ನಾಡ್ಲ್ ನಾಳ್…
ಕೈಂಜ ವಾರತಿಂಜ…
“ಅಯ್ಯಾ ತಕ್ಕ್‌ಲ್ ಪುಡ್‌ತಯಿರಡ್, ನಾಕೂ ತಕ್ಕ್, ಗೊತ್ತಿಲ್ಲತೆ ಅಲ್ಲ. ಒಂದ್ ಎಣ್ಣುವಿ- “ನಿಂಗ ಬಾತೇಂಗಿಯೂ ಬಂದ್‌ಲೇಂಗಿಯೂ ಬಪ್ಪ ಬೇಳಾಚೆ ನಾನ್ ಐನ್‌ಮನೆ ಪಟ್ಟಿಲ್ ಮೋಪ್ ಕೂಟ ಮಾಡಿತೇ ಮಾಡುವಿ.”
“ನಾನ್ ಬರತಿಪ್ಪ್‌ಲೆ ಬಪ್ಪಿ, ನಾಡ ಯೋಜನೆನ ನಾನೂ ಎಣ್ಣುವಿ. ನಾನ್ ಎಣ್ಣುವನೆಕೆ ನಡ್‌ಪಾ…, ಅಲ್ಲಾ ನೀನ್ ಎಣ್ಣುವನೆಕೆ ನಡ್‌ಪಾಂದ್ ನೋಟನ.”
“ನಿಂಗಡ ಯೋಜನೆಲ್ ಒಕ್ಕ ನಂದಾಪನೆಕೆ ಇಂಜಕ ಅದೇ ನಡ್‌ಕಡ್…” ಬೆರಿಯ ಕುಸಿಲ್ ಎಣ್ಣ್‌ಚಿ, ಚಿಮ್ಮ.
”ನಾಡ ಯೋಜನೆ ಎಂತ ಗೊತ್ತುಂಡಾ? ಐನ್‌ಮನೆನ ಇಡ್‌ಚಿತ್ ಕೋತಿರುವಂಜಿ ಅಲ್ಲಿ “ಒಕ್ಕ ಕ್ಲಬ್”ಂದೋರ್ ಕ್ಲಬ್ ಕೆಟ್ಟಂಡು. ಆ ಕ್ಲಬ್‌ಲ್ ಓದುವ ಮಕ್ಕಕೂ, ಚಾವ ಮುದ್‌ಕಂಗಳೂ, ಸುಖ ಪಡುವಯಿಂಗಕೂ ಎಂತೆಲ್ಲ ಫಂಡ್ ಮಾಡಂಡು ಅದ್‌ನೆಲ್ಲ ಮಾಡಲು. ಇನ್ನನೆ ಮಾಡ್‌ನಕ ಫಾರಿನ್‌ಲೂ ನಂಗಡ ಒಕ್ಕ ಪೆದ ಮಾಡುವ.”
”ಈ ಚಿಮ್ಮ ಬದ್‌ಕಿತಿರಣೆಕ್ ನಿಂಗಕ್ ಆ ತರ ಅಗ್ಗೇನ ಬೋಂಡ, ಗೊತ್ತಾಚಾ…?” ಗೂಳಿ ಎತ್ ಮುಕ್‌ಡುವನೆಕೆ ಗುಡ್‌ತ್‌ಚಿ, ಚಿಮ್ಮ.
“ಕೋಳಿನ ಕೇಟಿತ್ ದಾರೇಂಗಿ ಸಂಬಾರ ಅರೆಪರಾ?”
“ಈ ಒಕ್ಕತ್‌ರ ಪಟ್ಟೆದಾರಿಕೆಂಜಿ ನಿಂಗಳ ಮಾತುವ ಕಯ್ಯುಲೆ. ಎನ್ನಂಗಣ್ಣಕ ನಿಂಗಕ್ ವಯಸ್ಸ್‌ರ ಡಿಗ್ರಿ ಉಂಡ್. ಆಚೇಂಗಿ, ನಿಂಗ ಒಂದ್ ಮಾಡಂಡು ನಾನ್ ಮುದಿ ಆಯಿತ್ ಮೂಳೆ – ಮುಟ್ಟ್ ಬರತಾನಗುಂಡೂ, ಇಚ್ಚಕ್ ಮುದಿ ಆಚೇಂಗಿಯೂ ಮುಳ್‌ಕುವ ಬುದ್ದಿ ಬುಡತಾನಗುಂಡೂ, ನಾಕ್ ಒಕ್ಕತ್‌ರ ಕಾರ್ಬಾರ್ ನಡ್‌ತುವ ಕಯ್ಯುಲೇಂದ್ ಎಳ್‌ದಿ ತಾರಿ. ಒಕ್ಕಕ್ ಒರ್ ಬಾಲೆಕಾರ ಅಧ್ಯಕ್ಷನೋ, ಸೆಕ್ರೆಟರಿನೋ ಆಯ್ಕೆ ಮಾಡಿತ್ ನಂಗ ಕಾರ್ಬಾರ್ ಮಾಡುವ.” ಬಾಯಿ ಬಡ್‌ಚ‌ಂಡ್ ಪರ್‌ಂದತ್, ಚಿಮ್ಮ.
“ಏಯ್, ಒಕ್ಕಕಾರಳ ನಾಡ ಮೀದ ಎಡ್‌ತ್ ಕೆಟ್ಟುವಕ್ ಪೊರ್‌ಟಿತುಳ್ಳಿಯಾ?” ರೋಷತ್ ಚಿಮ್ಮಂಡ ಕಾಲರ್ ಪುಡ್‌‌ಚತ್ ಪಟ್ಟೆನರಿರನ್ನತ ಪಟ್ಟೆದಾರ!
ಚಿಮ್ಮನೂ ರೋಷತ್ ಆಸಾಮಿರ ಕೈನ ಪುಡ್‌ಚಿ ಕುಕ್ಕಿತ್ ಬಲಿಪದು. ಒಳ್‌ಲಿಂಜ ಒರ್ ಪಡೆಯೇ ದೊಣ್ಣೆ, ಚಾಕ್ ಕತ್ತಿ ಆಯಿತ್ ಪೊರ್‌ಮೆ ಪಾರಿಬುದ್ಧತ್.
ಕೀರಿ, ವಾಸು, ಅರುಣ, ಮನುರ ಕೂಟ್‌ಕ್ ಲಾರಿ ಡ್ರೈವರ್ ಪಿಂಞ ದಂಡ್ ದಡಿಯಂಗ ಅರೆ ತೆಳಿಲ್ ನಿಂದಿತಿಂಜಾನ ಚಿಮ್ಮ ಚೆಡಿ ದುಂಡ್‌ಲೇ ನೋಟಿಯಂಡ್ ನಿಂದತ್.
ಚಿಮ್ಮಂಡ ಕಣ್ಣ್ ಎದಿಕೆ ನಿಂದ ಶತ್ರುವಳ ನೋಟಿಯಂಡಿಂಜಕಲೂ, ಮನಸ್ಸ್ ತಪ್ಪ್‌ಚಿಟ್ಟವಕ್ ಬಟ್ಟೆ ತೇಡ್‌ಚಿ. ರಟ್ಟೆಲ್ ಶಕ್ತಿ ಉಂಡ್ಂದ್ ಪಾರಿ ಬುದ್ದಕ ಆಪ್‌ಲೆ. ನೀಚ ಪಟ್ಟೆದಾರ ಎಂತ ಕೇಳ್ ಮಟ್ಟಕ್ಕೂ ಬೋಂಡಿಕೆ ಇಳಿವಾಂದ್ ಚಿಮ್ಮಂಗ್ ಗೊತ್ತಿಂಜತ್, ನರಿಕೂ ನೆಟ್ಟಾಮೆ ಇಪ್ಪನೆಕೆ ಚಿಮ್ಮಂಗೂ ಒಮ್ಮ ಮೇಲ್ ಪುಳಿಕೆಟ್ಟ್‌ಚಿ. ಬೊರೀ ಕೈಲ್ ಬಾತೇಂಗಿ ಎಲ್ಲಾರ್‌ನ ಉರ್‌ಟುವ ತಾಕತ್ ಅವಂಗಿಂಜತ್. ಆಚೇಂಗಿ, ಕತ್ತಿ, ದೊಣ್ಣೆ, ಚಾಕ್ ಇಂಜಾಂಗ್ ಅಂವೊ ಬಯ್ಯಕ್ ತೆರಂಗ್‌‌ಚಿ.
ಅಕ್ಕಣೆಕ್ ಕೀರಿಕ್‌ಣ್ಣ ತೆಳ್‌ಚಂಡ್ ಓಡಿ ಪೋಯಿತ್, ಮುಂಬಡಿ ತಾತಿತ್ ಬೋಲ್ಟ್ ಇಟ್ಟತ್.
“ಎನ್ನಂ‌ಗ್‌ರಾ ಬೋಲ್ಟ್ ಇಡುವೋ? ನಾಕ್ ಪೋಕಂಡು, ಪಡಿ ತೊರ” ಗುಡ್‌‌ಗ್‌ಚಿ, ಚಿಮ್ಮ.
ಚಿಮ್ಮಂಡ ಜೋರ್‌ಕ್ ಮತ್ಯಯಿಂಡ ಕಾಲ್‌ರ ಮೂಳೆ ಒಮ್ಮ ಡೊಂಕಿತ್ ನೇರೆ ಆಚಿ.
“ಮನೆಕ್ ಬೆಂದ್‌ಕ ಬಪ್ಪದ್ ಅಯಿಂಗಡ ಕುಸಿ: ಆಚೇಂಗಿ ಅಯಿಂಗಳ ತಕ್ಕಾರ ಮಾಡಿತ್ ಆಯೆಪದ್ ಮನೆಕಾರಡ ಕುಸಿ, ಎನ್ನೆಣ್ಣು ವಿಯಾ?” ಪಟ್ಟೆದಾರಂಡ ಕೇಕಾಟಕ್ ಕುಟ್ಟಿಯಡ ತೆಳಿಯೂ!
ಚಿಮ್ಮಂಗ್ ತಾಂಡ ಕಣ್ಣ್‌ನ ತಾಂಗೇ ನಂಬುವ ಕಯಿಂಜಿಲೆ. ಇಡೀ ಒಕ್ಕಕಾರಕ್ ಅಪ್ಪಂಡ ಸ್ಥಾನತ್ ನಿಂದಿತುಳ್ಳ ಪಟ್ಟೆದಾರ ಇಚ್ಚಕ್ ಕೀಳಾಯಿತ್ ಸಿನಿಮಾ ಕಳಿ ಕಳಿಪಾಂದ್ ಅಂವೊ ಗ್ಯಾನ ಮಾಡಿತಿಂಜಿಲೆ. ದಡಿಯಂಗಡ ಬಾಯಿಂಜಿ ಕಳ್ಳ್ ವಾಸನೆ ಬೋರೆ ಬಂದಂಡಿಂಜತ್. ರೋಷ ಕಳಿಪಾಂಗ್ಂಜಿ ಉಪಾಯತ್ ಜಾರಿರುವದೇ ನಲ್ಲಂದ್ಂದ್ ತೋಂದ್‌‌ಚವಂಗ್.
“ಅಯ್ಯಾ, ಎಂತ ಉಂಡೇಂಗಿಯೂ ನಂಗ ಒಕ್ಕಕಾರ ಕೂಡಿತ್ ಪರ್‌ಂದ್ ಕಂಡವದ್ ಬುಟ್ಟಿತ್ ಈ ದುಷ್ಟಂಗಳ ಕೂಟಿಯಂಡ್ ಕಳಿಪಿಯಲ್ಲಾ, ಅದ್ ಸೆರಿಯಾ?” ಸಮಾಧಾನತ್ ಕೇಟತ್, ಚಿಮ್ಮ.
“ಏಯ್ ನಾಯಿಂಡಮೋನೇ’ ಎಣ್ಣಿತ್ ರೋಪ್‌ಟ್ಟ್‌ರುವಂಜಿ ಲಾರಿ ಡ್ರೈವರ್ ಚಿಮ್ಮಂಡ ಎದೆಕ್ ಅಂಗೈ ಬೆಚ್ಚಿತ್ ಬಯ್ಯಕ್ ಉಂದುವಕ್ ನೋಟ್‌ಚಿ.
“ಕೆಣೀ…ರ್…” ಡ್ರೈವರ್‌ರ ಅಣಿಯ ಪಾರುವನೆಕೆ ಕೆಮಿಕಂಡೆಕೆ ಒಂದ್ ಕಾಚ್‌ಚಿ, ಚಿಮ್ಮ,
ದಂಡ್ ದಡಿಯಂಗ ಪಾರಿತ್ ಚಿಮ್ಮಂಡ ಮೀದ ಬೂವಂಡು ಎಣ್ಣುವಕ ಪಟ್ಟೆದಾರ ತಡ್‌‌ತತ್.
ದಡಿಯಂಗ ಪಲ್ಲ್ ಕಡ್‌ಚಂಡ್ ಒರ್ ಬರಿಲ್ ನಿಂದತ್,
“ಅಯ್ಯಾ, ನೀನ್ ಈ ನೇರತ್ ಸಮಾಧಾನ ಎಡ್‌ತ್‌ರ್‌ತೆ. ಈ ಆಸಾಮಿನ ಇಕ್ಕ ಪೊರ್‌ಮೆ ಬುಟ್ಟ್‌ರುವದೂ, ಅರೆಬೊಡಿಯಾನ ನರಿನ ಬುಟ್ಟ್ ರುವದೂ ದಂಡೂ ಒಂದೇ” ಕೀರಿರ ತಕ್ಕ್‌ಲ್ ಗಾಬರಿ ಮೇಂಗಿತಿಂಜತ್.
“ಹ್ಂ…” ಎಳಕಂಗ್ ಓಡುವಕ್ ಗೊತ್ತಿಂಜಕ, ಮುದುಕಂಗ್ ಕಡಪೆ ಗೊತ್ತಿಪ್ಪರಾ.” ಇವನ ಎಂತ ಮಾಡಂಡೂಂದ್ ನಾಕ್ ಗೊತ್ತುಂಡ್. ವಾಸೂ… ಪೋರಾ, ಆಳಡ ಪಣಿ ಬುಟ್ಟಿತ್ ಅಯೆಚಿರುವಂಜಿ ಮನೆಕ್ ದಾರೂ ಬರತನೆಕೆ ಎಚ್ಚರ ಎಡ್‌‌ತ!”
ವಾಸು ದೊಣ್ಣೆನ ಅಯ್ಯಂಡ ಕೈಕ್ ಕೊಡ್‌ತಿತ್ ಬರಿಯ ಕಂಡಿಕಾಯಿತ್ ಪಟ್ಟಿಕ್ ಇಳ್ಂಜತ್.
ವಾಸು ಪೋನದು, ಪಟ್ಟೆದಾರ ಬಾಕಿ ಇಂಜಯಿಂಗಡ ಬರಿಕ್ ತಿರ್‌ಚಿ -“ಹ್… ಐನ್‌ ಮನೆರ ಬಾರಿಪಟ್ಟಿ ಪಿಂಞ ಮೋರ್‌ ಕುತ್ತಿ ಚೆಪ್ಪ್ ಎಲ್ಲಿ ಉಂಡ್ಂದ್ ಇಕ್ಕ ಇವಂಡ ಬಾಯಿ ಬುಡ್‌‌ತಿ!” ಪಟ್ಟೆದಾರಂಡ ಮೂಡ್ ರಾಹು ಪೊದ್ದ್‌ನನೆಕೆ ಇಂಜತ್.
“ಏಯ್… ಡೆಲ್ಲಿ ರಿಟರ್ನ್…, ನಂಗಡ ಅಯ್ಯ ಎಣ್ಣದ್ ಕೇಟತಾ?” ಕೀರಿ ತಾಂಡ ಕೈಲಿಂಜ ದೊಣ್ಣೆರ ತುದಿಲ್ ಚಿಮ್ಮಂಡ ರಟ್ಟೆಕ್ ಮೆಲ್ಲೆ ಮೆಲ್ಲೆ 2 ಕುರಿ ಕುತ್ತಿತ್ ಕೇಟತ್.
ಉಯ್ ದೇವರೇ, ಕೊಡಗ್‌ಲೂ ಇನ್ನತ ರೌಡಿಕಳಿ ನಡ್ಂದಂಡುಂಡ್ಂದ್ ಎಣ್ಣಕ ದಾರಾಚೇಂಗಿ ನಂಬುವಾಂದ್ ನೆನತಿಯಂಡ್ ಆಶ್ಚರ್ಯತ್ ನಿಂದತ್, ಚಿಮ್ಮ…
ಬಾಕಿ ಮಿಂಞಕ್…
