ನಾಡ್ಲ್ ನಾಳ್ -16
ಕೈಂಜ ವಾರತಿಂಜ….
“ಹ್ಹ… ನೀಡಪ್ಪಂಡದೂ ಅಲ್ಲಾ, ಇಡೀ ಒಕ್ಕಕ್ ಕೂಡಿತಿಪ್ಪಕ ಈ ಮನೆಂಜಿ ಒರ್ ಪಿಲ್ಲ್ ಕಳೆನ ಎಡ್ಪಕೂ ನೀಕೊಬ್ಬಂಗ್ ಹಕ್ಕ್ ಇಲ್ಲೇಂದ್ ಗೊತ್ತ್ಮಾಡ್ ಚಿಡುವಕ್ ಬುದ್ದ ಚೌಟದ್: ಗೊತ್ತಾಚಾ…?”
“ಏಯ್, ಕಳ್ಳಂಡನೆಕೆ ಬೆಂಬರತಿಂಜ ಚೌಟಿರುವಂಜಿ ಬಲ್ಯ ಅಳಕತೆ. ತಾಕತ್ತ್ ಉಂಡೇಂಗಿ ಪಕ್ಕ ಬಂದ್ ನೋಟ್ರೇ?”
ಅಣ್ಣುರ ತಕ್ಕ್ ತೀರುವಾಂಗ್ ಮಿಂಞಲೇ 7 ಅಡಿ ಕೊಡಿಂಜಿ ಅಡಿಕ್ ಪಾರಿತ್ “ಹ್ಂ… ಬಂದ” ಗರ್ವತ್ ಎಣ್ಣ್ಚಿ, ಚಿಮ್ಮ.
ಚಿಮ್ಮನ ಪೊಯ್ಯುವಕ್ ಕೈಕ್ ಒಂದು ಕ್ಟ್ಟತಾಪಕ ಒರ್ ಆಣಿಲ್ ತೂಂಗಿ ಕಳ್ಚಂಡಿಂಜ ಬಾರಿ ಪಟ್ಟಿಕ್ ಕೈ ಕೂಟ್ಚಿ, ಅಣ್ಣು.
“ಅಲ್ಲಲ್ಲ… ಪೊಯ್ತ್ ಕಳಿಕ್ ಪೊಳಿಪನ್ನತ ಮರವಾ ಅದ್…? ಕೇಟಂಡ್ ಅಣ್ಣುರ ಕೈಕ್ ಒರ್ ಚೌಟ್ ಕೊಡ್ತತ್, ಚಿಮ್ಮ.
ಅಣ್ಣು ಪುನಾದಿಯ ಚಿಮ್ಮಂಡ ಮೀದ ಪಾರಿಯಂಡ್ ಬಪ್ಪಕ ನಲ್ಲೋಣೆ ಗುದ್ದಿತೂ, ಪೊಜ್ಜಿತೂ ಅಣ್ಣುರ ಬೆಂಡ್ ಎಡ್ತತ್, ಚಿಮ್ಮ.
ಪೊಯ್ತ್ ತಡ್ಪ ಕಯ್ಯತಾಪಕ ಅಣ್ಣು ಎದಿಕೆ ಪಟ್ಟಿಕ್ ಓಡ್ಚಿ. ಚಿಮ್ಮನೂ ಅವಂಡ ಬಯ್ಯ ಓಡ್ಚಿ.
ಅಣ್ಣುರ ಕೂಟ್ಕಾರ ದಂಡಾಳ್ ಸದ್ದ್ ಕೇಟಿತ್ ಪೊರೆ ಮಂಡೆಲ್ ಬೆಚ್ಚಂಡೇ ಓಡುವಕ್ ಪೊರ್ಟತ್. ಚಿಮ್ಮ ದೂರತಿಂಜಿ ಬಡಿಯ ಚಾಡುವದು ಅಯಿಂಗ ಪೊರೆನ ಉಳ್ಪಿತ್ ಕಾಲ್ಕ್ ಬುದ್ದಿ ಎಣ್ಣ್ಚಿ.
ಚೆನ್ನ ದೂರ ಓಡಿತ್ ತಾನ್ ಇಂಞ ಚಿಮ್ಮಂಡ ಕೈಕ್ ಕ್ಟ್ಟುಲೇಂದ್ ಗೊತ್ತಾಪದು ಅಣ್ಣು ಕಾಕಿತ್ ಎಣ್ಣ್ಚಿ – “ಏ…ಯ್ ಪೊರ್ಮೆ ಪೋಯಿತ್ ಮಿಂಞತ್ರನೆಕೆ ಚಾಕ್ರಿಕ್ ಕೂಡಿಯಂಡಿಯಾ… ಬಚಾವ್ ಆಪಿಯ. ಇಲ್ಲೇ… ನೀಡಪ್ಪಂಡ ಗತಿಯೇ ನೀಕೂ… ಗೊತ್ತಿರಡ್” ಎಣ್ಣಿಯಂಡೇ ಓಡಿತ್ ಮರೆ ಆಚಿ ಕಳ್ಳಂಗ.
“ನೀಡಪ್ಪಂಡ ಗತಿಯೇ ನೀಕೂ…” ಆ ತಕ್ಕ್ನ ಚಿಮ್ಮ 3-4 ಕುರಿ ತಾಂಗ್ ತಾನೇ ಎಣ್ಣಿಯಂಡತ್.
“ಕಾಲಕ್ ಬಯ್ಯ ಕಾರಣ ನಿಪ್ಪಕ್ಂದ್ ಬೋರೆ ಮನೆಕ್ ಪೋನ ಪಪ್ಪ, ಚೋರೆ ಕಕ್ಕಿತ್ ಚತ್ತ್ ಪೋಚೀಂದ್ ಮನೆಲ್ ಅಮ್ಮಂಗ್ ಸುದ್ದಿ. ಅಮ್ಮ ಬಾಯಿ ಬಡ್ಚಂಡ್ ಓಡಿ ಪೋಯಿತ್ ನೋಟುವಕ ಸುದ್ದಿ ನೇರ್. ಟೆಲಿಗ್ರಾಂ ಕ್ಟ್ಟಿತ್ ಬಂದ ನಂಗಡ ಕೂಡೆ. ”ಪಪ್ಪ ಚೌಂಡಿರ ಪೋಕ್ಕ್ ಕ್ಟ್ಟಿ ಪೋಯಿತಿಕ್ಕು ಮಕ್ಕಳೇ”ಂದ್ ಅಮ್ಮಂಡ ಮೊರೆ ಪಡೆ…”
ಎಲ್ಲಾನ ನೆನತಿಯಂಡ್ ನಿಂದ ಚಿಮ್ಮಂಡ ಕಣ್ಣ್ ಚೋರೆ ಕಾರ್ಚಿ. ಪಲ್ಲ್ ಕರ… ಕರಂದ್ ಕಡ್ಚಿ ಪೋಚಿ.
**. ***. ****
ಎದ್ದ್ ಬುದ್ದ್ ಓಡ್ನ ಅಣ್ಣು ಪಿಂಞ ಕೂಟ್ಕಾರ ಓಡಿ ಪೋಯಿತ್ ಒಕ್ಕ ಪಟ್ಟೆದಾರಂಡ ಬಂಗಲೆಕ್ ಎತ್ತಿತ್ ಪಡಿ ಕೊಟ್ಟ್ಚಿ.
ಪಡಿ ತೊರಂದ ಪಟ್ಟೆದಾರ ತಡಿಯಪ್ಪಂಡ ಮನೆರ ಪೂಮೊಗತ್ರ ಮೊಜ್ಹೆಕ್ ನೆಲತ್ ಮೂಡ್ ಕಾಂಬಯಿಂಜತ್. ಇಚ್ಚಕ್ ನಲ್ಲ ನೆಲತ್ ಈ ಕಾಲ್ಲ್ ಎನ್ನನೆ ನಡ್ಪೋಂದ್ ಮತ್ಯಯಿಂಗ ಜಿಡ್ಡ್ ಕಾಲ್ನ ನೋಟಿಯಂಡ್ ನಿಂದತ್.
“ನಿಂಗಡ ಈ ಕಾಲ್ ಉಂಡೇಂಗಲ್ಲರೇ ಐನ್ಮನೆರ ಕೌಕೋಲ್ ನಾಡ ಕೊಟ್ಟ್ರ ಅಟ್ಟಕ್ ಬಂದಿತ್ ಬೂವೊ… ಬಾರಿ… ಬಾರಿ…!” ಬೂಟಿ ಮರತ್ರ ಪಂಡೆತ್ರ ಐನ್ಮನೆ ಕೌಕೋಲ್ನೋ, ಅದಂಡ ಕ್ರಯತ್ನೋ ನೆನತಿಯಂಡ್ ಮಕ್ಕಳ ಒಳ್ಕ್ ಕಾಕ್ಚಿ, ಪಟ್ಟೆದಾರ.
“ತಡಿಯಪ್ಪಾ…, ಆ ಪೊರ್ಕಿ ನಾಡ ತಡಿನ ಪುಣ್ಣ್ ಮಾಡಿರ್ತ್. ನಾನಿಂಞ ಕೌಕೋಲ್ ಕಪ್ಪಕ್ ಪೋಪ್ಲೆ” ನಿಂದಲ್ಲಿಯೇ ಸುಸ್ತ್ಲ್ ಅಳತ್ ಪೋಚಿ, ಅಣ್ಣು.
“ದಾರ್ರೇ ಅಂವೋ…ಂದ್ ಕೂತ್ ಕೊಡ್ತಂಡ್ ಒಳ್ಕ್ ಓಡ್ನ ಪಟ್ಟೆದಾರ, ಪೊರ್ಮೆ ಬಪ್ಪಕ ಕೈಲ್ ಒತ್ತೆಕೊಳ ತೋಕ್ ಮಿನ್ನುವಯಿಂಜತ್.
ತೋಕ್ನ ನಿಪ್ಪಲ್ ಬೆಚ್ಚಂಡ್ “ದಾರ್ರೇ ಅಂವೋ…?” ಕೇಟತ್ ಚಿಟ್ಟಪ್ಪ.
“ಅದೇ ತಡಿಯಪ್ಪಾ…, ಆ ಚತ್ತ್ ಪೋನ ಕಾರಣಕಾರಂಡ 4ನೇ ಮೋಂವೊ ಚಿಮ್ಮ.”
ಚೆನ್ನ ನೇರ ಬೇರ್ಚಿಟ್ಟ ಚಿಟ್ಟಪ್ಪ ಎಣ್ಣ್ಚಿ, “ಏದ್ ಸುಡ್ಗಾಡ್ ಸುಂಟಿ ಬೇರೋ, ಅವೊಂಗ್ ಚಿಮ್ಮಂದೆಣ್ಣುವ ಒರ್ ಮೋಂವನೂ ಉಂಡ್ರಾ?”
‘ಅಯ್ಯೋ… ನೀನೋರ್ ಒಕ್ಕ ಪಟ್ಟೆದಾರನಾಯಿತ್ ನೀಡ ಒಕ್ಕತ್ ಎಚ್ಚಕ್ ಕ್ಣ್ಣ ಮಕ್ಕ ಉಂಡ್ಂದೇ ನೀಕ್ ಗೊತ್ತಿಲೆಲ್ಲಯ್ಯಾ…, ಏದೇಂಗಿ ನಲ್ಲ ಒಕ್ಕಕಾರ ನೀಡ ತಕ್ಕ ಕೇಟಕ ಚಣ್ಣೆ ಪೊಜ್ಜಂಡ್ ತೆಳಿಕು” ಎಣ್ಣಿರುವಂಜಿ ಕೀರಿ ಕ್ಣ್ಣ ಒರ್ ಉಸ್ರ್ಕ್ ತೆಳ್ಚತ್.
“ಏ…ಯ್! ನಾಡ ನಿಪ್ಪ್ಲ್ ಎಂತ ಉಳ್ಳ ಕಂಡಿತುಳ್ಳಿಯಾ?” ಚೆಡಿ ಪಾರ್ಚಿ, ಚಿಟ್ಟಪ್ಪ.
ಚಿಟ್ಟಪ್ಪಂಡ ಉರಿ ಗೊತ್ತಿಂಜ ಚುಬ್ರ, ಕೀರಿರ ಬೆನ್ನ್ಕ್ ಒಂದ್ ಗುದ್ದಿತ್ ಅವಂಡ ತೆಳಿನ ನಿಪ್ಪಚಿಟ್ಟತ್.
ನಿಪ್ಪ್ಲಿಂಜ ತೋಕ್ನ ಪಡನೆಟ್ಟಿಲ್ ಬೆಚ್ಚಿತ್ ದಂಡ್ ಕೈನ ಎಡ್ತಿತ್ ತೋಕ್ರ ಮೇಲೆ ತೂಕಿಯಂಡ್ ಎಂತಾನೋ ಗ್ಯಾನ ಮಾಡಿಯಂಡ್, ಕಯ್ಯಾಲೆಲ್ ಅತ್ತಟಿ ಇತ್ತಟಿ ನಡ್ಂದ್ ಕಳ್ಚತ್, ಚಿಟ್ಟಪ್ಪ.
ಛೇ… ಕೊಪ್ಪ ಮನೆಕಾರಳೋ, ಪೊಳೆಕರೆಕಾರಳೋ ಆಯಿತಿಂಜಕ ತೋಕ್ ಎಡ್ತಂಡ್ ಕೂತ್ ಕೊಡ್ತಂಡ್ ಓಡುವಕ ಎಲ್ಲಾ ಕಾಡ್ಬುದ್ದ್ ಓಡಿರುವಯಿಂಜತ್. ಆಚೇಂಗಿ ಈ ಪಾರ್ಟಿ ಅನ್ನನೆ ಅಲ್ಲ. ಚೆನ್ನಂಗೆಲ್ಲ ಪೇಟೆಕೋಟೆ ಕಂಡಯಿಂಗ. ಕೂಟ್ಕ್ ಅಪ್ಪನೂ, ಅವ್ವನೂ… ದೇವ -ದ್ಂಡ, ಪದ್ದತಿ – ಪರಂಪರೆ ಎಣ್ಣಿಯಂಡ್ ಪಳಗ್ನ ಮಾರಿಯ! ತೋಕೆಡ್ತಂಡ್ ದುಡ್ಕ್ನಕ ಕಾರ್ಯ ಕೆಟ್ಟ್ ಪೋಕೂಂದ್ ನೆನತ್ನ ಚಿಟ್ಟಪ್ಪ ಮಕ್ಕಡತ್ತಟ್ಟಿ ತಿರಿತ್ “ಅವಂಡ ಕೂಡೆ ದಾರೆಲ್ಲ ಇಂಜತ್ರೇ…” ಂದ್ ಕೇಟತ್.
”ಒಬ್ಬನೇ ಕಂಡನೆಕೆ ಆಚಯ್ಯಾ” ಕೀರಿ, ಚುಬ್ರ ದಂಡಾಳು ಒರೇ ಸ್ವರತ್ ಏಂಗ್ಚಿ.
”ಅಂವೊ ಎನ್ನಂಗ್ ಆ ಪಾಳ್ಬುದ್ದ ಮನೆಕ್ ಬಂದಿಯೆ” ಚಿಟ್ಟಪ್ಪಂಡ ದಂಡನೆ ಪ್ರಶ್ನೆ ಇದ್.
“ಗೊತ್ತಿಲ್ಲೆ ತಡಿಯಪ್ಪ…”
“ನಿಂಗಳ ನೋಟ್ನಯಿಂಗ ದಾರಾಚೇಂಗಿ ಪೋಯಿತ್ ಅವಂಗ್ ಎಣ್ಣಿತ್ ಕೂಟಿಯಂಡ್ ಬಂದಿತಿಕ್ಕುವಾ?”
“ಗೊತ್ತಿಲೆಯ್ಯಾ…”
“ನಿಂಗಡ ಬಾಯಿಕ್ ಮಣ್ಣ್ಟ್ಟ ಸೂ… ಮಕ್ಕ. ಎಲ್ಲಾಂಗು ಗೊತ್ತಿಲ್ಲೆ… ಗೊತ್ತಿಲ್ಲೆ… ಗೊತ್ತಿಲ್ಲೆ! ನಿಂಗಕಿಂಞ ಎಂತರೆ ಗೊತ್ತುಳ್ಳ? ನಾಡ ಕೈಲ್ ಬಿಟ್ಟಿ ಕ್ಟ್ಟುವ ಕಳ್ಳರ ಕ್ರಯವೂ… ಪುಳ್ಳಿಕೊಟ್ಟ್ಲ್ ಪತ್ತಿ ಕಯಿಚಂಡ್ ಅಳ್ಪಿರಲ್ಲಾ, ಆ ಕೋಳಿರ ತೂಕವೂ… ಕೂಟ್ಕ್ 8-10 ದಿನಕ್ ಒಮ್ಮ ಆಯಿಂಬದ್, ನೂರ್ಂದ್ ಚೊಟ್ಟುವದೂ…” ರೇಗಿ ಬುದ್ಧತ್, ಪಟ್ಟೆದಾರ ಚಿಟ್ಟಪ್ಪ
“ದಾರೆಲ್ಲ ಇಂಜತ್ಂದ್ ಗೊತ್ತಿಲ್ಲೆ. ಅಚೇಂಗಿ ಅವಂಡ ಕೈಲ್ ಕತ್ತಿಯೂ ಕೈ ಕೊಡಲಿಯೂ ಇಂಜತ್ ತಡಿಯಪ್ಪಾ…” ಕೂಟ್ಲ್ ಚೆನ್ನ ಬುದ್ದಿವಂತನಾನ ಅಣ್ಣು ಎಣ್ಣ್ಚಿ.
”ಅಂದಕ ಅವನೂ ನಿಂಗಡನೆಕೇ ಬಂದ ಮರಕಳ್ಳ ಆಯಿತಿಕ್ಕು.”
“ಚಿ… ಚೀ… ನಿಂಗಡನೆಕೆ ಕಿತ್ತ ಮರತ್ನೆಲ್ಲ ಮಾರಿತ್ ಕಾಸ್ ಕೂಟುವ ಪಿರಾಂದ್ ಅವಂಗಿಪ್ಪಕಿಲ್ಲೆಯ್ಯಾ…! ಅಂವೊ ಪೇ… ರ್ತ್ ಬಲ್ಯ ಚಾಕ್ರಿಕ್ ರಾಜೀನಾಮೆ ಕೊಡ್ತಿತ್ ಬಂದಂವೊ.” ಚೆನ್ನ ಕೆತ್ತೆಕ್ ಬಡ್ಚನೆಕೆ ಪರ್ಂದಿತ್ ಅಭ್ಯಾಸ ಇಂಜ ಕೀರಿಕ್ಣ್ಣ ಅನ್ನನೆ ಪರ್ಂದತ್.
“ನಾಡ ಎಂಜಿ ತಿಂಬ ನಾವ್ಲ್ ಅವನ ಎಡ್ತ್ ಪರೆವಕ್ ನೀಡದೆಲ್ ಎಚ್ಚಕ್ ಬಣ್ಣತ್ರ ಚೈಪೆ ತೂಂಗಿತಿಕ್ಕುರೇ…” ಬಾಯಿ ಬಡ್ಚಂಡ್ ಕೀರಿ ಕ್ಣ್ಣಂಗ್ ನೇರ ತೋಕ್ ನೀಟ್ಚಿ, ಚಿಟ್ಟಪ್ಪ,
ಕೀರಿ ಕ್ಣ್ಣಂಡ ಮೇಲ್ “ಜುಂ” ಎಣ್ಣ್ಚಿ. ಅಂವೊ ಬೊಡಿ ತಪ್ಪ್ಚಿಟ್ಟವನೆಕೆ ದಬಕ್ಂದ್ ನೆಲತ್ ಅಳತ್ರ್ತ್.
ನೇರೆ ನಿಲ್ಲ್ ಎಣ್ಣುವನೆಕೆ ತೋಕ್ಲೇ ಸನ್ನೆ ಮಾಡ್ಚಿ, ಚಿಟ್ಟಪ್ಪ,
ಕ್ಣ್ಣ ಮೆಲ್ಲೆ ಎದ್ದ್ ನಿಂದತ್.
“ಸೂ… ಮೋನೇ…, ಬಾಯಿಕ್ ಬಂದದೆಲ್ಲ ತಕ್ಕ್, ಎಣ್ಣುವನೆಕೆ ಪರೆವಿಯಲ್ಲಾ…, ಅದ್ಂಗ್ ನೀಕ್ ಎಂತ ಶಿಕ್ಷೆ ಗೊತ್ತುಂಡಾ…? ಒರ್ ಕೈಲ್ ಮೀಸೆ ತಿರ್೦ಬಿಯಂಡ್ ಕೇಟತ್, ಚಿಟ್ಟಪ್ಪ,
“ಎಂತ ಶಿಕ್ಷೆ ಅಯ್ಯಾ” ಂದ್ ಕೇಪಕ್ ನಾವ್ನ ಎಚ್ಚಕ್ ಉರ್ಟ್ನಕಲೂ ಸೆರಿಯಾನ ಅಕ್ಷರ ಉರ್ಂಡ್ಲೆ ಕೀರಿರ ನಾವ್ಲ್.
“ಹ್ಂ… ತೋಕ್ ನ್ಟುವಕಲೇ ಎತೆತೆತೆತೇ… ಎಣ್ಣುವಿಯ, ಅಂಬ್ಲಿ ಉಂಡಿತ್ ಬೊಳ್ಂದ ಪೊರ್ಕಿ… ಪಿಂಞ ನಾವುನ ಎನ್ನ್ಂಗ್ರೇ ಅಚ್ಚಕ್ ಉದ್ದ ನ್ಟುವೊ ನೀನ್…!”
ಕೀರಿ ಕ್ಣ್ಣ ಉಸ್ರ್ ಬುಟ್ಟ್ಲೆ. ಬೊರ್ತಂಡ್ ಮುಂಡತೆ ನಿಂದತ್.
“ನೀನಿಕ್ಕ ಪೋಯಿತ್, ಆ ಚಿಮ್ಮನೋ ಮಣ್ಣಾಂಗಟ್ಟಿಯೋ ಎಂತ ಮಾಡಿಯಂಡುಂಡ್, ಅಂವೊ ಅಲ್ಲಿಕ್ ಬಂದ ಗುನ್ನ (ಗುರಿ) ಎಂತ? ದಾರೆಲ್ಲ ಬಂದಿಯೆ… ಇದ್ನೆಲ್ಲಾ ಅರ್ಂಜಂಡ್ 12 ಗಂಟೆರ ಒಳಿಯ ಇಲ್ಲಿರಂಡು, ಗೊತ್ತಾಚಾ…?”
ಚಿಟ್ಟಪ್ಪಂಡ ಕೈಲಿಂಜ ತೋಕ್ನೇ ನೋಟಿಯಂಡ್ “ಆಚಯ್ಯಾ”ಂದೆಣ್ಣಿತ್ ಒತ್ತಂಡ ಕೀರಿಕ್ಣ್ಣ, ಒರ್ ಗಳಿಗೆ ಗ್ಯಾನ ಮಾಡ್ಚಿ – ಚಿಮ್ಮಂಡ ಎತ್ತರತ್ರ ತಡಿ, ಅಗಲ ಎದೆ, ದುಂಬ್ನ ಮೂಡ್ಲ್ ಕರ್ತಿತೆ ಇಂಜ ತೂಡ್ ಮೀಸೆ, ಗಟ್ಟಿಯಾನ ಕೈರಟ್ಟೆ, ಇರ್ಂಬ್ ತಡಿ, ಇದೆಲ್ಲಾ ಗ್ಯಾನ ಬಪ್ಪದು ಅಯ್ಯಂಡ ಕೈಲುಳ್ಳ ತೋಕ್ ಒರ್ ತೀಕೊಳಪೆರನೆಕೆ ಆಚಿ ಕೀರಿಕ್. ಅಂವೊ ಮೆಲ್ಲೆ ಮಂಡೆ ಮಾಂದಿಯಂಡ್ “ಅಯ್ಯಾ…ಂದ್ ಕಾಕ್ಚಿ”.
“ಅಯ್ಯಾ… ಗಿಯ್ಯಾ… ಒಂದೂ ಇಲ್ಲೆ ನೀಕ್ ಒಪ್ಪ್ಚಿಟ್ಟ ಪಣಿನ ನೀನ್ ಮಾಡಂಡು, ಬೆರಿಯ ಪೊರಡ್” ತೋಕ್ನ ಪೊಳ್ಚಿತ್ ಒಳ್ಲಿಂಜ ತೋಟತ್ನ ಬಲ್ಚಿತ್ ಎಡ್ತಂಡ್ ಎಣ್ಣ್ಚಿ, ಚಿಟ್ಟಪ್ಪ.
ಕೀರಿಕ್ಣ್ಣ ಒರ್ ಎಟ್ಟ್ ಕುರಿ ಜುಲಾಪ್ ಆನವಂಡನೆಕೆ ಮೆಲ್ಲೆ ಬಗ್ಗಿಯಂಡ್ ಮನೆಂಜಿ ಕಡ್ಂದತ್.
ಚಿಟ್ಟಪ್ಪ ಚುಬ್ರಂಗ್ ಎಣ್ಣ್ಚಿ, “ಪೋರಾ, ಕೊಟ್ಟ್ಲುಳ್ಳ ಚಾಂದ್ ತುಂಡ್ಕ್ 2 ಬಿಂದಿಗೆ ಪಚ್ಚೆ ನೀರ್ ಬೂಕಿತ್ ಬಾ. ಪೋಲೀಸ್ ಕಾರಡ ಮೀಸೆಕ್ ವಾಸನೆ ಕ್ಟ್ಟಿ ಪೋನಕ ಅದೂ ಒಂದಾಕು.””
ಚುಬ್ರ ಪೋನದು ಅಣ್ಣುನ ತಾಂಡ ಕಯ್ಯಾಲೆ ಕೋಂಬರೆಕ್ ಕೂಟಿಯಂಡ್ ಪೋಚಿ, ಪಟ್ಟೆದಾರ. ಆ ಕೋಂಬರೆ ಅವಂಡ ಕಳ್ಳ ಕೇಮೆರ ಲೆಕ್ಕಾಚಾರಕ್ ತಕ್ಕ ಜಾಗ.
ಅಣ್ಣು ಚಿಟ್ಟಪ್ಪಂಡ ಬಲ್ತ ಕೈ. ಆಳ್ರ ಉದ್ದ ಬಣ್ಣಕೊಂದು ಕೊರವಿಂಜಿಲೆ. ಅವನ ಬೆಲ್ಕಿತ್ ಓಡ್ಚಿಡುವ ಶಕ್ತಿ ಸಾಧಾರಣಕ್ ಆ ಊರ್ಲ್ ದಾರ್ಕೂ ಇಂಜಿಲೆ. ಇಕ್ಕ ಚಿಮ್ಮಂಡ ಕೈಲ್ ಮಾಂಗಿಯಂಡ್ ಓಡಿ ಬಂದದ್ ನೋಟಿತ್ ಚಿಟ್ಟಪ್ಪಂಗ್ ತಾಂಡ ಮುಂಗಾಲ್ಲ್ ಪುಣ್ಣ್ ಎದ್ದನೆಕೆ ಆಯಂಡಿಂಜತ್.
ಕೋಂಬರೆ ನುಗ್ಗಿತ್ ತಾನ್ ಕುರ್ಚಿಲ್ ಅಳ್ತಕಲೂ ಅಣ್ಣು ನಿಂದಿತೇ ಉಳ್ಳದ್ ನೋಟಿತ್ ಚಿಟ್ಟಪ್ಪ ರೇಗ್ಚಿ.
ಬಾಕಿ ಮಿಂಞಕ್ ….
