ಮೂಲ ಬುಡಕಟ್ಟ್‌ಕ್‌ ಅಡಂಗಿತ್‌, ಉಲಗತೇ ಕೇಳಿ ಪೋನ ಸಾಹಿತ್ಯ, ಸಂಸ್ಕೃತಿ, ಪದ್ದತಿ ಉಳ್ಳ ಕೊಡವ ಪರಂಪರೆ ಮಿಂಞಕೂ ಉಳ್ಂಜಿ ಬೊಳಿವ ನ್‌ಟ್ಟ್‌ಲ್‌ ನಂಗೆಲ್ಲ ಒಂದಾಯಿ ನೈಕೊಂಡೂಂದ್‌ ಶಾಸಕಂಗಳಾನ ಅಜ್ಜಿಕುಟ್ಟಿರ ಪೊನ್ನಣ್ಣ ಪಿಂಞ ಮಂಡೆಪಂಡ ಸುಜಾ ಕುಶಲಪ್ಪ ಅವು ಒತ್ತೋರ್ಮೆರ ತಕ್ಕ್‌ ಪರಂದತ್.
ಕರ್ನಾಟಕ ಕೊಡವ ಸಾಹಿತ್ಯ ಅಕಾಡೆಮಿ ಪಿಂಞ ಬೇಂಗ್‌ನಾಡ್‌ ಕೊಡವ ಸಮಾಜತ ಕೂಟಾದನೆಲ್‌ ಇಂದ್‌ ನಡ್ಂದ ಹರದಾಸ ಅಪ್ಪನೆರವಂಡ ಅಪ್ಪಚ್ಚ ಕವಿರ 157ನೇ ಪುಟ್ಟ್‌ ನಾಳ್‌ರ ನೆಪ್ಪುಲ್‌ ಚಾರಂಬಾಣೆಲ್‌ ಅಂದೋಡೆ ನಡ್ಂದ ಕೊಡವ ಸಾಹಿತ್ಯ ನಾಳ್‌ಲ್‌ ಬೆಂದುವಳಾಯಿತ್‌ ಕೂಡಿಯಾಡಿತ್‌ ಶಾಸಕಂಗ ತಕ್ಕ್‌ ಪರಂದತ್.
ಕೂಡ್‌ನೈಂಗಳ ತೊಟ್ಟ್‌ ತಕ್ಕ್‌ ಪರ್ಂದ ವಿರಾಜಪೇಟೆ ಶಾಸಕ ಪಿಂಞ ಮುಖ್ಯಮಂತ್ರಿರ ಕಾನೂನ್‌ ಅರಿವುಕಾರ, ಅಜ್ಜಿಕುಟ್ಟಿರ ಪೊನ್ನಣ್ಣ ಅವು, ಕೊಡವ ಸಾಹಿತ್ಯ, ಕಲೆ ಇಂದ್‌ ನಿನ್ನಾಂದೆತದಲ್ಲ, ಆದಿ ಕಾಲತಿಂಜೇ ಬೊಳಂದ್ ಬಂದಂತದ್‌. ಪಿಂಞ ಇಂದ್‌ ಉಲಗತ ಎಲ್ಲಾ ಸಂಸ್ಕೃತಿ, ಪದ್ದತಿರ ನಡುಲ್‌ ಕೊಡವ ತಕ್ಕ್‌, ಸಂಸ್ಕೃತಿರ ನಡ್ಪು ಎದ್ದ್‌ ಕಾಂಬನ್ನತದ್. ಇದಂಗದ ಹರದಾಸ ಅಪ್ಪನೆರವಂಡ ಪಚ್ಚಕವಿರನ್ನತವು ನೀರ್‌ ಬೂಕಿತ್‌ ಇಂಞಚ್ಚಕೂ ಎಲಂಗುವನ್ನಕೆ ಮಾಡಿತ್. ಇದನ ಕಾಲ ಮುಂದರಕೂ ಉಳ್ತಿ ಬೊಳ್ತಿ ಪೋಕ್‌ ಎಲ್ಲಾ ಭಾಷಿಕ ಜನಾಂಗಕಾರಳೂ ಒಂದಾಯಿ ನೈಕೊಂಡು, ಈ ನ್‌ಟ್ಟ್‌ಲ್‌ ಸರ್ಕಾರತಿಂಜ ಸಾಯತ್‌ನ ನಾನ್‌ ಮಾಡುವಿ ಎಣ್ಣ್‌ಚಿ.
ಸಭೆನ ತೊಟ್ಟಿತ್‌ ತಕ್ಕ್‌ ಪರಂದ ವಿಧಾನ ಪರಿಷತ್‌ ಶಾಸಕ ಮಂಡೆಪಂಡ ಸುಜಾ ಕುಶಾಲಪ್ಪ ಅವು, ಲಗಾಯಿತ್ಂಜಿ ಬೊಳಂದ್ ಬಂದ ಕೊಡವಾಮೆ ಎಣ್ಣುವ ಗೂಡ್‌ರೊಳಿಯ ನಂಗೆಲ್ಲ ಬಾಳಿಯಂಡುಂಡ್. ಇದ್‌ ಏದೂ ನಂಗ ಮಾಡ್‌ನದಲ್ಲ, ನಂಗಡ ಅಜ್ಜಂಡಜ್ಜಂಗ ನೇಡಿ ತಂದಂತದ್. ಈ ವಿಷೇಶ ಪಟ್ಟ ಸಂಸ್ಕೃತಿನುಂಡೇ ನಂಗ ಇಂದ್‌ ಇಡೀ ಉಲಗತ್‌ ಗುರ್ತ್‌ ಮಾಡ್ಯವನ್ನಕೆ ಆಯಿತ್. ಮಿಂಞತ ಮಂಡೆಕ್‌ ಇದನ ಇನ್ನನೇ ಪೋತಿ ಕೊಡ್ಪಲ್ಲಿ ಎಲ್ಲರೂ ಕೈಕೂಟಿ ನೈಕೊಂಡೂ ಎಣ್ಣ್‌ಚಿ. ಅಪ್ಪನೆರವಂಡ ಅಪ್ಪಚ್ಚ ಕವಿರನ್ನತ ಮಹಾನೀಯಂಗ ಇಂದ್‌ ನಂಗಕ್‌ ಬಟ್ಟೆಬೊಳಿಯಾಯಿತ್‌ ಉಂಡ್. ಅವು ನಡ್ತಿ ಬೊಳ್ತ್‌ನಾನ ಉಳ್ತಿ ಪೋಪಕ್‌ ನಂಗೆಲ್ಲ ಕೈ ಕೂಟನ ಎಣ್ಣ್‌ಚಿ.
ಆದ್ಯತ್‌ ಒಕ್ಕಣೆ ಕಟ್ಟಿತ್‌ ಆಯಿಮೆಕ್‌ ಮೊಳಿ ಇಟ್ಟ, ಕರ್ನಾಟಕ ಕೊಡವ ಸಾಹಿತ್ಯ ಅಕಾಡೆಮಿರ ಅಧ್ಯಕ್ಷ ಅಜ್ಜಿನಿಕಂಡ ಸಿ. ಮಹೇಶ್‌ ನಾಚಯ್ಯ ಅವು, ಬಂದ ಬೆಂದುವಕೆಲ್ಲ ತಕ್ಕಾರ ಬಯಂದಂಡ್‌, ಆದ್ಯ ಮೊಳಿ ಪರಂದವು, ಅಪ್ಪಚ್ಚ ಕವಿ ಬರೀ ಓರ್‌ ಸಾಹಿತಿ ಮಾತ್ರ ಅಲ್ಲ ಇಡೀ ಕೊಎವ ಕುಲತ್‌ ಆದಿ ಕವಿಂದ್‌ ಕೇಳಿ ಪೋನವು, ಅಂದ್‌ ಕಾಲತ್‌ ಪಡೆ, ಪರಂಬು, ಬೇಲ್‌ ಬಾಣೆಂದ್‌ ನೈಚಂಡಿಂಜ ಕೊಡವಡಲ್ಲಿ ಸಾಹಿತ್ಯ ರಚನೆರಂತ ಇರಾದೆ ಕಮ್ಮಿ ಇಂಜಕೋ ಹರದಾಸ ತಾಂಡ ವಿಶೇಷ ಶಕ್ತಿನುಂಡ್‌ ಸಾಹಿತ್ಯ ರಚನೆ ಮಾಡಿತ್, ಇಡೀ ಕೊಡವ ಕುಲ ಕೊಂಡಾಡುವನ್ನಕೆ ಮಾಡಿತ್. ಇಂತ ಮೇರ್‌ ಕವಿ ಇಟ್ಟಿತಂದ ಸಾಹಿತ್ಯ ಮೊಟ್ಟ್‌ಲ್‌ ಇಂದ್‌ ನಂಗೆಲ್ಲ ಒಂದಾಯಿತ್‌ ನಡ್ಂದ್‌ ನೈಕೊಂಡು ಎಣ್ಣ್‌ಚಿ.
ಬೇಂಗ್‌ನಾಡ್‌ ಕೊಡವ ಸಮಾಜ ಅಧ್ಯಕ್ಷ ಬಾಚರಣಿಯಂಡ ದಿನೇಶ್‌ ಗಣಪತಿ ಅಯಿಂಗಡ ಮೇಲ್ಮಾನಿಕೆಲ್‌ ನಡ್ಂದ ಆಯಿಮೆಲ್‌, ಬೇಂಗೂರ್ ಗ್ರಾಮ ಪಂಚಾಯತಿ ಅಧ್ಯಕ್ಷೆ ಪಟ್ಟಮಾಡ ಮಿಲನ್‌ ಮುತ್ತಣ್ಣ, ಅಕಾಡೆಮಿ ರಿಜಿಸ್ಟ್ರಾರ್‌ ಅಜ್ಜಿಕುಟ್ಟಿರ ಗಿರೀಶ್‌, ಸದಸ್ಯಂಗಳಾನ ನಾಪಂಡ ಗಣೇಶ್‌, ಪಾನಿಕುಟ್ಟಿರ ಕೆ. ಕುಟ್ಟಪ್ಪ, ಚಿತ್ರ ನಟ ತೇಲಪಂಡ ಪವನ್‌, ಬೆಂಗಳೂರ್‌ ಕೊಡವ ಸಮಾಜ ಕೂಡ್‌ಕಾರ್ಯದರ್ಶಿ ಪೊನ್ನಚೆಟ್ಟಿರ ರಮೇಶ್‌ ಗಣಪತಿ ಅವು ಇಂಜತ್.
ಪೆರಿಯ ಸಾಹಿತಿ, ಕವಿಯಳೂ ಆನ ಬಾಚರಣಿಯಂಡ ಅಪ್ಪಣ್ಣ ಪಿಂಞ ಚೀರಮ್ಮನ ವಾಣೀಚಂಗುವಮ್ಮಯ್ಯ ಅಯಿಂಗಳ ತೊಮ್ಮಾನಮಾಡ್‌ಚಿ.
ಚೇರಂಬಾಣೆ ಪಟ್ಟಣತ್‌ ಕಾನಡೆರ ಕೂಡೆ ಮೊಳಿಯಾನ ಸಾಹಿತ್ಯ ನಮ್ಮೆಲ್‌, ಡಾ. ಕಾಳಿಮಾಡ ಕೆ. ಶಿವಪ್ಪ ಪಿಂಞ ಚೇನಂಡ ರಘು ಉತ್ತಪ್ಪ ಅವು ಹರದಾಸನ ತುದ್‌ಚಿತ್‌ ವಿಚಾರ ಒಪ್ಪುಚಿಟ್ಟತ್. ಮುಕ್ಕೋಡ್‌ರ ವ್ಯಾಲಿಡ್ಯೂ ಕಲ್ಚರಲ್‌ ಅಸೋಶಿಯೇಶನ್‌ರ ಕೋಲಾಟ್‌, ಬೊಳಕಾಟ್‌, ಕತ್ತಿಯಾಟ್‌, ಚೇರಂಬಾಣೆ ರಾಜ ರಾಜೇಶ್ವರಿ ಸ್ಖೂಲ್‌ರ ಮಕ್ಕಳುಂಡ್‌ ಪಲತರ ಸಾಂಸ್ಕೃತಿಕ ಆಯಿಮೆ ಇಂಜತ್. ಆದಿಲ್‌ ಚುಪ್ಪಿ ಮಕ್ಕಳಾನ ಕುಟ್ಟಂಜೆಟ್ಟಿರ ಕುಮಾರಿ ಪಿಂಞ ತೇಲಪಂಡ ಲಕ್ಷ್ಮಿ ದೇವಳ ತುದ್‌ಚಿ ಪಾಡ್‌ನಕ, ಅಕಾಡೆಮಿ ಅಧ್ಯಕ್ಷ ಅಜ್ಜಿನಿಕಂಡ ಮಹೇಶ್‌ ನಾಚಯ್ಯ ತಕ್ಕಾರ ಬಯಂದಿತ್‌, ರಿಜಿಷ್ಟ್ರಾರ್‌ ಅಜ್ಜಿಕುಟ್ಟಿರ ಗಿರೀಶ್‌ ತೊತ್ತ್‌ ಬಯಂದಂಡ್‌, ಅಜ್ಜಿನಿಕಂಡ ಪ್ರಮಿಳಾ ನಾಚಯ್ಯ ಪಿಂಞ ಬಡ್ಡಿರ ನಳಿನಿ ಪೂವಮ್ಮ ಕುಯ್ಯಳೆ ಕೂಟ್‌ಚಿ. ಆಯಿಮೆ ಅಕಾಡೆಮಿರ ಸದಸ್ಯಂಗ, ಸಿಬ್ಬಂದಿಯ ಕೂಡ್‌ನನಕೆ ಊರ್‌ ನಾಡ್‌ರ ಮಾಜನ ಏರ ಕಣಕಲ್‌ ಕೂಡಿಯಾಡಿತಿಂಜತ್.
