ಸಂಪಾದಕೀಯ, ಅ.15: ಪಂಡಾಯಿರ ಕಾಲತೋಟ್ಟ್‌ ಕೊಡವ ತಂಗಡದೇ ಆನ ಪದ್ದತಿ ಪರಂಪರೆ, ಆಯಿಮೆ, ಕೊಯಿಮೆನೂ ನಡ್ತಿಯಂಡ್‌ ಬಂದವು. ನಂಗಡ ಏದೇ ನಮ್ಮೆ ನಾಳ್‌, ಪದ್ದತಿ, ಪರಂಪರೆಲ್‌, ಪೂಜೆ ಪುರಸ್ಕಾರನೂ ನಂಗಳೆ ನಡ್ತಿಯಂಡ್‌ ಬಂದವು. ನಂಗ ನೆಲ್ಲಕ್ಕಿ ನಡುಬಾಡೆ, ಮೊಂಬೊಳಕ್‌ ಮಿಂಞಲ್‌, ಅಂದಿ ಮುಂದಿಲ್‌ ನಿಂದ್‌ ಬೋಡುವದೂ, ಪೊಲಾಕ ಕಾಕೆ ಪಕ್ಷಿ ಏವಾಂಗ್‌ ಮುಪ್ಪಡೆ(ಬ್ರಾಹ್ಮಿ ಮೂರ್ತ), ಬೈಟಾಪಕ, ಕಾಕೆ ಪಕ್ಷಿ ಅಡ್ಂಗ್‌ನಪಿಂಞ(ಸಂದ್ಯಾ ವಂದನೆರ ಸಮಯ)ತ್‌ ನಂಗ ಕೊಡವ, ನೆಲ್ಲಕ್ಕಿ ನಡುಬಾಡೆಲ್‌ ಬೊಳ್ಳಕ್ಕಿ ಪುಡ್ಚಿತ್‌, ಕಟ್ಟುವ ಒಕ್ಕಣೆ ಆಯಿರ ಗಾಯತ್ರಿ ಮಂತ್ರಕ್‌ ಸಮ. ಅನ್ನನೆ ಏದೇ ಕಾರ್ಬಾರ್‌ಕ್‌ ಮೊಳಿ ಇಡುವಕ್‌ ಮುಪ್ಪಡೆ, ಬೊಳ್ಚಕತ್ತ್‌ಚಿಟ್ಟಿತ್‌ ಕಟ್ಟುವ ನೇರ್ಚೆ ನೂರ್‌ ಹೋಮಕ್‌ ಸಮ, ಎಣ್ಣುವದ್ ಕೊಡವಾಮೆರ ಆಯಿಮೆನ ನಡ್ತಿ ಬಂದ ಮೋಲಿಯಡ ತಕ್ಕ್.
ಅನ್ನನೇ ನಂಗ ಪೆತ್ತಲ್ಲಿಂಜ ಚತ್ತಲ್ಲಿಕೆತ್ತನೆಯೂ, ಎಲ್ಲಾ ಮೊಟ್ಟ್‌ಲೂ, ನಂಗಡದೇ ಆನ ನಡ್ಪುಂಡ್. ಅದತ್‌ ಚತ್ತ ಪೆರಿಯಂಗಕ್‌ ಪಿಂಡ ಬೆಪ್ಪದೂ ಒಂದ್. ಪಂಡಾಯಿರ ಕಾಲ ತೊಟ್ಟ್‌ ಪಿಂಡ ಬೆಪ್ಪಕ ಬೋರೆ ದಾರ್ನೂ ಸಾಯಕೋ, ಪೂಜೆಕೋ ಕಾಕ್ಯವುಲೆ. ನಂಗಳೇ ಬೆಪ್ಪದ್‌ ಉಳ್ಳದ್.
ನಂಗ ಕೊಡವ ಕಾರೋಣಂಗಕ್‌ ಅಲ್ಲೇಂಗಿ ಚತ್ತೈಂಗಕ್‌ ಎಕ್ಕಲೂ ಮೋಕ್ಷ ಕೊಡ್ಪುಲೆ, ಅಯಿಂಗಳ ನಂಗಡ ಕಾರೋಣ ಕೋಟತ್‌ ಅಲ್ಲೇಂಗಿ ಕೈಮಡತ್‌ ಸ್ಥಾನನೆಲೆ ಕೊಡ್ತಿತ್‌ ಪೂಜಿಬಾವಳ ಸಂಸ್ಕೃತಿ ನಂಗಡ. ನಂಗಕ್‌ ಮಾಗುರು ಕಾರೋಣರೇ ಆದ್ಯ ದ್ಯಾವ. ಇನ್ನನೆ ಇಪ್ಪಕ, ನಂಗ, ಕೈಕ್‌ ಒಮ್ಮ ದರ್ಭೆ ಕಟ್ಟಿತ್‌, ಪೊಳೆರ ನಡುಲ್‌ ಎಡೆ ಒಪ್ಪುಚಿಟ್ಟಿತ್‌, ಬೊಗಸೆ ಕೈಲ್‌ ತರ್ಪಣ ಬುಟ್ಟಪಿಂಞ ಆ ಕಾರೋಣ, ಅಲ್ಲೇಂಗಿ ಆತ್ಮ, ನಂಗಳ ಬುಟ್ಟಿತ್‌ ಪೋಚೀಂದ್‌ ನಂಬಿಕೆ. ಅಲ್ಲಿಕ್‌ ಆತ್ಮತ್‌ರ ಋಣ, ನಂಗಳಿಂಜ ತೀಂದತ್‌ ಎಣ್ವ. ಅನ್ನನಾಯಿತ್‌ ನಂಗ ಏದ್‌ ಕಾರಣಕ್ಕೂ ಇನ್ನನೆ ಮಾಡತೆ ನಂಗಡ ಕಾರೋಣಳ ನಂಗಡ ಸುತ್ತೂ ಇಪ್ಪನ್ನಕೆ ಮಾಡ್ಯವಂಡು.
ಈ ಪಿಂಡ ಬೆಪ್ಪ ವಿಚಾರತ್‌ ಸುಮಾರ್ಕ್‌ ಸಂಶಯ, ಪೋರ್‌ಮೆ ನಂಗಡೊಳಿಯನೇ ಇಂಜಾನಕೊಂಡ್. ನಂಗ ದಂಡ್‌ ಕಾಲ ಬಯ್ಯ ಕಲ್ಯಾಟ ಅಜ್ಜಪ್ಪ ಬೊಳಿಕ್‌ ಬಂದಲ್ಲಿ, ಈ ವಿಚಾರತ್‌ ಅರಿಕೆ ತರೋಂಡೂಂದ್‌ ಕೇಟಲ್ಲಿ, ಅವು ತಂದ ಒಕ್ಕಣೆ ಇನ್ನನೆ ಉಂಡ್…
”ಬೋಂಡಿಯಾನ ಸಾಮಾನ್: ಕೊಡಿಬಾಳೆ ಎಲಕಂಡ, ಓರ್‌ ಪುಡಿ ನೆಲ್ಲ್‌ ಪೊರಿ( ಮನೆಲ್‌ ಮಾಡ್ನದಾಚೇಂಗಿ ನಲ್ಲದ್ ಇಲ್ಲೇಂಗಿ ಪ್ಯಾಟೆಲೂ ಎಡ್ತವಲು), ಓರ್‌ ಚೆನ್ನ ಕರ್ತ ಎಳ್ಳ್‌, ಓರ್‌ ಬಾಳೆ ಪಣ್ಣ್‌, ಚೆನ್ನ ತೇನ್‌ ಇಲ್ಲೇಂಗಿ ಕರ್ತ ಬೆಲ್ಲ.”
ಇವಿಚ್ಚಾಕಾನ ಎಡ್ತಂಡ್‌, ಪೊಲನ್ಯಾರ್ತೆ, ಕಾಕೆ ಪಕ್ಷಿ ಏವಾಂಗ್‌ ಮಿಂಞ ಮನೆ ಬಾಡೆನ ಒಡ್ಕಿ, ತೀಟಿತ್‌, ನೆಲ್ಲಕ್ಕಿಲ್‌ ಬೊಳ್ಚಕತ್ತ್‌ಚಿಟ್ಟಿತ್‌, ನೆಲ್ಲಕ್ಕಿರಡಿಲ್‌ ಓರ್‌ ಊರ್ಂಗೋಲ್‌ನ ಬೆಚ್ಚಿತ್, ಕೂಟ್‌ಲ್‌ ಪೆರಿಯಂವೊ, ಬಲ್ತೆ ಕೈನ ಎಡ್ತೆ ಎದೆಕ್‌ ಬೆಚ್ಚಂಡ್‌, ಇನ್ನನೆ ಪರಿಯೋಂಡು… “ನಂಗಡ ಒಕ್ಕತ ಆದಿ ಗುರುವೇ, ಅಜ್ಜಪ್ಪನೇ, ಮಮ್ಮರ್ಂಜ ಕಾರೋಣ, ಕಾರೋಣಚಿಯಳೆ, ಬಾರಿ.., ನಂಗೆಲ್ಲ ನಂಗಡವ್ವ ಕಾವೇರಿಕ್‌ ಪೋಯಿತ್‌, ಸಂಗಮತ್‌ ಮುಂಙಿತ್‌, ಮಾತಾಯಿಕ್‌ ಎಡೆಮೇಂಗಿ ಕೊಡ್ತಿತ್‌, ಭಗಂಡನ ತೊತ್ತಿತ್, ತಲೆಕಾವೇರಿಕ್‌ ಪೋಯಿತ್‌, ಶಾಂತಿಪೂಜೆ ಕೆಜ್ಜಿತ್‌, ಬೈಪಿರ್ಂಜಿ ಬಕ್ಕನಾ” ಎಣ್ಣಿತ್‌ ಕಾಕಿತ್‌, ನೆಲ್ಲಕ್ಕಿರಡಿಲ್‌ ತಾಕಿಬೆಚ್ಚ ಕೋಲ್‌ನ ಕೈಕ್‌ ಎಡ್ತಂಡ್‌, ಕಾರೋಣ ಕೋಟ ಅಲ್ಲೇಂಗಿ ಕೈಮಡಕ್‌ ಪೋಯಿತ್‌ ಇದೇ ಪೋಲೆ ಕಾಕಿತ್‌, ಪೊರ್ಡೋಂಡು.
ಪಾಂಡತುಳ್ಳ ಭಗಂಡ ಕ್ಷೇತ್ರಕ್‌ ಪೋಯಿತ್‌, ಅಲ್ಲಿ ಆದ್ಯ ಪಿಂಡ ಬೆಪ್ಪಂವೊ ಮಾತ್ರ ತಾಡಿಂದಲೆ ತಾತಿತ್(ಮಂಡೆ ಕೀಚಿತ್), ಬೊಳ್ತ ಕುಪ್ಯ ಇಟ್ಟಿತ್‌, ನಡುಕ್‌ ವಸ್ತ್ರ ಕೆಟ್ಟಿತ್‌, ಸಂಗಮತ ನಡು ಮಧ್ಯಕ್‌ ಪೋಯಿತ್‌ ಪಡ್ಂಞಾರ್‌ಕ್‌ ಮೂಡಾಯಿತ್‌ ಭಗಂಡನ ತೊತ್ತಿತ್, ಮೂಂದ್‌ ಕುರಿ ಮಂಡೆ ಮೇಲ್‌ ಮುಳೀತ್‌, ಕೊಡಿಕೆದ್ದಿತ್‌, ಬಲ್ತೆಬರಿಲ್‌ ತಿರಿತ್‌, ಕೇಕ್ಕ್ ಮೂಡಾಯಿ, ಸೂರಿಯನ ತೊತ್ತಿತ್, ಪೊಳೆಕರೆಕ್‌ ಬಂದಿತ್‌, ಮಣಪಟ್ಟಿ ಮೀದಲ್ ಕೇಕ್ಕ್ ಮೂಡಾಯಿತ್‌ ಮೊಟ್ಟ್‌ ಕುತ್ತಿತ್‌ ಅಳ್ತಿತ್‌, ಎಲಕಂಡತ ಕೊಡಿನ ಪಡಿಞಾರ್‌ ತುದಿಯಾಯಿ ಬೆಚ್ಚಿತ್ತ್‌, ಆದ್ಯ ನೆಲ್ಲ್‌ ಪೊರಿನ ಇಟ್ಟಿತ್‌, ಬಾಳೆ ಪಣ್ಣ್‌ ತೊಲ್ಚಿತ್‌ ಇಟ್ಟಿತ್‌, ಎಳ್ಳ್‌ ಇಟ್ಟಿತ್‌, ತೇನ್‌ ಇಲ್ಲೆಂಗಿ ಬೆಲ್ಲನ ಇಟ್ಟಿತ್‌ (ಬೆಲ್ಲ ಆಚೇಂಗಿ ಚೆನ್ನ ನೀರ್‌ ಮಾಡ್ಯವಂಡು) ಚಾಯಿಲ್‌ ಕಲ್ಂದಿತ್‌, ದಾರ್‌ಕೆಲ್ಲ ಪಿಂಡ ಬೆಕ್ಕೊಂಡುವೋ ಅಯಿಂಗಡ ಪೆದತ್‌ನ ನೆನತಿಯಂಡ್‌ ಮುದ್ದೆ ಮಾಡಿತ್‌ ಬೆಕ್ಕೊಂಡು.
ಅದಾನದು ಕೂಡಿ ನಿಂದ ಎಲ್ಲಾರೂ ಅಕ್ಕಿ ಕೈಕ್‌ ಎಡ್ತಂಡ್‌, ಪಿಂಡ ಬೆಚ್ಚವು, ಇನ್ನನೆ ಪರಿಯೊಂಡು, “ಮಾತಾಯಿ, ಮಾಗುರುವೇ, ಭಗಂಡೇಶ್ವರನೇ, ಒಕ್ಕ ಕಾರೋಣರೇ, ಇಂದ್‌ ನಂಗ, ನಂಗಡ ಮನೆಂಜ ಒಕ್ಕ ಮಕ್ಕಳಾಯಿ, ಕಾರೋಣಳ ಕೂಟ್ಯಂಡ್‌, ಭಗಂಡ ಕ್ಷೇತ್ರಕ್‌ ಬಂದಿತ್‌, ತಾಡಿಂದಲೆ ತಾತಿತ್, ಸಂಗಮತ್‌ ಮೂಮಮುಳಿ ಕುಳ್ಚಿತ್‌, ಪಂಡಿಯ ನಡೆಪೋಲೆ, ಅರಿಯೈಂಡ ಅರಿವು ಪೋಲೆ ಮಾತಾಯಿನ ತೊತ್ತಿತ್, ಮಾಗುರುನ ನೆನತಿತ್‌, ಕಾರೋಣರ ಕಾಕಿತ್‌, ಎಡೆಮೇಂಗಿ ಮುದ್ದೆಕೆಟ್ಟಿ ಬೆಚ್ಚಿತ್, ಇಕ್ಕ ಸಂಗಮತ ನಡುಮದ್ಯ ಮಾತಾಯಿರ ಮಡ್‌ಕ್‌ಟ್ಟ್‌ ನೀಕುವ. ಇನ್ನಪೋಲೆ, ನಂಗ ಮಾಡುವೋರ್‌ ಕಾರ್ಯತೋ, ನಡ್ಂದೋರ್‌ ನಡ್ಪುಲೋ, ಪರ್ಂದೋರ್‌ ತಕ್ಕ್‌ಲೋ ಎನ್ನ ತಪ್ಪು ಬಾತೇಂಗೂ, ಒಪ್ಪುಮಾಡಿ ತಂದಿತ್‌, ಇಂದ್‌ ತೊಟ್ಟ್‌ ಮುಂದಾರ ಕಾವೇರಮ್ಮೆ ಮಾತಾಯಿರ ದಯತ್‌ಲ್‌, ಮಾದೇವಂಡ ನಳತ್‌ಲ್‌, ಎಂಗಡೊಕ್ಕ ಕಾರೋಣಂಗ ಕೂಡೆ ಬಯ್ಯೆ ಬಂದಿತ್‌, ಎಂಗಡೊಕ್ಕ ಮಕ್ಕಳ, ಪೋನಲ್ಲಿ ಬಂದಲ್ಲಿ, ಅಳ್ಪಲ್ಲಿ ಏವಲ್ಲಿ, ಓಡುವಲ್ಲಿ ಪಾರುವಲ್ಲಿ, ಕಳಿಪಲ್ಲಿ ತೆಳಿಪಲ್ಲಿ, ಪರಿವಲ್ಲಿ ಪಾಡುವಲ್ಲಿ, ಎಣ್ವಲ್ಲಿ ಕೇಪಲ್ಲಿ, ಓದುವಲ್ಲಿ ಎಳ್ದುವಲ್ಲಿ, ನೈಪಲ್ಲಿ ನೇಡುವಲ್ಲಿ, ನಾಡ್‌ಲೂ ನಗರತೂ, ಊರ್‌ ಕೇರಿಲೂ, ಪಟ್ಟಣ ಪರದೇಶತೂ, ತೋಟ ತೊಡಿಯಕೂ, ಎತ್ತ ಕಡ್ಚಿಯಕೂ, ಬಿತ್ತ್‌ ಬೊಳೆಕೂ, ಬೋಟೆ ಬೊಡಿಕೂ, ಕರ್ಪ ಕಾಚೋಂಗೂ, ಕೋತಿ ತೊರಿವಾಂಗೂ, ನೇತಿ ಕಳ್ಪಾಂಗೂ, ಬೀಜಿ ಕೆತ್ವಾಂಗೂ, ಕೂಡಿ, ಸಾಲ್‌ ಸಂತಾನ, ಒಕ್ಕ ಮಕ್ಕಳೂ, ಅಂಗನರುವನೂ, ಅಜ್ಜ ತಾಯಿನೂ, ಕೊಡ್ತಲ್ಲಿ ಕೋಂದಲ್ಲಿಯೂ ಒಂದ್ ತೊಟ್ಟ್‌ ನೂರೋಳ, ಕೈ ಬಾಯಿ ಮೇಲ್‌ ಮಾಡಿತ್‌, ಎಳ್ಳಚ್ಚಕೂ ಕೊರು ಕಾಂಗತೆ, ಗಾಳಿಯಾಯಿ ಬಂದದ್‌ ಮಾಯಯಿ ಪೋಯಿತ್‌, ಮಳೆಯಾಯಿ ಬಂದದ್‌ ಮಂಜಾಯಿ ಕರೀತ್‌, ಕಣ್ಣ್‌ಕ್‌ ಬಂದದ್‌ ಕುಯಿಬುಲ್‌ ನೀಂಗಿತ್‌, ತಿತ್ತಾಯಿ ಬಂದದ್‌ ನೀರಾಯಿ ಜಾರಿತ್‌, ಕಳ್ಳಪಡೆ ಬಾತೇಂಗಿ ಕೇರಿಲ್ಲತೆ ಕೆಟ್ಟಾಯಿ, ಕೂಡ ನಿಂದ್‌ ಚದಿಪವಂಗ್‌ ಕೋಲಿಲ್ಲತೆ ಪೊಯ್ತಾಯಿ, ಅದಿ ಚದಿ ಮಾಡುವವಂಗ್‌ ಅಂಬಿಲ್ಲತೆ ಕುತ್ತಾಯಿ, ನಲ್ಲಮನತ್‌ ನಿಪ್ಪವಂಗ್‌ ಪೊಂಗೊಡೆ ನಾಳವಾಯಿ ಕಾತ್‌ ರಕ್ಷೆ ಮಾಡಿತ್‌, ಬಯಂದ ಕಾರ್ಯ ನಲ್ಲಾನ ಮೇರ್‌ ನೇತಿ ಬೆಚ್ಚಿತ್, ಕೇಳೀಂಗೀರ್ತಿ ತರೋಂಡೂಂದ್‌ ಕೂಡಿ ನಿಂದ, ಎಂಗ ಒಕ್ಕ ಮಕ್ಕ, ಚಣ್ಣಕ್ಕಿ ಒಲಂಬಿತ್‌ ಅಡ್ಡಬುದ್ದ್‌ ಬೋಡ್ಯವ.” ಎಣ್ಣಿತ್‌ ಎಡೆಕ್‌ ಅಕ್ಕಿ ಇಡೋಂಡು.
ಕೂಡಿ ನಿಂದ ಎಲ್ಲರೂ ಅಕ್ಕಿ ಇಟ್ಟಿತಾನದು, ಎಡೆರ ತುದಿನ ಮುಂಬರಕ್‌ ಮಾಡಿತ್‌ ಎಡ್ತಂಡ್‌, ಸಂಗಮತ ನಡುಮದ್ಯಕ್‌ ಪೋಯಿತ್‌, ಪಡಿಞಾರ್‌ ಮೂಡಾಯಿ ಭಗಂಡನ ತೊತ್ತಿತ್, ಬಲ್ತಬರಿಲ್‌ ತಿರೀತ್‌, ಕೇಕ್ಕ್ ಮೂಡಾಯಿ, ಎಡೆನ ನೀಕಿತ್‌, ಎಡ್ತ ಬರೀಲ್‌ ತಿರಿತ್‌, ಪಡಿಞಾರ್‌ಕ್‌ ಮೂಡಾಯಿ, ಮೂಂದ್‌ ಕುರಿ, ಮಂಡೆ ಮೇಲ್‌ ಮುಳಿತ್‌, ಬಲ್ತ್‌ಕಾಲೆ ತಿರೀತ್‌ ಕರೆ ಪತ್ತೋಂಡು.
ಪಿಂಡ ಬೆಚ್ಚೈಂಡ ಪೊಣ್ಣ್‌ ಉಂಡೇಂಗಿ ಪುನಾದ್ಯ ದಂಡಾಳು ಕೈ ಪುಡ್ಚಂಡ್‌ ಪೊಣ್ಣ್‌ ಎಡ್ತ್‌ಲೂ, ಆಣ್‌ ಬಲ್ತ್‌ಲೂ ಸಂಗಮತ ನಡು ಮದ್ಯತ್‌ ಮೂಮಮುಳಿ ಕುಳಿಕೋಂಡು. ಪಿಂಡ ಬೆಚ್ಚಿತಾಕಣೆಕ್‌ ಆಣ್‌ ಒಬ್ಬ ಮಾತ್ರ ಕುಳಿಪೊ. (ಆಮಕ್ಕ ಇಲ್ಲೇಂಗಿ ಪೊಮ್ಮಕ್ಕಳೂ ಕ್ರಮಪೋಲೆ ಪಿಂಡ ಬೆಕ್ಕಲೂ).
ಇದಾನದು ನಾಗಬನ ಸುತ್ತಿತ್‌, ಭಗಂಡಂಡ ಕ್ಷೇತ್ರತ್‌ ಮಾಪೂಜೆ ಕೆಜ್ಜಿತ್‌, ಮೂಲ ಕನ್ನಿಕಾವೇರಿಕ್‌(ಕನ್ನಿಕುಂಡ್) ಪೋಯಿತ್‌ ಕೈಮಲಂಗಿ ತೊತ್ತಿತ್, ತಲೆಕಾವೇರಿಕ್‌ ಪೋಯಿತ್‌ ಶಾಂತಿ ಪೂಜೆ ಕೆಜ್ಜಿತ್‌, ದೇವಾಟ್‌ಪರಂಬುಕ್‌ ಬಂದಿತ್‌ ತೊಪ್ಪುಕೊಂಬೆ ಬೆಚ್ಚಿತ್, ಮಣ್ಣ್‌ಕಾಯಿ ಪಡೆಪೊತ್ತ್‌ ಮಂಡೆಬೆಚ್ಚ ಬೀರಂಗಕ್‌, ಕೈಮಲಂಗಿ ತೊತ್ತಿತ್. ಬಯ್ಯಕ್‌ ಮನೆಕ್‌ ಬಂದಿತ್‌, ನೆಲ್ಲಕ್ಕಿ ನಡುಬಾಡೆಲ್‌ ಕೋಲ್ ತಾಕಿ ಬೆಚ್ಚಿತ್(ಪೊಲಾಕ ಎಡ್ತ ಪೋನ ಕೋಲ್, ಅಚ್ಚಕ್‌ ನ್ಯಾರವೂ ನಂಗಡ ಕೂಡೇ ಇಕ್ಕೋಂಡು. ನಂಗಡ ಕಾರೋಣ ಕೋಲ್ ರೂಪತ್‌ ನಂಗಡ ಕೂಡೆ ಉಂಡ್ ಎಣ್ಣುವ ನಂಬಿಕೆ ಅದ್) ಕಾರೋಣರ ತೊತ್ತಿತ್,
ಆನದು, ಪಾಲ್ಂಗೂಳ್‌ ಕೂಡ್ನನಕೆ ನಂಗಡ ಅನುಕೂಲಕೊತ್ತ ಅಡಿಗೆ ಮಾಡಿತ್‌, ಕೊಡಿ ಬಾಳೆ ಎಲಕಂಡತ್, ಕನ್ನಿಮೂಲೆ ಕೋಂಬರೆ, ಅಲ್ಲೇಂಗಿ ಉಂಬಳಮನೆರ ಬರೀಲ್‌ ಮೀದಿ ನೀರ್‌ ಬೆಚ್ಚಿತ್. ಒಕ್ಕಣೆ ಕಟ್ಟಿತ್‌ ಅಕ್ಕಿ ಇಡೋಂಡು. (ಅಂದ್‌ ಅಲ್ಲೇಂಗಿ ಪಿತ್ಯಾಂದ್‌ ಕಾರೋಣ ಕೋಟತೋ, ಕೈಮಡತೋ ಕಾರೋಣಂಗ್‌ ಇಡ್‌ವದ್‌ ಉಂಡೇಂಗಿ ಮನೆಲ್‌ ಬೋರೆ ಮೀದಿ ಬೆಕ್ಕೊಂಡೂಂದಿಲ್ಲೆ), ಮೀದಿ ಬೆಪ್ಪಕ ಅಜ್ಜಪ್ಪಂಗ್‌ ತಪ್ಪತೆ ಕಳ್ಳ್‌(ಕಾಚಿಂಗಳ್ಳ್‌ ಉಂಡೇಂಗಿ ನಲ್ಲದ್), ಕಾಕಿಬೀಡಿ(ಸೀಗರೇಟ್‌ ಅಜ್ಜಪ್ಪಂಗ ಒತ್ತವುಲೆ) ಕೊಡಿಯಲೆ ಅಡಿಕೆ ಬೆಪ್ಪಾನ ಮರ್ಪಕ್ಕಾಗ. ಮೀದಿಕ್‌, ಪಣ್ಣ್‌, ಬರ್ತ ತಿಂಡಿ ಪ್ಯಾಟೆರದ್‌ ಆಗ, ಹಲಾಲ್‌ ಮಾಡ್‌ನ ಎರ್ಚಿ ಆಗವೇ ಆಗ…
ಇನ್ನನೆ ನಂಗಡ ಪಿಂಡ ಬೆಪ್ಪಕ್‌ ಉಳ್ಳ ಕ್ರಮಾಂದ್‌ ಅಜ್ಜಪ್ಪ ಎಣ್ಣಿ ತಂದ ಪೋಲೆ, ನಾನ್‌ ದಂಡ್‌ ಕಾಲ ಬಯ್ಯತೊಟ್ಟ್‌ ಈ ಕ್ರಮತ್‌ನ ಆಪಚ್ಚಕ್‌ ಮಟ್ಟಕ್ ನಡ್ತುವ ಪ್ರಯತ್ನ ಮಾಡಿತುಳ್ಳ. ಮಿಂಞಕ್‌ ನಂಗೆಲ್ಲರೂ ಒತ್ತ್‌ ನಡ್ತೋಕ್‌ ಪೇಚಾಡ್‌ನಕ, ಕಾಲ ಮುಂದಾರಕ್‌ ನಂಗಡ ಮೂಲ ಪದ್ದತಿನ ತಿರಿತ್‌ ನಡ್ತಿಯಂಡ್‌ ಕೊಡವಾಮೆನ ಕೊಂಡಾಡುವಕ್‌ ನಂದಾಕೂ…
ಮಾಜನಕೆಲ್ಲಾ ಕಾವೇರಿ ಚಂಗ್ರಾಂದಿರ ನಲ್ಲಾಮೆ….
