ಕರಡ: ಮಾ.25:- ಕೊಡವ ಒಕ್ಕಡೊಕ್ಕಡ ಹಾಕಿ ನಮ್ಮೆ ಮುದ್ದಂಡ ಕಪ್‌ಕ್‌ ಮೊಳಿಯಾಪ 24 ಒಕ್ಕಡ ನೆಲ್ಲಕ್ಕಿ ತಿರಿಕ್‌ ಇಂದ್‌ ಪಾಂಡಂಡ ಬಲ್ಯ ಮನೆಲ್‌ ಕೊಡವ ಒಕ್ಕಡೊಕ್ಕಡ ಕಾರೋಣ, ಪಾಂಡಂಡ ಕುಟ್ಟಪ್ಪ ಅಯಿಂಗಡ ಪೊಣ್ಣ್‌ ಲೀಲಾ ಕುಟ್ಟಪ್ಪ, ಮುಖ್ಯ ಮಂತ್ರಿರ ಕಾನೂನು ಅರಿವುಕಾರ, ವಿರಾಜಪೇಟೆ ಶಾಸಕ ಅಜ್ಜಿಕುಟ್ಟಿರ ಪೊನ್ನಣ್ಣ, ಪಾಂಡಂಡ ಪಟ್ಟೆದಾರ ಮೊಣ್ಣಪ್ಪ, ಮುದ್ದಂಡ ಪಟ್ಟೆದಾರ ತಿಮ್ಮಯ್ಯ, ಕೊಡವ ಹಾಕಿ ಅಕಾಡೆಮಿ ಕೊರವುಕಾರ ಪಾಂಡಂಡ ಬೋಪಣ್ಣಕುಟ್ಟಪ್ಪ, ಮುದ್ದಂಡ ಕಳಿಕೂಟ್‌ ಸಂನಿತರ ಕೊರವುಕಾರ ಮುದ್ದಂಡ ರಶೀನ್‌ ಸುಬ್ಬಯ್ಯ ಕೂಡ್‌ನನಕೆ ಖನ ಪಟ್ಟವು ಮೊಳಿ ಇಟ್ಟತ್.
ಈ ನ್ಯಾರತ್‌ ತಕ್ಕ್‌ ಪರಂದ ಶಾಸಕ ಪೊನ್ನಣ್ಣ ಅವು, ಕೊಡವ ಹಾಕಿ ನಮ್ಮೆರ ಕೇಳಿ ಕಾಲತಿಂಜ ಕಾಲಕ್‌ ದೇಶ ವಿದೇಶತೂ ಪೆರ್ತಂಡುಳ್ಳದ್‌, ಇಡೀ ಕೊಡವ ಕುಲಕೇ ಪೆರ್ಮೆ ತಪ್ಪಂತದ್‌, ಇಂತೋರ್‌ ಕೇಳಿರ 25ನೇ ಕಾಲತ್‌ ನಾನ್‌ ತಿರಿ ಕತ್ತ್‌ಚಿಟ್ಟಿತ್‌ ಮೊಳಿ ಇಡೋಕಾನದ್‌ ನಾಡ ಭಾಯ ಎಣ್ಣ ಅವು, ಹಾಕಿರ ಕಾರೋಣ ಪಾಂಡಂಡ ಕುಟ್ಟಪ್ಪ ಅಯಿಂಗಡ ಪುತ್ತಳಿನ ಕರಡತ್‌ ಬೆಕ್ಕೋಂಡೂಂದ್‌ ಕೇಟ ಬೋಡಿಕೆನ, ನೋಟಿತ್‌ ಅರ್ಂಜಿತ್‌ ಕಾರ್ಬಾರ್‌ ಮಾಡನಾಂದ್‌ ಎಣ್ಣ್‌ಚಿ.
ಉಲಗ ಕೇಳಿರ ಕೊಡವ ಹಾಕಿ ನಮ್ಮೆಕ್‌ 25ನೇ ಕಾಲತ ಬೊಳ್ಳಿ ನಮ್ಮೆರ ಕೊಂಡಾಟ. ಮುದ್ದಂಡ ಒಕ್ಕಾಕಾರ ನಡ್ತಿಯಂಡುಳ್ಳ ಈ ನಮ್ಮೆ ಈ ನಮ್ಮೆ ಕೈಂಜ 24 ಕಾಲ ನಮ್ಮೆ ನಡ್ತ್‌ನ ಎಲ್ಲಾ ಒಕ್ಕಕಾರಡ ಬಲ್ಯ ಮನೆರ ನೆಲ್ಲಕ್ಕಿ ತಿರಿನುಂಡ್‌ ಈ ಕುರಿಯತ ಹಾಕಿ ನಮ್ಮೆಕ್‌ ಮೊಳಿ ಇಡೋದುಂಡ್.
ಈ ನ್ಯಾರತ್‌ ಕೊಡವ ಹಾಕಿ ಅಕಾಡೆಮಿ ಮೂಪಂಗ, ಪಾಂಡಂಡ, ಮುದ್ದಂಡ ಒಕ್ಕಕಾರ ಕೂಡ್‌ನನಕೆ ಖನ ಪಟ್ಟವು ಕೂಡಿಯಾಡಿತಿಂಜತ್.
