ಬೇಗೂರ್. ಏ. 15; [ ಮತ್ರಂಡ ಹರ್ಷಿತ್ ಪೂವಯ್ಯ] ಶ್ರೀ.ಪೂಳೆಮಾಡ್ ಈಶ್ವರ ಕೊಡವ ಸಾಂಸ್ಕೃತಿಕ ತಂಡ ಬೇಗೂರ್ ಪಿಂಞ ಶ್ರೀ ಪೂಳೆಮಾಡ್ ಈಶ್ವರ ದೇವಸ್ಥಾನ ಸಮಿತಿರ ಸಹಕಾರತ್ ಇದೇ ಏಪ್ರಿಲ್ 23 ಪದನಾಚೆಲಿಂಜ ಒರ್ ತಿಂಗ ಬೇಗೂರ್ ಪೂಳೆಮಾಡ್ ಈಶ್ವರ ದೇವಸ್ಥಾನತ್ ಕೊಡವ ಆಟ್-ಪಾಟ್ ಪಡಿಪು ಶಿಬಿರ ನಡ್ತುವಕ್ ತೀರ್ಮಾನ ಮಾಡಿತ್. ಪ್ರತಿನಾಳ್ ಒಯಿಪತ್ 5.30 ಗಂಟೆಕ್ ಶುರುವಾಪ ಶಿಬಿರತ್ ಕೋಲಾಟ್, ಬೊಳಕಾಟ್, ಕತ್ತಿಯಾಟ್, ಉಮ್ಮತ್ತಾಟ್ ಕಪ್ಪೆಯಾಟ್, ಪರೆಯಕಳಿ, ಬಾಳೊಪಾಟ್, ತಾಲಿಪಾಟ್, ಅಲ್ಲತೇ ವಸ್ತ್ರಕೆಟ್ಟೊ, ಚ್ಯಾಲೆಕೆಟ್ಟೊ,ಸಮ್ಮಂದ ಅಡ್ಕೋ, ಒಕ್ಕಣೆ ಕೆಟ್ಟೊ ಇನ್ನತ ತರಾವರಿ ಪಡಿಪುರ ತರಬೇತಿ ತಪ್ಪ. ಇದಂಗ್ ಏದೇ ಬಯತ್’ರ ನಿರ್ಕ್ ಇಲ್ಲೆ. ಇರಾದೇ ಉಳ್ಳವು ನಿಂಗಡ ಪೆದತ್’ನ ಪೂಳೆಮಾಡ್ ಈಶ್ವರ ಕೊಡವ ಸಾಂಸ್ಕೃತಿಕ ತಂಡತ್’ರ ಕಾರ್ಯದರ್ಶಿಯಾನ ಮತ್ರಂಡ ಹರ್ಷಿತ್ ಪೂವಯ್ಯ ಇಯಂಗಡಲ್ಲಿ ಪೆದ ದಾಖಲ್ ಮಾಡಿಯೋಲು.
ಪೆದ ದಾಖಲ್ ಮಾಡಿಯೋಕ್ ಆಖೀರಿ ನಾಳ್ ಇದೇ ನಾಳಂಕೆ 20-04-2025ನೇ ನಾರಾಚೆ. ಕೊಡವಾಭಿಮಾನಿಯ ಏರ ಕಣಕ್ಲ್ ಬಂತ್ ಕೂಡಿಯಾಡಿತ್ ನಂಗಡ ಆಟ್-ಪಾಟ್’ ಪದ್ದತಿನ ಪಡ್ಚಿತ್ ತರಬೇತಿನ ಯಶಸ್ವಿ ಮಾಡಿತ್ ಕೊಡವಾಮೆನ ಬೊಳ್ತುವಕ್ ಸಾಕಾರ ತರೋಂಡುಂದ್ ಪಡಿಪು ಸಮಿತಿಕಾರ ಕೇಟಂಡಿತ್. ಪಡಿಪು ಶಿಬಿರತ್ ಕೂಡಿಯಾಡುವಯಿಂಗಕ್ ಕಾಫಿ ತಿಂಡಿರ ವ್ಯವಸ್ಥೆ ಇಪ್ಪ.
ಏರ ವಿವರತ್ನ 9482269556 , 95917 97282 ಈ ನಂಬರ್ಲ್ ಅರಂಜವಲು.
