ಬೆಂಗಳೂರ್ ಸಮಾಜ ಏಳೇಕ್ರೆ ಜಾಗ…
- ಉಳ್ಳಿಯಡ ಡಾಟಿ ಪೂವಯ್ಯ.
ಬೆಂಗಳೂರ್ ಯಲಹಂಕ ಭಾಗತ್ ಏಳ್ ಏಕ್ರೆ ಜಾಗ ಬೆಂಗಳೂರ್ ಕೊಡವ ಸಮಾಜಕ್ ದಾನ ರೂಪತ್ ದಕ್ಕ್‌ನಾಂಗ್ ಆದ್ಯ ಆಯಿತ್ ಅವ್ವ ಕಾವೇರಿಕೂ , ಮಾಸ್ವಾಮಿ ಈಶ್ವರಿಗ್ಗುತಪ್ಪಂಗೂ ಅಡ್ಡ ಬುದ್ದಿತ್, ಈ ಜಾಗ ಸಮಾಜಕ್ ದಕ್ಕುವಕ್ ಪ್ರಯತ್ನ ಪಟ್ಟ ಎಲ್ಲಾಕೂ ನಲ್ಲಾಮೆ ಬಯಂದಂಡ್, ಎಲ್ಲಾಂಗೂಡಿ ಪಕ್ಕ ಪಕ್ಕ ಸುಮಾರ್ 60 ಕೋಟಿರ ಆಸ್ತಿನ 3 ಕೋಟಿಕ್ ಉಳ್’ಪಿತ್ ಕೊಡವಕ್ ಒರ್ ಇನಾಂ ಕ್’ಟ್ಟ್’ಚಿಟ್ಟನ್ನತ ವೀರಾಜಪೇಟೆ ಕ್ಷೇತ್ರ ಶಾಸಕನೂ, ಮುಖ್ಯಮಂತ್ರಿರ ಕಾನೂನ್ ಸಲಹೆಕಾರನೂ ತಾಕತ್ತ್’ರ ಜನ ಸೇವಕನೂ ಆಯಿತುಳ್ಳ ಸನ್ಮಾನ್ಯ ಅಜ್ಜಿಕುಟ್ಟಿರ ಎಸ್ .ಪೊನ್ನಣ್ಣ ಅಯಿಂಗಕ್ ಕೊಡವಾಮೆರ ಪರ ಕೈತೊತ್ತ್ ನಲ್ಲಾಮೆ ಬಯಂದಂಡ್, ಈ ಕುಂಞಿನ ಕಾವೇರಮ್ಮೆ ಕಾತ್ ರಕ್ಷಣೆ ಮಾಡಡ್ಂದ್ ಬೋಡಿಯವಿ.
ನಿನ್ನಾಂದ್ ಈ ಸುದ್ದಿ ಪೊರಬೂವಕ ನಾನ್ ಗೇನ‌ಮಾಡ್’ನ ಬೆಂಗಳೂರ್ ಕೊಡವ ಸಮಾಜತ್ ಪೊನ್ನಣ್ಣಂಗ್ ಒರ್ ಪೊಂದೇರ್(ಪೊನ್ನ್’ರ ತೇರ್, ರಥ) ರೆಡಿ ಆಯಿತಿಕ್ಕೂ…. ಕೊಡಗ್ಂಜಿ ಕೊಡವ ಸಮಾಜ. ಒಕ್ಕೂಟತ್’ರ ಮುಂದಾಳ್’ತನತ್ ಎಲ್ಲಾ ಸಮಾಜ ಸಂಘ ಸಂಸ್ಥೆ ಒಂದಾಂಡ ಬಯ್ಯ ಒಂದ್ ರಾಜಧಾನಿ ಸಮಾಜಕ್ ಪೋಯಿತ್, ಶಾಸಕ ಪೊನ್ನಣ್ಣಂಗ್ ಸಾರ್ವಜನಿಕ ಸನ್ಮಾನ ಮಾಡಿತ್, ಗೌರವತ್’ರ ತಕ್ಕ್’ಲ್ ಕೊಂಡಾಡಿತ್ ಕೊಡವಕ್ ಸರಕಾರತ್ಂಜಿ ಇಂಞಚ್ಚಕೂ ಉಪಕಾರ ದಕ್ಕುವನೆಕೆ ಮಾಡ್’ಚಿಡೂಂದ್. ಆಚೇಂಗಿ ಆಯಂಡುಳ್ಳದೆಂತ ??????
ಕೇಡ್ , ಕೇತರೆ, ಕಾಲ್’ಬಲಿ .. ಸಮಾಜ ರಾಜಕೀಯತ್’ರ ಹೊಲಸ್ ಚರ್ಚೆ… ! ಥೂ….ನಂಗಡ ಕೊಡವಕ್ ಎನ್ನಂಗ್ ಇಚ್ಚಕ್ ಬುದ್ದಿ ಕಮ್ಮಿ ಆಯಿಟ….??? ಕೊಡವಂಗ್ ಕೊಡುವನ ಕಂಡಕ ಆಪ್’ಲೇಂದೆಣ್ಣುವಾಂಗ್ ಇದೇ ಉದಾಹರಣೆ.ಸದಾನಂದ ಗೌಡ ಮುಖ್ಯಮಂತ್ರಿ ಆಯಿತಿಪ್ಪಕ ಏಳ್ ಏಕ್ರೆ ಸ್ಯಾಂಕ್ಸನ್ ಆಚೀಂದ್ ಎಲ್ಲಾರು ಕುಶಿ ಪಟ್ಟತ್. ಆಚೇಂಗಿ ಶಿವ ಕೊಟ್ರೂ ಪೂಜಾರಿ ಕೊಡಲಿಲ್ಲಾ ಎಣ್ಣವ ಕನ್ನಡ ಗಾದೆರನೆಕೆ ಸರ್ಕಾರ 50, 60 ಕೋಟಿ ಮಾರ್ಕೆಟ್ ರೇಟ್ ತಂದಿತ್ ಎಡ್’ತೋಳಿಂದ್ ಎಣ್ಣಿರ್’ತ್. (ದುಡ್ಡ್ ಕೊಡ್’ತಿತ್ ಸೈಟ್ ಎಡ್’ಪದಾಚೇಂಗಿ ಜಾಗಕೆನ್ನ್ ಬರ) ಇದ್ಂಡ ಅರ್ಥ ಪಾಂಬು ಚಾವಕಾಗ ಕೋಲ್ ಮುರಿವಕಾಗಂದ್ ಈ ಕೃತ್ರಿಮ ಸಾಧು ಕೊಡವಂಗ್ ಅರ್ಥ ಆಗತದೊ…ಅಲ್ಲಾ ಬೋರೆಯಿಂಗಡ ಚಿಂಡ್ ಸೆರೀಂದಾಪದೋ ಗೊತ್ತಾಗ.
ಆಯಿರ ಪರಂದಕ ಅರೆಪಣ ತೂಂಗ. ನೇರೆ ವಿಷಯಕ್ ಬಪ್ಪಿ. ಬೆಂಗಳೂರ್ ಕೊಡವ ಸಮಾಜತ್’ರ ಜಾಗ ಯೋಜನೆರ ಪ್ರಯತ್ನಕ್ ಜೈ ಎಣ್ಣಂಡು.ಕೊಡವ ಸಮಾಜತ್’ರ ಪದಾಧಿಕಾರಿಯಳ ಜನ ಓಟ್ ಇಟ್ಟಿತ್ ಅಂಜಿ ಎಡ್’ತ್ ಆಯ್ಕೆ ಮಾಡುವೊ ಎನ್ನಂಗೆಣ್ಣಕ ಕೊಡವಾಮೆರ ಉಳಿಕೆ ಬೊಳಚೆಕಾಯಿತ್ ನೈಕಡ್ಂದ್. ಆಪೋಲೆ ಬೆಂಗಳೂರ್ ಕೊಡವ ಸಮಾಜ ಆಡಳಿತ ಮಂಡಳಿ ಜನಾದೇಶ ಪೋಲೆ ಏಳೇಕ್ರೆ ಜಾಗಕಾಯಿತ್ ಯೋಜನೆ ಇಟ್ಟಿತ್ ಪೇಚಾಡ್’ಚಿ. ಆಚೇಂಗಿ ದಕ್ಕಿತಿಂಜಿಲೆ. ಪುನಾದಿಯ ಪುದಿಯ ಆಡಳಿತ ಮಂಡಳಿ ರಚನೆ ಆಯಿತ್ ಕಾಲ ಮೂಂದಾನಕಲೂ ಏಳೇಕ್ರೆ ದಕ್ಕಿತಿಂಜಿಲೆ. ಇಕ್ಕ ಶಾಸಕ ಅಜ್ಜಿಕುಟ್ಟಿರ ಎಸ್. ಪೊನ್ನಣ್ಣಂಡ ಎಡೆಬುಡತ ತಾಕತ್ತ್’ರ ಪ್ರಯತ್ನತ್ ಕ್’ಟ್ಟಿತ್. ಕ್’ಟ್ಟುವಕ್ ಮೊಳಿ ದಾರ್? ಕಾರಣ ಕರ್ತ ದಾರ್? ಸುಲಭತ್ ಕ್’ಟ್ಟುವದಾಚೇಂಗಿ ಅಕ್ಕಲೇ ಕ್’ಟ್ಟಂಡಿಂಜತಲ್ಲಾ..???? ಇಕ್ಕ ನಿಂಗ ಎಣ್ಣಿ ಪೊನ್ನಣ್ಣಂಡ ಕೊಡವಾಮೆರ ಈ ಸೇವೆಕ್ ಬೆಲೆ ಕೆಟ್ಟುವಕಯ್ಯುವಾ? ಎಂ.ಎಲ್.ಎ ಒರ್ ಜನಾಂಗಕ್ ಮಾತ್ರ ಎಂ.ಎಲ್.ಎ ಅಲ್ಲ ….ಅನ್ನನಿಪ್ಪಕ ಕೊಡವ ಜನಾಂಗಕ್ 53 ಕೋಟಿರಚ್ಚಕ್ ಲಾಭ ಮಾಡಿ ತಂದ ಎಂ. ಎಲ್ ಎ. ಪೊನ್ನಣ್ಣ ಅಯಿಂಗಕ್ ಕೊಡವ ಕೊಡ್’ತಂಡುಳ್ಳ ಬೆಂಬಲ , ಮರ್ಯಾದಿ ಎಂತ? 4 ಕಾಲಕ್ ಬಯ್ಯ ಇಂಜ ಮಾಜಿ ಶಾಸಕ ಏಳೇಕ್ರೆಕ್ ಚೆನ್ನ ಒತ್ತಾಸೆ ತಾತ್ಂದೆಣ್ಣುವಕ ಅಚ್ಚಕ್ ಬೆರಿಯ ನೋಟೀಸ್ ಬೋರ್ಡ್ ತಯಾರಾಯಿರ್’ತ್…..ಕೊಡವ ಸಂಸ್ಥೆರ ಬೋರ್ಡ್’ರ ಟಾಪ್’ಲ್ ಕೊಡವೇತರ ಶಾಸಕಂಡ ಪೆದ ಮಿನ್ನಿರ್’ತ್, ಉಟ್ಟಿ ಮಂಡೆ ಕಾಯುವ ಉರಿಬೆದ್’ಲ್ ಸರ್ವೆ ಆಪಕ ಸುಬ್ಬಯ್ಯ,ನಾಣಯ್ಯ. ಪೆಮ್ಮಯ್ಯಂ…ಡನ್ನತ ಬಂಬಂಗೊಡವಡ ಚಾಣೆಮಂಡೆ ಅಂತಾ ಉರಿ ಬೆದ್’ಲ್ (ಮುಟ್ಟೆ ಬೂಕಿತಿಂಜಕ ಆಮ್ಲೆಟ್ ರೆಡಿ ) ಪಾಪ ಕರ್ಂಜಂಡಿಪ್ಪಕ ಆ ಶಾಸಕಂಗೊಬ್ಬಂಗ್ ಒರ್ ಕೊಡವೊ ಬಲ್ಯ ಕೊಡೆ ಪುಡ್’ಚಂಡ್ ನಿಂದಿತಿಂಜತ್. ಎನ್ನಂಗೆಣ್ಣಕ ಅಂವೊ ಕೊಡವೇತರ ಆನಗುಂಡಾಯಿತಿಕ್ಕು. ಗುಲಾಮ ಚಾಲ್’ರ ಕೊಡವಕ್ ಇಂಞೋರ್ ಕೊಡವೊ ಎಂತ ಮಾಡ್’ಚೇಂಗಿಯು ಕೇಡ್ ಕಿಚ್ಚ್.
ದುಂಬ ಎಳ್’ದುವದ್ ಸೆರಿಯಾಗ. ಇಕ್ಕ ಎಣ್ಣಿ….ನಿಂಗಡ ಕೇಡ್, ಕಿಚ್ಚ್ , ಒಳ ರಾಜಕೀಯ, ಸ್ವಾರ್ಥ ಗೇನ…..ಇನ್ನತ ಹೇಸಿಗೆ ಕಳಿ ನೆಲ್ಲ ಬುಟ್ಟಿತ್ ನಾಳೆತ್’ರ ನಂಗಡ ಪೀಳಿಗೆರ ಮಕ್ಕ ಮರಿಯಳ ಗೇನ ಮಾಡಿತ್ ಒಂದಾಪಿರಾ? ಬೋರೆ ಜನಾಂಗ ಆಯಿತಿಂಜಕ ಇಂದ್ ಏಳೇಕ್ರೆ ಕೇರಾಫ್’ಲ್ ನಮ್ಮೆ ಮಾಡುವಯಿಂಜತ್. ಇಕ್ಕ ನಿಂಗ ಎಣ್ಣಿ….ಬೆಂಗಳೂರ್ ಕೊಡವ ಸಮಾಜಕ್ ಅಯಿಂಬತ್ ಮೂಂದ್ ಕೋಟಿ ಉಳಿಚಿಟ್ಟಿತ್ ಏಳೇಕ್ರೆ ಇನಾಂ ತಪ್ಪ್’ಚಿಟ್ಟ ಶಾಸಕ ಪೊನ್ನಣ್ಣಂಗ್ ನಿಂಗಡ ಥ್ಯಾಂಕ್ಸ್ ಗಿವಿಂಗ್ ಎಂತ? ನಾಡ ಪ್ರಕಾರ ಉಳಿಕೆ ಮಾಡಿ ತಂದ 53 ಕೋಟಿಲ್ 1ಕೋಟಿ ಖರ್ಚ್ ಮಾಡಿತ್ ಏಳೇಕ್ರೆ ಜಾಗತ್’ರ ಎಂಟರೆನ್ಸ್’ಲ್ ಶಾಸಕ ಅಜ್ಜಿಕುಟ್ಟಿರ ಎಸ್ ಪೊನ್ನಣ್ಣಂಡ (ಪೊನ್ನ್’ಕುಂಞಿರ) ಆಳೆತ್ತರ ಸ್ಟೇಚ್ಯೂ (ಪ್ರತಿಮೆ) ನಿಪ್ಪ್’ಚಿಟ್ಟಿತ್, ಪೊನ್ನ್’ರ ಕೋಟಿಂಗ್ ಕೊಡ್’ಪದ್ ನಲ್ಲದ್. ಕಡೇಕ್ ಒರ್ ತಕ್ಕ್ ಗೇನ ಇರಡ್. ….ಎಚ್ಚರ ಕೊಡವಾ…..ಕಾನೂನ್’ನ ಅರತ್ ಕುಡ್’ಚ ಪೊನ್ನಣ್ಣಂಗ್ ದಕ್ಕ್’ನ ಜಾಗತ್’ನ ಅನ್ನನೇ ತಪ್ಪ್’ಚಿಡುವಕೂ ಗೊತ್ತಿಕ್ಕು….. ಎಚ್ಚರಾ!!!!ಜೈ ಅವ್ವ ಕಾವೇರಿ…
