ಮಡಿಕೇರಿ, ಮಾ.19: ಕೊಡ ಹಾಕಿ ಅಕಾಡೆಮಿರ ಆದನೆಲ್‌, ಕೊಡವ ಒಕ್ಕಡೊಕ್ಕಡ ನಡುಲ್‌ ಕೈಂಜ ಇರುವತ್ತ ನಾಲ್ ಕಾಲತೊಟ್ಟ್‌ ನಡ್ಂದಂಡುಳ್ಳ ಹಾಕಿ ನಮ್ಮೆ, ಈ ಕಾಲ 25ನೇ ಕಾಲತ ಬೊಳ್ಳಿ ನಮ್ಮೆನ ಕೈಚಂಡ್‌ ಉಂಡ್. ಈ ಕಾಲ ನಮ್ಮೆ ನಡ್ತುವ ಕೊರವುಕಾರಿಕೆನ ಎಡ್ತಂಡಿತುಳ್ಳ ಮುದ್ದಂಡ ಒಕ್ಕಕಾರ, ಕೈಂಜ 24 ಕಾಲತ ಎಲ್ಲಾ ದಾಖಲೆನ ಪೊಳ್ಚಿತ್‌ ಪುದಿಯ ಐತಿಹಾಸಿಕ ದಾಖಲೆನ ಮಾಡಿತ್.
ಪೈಪೋಟಿಲ್‌ ಕೂಡಿಯಾಡುವ ಒಕ್ಕ ದಾಖಲೆಲ್‌ ಕೈಂಜ ಇರುವತ್ತ ನಾಲ್ ಕಾಲತ್‌ ಕೂಡಿಯಾಡ್‌ನಂಗ್ಂಜಿ ಏರ ಒಕ್ಕಕಾರ, ಒಟ್ಟು 396 ಒಕ್ಕ ಈ ಕುರಿ ಪೆದ ದಾಖಲ್‌ ಮಾಡ್ಯಂಡಿತ್ಂದ್‌ ಅರ್ಂಜಿ ಬಂದಿತ್.
ಇಕ್ಕಾಕಲೇ ಉಲಗತೇ ಏರ ಬಲ್ಯ ಫೀಲ್ಡ್‌ ಹಾಕಿ ಪೈಪೋಟಿ ಎಣ್ಣುವ ದಾಖಲೆ ಪಡ್‌ಂದಿತುಳ್ಳ ಕೊಡವ ಒಕ್ಕಡೊಕ್ಕಡ ಹಾಕಿ ನಮ್ಮೆ, ಈ ಕುರಿ ಈ ಎಲ್ಲಾ ದಾಖಲೆನ ಕಡ್ಂದಿತ್‌, ಕೈಂಜ 25 ಕಾಲತೇ ಏರ ಕಳಿಕಾರ ಕಳ್‌ಚ ಹಾಕಿ ನಮ್ಮೆ ಎಣ್ಣುವ ಕೇಳಿರ ದಾಖಲ್‌ಕ್‌ ತಯಾರಾಯಿತ್.
ಚೆನ್ನಂಗೇ ಸಮಯತ್‌ ಪೊರಬಪ್ಪ ಮುದ್ದಂಡ ಕಪ್‌ಲ್‌ ಕಳಿಪ ಒಟ್ಟು ಒಕ್ಕ ತಂಡತ್‌ರ ಪಟ್ಟಿ, ಕೈಂಜ 24ಕಾಲತ ಎಲ್ಲಾ ದಾಖಲ್‌ನ ಪೊಡಿತಟ್ಟಿತ್‌ಡುವ ಎಣ್ಣುವ ಸುದ್ದಿ ಬಂದಿತ್.
28/03/2025 ಲಿಂಜ ತೊಟ್ಟ್‌ 27/04/25ಕೆತ್ತನೆ ಏಳ್‌ನಾಡ್‌ ಸೂರ್ಲಬ್ಬಿಕ್‌ ಅಡಂಗಿತುಳ್ಳ, ಎಟ್ಟ್‌ಕೇರಿ ನಾಡ್‌ರ ಮಾನಿಕರೆ(ಮಡೆಕೇರಿ)ರ ಉಲಗ ಕೇಳಿರ ಮೂಪಡೆ ಮೂಪ, ಫೀಲ್ಡ್‌ ಮಾರ್ಷಲ್ ಕೊಡಂದೆರ ಕಾರ್ಯಪ್ಪ ಅಜ್ಜಂಡ ನೆಪ್ಪುಲ್‌ ಉಳ್ಳ, ಫಿ.ಮಾ.ಕಾರ್ಯಪ್ಪ ಕಾಲೇಜ್‌ ಪರಂಬುಲ್‌ ನಡ್ಪ ಮುದ್ದಂಡ ಕಪ್‌ ಹಾಕಿ ಕಳಿನಮ್ಮೆಕ್‌ ಎಲ್ಲಾ ತಯಾರ್‌ ಆಯಂಡುಳ್ಳ ನ್ಯಾರತ್‌, ನಮ್ಮೆರ ಆದಿಲೇ ಉಲಗ ದಾಖಲೆಕ್‌ ತಯಾರಾಯಂಡುಳ್ಳದ್‌ ಕೊಡವ ಕುಲಕ್‌ ಪೆರ್ಮೆರ ವಿಚಾರ.
