ಏದ್ 5 ಸ್ಟಾರ್ ಹೊಟೇಲ್ಲ್ ಕ್ಟ್ಟೂಂದ್ ನೆನತಿಯಂಡತ್ ಚಿಮ್ಮ. ಅಂತೂ ಐನ್ಮನೆ ತೆಳಿ ತೆಳಿಪನೆಕೆ ಕಂಡತವಂಗ್.
“ಹ್ಂ… ಆ ಪಟ್ಟೆದಾರ ಕಟ್ಟಂಡ್ ಪೋನ ಬಾರಿಪಟ್ಟಿನ ಒಮ್ಮ ಬಲ್ಚಂಡ್ ಬಂದಿತ್ ಮಾಮೂಲ್ ಜಾಗತ್ ಬಡ್ಚಿಟಕ ಐನ್ಮನೆ ಸೆರಿ ಆನನೆಕೆ” ಎಣ್ಣಿಯಂಡ್ ಗೊಣಂಗ್ನ ಚಿಮ್ಮಂಡ ಕಣ್ಣ್ಲ್ ಕುಸಿರ ಕಣ್ಣ್ ನೀರ್ ಒಕ್ಕ್ಚಿ.
ಪೊಲಾಕ್ಂಜಿ ಒರ್ ಪೋಲೆ ಪಣಿ ಕೆಜ್ಜಂಡಿಂಜ ಚಿಮ್ಮಂಡ ಕೂಡೆ ತಕ್ಕ ಸುರು ಮಾಡುವಕ್ ಧೈರ್ಯ ಇಲ್ಲತೆ ನೇರ ಕಯಿಪಕ್ ಕಳ್ಳ ಪಣಿ ಕೆಜ್ಜಂಡಿಂಜತ್ ಕೀರಿಕ್ಣ್ಣ. ಇಕ್ಕ ಚಿಮ್ಮಂಡ ಕಿರಿಲ್ ಒರ್ ಪೂತೆಳಿ ಎಲಂಗುವದು ಆಸಾಮಿಕ್ ಧೈರ್ಯ ಬಾತ್.
ಎಣ್ಣೆ ಕಾಂಗತ ಜುಲ್ಪು ಮಂಡೆನೊಮ್ಮ ಕೊರ್ರ್… ಕೊರ್ರ್ಂದ್ ಮಾಂದ್ನ ಕೀರಿ ಕ್ಣ್ಣ “ಗಂಟೆ ಎಚ್ಚಕ್ ಅಣ್ಣಯ್ಯಾ” ಂದ್ ಕೇಟತ್.
“ಎನ್ನಂಗ್ರೇ ಇಚ್ಚಕ್ ಬೆರಿಯ ಕೆಲ ಪಯಿಚಂಡುಂಡಾ? 25 ಬಯತ್ ದುಂಬ್ಚೀಂದ್ ಎಣ್ಣಿಯಾ? ಅಚ್ಚಕೆಲ್ಲ ಪಯಿಪು ತಡ್ಪಕಯ್ಯುಲೆರೇ” ಂದ್ ತೆಳ್ಚಂಡ್ ವಾಚ್ ನೋಟ್ನ ಚಿಮ್ಮಂಗ್ ಆಶ್ಚರ್ಯ ಆಚಿ. ನಾಲಾಂಗ್ ಅಂಜಿ ನಿಮಿಷ ಇಂಜತ್. ಪಣಿಕ್ ನಿಗ ಇಟ್ಟಿತಿಂಜಾಂಗ್ ನೇರ ಪೋನದೇ ಗೊತ್ತಾಯಿತಿಂಜಿಲೆ. ಮಜ್ಜಣ ಉಂಬಕೂ ಮರ್ಂದ್ ಪೋಯಿತಿಂಜತ್.
ಕೀರಿ ಕ್ಣ್ಣನ ಪಾಪಾಂದಾಚಿ ಚಿಮ್ಮಂಗ್. ಅಂವೊ ಬೆರಿಯ ಕಾಯಿ ಮರಕ್ ತೂಕಿತಿಂಜ ಕೂಪದಿನ ಎಡ್ತಿತ್ ಕೀರಿಕ್ ಕೊಡ್ತತ್.
“ನೀನ್ ಉಂಬ್ಲೆಯಾ ಚಿಮ್ಮಣಯ್ಯಾ…” ಬರ್ತ ಕೋಳಿ ತುಂಡ್ನ ಬಾಯಿಕ್ ಚಾಡಿಯಂಡ್ ಕೇಟತ್ ಕೀರಿ.
“ನಾನ್ ಇಂಞ ಒಮ್ಮಲೆ ಬೈಟೆಕ್ ಉಂಬಿ” ಚಿಮ್ಮಂಡ ಕಣ್ಲ್ ನೀರ್ ದುಂಬ್ಚಿ.
ಕಾಡ್ಲ್ ಕುಂಞಿಯ ಇಚ್ಚಕ್ ದಿನ ಕೂಳ್ ನೀರಿಲ್ಲತೆ ಬದ್ಕಿತಿಕ್ಕುವಾ? ಮಕ್ಕ ನೇರಾಯಿತೂ ಕಾಡ್ಲೇ ಇಕ್ಕುವಾ? ಚಿಮ್ಮಂಡ ತೊಂಬೆನ ದಾರೋ ನೆರ್ಂಬ್ನನೆಕೆ ಆಚಿ.
ಕೂಳ್ – ನೀರ್, ಪಣ್ಣ್- ಫಲ ಎಂತಾನ ಕಂಡಕಲೂ ಒಮ್ಮಲೆ ಮಕ್ಕಳ ಗ್ಯಾನ ಬಂದಿತ್ ಮಂಡೆ ತಿರ್ನನೆಕೆ ಅಪಯಿಂಜತವಂಗ್, ಕೂಡನ್ನೆ ಒರ್ ತರ ಧೈರ್ಯ ಎಡ್ತಂಡ್ ದೇವಡ ಮೀದ ಭಾರ ಇಡುವಯಿಂಜತ್.
