಂದನೆಕೆ ಆಚಿ. ಅಂವೊ ಎಂತದೋ ಪರೆವಕ್ ಬಾಯಿ ತೊರ್ಂದತ್.
”ಚಿಮ್ಮಾ, ನೀನ್ ಚೆನ್ನ ಕೂಳ್ ಉಂಡಿತ್ ಬುದ್ದಂಡ್ ವರೀರ್. ಇಕ್ಕ ಬೈಟ್ 11 ಗಂಟೆ. ಬಾಕಿ ಎನ್ನುಂಡೇಂಗಿಯೂ ನಾಳೆ ನೋಟನ!”
ಚಿಮ್ಮ ಆಶ್ಚರ್ಯತೂ, ಸಂಶಯತೂ ಅಣ್ಣಂಡ ಮೂಡ್ ನೋಟ್ಚಿ.
“ಅಕ್ಕು, ನೀಕಿಕ್ಕ ಆರಾಮ್ ಬೋಂಡು, ನಾಳೆ ಬೋಂಡಿಕೆ ಎಲ್ಲಾರು ಪೋಯಿತ್ ಇಡೀ ಕಾಡ್ನ ತೇಡನ. ಬುದ್ದಪ್ಪಾ!” ತಮ್ಮಣಂಗ್ ಸಮಾಧಾನ ಪರ್ಂದತ್, ರಾಜ .
“ಅಣ್ಣಯ್ಯಾ…, ಕುಂಞ್ಯಳ ನಾನ್ ಬೋಂಡೂಂದ್ ಪಾಳ್ ಮಾಡಿತಿಲ್ಲೆ… ಮನಸ್ಸ್ರ ನೊಂಬಲತ್ನ ಕಳ್ಂದವಕ್ ಪುನಃ ಮೊರ್ಟಂಡ್ ಅಣ್ಣನ ತಬ್ಬ್ಚಿ, ಚಿಮ್ಮ.
ಬಾಕಿ ಮಿಂಞಕ್…..
