ಬೆಂಗಳೂರ್, ಮಾ:28:- ಕೇಳಿಪೋನ ಸಿನೆಮಾತಾರೆ, ಪಲಪಾಜೆರ ನಟನೆಕಾರ, ನಿರ್ದೇಶಕ, ನಿರ್ಮಾಪಕ, ಆಪಾಡಂಡ ರಘು ಅಯಿಂಗಡ ತಡಿ ಬುಟ್ಟ ಜೀಂವಕ್ ತಣು ದಕ್ಕಡ್ಂದ್, ಬೆಂಗಳೂರ್ ಕೊಡವ ಸಮಾಜ ಪೂ-ನಮನ ಒಪ್ಪುಚಿಟ್ಟತ್.
ಸಮಾಜ ಬಾಡೆಲ್, ಬೆಂಗಳೂರ್ ಕೊಡವ ಸಮಾಜ ಕೊರವುಕಾರ, ಕರವಟ್ಟಿರ ಪೆಮ್ಮಯ್ಯ ಅಯಿಂಗಡ ಕೊರವುಕಾರಿಕೆಲ್, ಆಡಳಿತ ಮಂಡಳಿರ ಎಲ್ಲಾ ಮೂಪಂಗಡ ಕೂಡ್ ಕೂಟತ್ ನಡ್ಂದ ಆಯಿಮೆಲ್, ಆಪಾಡಂಡ ರಘು ಅಯಿಂಗಡ ಚಿತ್ರಪಟಕ್ ಪೂವು ಇಟ್ಟಿತ್, ಎಲ್ಲರೂ ತೊತ್ತ್ ಬಯಂದಂಡತ್.
ಈ ನ್ಯಾರತ್ ತಕ್ಕ್ ಪರಂದ, ಕರವಟ್ಟಿರ ಪೆಮ್ಮಯ್ಯ ಅವು, ಆಪಾಡಂಡ ರಘು, ಕೊಡವಡ ಆಸ್ತಿ, ಸಿನೇಮಾ, ನಟನೆರನ್ನತ ಕೋವುಲ್ ಒತ್ತಾಸೆ ಕಮ್ಮಿ ಇಂಜ ಕಾಲತ್, ರಘು ಅವು ಕನ್ನಡ, ಕೊಡವ, ಹಿಂದಿ, ಮಲೆಯಾಳಂ, ತೆಲಗುರನ್ನತ ಪಲಪಾಜೆರ ಸಿನೇಮಾ ಕೋವುಲ್ ನೈಚಿತ್ ಕೇಳಿ ಎಡ್ತದ್ ಇಡೀ ಜನಾಂಗವೇ ಪೆರ್ಮೆ ಪಡುವನ್ನತದ್. ಅಯಿಂಗಡ ನೈಪು ಮಿಂಞಕ್ ಈ ಕೋವುಲ್ ನೈಪಕ್ ಇರಾದೆ ಉಳ್ಳ ನಂಗಡ ಮಕ್ಕಕ್ ಬಟ್ಟೆ ಬೊಳಿಯಾಡ್ಂದ್ ಎಣ್ಣ್ಚಿ.
ಸಮಾಜತ ಕೂಟ್ಲೆಕ್ಕಪಟ್ಟಿಕಾರ, ಪೊನ್ನಚೆಟ್ಟಿರ ರಮೇಶ್ ಅವು ಅವು ಆಪಾಡಂಡ ರಘು ಅಯಿಂಗ ಬೊಳ್ಂದ್ ಬಂದ ಬಟ್ಟೆನ ಓದಿತ್ ಅರಿಚಿಟ್ಟತ್, ಕೂಡಿತಿಂಜ ಎಲ್ಲಾರೂ ರಘು ಅಯಿಂಗಡ ಚಿತ್ರಪಟಕ್ ಪೂ ಇಟ್ಟಿತ್ ತೊತ್ತ್ ಬೋಡ್ಯಂಡತ್.
ಇದೇ ನ್ಯಾರತ್ ಮೋಪು ಮಾಡ್ನ ಸಮಾಜತ ಕಾರ್ಯಕೂಟ್, ಆಪಾಡಂಡ ರಘು ಅಯಿಂಗಡ ನೈಪುಕ್ ಒತ್ತಾಸೆ ಆಯಿತ್ ಅಯಿಂಗ ಮಾದ ಕಾರ್ಬಾರ್ಕ್ ಸಮಾಜತ ಜಾಗತ್ನ ಬಣ್ಣೆ ಬುಟ್ಟ್ ಕೊಡ್ಪನ್ನಕೆ ನಿರ್ಕ್ ಮಾಡ್ಚಿಂದ್ ಸಮಾಜತ ಕಾರ್ಯಕಾರ ಕ.ಚಿರಿಯಪಂಡ ವಿವೇಕ್ ಮುತ್ತಣ್ಣ ಅವು ಅರಿಚಿಟ್ಟಿತ್.
