ಮಡಿಕೇರಿ, ನ.07: (ಬಾಳೆಯಡ ಕಿಶನ್‌ ಪೂವಯ್ಯ): ಮಡಿಕೇರಿ ಕೊಡವ ಸಮಾಜತ ಆದನೆಲ್‌ ಉಳ್ಳ ಜನರಲ್ ತಿಮ್ಮಯ್ಯ ಪಬ್ಲಿಕ್ ಸ್ಕೂಲ್‌ಲ್‌ ಇದೇ ಆದ್ಯವಾಯಿತ್‌ “ತಾತ ಅವ್ವಯಂಗಡ ನಾಳ್‌” ನಡ್ಂದತ್.
ಮಡಿಕೇರಿ ಕೊಡವ ಸಮಾಜ ಕೊರವುಕಾರ ಪಿಂಞ ಸ್ಕೂಲ್ ಸಮಿತಿರ್ ಕೊರವುಕಾರನೂ ಆಯಿತುಯಳ್ಳ, ಮಂಡುವಂಡ. ಪಿ .ಮುತ್ತಪ್ಪ ಅಯಿಂಗಡ ಕೊರವುಕಾರಿಕೆಲ್‌, ಸ್ಕೂಲ್ ಆಡಳಿತ ಅಧಿಕಾರಿ ಶ್ರೀಮತಿ ಎನ್. ಎ.ಪೊನ್ನಮ್ಮ ಅಯಿಂಗಡ ಕೂಡ್‌ ಕೂಟ್‌ಲ್‌ ಕಾರ್ಬಾರ್‌ ಮೊಳಿಯಾಚಿ.
ಆದ್ಯ ಮೊಳಿ ತಕ್ಕ್ ಪರ್ಂದ ಪ್ರಾಂಸುಪಾಲೆ ಶ್ರೀಮತಿ ಸವಿತ ಎಂ.ಜಿ. ಅವು, ಕ್‌ರ್‌ ಮಕ್ಕಡ ಬೊಳ್ಚೆಲ್‌ ತಾತ ಅವ್ವಯಂಗಡ ಪಾಲ್‌ ಏರ ಇಪ್ಪ, ನಂಗಡ ಪದ್ದತಿ ಪರಂಪರೆನ ಕಥೆರ ರೂಪತ್‌ ಮಕ್ಕಕ್‌ ಎಣ್ಣಿಕೊಡ್ಪಾಂಡ ಕೂಟ್‌ಕ್‌, ಈ ಸಮಾಜತ್‌ ನಲ್ಲ ಮಕ್ಕಳಾಯಿತ್‌ ಬೊಳ್ತುವಲ್ಲಿ ತಾತ ಅವ್ವಯಂಗಳೂ ಕೈ ಕೂಟೋಂಡೂಂದ್‌ ಎಣ್ಣ್‌ಚಿ. ಕೊರವುಕಾರ ಮಂಡುವಂಡ ಮುತ್ತಪ್ಪ ಅವು ತಕ್ಕ್ ಪರ್ಂದಿತ್‌, ಇಂದೇತ ಮಕ್ಕಳ ಕೋಪಟೆರ ಕೂಟ್‌ಕ್‌, ಶಿಸ್ತ್‌, ತಗರ್ದಿಲೂ, ನಂಗಡ ತನ ಪಾಳಾಕತನಕೆ ಬೊಳ್ತುವದ್‌ ಪೆರಿಯೈಂಗಡ ಮೇನತಾಂಡೂಂದ್‌ ಎಣ್ಣ್‌ಚಿ. ಆಯಿಮೆಲ್‌, ಚುಪ್ಪಿ ಮಕ್ಕಡ ಆಟ್‌ ಪಾಟ್‌, ಕೊನ್ನೆ ತಕ್ಕ್‌ಲ್‌ ತಾತ ಅವ್ವಯ್ಯಂಗಳ ಕುಶಿ ಪಡ್ತ್‌ನಕ, ತಾತಾ ಅವ್ವಯಂಗಳೂ ಕಳಿ ತೆಳಿರರ ಪೈಪೋಟಿಲ್‌ ಕೂಡಿಯಾಡಿತ್‌, ಮಕ್ಕಕ್‌ ಪುರ್‌ಡ್‌ ಕೊಡ್ತತ್.
ಆದಿಲ್‌ ಶಿಕ್ಷಕಿ ಶ್ರೀಮತಿ ಚಂದ್ರಾವತಿ.ಬಿ.ಎಸ್. ಅವು ದೇವಳ ತೊತ್ತ್‌ ಪಾಡ್‌ನಕ, ಶ್ರೀಮತಿ ಶಾಹಿರ ಎಂ.ಹೆಚ್. ಅವು ತಕ್ಕಾರ ಬಯಂದತ್. ಕಳಿ ಕೂಟ್‌ತ್‌ನ ಶ್ರೀ ಭರತ್.ಕೆ.ಎನ್., ಶ್ರೀ ಈರಪ್ಪ.ಹೆಚ್.ಎನ್ ಪಿಂಞ ಶ್ರೀಮತಿ ಸೀಮ ಪರ್ವಿನ್‌ ಅವು ನಡ್ತ್‌ಚಿ. ಶ್ರೀಮತಿ ವಿನಯಉತ್ತಪ್ಪ ಪಿಂಞ ಶ್ರೇಮತಿ ಕುಸುಮ.ಎಸ್.ಕೆ. ಅವು ಕುಯ್ಯಳೆ ಕೂಟಿತ್‌, ಶ್ರೀಮತಿ ಮಿಥಿಲಪೊನ್ನಪ್ಪ ಅವು ತೊತ್ತ್‌ ಬಯಂದಂಡತ್. ಸ್ಕೂಲ್‌ರ ಎಲ್ಲಾ ಶಿಕ್ಷಕ, ಶಿಕ್ಷಕೇತರ ಸಿಬ್ಬಂಧಿಯ, ಮಕ್ಕ ಕೂಡಿಯಾಡಿತ್‌ ಗೌಜಿಲ್‌ ನಾಳ್‌ ಕೈಚತ್.
