ಓರ್ ಚಿತ್ರಪಟ ಆಯಿರ ತಕ್ಕ್ಕ್ ಸಮಾಂದ್ ಅರ್ಂಜೈಂಗಡ ತಕ್ಕುಂಡ್. ಅದತೂ ಕುತ್ತ್ಂಜಿತ್ರ (ಕಾರ್ಟೂನ್) ಕುರಿಲ್ ಇಡೀ ವ್ಯವಸ್ಥೆನೇ ಬದಲಾಕ್ನ ಎಚ್ಚಕೋ ಉದಾಹರಣೆ ನಂಗಡ ಕಣ್ಣೆದಿಕೆ ಕಾಂಬ. ಈ ಕುತ್ತ್ಂಜಿತ್ರತಿಂಜ ಎಚ್ಚಕೋ ಸರ್ಕಾರ ಅಳ್ಳಾಡ್ನ ಕಥೆ ಉಂಡ್, ಎಲ್ಲಿಯೂ ಆಕತ ಕಾರ್ಯ ಇಂತದೋರ್ ಚಿತ್ರಕುರಿಂಜ ಆನದುಂಡ್. ಇದತಿಂಜ ಕೋರ್ಟ್, ಯಾಜ್ಯ, ಮಾನನಷ್ಟ ಕೇಸ್ ಆನದೂ ಉಂಡ್. ಅನ್ನತೋರ್ ಬೀರ್ಯಪಟ್ಟ ತಾಕತ್ತ್ ಚಿತ್ರಕುರಿಕ್ ಉಂಡ್. ಇನ್ನತ ಚಿತ್ರ ಕುರಿಪವು, ತಾಂಡ ಸುತ್ತೋಡ್ ಸುತ್ತ್ ಆಪ ಪೋಪಾನ ಅರಂಜಿತ್ ಅದಂಗೊತ್ತ ಬದಲಾವಣೆಕ್, ಅರಿವುಕ್, ಬಟ್ಟೆಬೊಳಿಕ್ ತಾಂಡ ಮನತೊಳಿಯ ಉದ್ಚಾನ ರಂಗ್ಕ್ ಇಳ್ಪಿತ್ ಕಾಟುವದೂ ಓರ್ ತಗರ್ದಿ.
ಅಂತದೇ ಓರ್ ಚಿತ್ರಕುರಿಕಾರ ಕೊಡವಡೊಳ್ಲ್ ಇಂಜಂಡ್, ಕಾಲನ್ಯಾರಕ್, ವಿಚಾರಕೊತ್ತ ತಾಂಡ ಚಿತ್ರ ಕುರಿಂಜ, ಜನಕ್ ಕೊಡವಾಮೆರ ಅಭಿಮಾನ ಪೊಂದ್ಚಿಡೋಂಡ ಕೂಟ್ಕ್, ನಂಗಡ ಉಡ್ಪುರ ವಿಚಾರತ್ ಕುರ್ಚ ಓರ್ ಚಿತ್ರಕ್ಕಾಯಿತ್ ಕೋರ್ಟ್ ಮೊಟ್ಟ್ ಪತ್ತಿತೂ ಬಂದಿತ್. ಅವುವೇ ಮೂವೆರ ರಾಯ್ಪೊನ್ನಣ್ಣ.
ಮೂವೆರ ರಾಯ್ ಪೊನ್ನಣ್ಣ ಕುರ್ಚ ಚಿತ್ರತ್ನ ನೋಟತವು ದುಂಬಾ ಕಮ್ಮಿಂದೇ ಎಣ್ಣೋಲು. ಇವು ಕೊಡವಾಮೆರ ವಿಚಾರತ್ ಎಂತದೇ ಎಣ್ಣುವದುಂಡೇಂಗೂ ಅದ್ ತಾಂಡ ಚಿತ್ರಕುರಿನುಂಡೇ, ಆ ಚಿತ್ರವೇ ನೋಟ್ನಯಿಂಗಕ್ ಕೊಡವಾಮೆರ ಪಾಟ. ಬಟ್ಟೆಬೊಳಿರ ಕೂಟ್ಕ್ ಚೂಕ್ಟ್ಟ್ ಕಾಟುವ ಕಾರ್ಯತ್ನೂ ಮಾಡ್ಯಂಡುಂಡ್.
ಬಲ್ಲತ್ ನಾಡ್, ಬಲ್ಲಮಾವಟಿರ ಮೂವರೆ ಪ್ರಕಾಶ್ ಪಿಂಞ ರೇಖಾ (ತಾಮನೆ : ಮಾಲೆಯಂಡ) ದಂಪತಿಯಡ ಮೋಂವೊನಾಯಿತ್ ಪುಟ್ಟ್ನ ರಾಯ್ ಪೊನ್ನಣ್ಣ, ತಾಂಡ ಆದ್ಯತ್ ವಿದ್ಯಾಬುದ್ದಿನ ಶ್ರೀರಾಮ ಟ್ರಸ್ಟ್ ನಾಪೋಕ್ಲ್ ಪಡ್ಂದಿತ್, ಬಯ್ಯಂಜಿ ಕೊಡಗು ವಿದ್ಯಾಲಯ, ಪುತ್ತೂರ್ ಸೆಂಟ್ ಫಿಲೋಮಿನಾಸ್, ಮಿರಂಡ ಇನ್ಸ್ಟಿಟ್ಯೂಟ್ ಬೆಂಗಳೂರ್ಲ್ ಪಡ್ಚಿತ್, ಇಕ್ಕ ಬೆಂಗಳೂರ್ಲ್ ತಾಂಡದೇ ಆನ ಕಂಪೆನಿ ನಡ್ತಿಯಂಡುಳ್ಳ ಇವು ಚೋನಿರ ಆಶ್ವಲಿನ ಮಂಗಲಾಯಿತ್ ವಿಯೋಂ ಕರುಂಬಯ್ಯ ಎಣ್ಣುವ ಕುಂಞಿ ಉಂಡ್.
ಬಾಲ್ಯತಿಂಜೇ ಚಿತ್ರ ಕುರಿಲ್ ಏರ ಪುರ್ಡ್ ಬೆಚ್ಚಂಡಿತಿಂಜ ರಾಯ್ ಪೊನ್ನಣ್ಣಂಗ್ ಕೊಡಗು ವಿದ್ಯಾಲಯತ್, ಗುರುರ ಒತ್ತಾಸೆ ಕ್ಟ್ಟಿತ್, ಸೆಂಟ್ ಫಿಲೋಮಿನಾಸ್ಲ್ ಸರಿಯಾನ ಪಡಿಪುಕೊತ್ತ ಬಟ್ಟೆಬೊಳಿ ದಕ್ಕುವ. ಅಂದ್ಂಜ ಇಂದಾಕಣೆಕೂ ತಾಂಡದೇ ಆನ ಮನಸಾಸೆಲ್ ಚಿತ್ರ ಕುರಿಪ ರಾಯ್ ಪೊನ್ನಣ್ಣ, ಕೊಡವ, ಕನ್ನಡ, ಇಂಗ್ಲೀಷ್ಲ್ ಕುತ್ತ್ಂಜಿತ್ರ(ಕಾರ್ಟೂನ್) ಬುಡ್ತಿತ್, ಅದದ್ ಪರಿಸ್ಥಿತಿರ ಅರಿವುನ ಮಾಡುವ ಕೆಲಸನೂ ಮಾಡಿಯಂಡುಂಡ್. ಕೊಡವಾಮೆರ ಕೋವುಲ್, ಇಂದೆತ ಬಾಲೆಕಾರ ಮಕ್ಕಕ್ ನಂಗಡ ಉಡ್ಪುಂಗೊಡ್ಪು, ಪದ್ದತಿ ಪರಂಪರೆ, ಆಯಿಮೆ ಕೊಯಿಮೆರ ವಿಚಾರತೂ ತಾಂಡ ಚಿತ್ರ ಕುರಿಲೇ ಅರ್ಥಮಾಡ್ಚಿಡುವ. ಇಪ್ಪರಕ್ ಸಾಮಾಜಿಕ ಮಾದ್ಯಮತ್ ಇವು ಬುಡ್ತುವ ಚಿತ್ರತಿಂಜೇ ಎಚ್ಚಕೋ ಬದಲಾವಣೆನ ಕಂಡಿತ್, ತಪ್ಪಿಪೋಯಂಡಿಂಜ ಕೊಂಡಿ ಸೆರಿ ಬಟ್ಟೆಕ್ ಬಂದದೂ ಉಂಡ್. ಇವು ನಾಲಂಜಿ ಕಾಲಕ್ ಬಯ್ಯ, ನಂಗಡ ಕುಪ್ಯ ಚಾಲೆ, ನಂಗಡ ಮೂಲ ಸ್ವತ್ತ್, ಅದನ ದಾರೂ ಕಟ್ಟಿತ್, ಕಾಪಿ ಮಾಡತೀಂದ್ ಸಾರುವನ್ನಕೆ ಕುರ್ಚ ಚಿತ್ರ, ಬಯ್ಯಂಜಿ ರಾಜಕೀಯ ರೂಪುಪಡ್ಂದಂಡ್ ಬಲ್ಯ ರಂಪ ಆಯಿತ್, ಇಯಂಗಡ ಮೀದ ಕೇಸ್ ಆಯಿತ್ ಕೋರ್ಟ್ ಮೊಟ್ಟ್ ಪತ್ತನದೂ ಕೆಜ್ಜಿತ್.
ಕೊಡವ, ಕನ್ನಡ, ಇಂಗ್ಲೀಷ್ಲ್ ಓರಾಯಿರಂಗೂ ಏರ ಚಿತ್ರ ಕುರ್ಚಿತುಳ್ಳ ಮೂವೆರ ರಾಯ್ ಪೊನ್ನಣ್ಣ ತಾನ್ ಕುರ್ಚ ಎಲ್ಲಾ ಚಿತ್ರತ್ಲೂ ಸಮಾಜಕೋರ್ ಅರಿವುನ ಕೊಡ್ಪ ಖಾಯಿಸ ಪಟ್ಟಿತ್.
ಮೂವೆರ ರಾಯ್ ಪೊನ್ನಣ್ಣ ಬರೀ ಓರ್ ಚಿತ್ರಕುರಿಕಾರ ಮಾತ್ರ ಅಲ್ಲ, ಚಿತ್ರಬೈಸ್ಯಕಾರ(ಥೆರಪಿಸ್ಟ್) ಎಣ್ಣುವದ್ ಇಯಂಗಡ ಚಿತ್ರಕುರಿರ ಆಳ ನ್ಳನ ಅರ್ಂಜ ಅಭಿಮಾನಿಯಡ ತಕ್ಕ್. ಕೊಡವಾಮೆರ ಕೋವುಲೋರ್ ಮಿನ್ನಂಬೊಳಿಯಾಯಿ ಎಲಂಗಡ್ಂದ್ ಇಯಂಗಡ ಸಿನೇತಂಗಡ ಕೊದಿರ ಇರಾದೆ.
Im overwelmed l, thank you