ನಾಡ್ಲ್ ನಾಳ್- 24
ಕೈಂಜ ವಾರತಿಂಜ….
ಕಿಡ್ಕೆಕಾಯಿತ್ ಉಳಿ ನೋಟ್ನ ಚಿಮ್ಮಂಗೂ ಒರ್ ಗಳಿಗೆ ಎಂತ ಮಾಡಂಡೂಂದ್ ಗೊತ್ತಾಯಿಲೆ. ಮಾಲ್ ಸಮೇತ ತಾನ್ ಕ್ಟ್ಟಿ ಬೂವಾನಗುಂಡ್ ಬಾಯಿ ಮೇಜಿತ್ ಬಚಾವಾಪಕ್ ಸಾಧ್ಯ ಇಲ್ಲೇಂದ್ ಗ್ಯಾನ ಮಾಡಿಯಂಡ್ ನಿಂದತಂವೊ.
ಬೋಂಡಿಕೆ ಪ್ರಮಾಣ ಮಾಡಿತ್ ತಾನ್ ಮರಕಳ್ಳ ಅಲ್ಲಾಂದೂ; ನೇರಾನ ವಿಷಯ ಇನ್ನನೇಂದೂ ಎಣ್ಣಲು. ಆಚೇಂಗಿ ಖಾಕಿಯಡ ಕೂಡೆ ಉಂಡಾ ಆಣೆ -ಭಾಷೇ!
ಪಟ್ಟೆದಾರಂಡೋ, ಅವಂಡ ಕುಟ್ಟಿಯಡೋ ಮೋಸತ್ನ ನೆನ್ತಿತ್ ಚಿಮ್ಮಂಡ ಚೋರೆ ಕೊದಿಪಕ್ ಸುರು ಆಚಿ. ಒಂದೋ ಚಾವು, ಇಲ್ಲೇಂಗಿ ಬಾವು. ಇಂದ್ ಏದಾಚೇಂಗಿ ಒಂದ್ ಆಯಿತೇ ಆಕಂಡು. ಎಲ್ಲಾಡ ಮಿಂಞಲ್ ಪಟ್ಟೆದಾರಂಡ ಚೋರೆ ಕುಡ್ಚಿತ್ ಜೈಲ್ಲ್ ಅಳೆಪಿ. ಅನ್ನನೆ ಮಾಡ್ನಕ ನಾಡ ಪಪ್ಪಂಡ ಆತ್ಮಕೂ ಶಾಂತಿ, ಒಕ್ಕವೂ ಉದ್ದಾರಾಪ.
ಪಲ್ಲ್ ಕಡ್ಚಂಡ್ ಎದಿಕೆ ಪಡಿ ತೊರ್ಪಕ್ ಪೊರ್ಟತ್, ಚಿಮ್ಮ
ಅಂವೊ ಮಿಂಞಕ್ ಪೋಕತನೆಕೆ ಪಾರಿತ್ ಮೋಂವಂಡ ಎದಿಕೆ ನಿಂದತ್, ತಂಗವ್ವ.
ಚಿಮ್ಮ ಅವ್ವಂಡ ಮೂಡ್ನ ಒರ್ ತರತ್ ನೋಟ್ಚಿ. “ಹಿಹಿಹಿ…” ಚೆನ್ನ ಬಲ್ಂಙನೆ ತೆಳ್ಚತ್, ತಂಗವ್ವ.
ಚಿಮ್ಮ ಮಂಡೆನೊಮ್ಮ ಕೊಡ್ಕಿಯಂಡ್ ಗ್ಯಾನ ಮಾಡ್ಚಿ – ಅಮ್ಮ ಬೊಳ್ತ ಪೊಡಿಯವೇ ಉಡ್ತಿತಿಂಜಿಯೆ. ಅ… ಆಚೇಂಗಿ ಈ ಮೂಡ್! ಅಮ್ಮಂಡ ಬಾಯಿರ ಸುತ್ತು ಇಚ್ಚಕ್ ಜುಮ್ಮು ಕೂಡಿತುಂಡಾ? ಬಾಯಿಂಜಿ ಕೊಡಿಯಲೆ ಕರೆ ಪರ್ಂಜಂಡುಂಡಾ…? ನೋಟಿಯಂಡೇ ನಿಂದತ್, ಚಿಮ್ಮ.
“ಕುಂಞೀ…, ಪಟ್ಟೆದಾರಂಡ ಚೋರೆ ಕುಡಿಪಕ್ ಪೊರ್ಟಿತುಳ್ಳಿಯಾ? ನೀಡನ್ನತ ವಿದ್ಯಾವಂತಂಗ್ ಕೊಲ್ಲ್- ಕೊಲೆ ಎಣ್ಣ್ನದಲ್ಲ. ಅವನ ಕೊಂದಕ ಕೂಡ್ನ ಜನಡ ಮಿಂಞಲ್ ನೀನ್ ಒರ್ ತಪ್ಪಿತಸ್ತ ಕೊಲೆಗಾರನಾಪಿಯ. ನೀನಿಕ್ಕ ಸಧ್ಯಕ್ ಬಚಾವಾಪಕ್ ನೋಟ್. ಪೊರ್ಮೆ ಕಡ್ಂದಿತ್ ಒರೇ ಪುಡಿ ಪುಡ್ಚ – ‘ಮರ ಮಂಡಿ ಒಂದೂ ನಾನ್ ಮನೆಲ್ ಬೆಚ್ಚಂಡಿತಿಲ್ಲೆ. ನಾಕ್ ಒರ್ ವಿಷಯವೂ ಗೊತ್ತಿಲ್ಲೆ. ಈ ಪಟ್ಟೆದಾರನೇ ನಾಕ್ ಕೆಟ್ಟ ಪೆದ ಮಾಡಿತ್ ಕೆಣಿಪಕ್ ಮರತ್ನ ಬರಿಯತ್ ಬೆಚ್ಚಿ ತಿಕ್ಕೂ’ಂದ್ ಎಣ್ಣ್.”
“ಪೋಲೀಸ್ಕಾರ ಎಚ್ಚಕ್ ಕುರಿ ಕೇಟಕಲೂ ಇದೇ ತಕ್ಕ್ನ ಎಣ್ಣ್. ಪೋ… ಪೋಪ್ಪಾ… ಪೋ ಮೋನೇ। ನಾಕ್ ಎನ್ನಂಗೋ ಒರ್ ಗಳಿಗೆ ಬುದ್ದವಂ ಡೂಂದಾಪ.”
ಎಣ್ಣಿಯಂಡಿಂಜನೆಕೇ ತಡಿಲ್ ಪೊದ್ದ್ನದ್ ತೆಳ್ಂಜನೆಕೆ ಕಡಿಕೆಲ್ ದಡ್ಡ್ಂದ್ ಬುದ್ದ್ ಪೋಚಿ, ತಂಗವ್ವ.
ಅಕ್ಕಣೆಕ್ ದಡ ದಡ ದಡಾ…ಂದ್ ಮುಂಬಡಿ ಕೊಟ್ಟಲ್ ಜೋರಾಚಿ. ಚಿಮ್ಮ ಮೆಲ್ಲೆ ಪೋಯಿತ್ ಎದಿಕೆ ಪಡಿ ತೊರ್ಂದತ್.
ಪೋಲೀಸ್ ಗಪ್ಪು ರೈಟರ್ ದಂಡ್ ಪೇದೆಯಡ ಕೂಡೆ ನಿಂದಿತಿಂಜತ್. ಬೆಂಬರತ್ ಪಟ್ಟೆದಾರ, ಅಣ್ಣು, ಕೀರಿ – ತೂರಿ ಎಲ್ಲಾ ಒರ್ ತರ ತೆಳಿ ತೆಳ್ಚಂಡ್ ನಿಂದಿತಿಂಜತ್.
“ಚಿಮ್ಮಾ, ನೀಡ ಅಪ್ಪ ಅಚ್ಚಕೋರ್ ಯೋಗ್ಯ ಮನ್ಷ್ಯ. ಆಚೇಂಗಿ ನೀನ್…?” ಗಪ್ಪು ರೈಟರ್ ಏಂಗ್ಚಿ.
“ಯೋಗ್ಯಂಗ ಇಂಜಕ ಅಯೋಗ್ಯಂಗಕ್ ಬದ್ಕುವಕ್ ಕಷ್ಟ ಆಕೂಂದೇ ಅಪ್ಪನ ಕೊಲೆ ಮಾಡಿತಿಕ್ಕು ಸಾರ್” ಪಟ್ಟೆದಾರನೇ ನೋಟಿಯಂಡ್ ರೈಟರ್ಕ್ ಜವಾಬ್ಚಿ, ಚಿಮ್ಮ.
“ಗಪ್ಪಣ್ಣಾ…, ಬಂದ ಕಾರ್ಬಾರ್ನ ಮಿಂಞ ಮಾಡಿತ್ ತೀತ್ರಿ, ಬಾಕಿ ಜೈಲ್ಲ್ ವಿಚಾರಣೆ ಮಾಡಿಯವಲು” ಎಣ್ಣಿತ್ ಪೇದೆಯಳ ನೋಟ್ಚಿ, ಪಟ್ಟೆದಾರ. ಪೇದೆಯ ಕೋಳ ಪುಡ್ಚಂಡ್ ಚಿಮ್ಮಂಡ ಬರಿಕ್ ನಡ್ಂದತ್.
ವಿಷಯ ಎಂತಂದ್ ಎಣ್ಣತೆ, ವಾರಂಟ್ ಕಾಟತೆ ನನ್ನ ಅರೆಸ್ಟ್ ಮಾಡ್ನಕ ನಾನ್ ಮುಂಡತಿಪ್ಪುಲೆ. ಅದೂ ಒರ್ ಕೊಲೆಗಾರನ ಪುಡ್ಚನೆಕೆ ಕೋಳ ಬೋರೆ! ಹ್ಂ! ಬಾಯಿ ಬಡ್ಚಂಡ್ ಪೇದೆಯಡ ಪಕ್ಕ ಪಾರ್ಚಿ, ಚಿಮ್ಮ.
ಗಪ್ಪು ರೈಟರ್ ಅವನ ತಡ್ತಿತ್, “ನೀನ್ ಬೂಟಿ ಪಿಂಞ ಚಾಂದ್ ಮರ ಕಟ್ಟಿತ್ ಕೇರಳಕ್ ಸಾಗ್ಚಿಟ್ಟಂಡುಳ್ಳಿಯಾಂದೂ, ನೀಡ ಮನೆಲ್ ಮರತ್ರ ಸ್ಟಾಕ್ ಉಂಡ್ಂದೂ ಗುಮಾನಿ ಉಂಡ್.” ಎಣ್ಣ್ಚಿ.
“ನಾನ್ ಏದ್ ಮರತ್ನೋ ಸ್ಟಾಕ್ ಮಾಡಿತಿಲ್ಲೆ. ಮರ ಮಂಡಿರ ಒರ್ ವಿಷಯವೂ ನಾಕ್ ಗೊತ್ತಿಲ್ಲೆ” ಎದೆ ಮಲ್ಕಿಯಂಡ್ ನಿಂದತ್, ಚಿಮ್ಮ.
ಚಿಮ್ಮಂಡ ತಕ್ಕ್ಕ್ ಕೀರಿಕ್ಣ್ಣ ಪುರ್ಕ ತೆಳ್ಚಿರ್ತ್.
ರೈಟರ್ ಸರ್ಚ್ ವಾರೆಂಟ್ನ ಜೋಬ್ಂಜಿ ಪೊರಮೆ ಎಡ್ಪದು ಪಟ್ಟೆದಾರ ಎಣ್ಣ್ಚಿ – ‘ತೇಡುವ ಅವಶ್ಯಕತೆ ಒಂದೂ ಇಲ್ಲೆ. ಇಂವೊ ಮರ ಬೆಚ್ಚ ಜಾಗತ್ನೆಲ್ಲ ನಂಗಡ ಮಕ್ಕ ನೋಟಿ ಬೆಚ್ಚಿತ್. ಎನ್ನಂಗೆಣ್ಣಕ ಒಕ್ಕತ್ರ ಮಾನ – ಮರ್ಯಾದಿರ ಪ್ರಶ್ನೆ ನೋಟಿ, ಏಳ್ರಾ ಕೀರಿ, ರೈಟರ್ ಸಾರ್ಕ್ ಮರ ಕಾಟಿ ಕೊಡ್” ಎಣ್ಣಿಯಂಡ್ ಕೀರಿರ ಬಯ್ಯ ಬರಿಯಕ್ ನಡ್ಂದತ್, ಪಟ್ಟೆದಾರ.
ಪೋಲೀಸ್ಕಾರ ಪಟ್ಟೆದಾರಂಡ ಬಯ್ಯ ಪೋಪಕ ಚಿಮ್ಮಂಗ್ ತಾನೂ ಪೋಕತೆ ವಿಧಿ ಇಂಜಿಲೆ. ಅವಂಗ್ ಒರ್ ತರ ಮಾನಕೇಡ್ಲ್ ಪ್ರಾಣ ಪೋಪನೆಕೆ ಆಪಯಿಂಜತ್. ಊರ್ಕಾರ, ಮನೆಕಾರ, ಪೋಲೀಸ ಎಲ್ಲಾಡ ಎದಿಕೆ ತಾನ್ ಕಳ್ಳಂಡ ಪಟ್ಟತ್ ಅಳ್ಕಂಡುವಲ್ಲಾಂದ್ ಜಿಂವ ಪುಂಡ್ನನೆಕೆ ಆಚೇಂಗಿಯೂ, ಕಣ್ಣ್ಲ್ ನೀರ್ ಬರತನೆಕೆ ದುಃಖತ್ ಎರಕಿಯಂಡತಂವೊ.
ಮರತ್ನ ಅಟ್ಟಿತ್ ಬೆಚ್ಚಿತಿಂಜ ಜಾಗತ್ನ ನೋಟ್ನ ಕೀರಿಕ್ಣ್ಣ “ಹ್ಂಂ” ಂದ್ ಜಿಂವ ಬಯ್ಯಕ್ ಬಪ್ಪಕಿಲ್ಲೆನ್ನೋ ಎಣ್ಣುವಚ್ಚಕ್ ಜೋರಾಯಿತ್ ಎಕ್ಕಿರ್ತ್.
ಚಿಮ್ಮ ತಾಂಡ ಕಣ್ಣ್ನ ದಂಡ್ ಕುರಿ ಉದ್ದಿಯಂಡ್ ನೋಟ್ಚಿ. ತೆಳಿಕಂಡುವಾ… ಮೊರ್ಡಂಡುವಾಂದ್ ಗೊತ್ತಾಯಿಲೆವಂಗ್. ಮರ ಬೆಚ್ಚಿತಿಂಜ ಜಾಗತ್ ನಿನ್ನಾಂದ್ ಕೊಟ್ಟ್ಕ್ ಕೂಡತ ನಾಲ್ ರಾಸ್ ಅತ್ತ ಪಡ್ತಂಡ್ ಮೇಚಿಕರ್ಕುವಯಿಂಜತ್. ಜನ ಬಂದಾನ ನೋಟ್ನ ಒರ್ ಎಮ್ಮೆ ಎದ್ ನಿಂದ್ರ್ರುವಂಜಿ ಜಲಿ… ಜಲಿ… ಜಲೀ…ಂದ್ ಉಚ್ಚಾಟಿರುವಂಜಿ ನಾಲ್ ಕುಪ್ಪು ಚಾಣ ಇಟ್ಟತ್.
“ಥೂ ನಿನ್ನ ಪಾಳಾಪಕ್, ಎಲ್ಲಿಯರಾ ಮರ…?” ಉಚ್ಚೆ ನೆಲಕ್ ಬೂವಕ ಸುರಾಲ್ಕ್ ಪಾರ್ನ ಮಣ್ಣ್ನ ತೀಟಿರುವಂಜಿ, ತಾಂಡ ಚೋಂದ ಕಣ್ಣ್ನ ಪೊರ್ಮೆ ದಾಟ್ಚಿಟ್ಟಂಡ್ ಕೀರಿಕ್ಣ್ಣನ ಗದ್ಮ್ಚಿ, ಗಪ್ಪು ರೈಟರ್.
”ಪಾಪ ಆ ಕ್ಣ್ಣನ ಎನ್ನಂಗ್ ಬಯ್ಯುವಿರ ಗಪ್ಪಣ್ಣಾ…! ಇವಂಡ ಮನೆರ ಅಟ್ಟ, ಕೊಟ್ಟ್, ತೋಟ ತೋಡ್ನೆಲ್ಲಾ ಒಮ್ಮ ತೇಡ್ಚಿಡಿ.
ರೈಟರ್ರ ಅಪ್ಪಣೆರನೆಕೆ ಕೀರಿ, ಅಣ್ಣು, ವಾಸು, ಅರುಣ, ದಂಡ್ ಪೇದೆಯ ಎಲ್ಲಾ ಕೂಡಿತ್ ಇಡೀ ಜಾಗತ್ನ ತುಡ್ಂಗ್ಚಿ. ಎಲ್ಲಿಯೂ ಮರ ಕ್ಟ್ಟ್ಲೆ.
“ಅದೇಪ್ಪಾ…. ಚಿಮ್ಮ ಈ ತರ ಮಾಡ್ಚೀಂದ್ ಎಣ್ಣುವಕ ನಾನ್ ಮರಕೆಟ್ಟಿ ಪೋನ. ನಾಡ ಪೊಣ್ಣಂತೂ ಚಿಮ್ಮ ಆ ತರ ಮಾಡ್ನದ್ ನೇರಾಚೇಂಗಿ ನಾನ್ ಮೂಕ್ಕಾಯಿತೆ ಉಂಡ್ರುವೀಂದ್ ನಾಡ ಕೂಡ ಪಂತ ಕೆಟ್ಟ್ಚಿ. ಪಟ್ಟೆದಾರಂಗ್ ಕೇಪನೆಕೆ ನೆರೆಮನೆಕಾರ ಕರುಂಬಯ್ಯ ಮಾಸ್ಟರ್ ಎಣ್ಣುವಕ, ಪಟ್ಟೆದಾರಂಗ್ ಪಾತಾಳಕ್ ತಾಂದಂಡುಳ್ಳನೆಕೆ ಆಚಿ. ಪೊಲಂಜತೆಕ್ ಪಟ್ಟೆದಾರ ಮನೆಕಾರಡ ಮನೆ ಮನೆಕ್ ಕ್ಣ್ಣಂಗಳ ಆಯೆಚಿತ್ ವಿಷಯ ಎಣ್ಣುವಕ ಮನೆಕಾರ ದಾರೂ ಚಿಮ್ಮ ಮರ ಕಡ್ತ್ ಬೆಚ್ಚಿತಿಕ್ಕೂಂದ್ ನಂಬಿತಿಂಜಿಲೆ. ಎಲ್ಲಾಂಗೂ ಚಿಮ್ಮಂಡ ಮನೆಕೇ ಪೋಯಿತ್ ನೋಟಿರಂಗಾಂದ್ ಜೀಪ್ರ ಬಯ್ಯ ಎಲ್ಲಾರೂ ಸಾಲ್ಕೆಟ್ಟಿ ಬಂದಿತಿಂಜತ್.
“ಚಿಟ್ಟಪ್ಪಣ್ಣಾ…, ಬಿ. ಎ., ಎಂ. ಎ. ಓದ್ನ ಡಿಗ್ರಿಕಾರಕ್ ಬಪ್ಪನ್ನತ ಪದವಿಯಲ್ಲ ಈ ಪಟ್ಟೆದಾರಿಕೆ. ಕೊಡವ ಪೆರಿಯಯಿಂಗಕ್ ಎಚ್ಚಕ್ ಮರ್ಯಾದಿ ಕೊಡ್ಪಾಂದ್ ಎಣ್ಣುವಾಂಗ್ ಈ ಪಟ್ಟೆದಾರಿಕೇ ಸಾಕ್ಷಿ. ನಂಗಡ ಒಕ್ಕತ್ ಚಿಮ್ಮಂಡನ್ನತ ಎಳ್ತ್ ಪಡ್ಚ ಬುದ್ದಿಕಾರ ಬಾಲೆಕಾರ ಇಂಜಿತೂ ನಿಂಗಕ್ ಪಟ್ಟೆದಾರಿಕೆ ತಂದಿಯೆ ಬೊರೀ ವಯಸ್ಸ್ರ ಸರ್ಟಿಫಿಕೇಟ್ಲ್ ಗೊತ್ತುಂಡಾ? ನಿಂಗಳೇ ಈ ತರ ಚಲ್ಲ್ ಕಳಿ ಕಳಿಪದ್ ಸೆರಿಯಾ?” ಚಿಮ್ಮಂಡ ಬೋಜಪ್ಪ ಪಟ್ಟೆದಾರಂಡ ಮೂಡ್ಕ್ ತುಪ್ಪುವನೆಕೆ ರೇಗ್ಚಿ.
ಗಪ್ಪು ರೈಟರೂ, ಪೇದೆಯಳೂ ಬಯ್ಯಕ್ ಪೊರ್ಟತ್.
“ಗಪ್ಪಣ್ಣ ನಿಲ್ಲೀ! ನಂಗಡ ಐನ್ ಮನೆಲ್ ಕೊಲೆ ಆನ ಒರ್ ಮುದ್ಕಿರ ಮಾಲ್, ಮಟ, ಪೊನ್ನ್ ಪಣತ್ನೆಲ್ಲಾ ಒರ್ ಮೋರ್ಕುತ್ತಿಲ್ ದುಂಬ್ಚಿಟ್ಟಿತ್, ತಾಂಡ ಬಾಡೆಲ್ ಬೆಚ್ಚಂಡ್, ತಾಂಗ್ ಬೋಂಡಿಯಾನನೆಕೆ ಖರ್ಚ್ ಮಾಡಿಯಂಡುಂಡ್ ಈ ಚಿಮ್ಮ. ಇವನೇ ಎನ್ನಂಗ್ ಮುದ್ಕಿನ ಕೊಂದಿತಿಪ್ಪಕಾಗ? ನಾಡ ತಕ್ಕ್ಲ್ ನಂಬಿಕೆ ಇಂಜಿಲೇಂಗಿ ನಿಂಗಳೇ ಪೋಯಿತ್ ಬಾಡೆನ ಒಮ್ಮ ತೇಡಿ ನೋಟಿ.”
“ನಿಂಗಡ ತಕ್ಕ್ ಕೇಟಂಡ್ ಒಮ್ಮ ತೇಡ್ಚಿಟ್ಟದ್ ಮದಿ ಚಿಟ್ಟಪ್ಪಣ್ಣಾ. ನಿಂಗಡ ಮೋರ್ಕುತ್ತಿ, ಬೆಲ್ಲ ಕುಡ್ಕನೆಲ್ಲ ತುಡ್ಂಗುವಕಲ್ಲ ನಂಗಡ ಡಿಪಾರ್ಟ್ಮೆಂಟ್ ಉಳ್ಳೋ. ಚಾಂದ್ ಮರ, ಬೂಟಿಮರ ಉಂಡ್ಂದ್ ಇರ್ಕಿರ್ಲೇ ನಿಂಗ ಪುಕಾರ್ ಮಾಡ್ನಾಂಗ್ ನಾನ್ ಬಂದಿಯೆ.” ಲಂಚ – ಗಿಂಚಕ್ ಕೈ ಒಡ್ಡತ ಗಪ್ಪು ರೈಟರ್ ಮುಲಾಜಿಲ್ಲತೆ ಮಿಂಞಕ್ ನಡ್ಂದತ್,
ಚಿಟ್ಟಪ್ಪಂಡ ಕೈಲ್ ಮೇಚಿ ತಿಂದ ಪೇದೆಯ ಮಾತ್ರ ಮನ್ಸಿಲ್ಲತ ಮನ್ಸ್ಸ್ಲ್ ರೈಟರ್ರ ಬಯ್ಯ ನಡ್ಂದತ್.
ಬಾಕಿ ಮಿಂಞಕ್…
