ನಾಡ್ಲ್ ನಾಳ್– 21
ಕೈಂಜ ವಾರತಿಂಜ…
“ಅಮ್ಮಾ… ನಾನ್ ಒಬ್ಬನೇ ಪೋಯಂಡಿಲ್ಲೆ. ನಾಡ ಕೂಟ್‌ಕ್ ಕೀರಿ, ಅರುಣ, ವಾಸುಕ್‌ಣ್ಣ ಎಲ್ಲಾರು ಬಪ್ಪ,”
ಇಕ್ಕ ತಂಗವ್ವಂಗ್‌ ಸಮಾಧಾನ ಆಚಿ.
”ಅನ್ನನೆ ಆಚೇಂಗಿ ಪೋಯಿತ್ ಬಾಪ್ಪ, ನೀನ್ ಒಬ್ಬನೇ ಪೊರಟಿಯನ್ನೋಂದ್ ಗ್ಯಾನ ಮಾಡ್‌ನ. ಆಚೇಂಗಿಯೂ ಎಚ್ಚರತಿರ್.” ಪುನಃ ತಂಗವ್ವಂಡ ಕಣ್ಣ್ ದುಂಬ್‌ಚಿ.
ಚಿಮ್ಮ ಅವ್ವಂಡ ಮಂಡೆನ ತೀಟಿತ್ ಸಮಾಧಾನ ಮಾಡಿರುವಂಜಿ ಪೊರ್ಟತ್.
ಬೆರಿಯ ನಡ್‌ಂದಿತ್ ಮುರ್ಕ್ ಮರತ್‌ರ ಅಡಿಕ್ ಎತ್ತ್‌ನ ಚಿಮ್ಮಂಗ್ ಕೀರಿನ ಅಲ್ಲಿ ಕಂಡ್‌ಲೆ, ಕಾತಂಡ್ ನಿಂದತಂವೊ.
ಸೆರೀ 8-25 ಲ್ ಪಟ್ಟೆದಾರಂಡ ಪಟ್ಟಿಂಜ ಲಾರಿ ಪೊರಡುವಕ್ ತಯಾರಾಯಿತ್ ನಿಂದತ್. ಐನ್‌ಮನೆರ 50 ಬಾರಿನ ಲಾರಿಲ್ ಒರ್ ಸಮಕ್ ಅಡ್‌ಕಿತಿಂಜತ್. ಪೊಗೆ ಪುಡ್ಚಿತಿಂಜ ಬಾರಿಕ್ ಆಚಾರಿರ ಕೈಲ್ ಚಿಪ್ಪುಳಿ ಇಡ್‌ಚಿಟ್ಟಿತ್ ಮಿನಿ ಮಿನಿ ಮಿನ್ನುವನೆಕೆ ಮಾಡಿತಿಂಜತ್. ಬಾರಿರ ಕೂಡೆ 300 ಕೆ. ಜಿ. ರಚ್ಚಕ್ ಚಾಂದ್ ತುಂಡ್‌ನೋ ಅಡ್‌ಕಿತಿಂಜತ್.
ಲಾರಿ ಪೊರಡುವಾಂಗ್ ಮಿಂಞ ಪಟ್ಟೆದಾರ, ಅಣ್ಣುನ ಒರ್ ಬರಿಕ್ ಕಾಕಿತ್-“ಏಯ್, ವಿಷಯ ಚಾಯಿಲ್ ಗ್ಯಾನ ಉಂಡರಾ? ಮುರ್ಕ್ ಮರತ್‌ರ ಅಡಿಲ್ ಅಂವೊ ತಡ್‌ತ್‌ಲೇಂಗಿಯೂ ರಿಪೇರಿ ಆನನಕೆ ಅಲ್ಲಿ ಲಾರಿ ನಿಕ್ಕಂಡು. ಅಂವೊ ಮಿಂಞಕ್ ಬಂದ ಪಿಂಞ ಒಬ್ಬೊ ಉಪಾಯತ್ ಅವಂಡ ಕೂಡ ತಕ್ಕ ಸುರು ಮಾಡಂಡು. ಅಕ್ಕ ಬಾಕಿ ಉಳ್ಳಯಿಂಗ ಬೆಂಬರತಿಂಜ ಅವಂಡ ಪಡನೆಟ್ಟಿಗೆ ಬಾಟಂಡು. ಬುದ್ದನೆಕೆ, ಬಾಯಿ ಬಡಿಕತನೆಕೆ ಬಂದೋಬಸ್ತ್ ಮಾಡಿರುವಂಜಿ ಪಣಿ ಕೂಟಿತ್ ಲಾರಿರ ಮರತ್‌ರ ಮದ್ಯ ಬುದ್ದಾಕಿತ್ ಪಾರ್ಸಲ್ ಮಾಡಂಡು. ಚೆಕ್ ಪೋಸ್ಟ್‌ಲ್ ಲಾರಿ ತಡ್‌‌ಕತನೆಕೆ ಮಾಡುವ ಪಣಿ ನಾಡದ್.
ಅವಂಡ ಪಣಿ ಕೂಟುವ ನೇರತ್ ಊರ್, ಕೇರಿ, ಬಟ್ಟೆ ಪೋಕಂಗ ದಾರೇಂಗಿ ಬಾತೇಂಗಿ ಲಾರಿರ ಲೈಟ್ ಕೆಡ್‌‌ತಿತ್, ಲಾರಿ ರಿಪೇರಿ ಎಣ್ಣಿತ್ ಉಪಾಯತ್ ನೊಣೆ ತಕ್ಕ್‌ಲ್ ಅಯಿಂಗಳ ಅಯೆಕಂಡು, ಹ್ಂ, ಪೊರಡಿ.” ಅಣ್ಣು, ವಾಸು ಲಾರಿಲ್ ಡ್ರೈವರ್‌ರ ಕೂಡೆ ಅಳ್‌ತತ್. ಕೀರಿ ಅಯಿಂಗಡ ಕಾಲ್‌ರ ಪಕ್ಕ ಪದಂಗಿಯಂಡತ್,
ಲಾರಿ ಪೊರ್ಟತ್. ಗೇಟ್ ಕಡ್ಂದಿತ್ ಚೆನ್ನ ದೂರತ್ ಡ್ರೈವರ್ ಖಾದರ್ ಲಾರಿರ ಸ್ಪೀಡ್‌ನ ಪೂರ್ತಿ ಕಮ್ಮಿ ಮಾಡಿತ್ ಪುನಃ ಸ್ಪೀಡ್ ಎಡ್ತತ್. ದಂಡ್ ಮೂಂದ್ ಕುರಿ ಇನ್ನನೇ ಆಪದು, ಅಣ್ಣು ಡ್ರೈವರ್‌ನ ತಟ್ಟಿತ್, “ಎಂದಾಯೀಂ”ದ್ ಕೇಟತ್.
“ರೋಡ್‌ಲ್ ಓರ್ ವೆಳ್ಳೆ ಸಾರಿ ಉಡ್ತ ಪೆಂಙಳಾ…!” (ರೋಡ್‌ಲ್ ಒರ್ ಬೊಳ್‌ತ ಪೊಡಿಯ ಉಡ್ತ ಪೊಣ್ಣಾಳ್) ಎಣ್ಣಿಯಂಡೇ ಗೇರ್ ಬಲ್‌ಚತ್. ಖಾದರ್!
ಖಾದರ್‌ರ ತಕ್ಕ್ ಕೇಟಿತ್ ಅಣ್ಣು ಮಂಡೆ ನೇತಿತ್, ಬೋಳೆ ಉದ್ದ ಮಾಡಿತ್ ರೋಡ್ ನೋಟ್ಚಿ, ಅವಂಡ ಕಣ್ಣ್‌ಕ್ ಒಂದೂ ಕಂಡ್‌ಲೆ.
ಏಯ್… ಖಾದರ್ ನಾಯಿಂಡ ಮೋನೆ, ನೀಕ್ ಇನ್ನ್ ಕುಡ್‌ಚದ್ ಅದಿಗ ಆಯಡೋ” ಎಣ್ಣಿಯಂಡ್ ತಮಾಷಿಲ್ ಡ್ರೈವರ್‌ರ ಮಂಡೆಕ್ ಒಂದ್ ತಟ್ಟ್‌ಚಿ ಅಣ್ಣು.
ಇಕ್ಕ ಲಾರಿ ಮುರ್ಕ್ ಮರಕಿಂಜ ಕಾಲ್ ಫರ್ಲಾಂಗ್ ಬಯ್ಯಕ್ ಎತ್ತಿತಿಂಜತ್. ರೋಡ್ರ ಬಲ್‌ತೆ ಬರಿ ಎತ್ತರ ಬೆಟ್ಟ, ಎಡ್ತೆ ಬರಿ 50 ಅಡಿ ಆಳತ್‌ರ ಇಳಿಜಾರಾನ ಪೈಸಾರಿ ಕಾಡ್.
ಖಾದರ್ ಒಮ್ಮಲೆ ಲಾರಿ ನಿಪ್ಪ ಚಿಟ್ಟತ್. ಅಚ್ಚಕ್ ನೇರ ರೋಡ್ ಅರುಲ್, ಬರಿಲ್ ಕಾಂಬ್‌ಚಿಟ್ಟವಯಿಂಜ ಬೊಳ್‌ತ ಪೊಡಿಯತ್‌ರ ತಾಯಿ, ಇಕ್ಕ ರೋಡ್ ಮದ್ಯ ನಿಂದ್‌ರುವಂಜಿ ದಮ್ಮಯ್ಯಪ್ಪಾ… ನನ್ನ ಬಲ್ಯ ರೋಡ್ರ ಆ ಮಿಲ್ಲ್‌ ಕೆತ್ತನೆ ಬುಟ್ಟಿತಾ. ನಾಡ ಕೂಟ್‌ಕ್ ದಾರೂ ಇಲ್ಲೇ”ಂದ್ ಬಾಯಿ ಬಡಿಪದ್ ಕಂಡಿತಿಂಜತಂವೊ.
ಖಾದರ್ ಆ ತಾಯಿನ ಅಣ್ಣುಕ್ ಕಾಟುವದು ಮೂಕ್ ಮಾತ್ರ ಕಾಂಬನೆಕೆ ಮಫ್ಲ‌ರ್ ಕೆಟ್ಟಿತಿಂಜ ಆ ತಾಯಿ ದಾರ್ಂದ್ ಅಣ್ಣುಕ್ ಗೊತ್ತಾಯಿಲೆ. ಪಾಳ್ ಮುದ್‌ಕಿ, ಈ ನೇರಕ್ ಲಾರಿ ತಡ್‌ಪಲ್ಲಾಂದ್ ಗೊಣಂಗಿಯಂಡ್ ಲಾರಿರ ಎಡ್ತೆ ಬರಿ ಪಡಿ ತೊರ್ಂದಿತ್ “ಬರಬಂದ ಕಾಲತ್ ನೆರ್ಂದಿಯ ಮೋಳೆ” ಎಣ್ಣುವನೆಕೆ “ನೀಡೋರ್ ಚುಮಳ ಬಾ ತಾಯಿ ಒಮ್ಮ ಪತ್ತ್”ಂದ್ ಜೋರ್ ಮಾಡ್‌ಚಿ.
ಮುದ್‌ಕಿ ಬೆರಿಯ ಓಡಿ ಪೋಯಿತ್, ‘ಅಪ್ಪಾ ನಾಕ್ ಅಚ್ಚಕ್ ಎತ್ತರ ಪತ್ತುವ ಕಯ್ಯ, ಒಮ್ಮ ಕೈ ತಾ ಮೋನೇ” ಎಣ್ಣ್‌ಚಿ. ಅಣ್ಣು ಅಳಿತಲ್ಲಿಂಜೇ ಬಗ್ಗಿತ್ ಕೈ ನೀಟ್‌ಚಿ. ತಾಯಿ ಕೈ ಪುಡಿಪದು ಅಣ್ಣುಕ್ ಮೇಲೆಲ್ಲ ಐಸ್ ಕಟ್ಟಿಯಂಡನೆಕೆ ಆಚಿ. ಎಚ್ಚಕ್ ಶಕ್ತಿ ಕೂಟಿ ಬಲ್‌ಚಕಲೂ ಮುದ್‌ ಪಾರೆಕಲ್ಲ್‌ರ ಭಾರ. ಅಣ್ಣು ಅಡಿಕ್ ಜೂಂಗುವಲ್ಲತೆ ಮುದ್‌ಕಿ ಮೋಳ್‌ಕೇರುವನಕ ಕಂಡ್‌ಲೆ.
ಅಣ್ಣು ಒರ್ ಕೈಲ್ ಸ್ಟೇರಿಂಗ್‌‌ನ ಗಟ್ಟಿ ಪುಡ್‌‌ಚಂಡ್, ಇಂಞೋರ್ ಕೈಲ್ ಶಕ್ತಿ ಕೂಟಿತ್ ಮುದ್‌ಕಿನ ಬಲ್‌ಚತ್. ಇಂಜಿಂಜನಕೇ ಮುದ್‌ಕಿ ವಿಚಿತ್ರ ಸ್ವರತ್ ಜೋರ್ ಚೀರುವನೆಕೆ ತೆಳಿಪಕ್ ಸುರು ಮಾಡ್‌ಚಿ. ಅಣ್ಣು ಕಣ್ಣ್‌ನ ಬೀತಿಯಂಡ್ ಮುದ್‌‌ಕಿರ ಮೂಡ್ – ಕಣ್ಣ್‌ನೇ ನೋಟ್ಚಿ. ಅಂದ್ ಮಾಲ್ ಮಟ ಪಣತ್‌ನ ಎಲ್ಲಿ ಬೆಚ್ಚಿಯಾಂದ್ ಕೇಟಂಡ್ ಪಟ್ಟೆದಾರ ತೊಂಡೆ ಕೊರತ್‌ನ, ಮುರ್‌ಕಿ ಪುಡಿಪಕ ವಿಚಿತ್ರ ತರತ್ ಕೂತ್‌‌ಟ್ಟಂಡ್ ಕಣ್ಣ್‌ನ ತಿರ್‌ಕಿಯಂಡ್‌ ನೋಟ್‌‌ನ ಚೋಮಕ್ಕ ತಾಯಿರ ಮೂಡ್ ಇಕ್ಕ ಅಣ್ಣುಕ್ ಚಾಯಿಲ್ ಕಂಡತ್. ಸ್ಟೇರಿಂಗ್ ಪುಡ್ಚಿತಿಂಜ ಕೈನ ಗಟ್ಟಿ ಮಾಡಿಯಂಡ್ ತಾಯಿರ ಕೈನ ಬುಡುವಕ್ ನೋಟ್ಚಿ ಅಂವೊ. ಆಚೇಂಗಿ ತಾಯಿ ಇಕ್ಕ ಅವಂಡ ಕೈನ ಮುರ್‌ಕಿ ಪುಡ್‌ಚಿತಿಂಜತ್.
ಸ್ಟೇರಿಂಗ್ ಕೂಡೆ ಇಡೀ ಲಾರಿ ದರದರ ದಡ ದಡಾ… ಸದ್ದ್‌ರ ಕೂಡೆ ಇಳಿಜಾರ್ ಜಾಗತ್ ಮೆಲ್ಲೆ ಉರ್ಂಡುವಕ್ ಸುರು ಆಚಿ. ತಾಯಿರ ತೆಳಿ ಸದ್ದೂ ಜೋರಾಚಿ. ಮೆಲ್ಲೆ ಉರ್ಂಡುವಕ್ ಸುರು ಆನ ಲಾರಿ 10 ಅಡಿ ಇಳಿಜಾರ್‌ಲ್ ಜಾರಿತ್ ಒರ್ ಬಲ್ಯ ಬೊಳ್ಳಂದಿ ಮರಕ್ ತಾಂಗಿತ್ ಅನ್ನನೇ ನಿಂದತ್. ಆಶ್ಚರ್ಯ ಎಣ್ಣಕ, ದಾರ್‌ಕೂ ಒರೂ ನೊಂಬಲ ಆಯಿತಿಲ್ಲೆ.
ಲಾರಿ ಮಾತ್ರ ಕೊಡಿ ರೋಡ್‌ಕ್ ಎಡ್‌‌ಪಕಯ್ಯತ ಸ್ಥಿತಿಲ್ ಇಂಜತ್. ಲಾರಿರ ಒಳ್‌ಲ್ ಇಂಜಯಿಂಗ ಮೆಲ್ಲೆ ಪೊರ್‌ಮೆ ದಾಟಿತ್, ನಂಗ ಸ್ವಪ್ನ ಕಂಡಂಡುಳ್ಳದಾ, ನೇರಾಯಿತೂ ಇದೆಲ್ಲಾ ನಡ್ಂದತಾಂದ್ ಮೇಲ್‌ನ ಒಮ್ಮ ಞ್ಂಡಿ ನೋಟ್ಚಿ, ಅಣ್ಣು ಕ್‌ಣ್ಣಂಡ ಕಣ್ಣಂತೂ ಗಾಬರಿಲ್ ತಾಯಿನ ತೇಡುವಯಿಂಜತ್, ಅವಂಡ ಕಣ್ಣ್‌ಕ್ ತಾಯಿನ ಕಂಡ್‌ಲೆ. ಅಂವೊ ಬೆರಿಯ ಬಾಕಿ ಉಳ್ಳಯಿಂಗಳ ಕೂಟಿಯಂಡ್ ಒಳಬಟ್ಟೆಕಾಯಿತ್ ಪಟ್ಟೆದಾರಂಡ ಮನೆಕ್ ಓಡ್‌ಚಿ.
ತಾನ್ ನಿಂದ ಮುರ್ಕ್ ಮರತ್‌ರ-ಅಡಿಲಿಂಜ ಚೆನ್ನ ದೂರತ್ ದಡ ದಡಾಂದೆಣ್ಣುವ ಜೋರಾನ ಸದ್ದ್ ಕೇಟಿತ್ ಚಿಮ್ಮ ಅತ್ತಟಿ ಪೊರ್ಟತ್. ಪೋಪಾಂಗ್ ಮಿಂಞ ಒಮ್ಮ, ಕೀರಿ ಕ್‌ಣ್ಣ ಬಂದಿತ್ ಇಲ್ಲಿ ನನ್ನ ತೇಡ್‌‌ನಕೋಂದ್ ಗ್ಯಾನ ಬರತಿಂಜಿಲೆವಂಗ್. ಎಲ್ಲಾಂಗೂ ಒಮ್ಮ ಸದ್ದಾನದ್ ಎಂತಂದ್ ನೋಟಿತ್ ಬಂದ್‌ರುವೀಂದ್ ಆತುರತ್ ಮೊಟ್ಟ್‌ಟ್ಟತ್, ಚಿಮ್ಮ. ಲಾರಿ ಉರ್‌ಂಡ್‌ನ ಜಾಗತ್ ಮನೆಕಾರ ಊರ್‌ಕಾರಾಂದ್ 5-6 ಜನ ಕೂಡಿತಿಂಜತ್.
ಚಿಟ್ಟಪ್ಪಂಡ ಮನೆಕ್ ಲಾರಿ ಬಪ್ಪದೂ ಪೋಪದೂ ಮಾಮೂಲ್ ಆಯಿತಿಂಜಾಂಗ್ ಜನಕ್ ಲಾರಿರ ತೊಟ್ಟಿಲ್ ಉಳ್ಳ ವಸ್ತುರ ಮೀದ ಬಲ್ಯ ನಿಗ ಇಂಜಿಲೆ, ದಾರ್‌ಕಾಚೇಂಗಿ ಜಕ್ಕಿಂ ಆಯಿತಿಕ್ಕುವಾಂದ್ ಎಲ್ಲಾಡ ಮೂಡ್‌‌ಲ್ ಆತುರ. ಲಾರಿರ ಒಳ್‌ಲ್ ಜನ ಕೆಣ್ಂಜಿ ಪೋಯಿತ್ ಪೊರ್‌ಮೆ ಬಪ್ಪಕ್ ಒದ್ದಾಡಿಯಂಡಿಕ್ಕೂಂದ್ ನೆನತ್‌ನ ಚಿಮ್ಮ, ಇಳಿಜಾರ್‌ಲ್ ಕ್‌ಟ್ಟ್‌ನ ಪಿಲ್ಲ್ ಗಿಡ ಬಳ್ಳಿನ ಪುಡ್‌‌ಚಂಡ್ ಜಾರಿಯಂಡ್ ಪೋಯಿತ್ ಲಾರಿರ ಪಕ್ಕ ಎತ್ತ್‌ಚಿ. ಲಾರಿರ ಒಳ್‌ಲಾಡ್, ಸುತ್ತ್ ಮುತ್ತಾಡ್ ದಾರ್‌ನೋ ಕಂಡ್‌ಲೆ.
ಲಾರಿಲ್ ದಾರೂ ಇಲ್ಲೇಂದ್ ಚಿಮ್ಮ ಎಣ್ಣುವದು ಕೊಡಿ ರೋಡ್‌ಲ್ ನಿಂದಿತಿಂಜಯಿಂಗ ಬೆಮ್ಮಾರ್‌ಚಿ. ಲಾರಿರ ತೊಟ್ಟಿಲ್ ದುಂಬ್‌ಚಿಟ್ಟತಿಂಜ ಬಾರಿನ ನೋಟುವಕ ಚಿಮ್ಮಂಡ ಕಿರಿಲ್ ಅವಂಗ್ ಗೊತ್ತಿಲ್ಲತೆ ಒರ್ ಪೂಂದೆಳಿ ಮಿನ್ನ್‌ಚಿ. ಪಟ್ಟೆದಾರಂಡ ದುರಾಸೆಕ್ ದೇವ ನಲ್ಲ ಪೊಯ್ತ್ ಕೊಡ್‌‌ತಿತ್. ಒರ್ ಸಮಯ ಇಚ್ಚಕ್ ನೇರಕ್ ಕೀರಿ ಕ್‌ಣ್ಣ ಮುರ್ಕ್ ಮರತ್‌ರ ಅಡಿಕ್ ಬಂದಿತಿಕ್ಕು, ಅವನ ಕೂಟಿಯಂಡ್ ಬಂದಿತ್ ಇರ್‌ಕಿ‌ರ್‌ಲೇ ಈ ಬಾರಿನ ಪೊರ್‌ತಂಡ್ ಪೋಯಿತ್ ಐನ್‌‌ಮನೆಕ್ ಎತ್ತ್‌ಚಿಡಂಡೂಂದ್ ಕೊಡಿಕ್ ಪತ್ತುವಕ್ ಕಾಲ್ ಎಡ್ತತ್ ಚಿಮ್ಮ.
ಅಕ್ಕಣೆಕ್…!
ಲಾರಿ ಉರ್‌ಂಡ್‌ನ ಸುದ್ದಿ ಅರ್‌ಂಜಿತ್ ಪಟ್ಟೆದಾರ, ಅಣ್ಣು ಪಿಂಞ ಗ್ಯಾಂಗ್‌ನ ಕೂಟಿಯಂಡ್ ಆ ಜಾಗಕ್ ಬುಸ್‌ಬಾಯಿ ಬುಟ್ಟಂಡ್ ಓಡ್‌ಚಿ. ಅಲ್ಲಿ ಚಿಮ್ಮ ನಿಂದಾನ ನೋಟಿತ್ ಅಯಿಂಗ ಪಕ್ಕತ್‌ರ ಕೊಚ್ಚೆ ಕಾಡ್‌ಲ್ ಒಳ್‌ಚಂಡ್ ಚಿಮ್ಮ ಎಂತ ಮಾಡುವಾಂದ್ ಬೇರ್‌ಚಿಟ್ಟಂಡ್ ನಿಂದತ್…
ಬಾಕಿ ಮಿಂಞಕ್…
