ಮಡಿಕೇರಿ, ಜ.05: (ಕಾಯಪಂಡ ಶಶಿಸೋಮಯ್ಯ) ಪೆರಿಯ ಜಾನಪದ ಅರಿವುಕಾರ ನಿವೃತ್ತ ಡಿ.ಆರ್‌.ಎಫ್ ಅದಿಕಾರಿ, ಮಡಿಕೇರಿಲ್‌ ನೆಲೆ ನಿಂದಿತಿಂಜ ಪಂಜೇರಿರ ಬೊಳ್ಯಪ್ಪ ಅವು ಇಂದ್‌ ಮೈಸೂರ್‌ ಆಸ್ಪತ್ರೆಲ್‌ ಒಯಿಂಜಿ ಪೋಯಿತ್.
ಕೊಡವ ಜಾನಪದ, ನಡೆ ನುಡಿ, ಆಯಿಮೆ ಕೊಯಿಮೆ ಪದ್ದತಿ ಪರಂಪರೆರ ವಿಚಾರತ್‌ ಏರ ಆಳತ್‌ ಅರಿವಿಂಜ ಇವು, ಈ ವಿಚಾರಕೊತ್ತನ್ನಕೆ 03 ಪುಸ್ತಕ ಎಳ್ದಿತ್, ಕರ್ನಾಟಕ ಕೊಡವ ಸಾಹಿತ್ಯ ಅಕಾಡೆಮಿರ ಬಿರ್‌ದ್‌ ತೊಮ್ಮಾನತ್‌ನೂ ಪಡ್ಂದಂಡಿತ್. ನಾಳೆ ಪೊಲಾಕತಿಂಜ ಮಡಿಕೇರಿ ಪುಟಾಣಿ ನಗರತುಳ್ಳ ಅಯಿಂಡ ಮನೆಲ್‌ ಚಾವು ಕೂಟಿತ್‌, ಮಜ್ಜಣತ ಮೀದ ಮಡಿಕೇರಿ ಕೊಡವ ಸಮಾಜ ಕ್ಯಾಕೊಳತ್‌ ಆಖೀರಿ ಕಾರ್ಬಾರ್‌ ನಡ್ಪದುಂಡ್. ಇವು, ಪೊಣ್ಣ್‌ ಕಾಮವ್ವ, ಪೆರಿಯ ಪತ್ರಕರ್ತ ಪಂಜೇರಿರ ಜಗದೀಶ್‌ಬೆಳ್ಯಪ್ಪ ಕೂಡ್‌ನನಕೆ ದಂಡ್‌ ಆಮಕ್ಕ ಓರ್‌ ಮೋವ ಪಿಂಞ ದುಂಬು ಸಂಸಾರತ್‌ನ ಬುಟ್ಟ್‌ ಒಯಿಂಜಿತ್.
ಒಯಿಂಜ ಪೆರಿಯ ಜೀಂವ, ಜಾನಪದ ಅರಿಯನೂ ಆಯಿತಿಂಜ ಪಂಜೇರಿರ ಬೊಳ್ಯಪ್ಪ ಅಯಿಂಗಡ ಕಣ್ಮರೆ ಆನಾಂಗ್‌ ಬೇಜಾರ್ ಕಾಟಿತುಳ್ಳ ಕೊಡವಾಮೆರ ಕೊಂಡಾಟ ಸಂಘಟನೆ, ತಡಿಬುಟ್ಟ ಜೀಂವ ತಣುಲಿರಡ್ಂದ್‌ ಬಯಂದಂಡ್‌, ಸಂಘಟನೆ ಆಖೀರಿ ಕಾರ್ಯಕೆತ್ತಣೆ ಸಂಗಟನೆರ ಪೆದತ್‌ ಏದೇ ಎಳ್ತ್‌ ಕುತ್ತ್‌, ತಕ್ಕ್‌ ತೆಳಿ ಇಲ್ಲತೆ ಸದ್ದಡಂಗಿತ್‌ ಇಪ್ಪಕ್‌ ತೀರ್ಮಾನ ಮಾಡಿತ್.
