Nadubadenews, ಅ.28: (ಅರಿವು: ಅಣ್ಣಿರ ಹರೀಶ್ ಮಾದಪ್ಪ) ಸಮಾಜ ವ್ಯಾಪ್ತಿಲ್‌ ಕೊಡವ ದಂಪತಿಯ ಮೂಂದನೇ ಕುಂಞಿ ಮಾಡಿಯಂಡಕ ಆ ಕುಂಞಿಕ್‌ ಐಂಬದ್‌ ಆಯಿರ, ನಾಲನೇ ಕುಂಞಿಯಾನಕ ಆ ಕುಂಞಿಕ್‌ ಓರ್‌ ಲಕ್ಷ ಇನಾಂ ಕೊಡ್ಪಕ್‌ ನಿರ್ಕ್‌ ಮಾಡಿತ್ಂದ್‌ ಟಿ.ಶೆಟ್ಟಿಗೇರಿ ಕೊಡವ ಸಮಾಜದ ಅಧ್ಯಕ್ಷ ಕೈಬುಲಿರ ಹರೀಶ್ ಅಪ್ಪಯ್ಯ ಅವು ಎಣ್ಣಿತ್.
ನಿನ್ನಾಂದ್‌ ಸಮಾಜ ಬಾಡೆಲ್‌ ನಡ್ಂದ, ಚಂಗ್ರಾಂದಿ ಪತ್ತಾಲೋದಿ ಆಯಿಮೆರ ಆಖೀರಿ ಕಾರ್ಬಾರ್‌ರ ಕೊರವುಕಾರಿಕೆ ಎಡ್ತಂಡ್‌ ತಕ್ಕ್‌ ಪರ್ಂದ ಅವು, ಕೊಡವ ದಂಪತಿಯಕ್‌ ಪುಟ್ಟುವ ಮೂಂದನೇ ಕುಂಞಿಕ್‌ ಐಂಬದಾಯಿರ, ನಾಲನೇ ಕುಂಞಿಕ್‌ ಓರ್‌ ಲಕ್ಷತ್‌ನ ಆ ಕುಂಞಿಯಡ ಪೆದತ್‌ ಬ್ಯಾಂಕ್‌ಲ್‌ ಡೆಪಾಸಿಟ್‌ ಬೆಚ್ಚಿತ್‌, ಅಯಿಂಗಕ್‌ 18ಕಾಲ ದುಂಬುವಕ ಆ ದುಡ್ಡ್‌ ಅಯಿಂಗ ಎಡ್ತವನ್ನಕೆ ಮಾಡುವಕ್‌ ಟಿ.ಶೆಟ್ಟಿಗೇರಿ ಸಮಾಜ ನಿರ್ಕ್‌ ಮಾಡಿತ್‌ ಎಣ್ಣ್‌ಚಿ.
ಮಿಂಞಕ್‌ ತಕ್ಕ್‌ ಪರಂದ ಅವು, ನಂಗಡ ಪದ್ದತಿ, ಪರಂಪರೆ ಆಯಿಮೆಕೊಯಿಮೆನ ನಡ್ತೋಕ್‌, ತರಾವರಿ ಕಾರ್ಬಾರ್‌ ಮಾಡ್ಯಂಡುಂಡ್. ಈ ಎಲ್ಲಾ ಆಯಿಮೆ ಕೊಯಿಮೆ ಬವುಸ್‌ಲ್‌ ಉಳಿಯೋಂಡುವೇಂಗಿ ಜನಾಂಗ ಉಳಿಯಂಡಿಯದ್‌ ಆದ್ಯ. ತಾಂದುಂಡುಳ್ಳ ನಂಗಡ ಜನಸಂಕ್ಕಯೆನ ಪೊಂದ್‌ಚಿಡೋಕ್‌ ನಂಗೆಲ್ಲರೂ ಕೈ ತೆಕ್ಕಿತ್‌ ಇಳಿಯಂಡಿಯ ನ್ಯಾರ ಬಂದಿತ್. ಅನ್ನನಾಯಿತ್‌ ನಂಗ ಈ ಮೊಟ್ಟ್‌ನ ಎಡ್ತಂಡಿತ್. ಇದತಿಂಜ ನಂಗಡ ಬಾಲೆಕಾರ ದಂಪತಿಯಕ್‌ ಪುರ್‌ಡ್‌ರ ಕೂಡೆ, ಅರಿವು ಕೊಡ್ತನ್ನಕೆಯೂ ಆಪಾಂದ್‌ ಎಣ್ಣ್‌ಚಿ.
ಈ ನ್ಯಾರತ್‌, ಖನಪಟ್ಟ ಬೆಂದುವ, ಸಮಾಜ ಆಡಳಿತ ಮಂಡಳಿ, ಸದಸ್ಯಂಗ ಪಿಂಞ ಅಭಿಮಾನಿಯ ಕೂಡಿತಿಂಜತ್.
