ನಾಡ್ಲ್ ನಾಳ್- 23
ಕೈಂಜ ವಾರತಿಂಜ…
ಎದ್ದ್ ಬುದ್ದ್ ಓಡ್ನ ಕೀರಿಯೂ, ಕೂಟ್ಕಾರಳೂ ಪತ್ತೇ ನಿಮಿಷತ್ ಪಟ್ಟೆದಾರಂಡ ಪಟ್ಟಿಕ್ ಎತ್ತ್ಚಿ.
ಕೀರಿಕ್ಣ್ಣ ತಾಂಡ ಕೂಟ್ ಕಾರಡ ಕೂಡೆ ಅತ್ತಟಿ ಪೋಪಾನೇ ಕಾತಂಡಿಂಜ ತಂಗವ್ವ, ಚಿಮ್ಮನ ಚೆನ್ನ ಜೋರಾಯಿತೇ ಕಾಕ್ಚಿ.
“ಚಿಮ್ಮಾ…?”
“ಎಂತಮ್ಮಾ…?”
”ಬರಿಯತ್ ಬೆಚ್ಚದ್ ಐನ್ಮನೆರ ಬಾರಿ ಪಟ್ಟೀಂದ್ ಕೀರಿಕ್ಣ್ಣ ಎಣ್ಣ್ಚಿ’
“ಅಲ್ಲಾಂದೆಣ್ಣಿಯೆ ದಾರ್…?”
“ಎಂತ, ಎನ್ನ್, ಎತ್ತ್ಂದ್ ಕೇಪಕ ಎಲ್ಲಾ ಚಿಮ್ಮಣ್ಣಯ್ಯನ ಕೇಳ್ ಕುಂಞವ್ವಾಂದೆಣ್ಣ್ಚಿ.”
“ಕೇಳ್, ದಾರ್ ಬೋಂಡಾಂದೆಣ್ಣಿಯೇ?” ಅವ್ವನ ನೋಟಿಯಂಡ್ ಚೆರ್ಂಙನೆ ತೆಳ್ಚತ್, ಚಿಮ್ಮ.
“ಚಿಮ್ಮಾ… ಈ ತರ ಪಾಳ್ ಪಣಿ ಕೆಜ್ಜಕ ಚತ್ತ್ ಪೋನ ನೀಡ ಪಪ್ಪಂಗ್ ಸ್ವರ್ಗ ಕ್ಟ್ಟುವಕಿಲ್ಲೆ. ಲೋಕಕ್ ಲೋಕವೇ ನೀನ್ ನಲ್ಲ ಮನ್ಷ್ಯಂದ್ ನಿನ್ನ ಕೊಂಡಾಡಿಯಂಡಿಪ್ಪಕ, ನೀಕ್ ಈ ಪಾಳ್ ಬುದ್ದಿ ಎನ್ನಂಗ್ ಬಾತ್? ಆ ಚಾಂದ್ ಕಳ್ಳ ಕೀರಿಕ್ಣ್ಣನ ಕೂಟಿಯಂಡ್ ಸುತ್ತುವಕಲೇ ಗ್ಯಾನ ಮಾಡ್ನ ಸಂಗದೋಷತ್ ನೀನ್ ಪಾಳಾಪಿಯಾಂದ್, ಇದ್ಂಗೇ ಕಾಂಬ ಚೆನ್ನ ದಿನತ್ಂಜಿ ಐನ್ಮನೆ ರಿಪೇರಿಂದ್ ಐನ್ಮನೆರ ಬಯ್ಯ ಬುದ್ದಿಯೆ ನೀನ್! ಪೋಯಿ ಪೋಯಿ ಐನ್ಮನೆರ ಮರತ್ನ ಮಾರಿತ್ ಸಂಪಾದನೆ ಮಾಡುವಚ್ಚಕ್ ಲುಚ್ಚ ನಾಯಿಟಿಯ ಕುಂಞಿ ನೀನ್?” ಒರ್ ಉಸ್ರ್ಕ್ ಕೇಟಂಡ್ ಜೋರಾಯಿತ್ ಮೊರಡುವಕ್ ಸುರು ಮಾಡ್ಚಿ ತಂಗವ್ವ.
“ಅಮ್ಮಾ ssss…” ವರ್ನ ಮಕ್ಕೆಲ್ಲ ಎದ್ದಿತ್ ಅಳಪಚ್ಛಕ್ ಜೋರಾಯಿತ ಕ್ರ್ ಕೂತ್ಟ್ಟತ್, ಚಿಮ್ಮ.
ತಂಗವ್ವಂಡ ಮೊರೆ ಯಾಲೆ ಓಡಿರ್ತೋ. ಪಾರುವ ಎದೆನ ಪೊತ್ತಿಯಂಡ್ ಮೋಂವನೇ ನೋಟ್ಚವ.
“ಅ… ಅಮ್ಮಾ…. ನಿ… ನೀನಲ್ಲತೆ ಬೋರೆ ದಾಡೇಂಗಿರ ಬಾಯಿಲ್ ಈ ನೇರತ್ ಇಲ್ಲಿ ಈ ತಕ್ಕ್ ಬರಂಡುಯಿಂಜತ್…?” ಚೆಡಿ ಪಿಂಞ ಮಾನಕೇಡ್ನ ಪುಡ್ತಕ್ ಕೊಂಡ ಬಂದಂಡ್ ಪರ್ಂದತ್, ಚಿಮ್ಮ.
‘ಮಕ್ಕಳ ತೇಡುವಕ್ ಕೀರಿಕ್ಣ್ಣನ ಕೂಟಿಯಂಡ್ ಕಾಡ್ಕ್ ಪೋಪೀಂದ್ ಪೋನಂವೊ, ಇಕ್ಕ ಈ ಬಾರಿನ ಪೋರಿಯಂಡ್ ಬಂದಿತ್ ಪೊತ್ತಿ ಬೆಚ್ಚಿಯಲ್ಲಾ….. ನಾನ್ ಎಂತಂದ್ ಗ್ಯಾನ ಮಾಡಡ್ ಕುಂಞೀ…?”
“ನೀಡ ಚೋರೆನ ಸಂಶಯ ಪಡುವಕ್ ನೀಕ್ ಞಾಣ ಆಪುಲೆಯಮ್ಮಾ? ನನ್ನ ಇಚ್ಚಕ್ ಉದ್ದ ಬಣ್ಣ ಬೆಪ್ಪ್ಚಿಟ್ಟ ನೀಕ್ ನನ್ನ ನಂಬಿಕೆ ಇಲ್ಲೆಯಾ?” ಅವ್ವನ ಕುಲ್ಕಿಯಂಡ್ ಕೇಟತ್, ಚಿಮ್ಮ.
“ನಿನ್ನ ನಂಬಿಕೆ ಉಂಡ್ ಕುಂಞಿ. ಆಚೇಂಗಿ, ಸಂಗ ದೋಷತ್ ಪಾಳ್ ಪಣಿಕ್ ಇಳ್ಂಜಿರ್ತಿಕ್ಕೂಂದ್ ನೆನತ್ನ. ಆ ಕೀರಿ, ಅರುಣ, ವಾಸು, ಅಣ್ಣು ಕ್ಣ್ಣಂಗೆಲ್ಲ ಊರ್ಲ್ ನಲ್ಲ ಪೆದ ಇಲ್ಲೆ. ದಂಡ್ ಕುರಿ ಜೈಲ್ಲ್ ಅಳಿತಿತಿಂಜತ್. ಆ ಚಿಟ್ಟಪ್ಪ ಬಾವ ಜಾಮೀನ್ಲ್ ಬುಡ್ತಿಯೆ. ನೀನ್ ಪೊರ್ಮೆ ಇಂಜಾಂಗ್ ಅಯಿಂಗಡ ಪುರಾಣ ಗೊತ್ತಿಲ್ಲೆ. ಆ ಕಳ್ಳ ಕ್ಣ್ಣಂಗಳ ಕೂಟಿಯಂಡ್ ಬಾರಿ ಪಟ್ಟಿನ ಇಲ್ಲಿ ಬೆಪ್ಪಕ ನಾನ್ ಎಂತ ಗ್ಯಾನ ಮಾಡಡ್ ಕುಂಞೀ…?”
“ನೇರಮ್ಮ, ನೀಡನ್ನತ ಸಾಧಾರಣ ಜನ ಗೇನ ಮಾಡುವಕೆಲ್ಲ ಪೋಪುಲೆ. ಬಾಯಿ ಬಲ್ಯವಂಡ ಬಟ್ಟ್, ನಾಯಿ ಬಲ್ಯವಂಡ ಬೋಟೇಂದ್ ಪಳಂಜೊಲ್ಲೇ ಉಂಡಲ್ಲಾ; ಪಟ್ಟೆದಾರಂಡನ್ನತ ಅಯೋಗ್ಯಂಗ, ಕ್ಯಾಮೆಯಿಲ್ಲತಯಿಂಗ, ಕೊಲೆಗಾರಂಗ ಪರೆವ ತಕ್ಕೂ, ಕಳಿಯೂ ಸಮಾಜಕ್ ಸತ್ಯತ್ ಕಂಡಂಡುಂಡ್. ಖಂಡಿತವಾದಿ ಲೋಕ ವಿರೋಧಿ ಎಣ್ಣುವನೆಕೆ, ಸತ್ಯ ಧರ್ಮತ್ ನಡ್ಂದಂಡುಳ್ಳ ನಾಡನ್ನತಯಿಂಗ ಸಮಾಜಕ್ ವಿರೋಧಿ ಆಯಂಡುಂಡ್. ಇದ್ ಮಾಜನಡ ತಪ್ಪಲ್ಲಮ್ಮಾ…. ಮೀದಿ – ನೀರಿಲ್ಲತೆ ಗುರುಕಾರೋಣಂಗ, ಪೂಜೆ, ಪುರಸ್ಕಾರ ಇಲ್ಲತೆ ದೇವಾನುದೇವತೆಯ ಕಣ್ಣ್ ಕೆಟ್ಟಿತ್ ಅಳ್ತ್ ಪೋನಾಂಡ ಫಲ ಇದಮ್ಮಾ” ಎಣ್ಣಿಯಂಡ್ ಬಾಯಿ ಬಡ್ಚ ಚಿಮ್ಮ, ಮರತ್ರ ವಿಷಯತ್ ನಡ್ಂದ ಕತೆನೆಲ್ಲ ತಂಗವ್ವಂಗ್ ಎಣ್ಣಿ ಕೊಡ್ತತ್.
ಪಟ್ಟೆದಾರಂಡ ಪೊರ್ಕಿ ಕತೆ ಕೇಟಿತ್ ತಂಗವ್ವ ಮರಕೆಟ್ಟಿ ಪೋಚಿ
”ಅಮ್ಮಾ….. ಏದೇ ಸಂದರ್ಭತೂ ಸತ್ಯ, ಧರ್ಮ, ನೈಪು ಈ ಮೂಂದಾಂಗ್ ಬೆನ್ನ್ಟ್ಟಿತ್ ನಡ್ಪಂವೊ ಅಲ್ಲಮ್ಮ ಈ ನೀಡ ಮೋಂವೋ!”
”ಅಯ್ಯೋ ಕುಂಞಿ…. ಸತ್ಯ- ಧರ್ಮ ಎಣ್ಣಿಯಂಡ್ ಪಟ್ಟೆದಾರಂಡನ್ನತ ಬಲ್ಯಯಿಂಡ ವಿರೋದ ಕೆಟ್ಟಿಯವತೆ ಮೋನೇ…!” ತಂಗವ್ವಂಡ ಕಣ್ಣ್ಲ್ ನೀರ್ ಪೆರೆಕೆಟ್ಟ್ಚಿ.
“ನಾಡ ಸತ್ಯತ್ರ ಬಟ್ಟೆಕ್ ಇಡೀ ಸಮಾಜ ಅಲ್ಲ, ಲೋಕ ಒಂದಾಚೇಂಗಿಯೂ ನಾನ್ ಮಂಡೆ ಬಗ್ಗ್ಚಿಡುಲೆಮ್ಮಾ, ಇಂದ್ ನಂಗಡ ಜನಾಂಗತ್ ನಡ್ಂದಂಡುಂಡಲ್ಲಾ ಮೋಸ, ವಂಚನೆ, ಲಾಬಿ, ಚೇಲಾಗಿರಿ, ಎದ್ದ ಎತ್ತ್ರ ಬಾಲ ಪುಡ್ಚವೊ… ಇದೆಲ್ಲಾ… ಇದ್ನೆಲ್ಲಾ ಇಲ್ಲತೆ ಮಾಡುವಿ, ದೇವ ಒಂದ್ ನಾಡ ಬರಿಕ್ ಇಂಜಕ ಮದಿ.”
“ದೇವ, ಧರ್ಮ, ಸತ್ಯ, ಸಂಸ್ಕೃತೀಂದೆಣ್ಣಿತ್ ತಾಂಡ ಮೂಕ್ ನೇರೆ ನಡ್ಂದಂಡಿಂಜ ನೀಡ ಪಪ್ಪಂಗ್ ಕ್ಟ್ಟ್ನ ಇನಾಂ ಎಂತ ಕುಂಞೀ? ಚೋರೆ ಕಕ್ಕಿತ್ ಚತ್ತತ್ಂದ್ ಪರೆವಯಿಂಗಕ್ ಬಟ್ಟೆ ಆಪನ್ನತ ಚಾವ್ ಕ್ಟ್ಟ್ಚಿ, ಅಚ್ಚಿಕೆ.” ಮೂಡ್ಕ್ ಸೆರಗ್ ಪೊತ್ತಿಯಂಡ್ ಎಕ್ಕಿ ಎಕ್ಕಿ ಮೊರ್ಟತ್, ತಂಗವ್ವ.
“ಅಮ್ಮಾ…?”
“ಹ್ಂ”
“ಪಪ್ಪ ಚತ್ತಿತಿಲ್ಲೆ”
“ಪಿಂಞ….?”
“ಕೊಲೆ ಮಾಡ್ಚಿ!” ಅವ್ವಂಗ್ ಬೆನ್ನ್ಟ್ಟಿತ್ ನಿಂದ ಚಿಮ್ಮ, ಕೆಂವಕ್ ನೆತ್ತಿನ ಕುಟ್ಟಿಯಂಡ್ ದುಃಖತ್ನ ಎರಕುವಕ್ ನೋಟ್ಚಿ.
“ದ… ದಾರಪ್ಪ…ಪ… ಪಪ್ಪನ ಕೊ… ಕೊಂದಿಯೆ?” ತಂಗವ್ವ ಬಿಕ್ಕಚಿ.
“ಕೊಂದಿಯೇ ಅಲ್ಲ…, ಪಟ್ಟೆದಾರ ಕೊಲೆ ಮಾಡ್ಚಿಟ್ಟಿಯೆ…!”
ತಂಗವ್ವಂಡ ಕಣ್ಣ್ಂಜಿ ನೀರ್ ತುಳಿ ಒಂದಾಂಡ ಬಯ್ಯ ಒಂದ್ ಉರ್ಂಡ್ಚಿ
“ಅಮ್ಮಾ…. ಪಪ್ಪ ಚಾವಕ್ ಚೆನ್ನ ಸಮಯಕ್ ಮಿಂಞ ಪಪ್ಪಂಗೂ, ಪಟ್ಟೆದಾರಂಗೂ ಎನ್ನೇಂಗಿ ವ್ಯಾಜ್ಯ ಇಂಜತಾ…?”
“ಮೋನೇ…. ಅದ್ನೆಲ್ಲ ಕೆಟ್ಟಿಯಂಡ್ ಎಂತ ಆಕಂಡು ಎಣ್ಣ್. ಬೋಂಡ ದೊರೇ. ನೀನ್ ಅವಂಡ ವಿರೋದ ಕೆಟ್ಟಿಯವತೆ. ನೀಕೂ ಪಪ್ಪಂಡ ಗತಿ ಬಂದ್ ಪೋಕು. ಬೋಂಡ… ಬೋಂಡಾ…” ತಂಗವ್ವ ಒರ್ ಉಸ್ಕ್ ಬೊರ್ಪಯಿಂಜತ್.
“ಅಮ್ಮಾ…. ನಂಗಡ ಕೇಳಿಪಟ್ಟ ಒಕ್ಕ ಇಂದ್ ಮೂಲೆ ಕೂಡಂಡಿಕೆ, ನಂಗಡ ಒಕ್ಕತ್ರ ಬಾಲೆಕಾರ ಕಳ್ಳ್, ಬೀಡಿ, ಕಳ್ಳತನಕ್ ಮಂಡೆ ಬಗ್ಗ್ಚಿಡಂಡಿಕೆ, ಆ ನೀಚ ಪಟ್ಟೆದಾರನೇ ಕಾರಣ. ನಂಗಡ ಒಕ್ಕ ನಂದಾಕಂಡಿಕೆ ನಾಡ ಪ್ರಶ್ನೆಕ್ ಜವಾಬ್ ತಾಮ್ಮಾ…. ನೀಕೋರ್ ಪೋಡಿ ಬೋಂಡ. ಎಣ್ಣಮ್ಮಾ….?”
“ಪಪ್ಪ ಚಾವಕ್ 2 ತಿಂಗಕ್ ಮಿಂಞ ಪಟ್ಟೆದಾರ ಐನ್ಮನೆರ ವಾಡೆ ಜಾಗತ್ರ ಕಾಡ್ನೆಲ್ಲ ಕೆತ್ತಿತ್ ಕಾಫಿಗಿಡ ಬೆಪ್ಪಕ್ ಸುರು ಮಾಡ್ಚಿ. ಪಪ್ಪ ಇಂಗ್ ಬಲ್ಂಙನೆ ವಿರೋಧ ಮಾಡ್ಚಿ. ಆಸಾಮಿ ಬಗ್ಗ್ಲೆ ಆಖೀರಿಕ್ ಪಪ್ಪ ಮನೆಕಾರಳೆಲ್ಲ ಕಂಡಿತ್ ವಿಷಯ ಎಣ್ಣ್ಚಿ. ಎಲ್ಲಾರೂ ಪಟ್ಟೆದಾರಂಡ ಕೀಳ್ ಬುದ್ದಿನ ರೋಸಿತ್ ಪರ್ಂದತ್, ಎಟ್ಟೇ ಎಟ್ಟ್ ದಿನತ್ ಪಟ್ಟೆದಾರ ಈ ವಿಷಯತ್ ಚರ್ಚೆ ಮಾಡುವಕ್ ಒಕ್ಕತ್ರ ಒರ್ ಮಾಸಭೆ ಕಾಕ್ಚಿ. ಪಪ್ಪ ಕುಸೀಲ್ ತಾಂಡ ಅಭಿಪ್ರಾಯ ಎಣ್ಣುವಕ್ ಪೋಚಿ. ಅಲ್ಲಿ ಆನದೆಂತ? ಇಡೀ ಮನೆಕಾರ ಒಂದಾಯಿತ್ ಪಟ್ಟೆದಾರ ಮಾಡಿಯಂಡುಳ್ಳದ್ ಸೆರೀ: ವಾಡೆ ಮನೆದಳತ್ ಬಂದ ಫಸಲ್ನ ಒಕ್ಕ ಫಂಡ್ಕ್ ಇಡುವಲೊ, ದಾರೂ ಕೊಕ್ಕೆ ಪರೆವಕಯ್ಯಾಂದ್ ಎಣ್ಣುವದು ಪಪ್ಪಂಗ್ ಆಶ್ಚರ್ಯ ಆಚಿ. ಆಚೇಂಗಿಯೂ ಪಪ್ಪ ಮುಂಡತಿಂಜಿಲೆ. ಆ ಜಾಗತ್ ಬೋಂಡಿಕೆ ಫಸಲ್ ಎಡ್ಕಡ್. ಆಚೇಂಗಿ ಜಾಗತ್ನ ಪಟ್ಟೆದಾರಂಡ ಪೆದಕ್ ಮಾಡಿಯಂಡದ್ ತಪ್ಪೂಂದ್ ವಾದ ಮಾಡ್ಚಿಲೊ. ಕೂಡ್ನಯಿಂಗೆಲ್ಲ ಪಪ್ಪನೇ ಬಯ್ಯುವಕ್ ಸುರು ಮಾಡ್ಚಿಲೊ. ಮಾಸಭೆಕ್ 1 ದಿನಕ್ ಮಿಂಞ ಪಟ್ಟೆದಾರಂಡ ಮನೆಲ್ ಮನೆಕಾರಕೆಲ್ಲ ಒರ್ ‘ತಯಾರಿ ಸಭೆ” ಯೂ ಕಳ್ಳ್ರ ಪೊಳೆಯೂ ಒಕ್ಕ್ನದ್ ಪಪ್ಪಂಗ್ ಬಯ್ಯಂಜಿ ಗೊತ್ತಾಚಿ.
ತಂಗವ್ವ ಎಣ್ಣಿಯಂಡಿಂಜನಕೇ ಕೆಂವತ್ಲಿಂಜ ಗಡಿಯಾರ 6 ಕುರಿ ಪೊಜ್ಜತ್.
”ಉಯ್ ತಾಯಿ… ಇರ್ ಪೊಲ್ಂದದೇ ಗೊತ್ತಾಯಿಲೇ” ಎಣ್ಣಿಯಂಡ್ ಕಿಡ್ಕೆ ತೊರ್ಂದತ್, ತಂಗವ್ವ.
ಅಕ್ಕಣೆಕ್ ಬರ್ರ್ಂದ್ ಪಟ್ಟೆದಾರಂಡ ಜೀಪ್ ಪಟ್ಟಿಲ್ ನಿಂದತ್. ಪೋಲೀಸ್ಕಾರ ದಂಡಾಳು ಜೀಪ್ಲಿಂಜಿ ಇಳ್ಂಜತ್, ಕೂಡೆ ಪಟ್ಟೆದಾರ, ಕೀರಿ, ಅರುಣ, ಅಣ್ಣು ಇಳ್ಂಜತ್. ಜೀಪ್ರ ಬೆಂಬರತೇ ಮನೆಕಾರಳೂ ಗುಡ್ಡೆ ಗುಡ್ಡೆ ಬಂದಂಡಿಂಜತ್.
“ನಾಡ ಮೋನೇ…, ನಿನ್ನ ಕೆಣ್ಚಿರ್ತವ್ಯಯ್ಯಾ…” ಚೆರಿಯ ಸ್ವರತ್ ಕೂತ್ ಕೊಡ್ತಂಡ್, ತಡಿಲ್ ಶಕ್ತಿ ತಾಂದನೆಕೆ ಕಿಡ್ಕೆರ ಕಂಬಿನ ಪುಡ್ಚಿತ್ ತೂಂಗಿ ನಿಂದತ್, ತಂಗವ್ವ.
ಬಾಕಿ ಮಿಂಞಕ್…
