ನಾಡ್ಕೋರ್ ನಡ್ಪು, ಊರ್ಕೋರ್ ಪದ್ದತಿ ಒಕ್ಕಕೋರ್ ಆಯಿಮೆ ಎಣ್ಣುವದೋರ್ ಪಳಂಜೊಲ್ಲ್. ಪೊಮ್ಮಾಲೆ ಕೊಡುದೇಶತ್ ಆದಿ ಮೂಲ ಕೊಡವ ಮಾಡುವ ಪ್ರತೀ ನಮ್ಮೆ ನಾಳ್ಲೂ, ಮಂಗಲ ಮಾದತೂ, ಆಯಿಮೆ ಕೊಯಿಮೆಲೂ ತರಾವಾರಿ ನಡ್ಪುನ ಕಾಂಬ. ಅದೇ ಪೋಲೆ ಕೊಡವುಲ್ ಊಣ್ ತೀನಿ, ಪುಟ್ಟ್ ಒಟ್ಟಿಲೂ ಅದದ್ ಊರ್ ನಾಡ್ಲ್ ಓರೋರ್ ತರತ್ನ ಕಾಂಗೋಲು. ಇನ್ನನೆ ಪುತ್ತರಿಲ್ ಮಾಡುವ ತಂಬುಟ್ಟ್ಲೂ ಬೋರೆ ಎಲ್ಲಾ ನಾಡ್ಕ್ಂಜಿ ಸೂರ್ಲಬ್ಬಿ ನಾಡ್ಲ್ ಮಾಡುವ ಪಚ್ಚೆ ತಂಬುಟ್ಟ್ ಏರ ವಿಷೇಶ ಆನದ್.
ಸಾಮಾನ್ಯವಾಯಿತ್ ಪುತ್ತರಿ ತಂಬುಟ್ಟ್ ಎಣ್ಣಕ, ಬರ್ತ ಅಕ್ಕಿರ ಪೊಡಿಕ್, ಬಾಳೆ ಇಟ್ಟಂಡ್ ಕಲ್ಂದಿತ್ ಮಾಡುವ ತಂಬುಟ್ಟ್ ಎಲ್ಲಾರ್ಕೂ ಗೊತ್ತುಳ್ಳದೆ. ಆಚೇಂಗಿ ಸೂರ್ಲಬ್ಬಿ ನಾಡ್ಲ್ ಪಚ್ಚೆ ಅಕ್ಕಿರ ಒಡಿಲೇ ತಂಬುಟ್ಟ್ ಮಾಡುವ ಪಿಂಞ ಈ ತಂಬುಟ್ಟ್ ಆರ್ ತಿಂಗಾಚೇಂಗೂ ಪಾಳಾಪುಲೆ, ಚೋದ್ ಕೆಡುಲೇ ಎಣ್ಣೋದ್ ಇಂಞೂ ಖನ ಪಟ್ಟದ್.
ಆದ್ಯ ಪುತ್ತರಿಕ್ ಮಿಂಞ ಬೊಳ್ತಕ್ಕಿ (ಬುಳಿಯ ನೆಲ್ಲ್ರ ಅಕ್ಕಿ ಆನಕ ನಲ್ಲದ್) ಕತ್ತಿತ್ ಚಾಯಿಲ್ ಬೆದ್ಲ್ ಒಣ್ಕೊಂಡು, ಓರ್ ಪದಕ್ ಒಣಗ್ನಪಿಂಞ ತೊಲ್ಚ ಯಾಲೆಕ್ಕಿ ಕುರು, ನೇರಚೆಕ್ಕೆ(ಪಚ್ಚೆ ಅಟ್ಟೆ ಅಕ್ಕ ಎಪ್ಪುನದ್) ಕೂಟಿತ್, ಇಡಿಕೊಂಡು(ಪಂಡ ಮೈಪಕೊಟ್ಟ್, ಕಲ್ಲ್ರ ಒರ ಇಂಜಕಾಲತ್ ಒಣಕೆಲೇ ಇಡಿಪೈಂತ್) ಇಲ್ಲೇಂಗಿ ನೈಂಗ್ನೆ ಆಪನ್ನಕೆ ಮಿಲ್ಲ್ ಮಾಡೋಲು, ಅದೂ ಆಯಿಲೇಂಗಿ ಮನೆಲ್ ನೈಂಗನೆ ಮಿಕ್ಷಿ ಮಾಡ್ಯವಲು. ಜೊತೆಕೆ ತೇನ್, ಇಲ್ಲೇಂಗಿ ಸಕ್ಕೆರೆ ಜೋನಿ ಮಾಡಿ ಬೆಚ್ಚವಂಡು, ಕರ್ತ ಎಳ್ಳ್ ಬರ್ತದ್, ಪುರಿ ಕಡ್ಲೆ, ಕೊಪ್ಪರಿ ತೆಂಗೆನ ಚೆರ್ಂಗ್ನೆ ಮುರ್ಚಿ ಬೆಚ್ಚವಂಡು.
ಬೈಟ್ ಕದ್ ಎಡ್ತಿತ್, ಕಟ್ಟಿತ್ ಆನದು, ಕುತ್ತಿ ಎಡ್ತವು ನೆಲ್ಲಕ್ಕಿಲ್ ಅಳ್ತಂಡ್ ಆದ್ಯ ಕೊಡಿ ಬಾಳೆ ಎಲಕಂಡಕ್ ಎಡ್ತಬಂದ ಕದ್ರ ಅಂಜಿ ಇಲ್ಲೇಂಗಿ ಏಳ್ ಅಕ್ಕಿನ ತೊಳ್ಚಿತ್ ಇಟ್ಟತ್, ಮಿಂಞ ತಯಾರ್ ಮಾಡಿಬೆಚ್ಚ ಪೊಡಿ, ಕಡ್ಲೆ, ಎಳ್ಳ್, ತೆಂಗೆ ಚೂರ್, ತೇನ್ ಅಲ್ಲೇಂಗಿ, ಸಕ್ಕರೆ ಜೋನಿನ ಇಟ್ಟಿತ್ ಕಲ್ಪ. ಅನ್ನನೆ ಕಲ್ಪಕ ಅಂಡೊಳ್ಕೋರ್ ಕಾಸ್(ಕಾಯ್ನ್) ಇಡುವ. ಆದ್ಯ ಚೆಕ್ಕೆ ಎಲಕಂಡತ್ ಕಾರೋಣ, ಪಿಂಞ ಒಯಿಂಜ ತಾಮನೆ ಮೂಡಿಯ, ಪಡೆಭೀರಂಗಡ ಪೆದತ್ ಬುಟ್ಟಕ್ ಅಂಟ್ಚಿಟ್ಟಿತ್ ಆನದು, ಎಲ್ಲಾರೂ ಆದ್ಯ ಪ್ರಸಾದ ಆಯಿತ್ ಆ ಪಚ್ಚೆ ತಂಬುಟ್ಟ್ನ ತಿಂಬ. ಇನನ್ನೆ ತಿಂಬಕ ದಾರ್ಕ್ ಕಾಸ್ ಕ್ಟ್ಟುವೋ, ಅವು, ಪಿತ್ಯಾಂದ್ ಪೊಲಾಕ ಎತ್ತ ಮೇಪಕ್ ಪೋಂಡೂ ಎಣ್ಣುವ ನೇಮ ಉಂಡ್. ಇದ್ ಇಕ್ಕ ತಮಾಶಿಕಾಯಿತ್ ಕಂಡಕಲೂ, ಪಂಡ್ ಮಂದ್ ಮಾನಿಕ್ ಎಲ್ಲಾರೋ ಪೋಪಕ್ ನಾಮಿಂಞ ನೀಮಿಂಞಾಂದ್ ಓಂಗಿ ಕಳಿಪ ಕಾಲತ್, ಎತ್ತ ನೋಟೋವು ದಾರ್ಂದ್ ಪೇಸ್ ನ್ಯಾಯ ಬರತನ್ನಕೆ ನಿರ್ಕ್ ಮಾಡೋಕಾಯಿತ್, ಈ ನಡ್ಪು ಮೊಳಿ ಆಯಿತಿಕ್ಕು. ಇದೆಲ್ಲನಾದು ಬಾಕಿ ಅಕ್ಕಿಪೊಡಿನೂ ಇದೇ ರೀತಿಲ್ ತಂಬುಟ್ಟ್ ಕಲ್ಂದಿತ್ ಬೆಪ್ಪ.
ʼಇನ್ನನೆ ಕಲ್ಂದ ತಬ್ಬುಟ್ಟ್ರ ಅಕ್ಕಿಪೊಡಿ ತಿತ್ತ್ಲ್ ಬೇವದೇ ಇಲ್ಲೆ, ಆಚೇಂಗೂ ನಂಗಕ್ ಬೋಂಡ್ಯಚ್ಚಕ್ ತಿಂದಕೋ ಕೆಲಕ್ ಓರ್ ಕೇಡೂ ಆಪುಲೆ ಪಿಂಞ ಅಂದ್ ಕಲ್ಂದ ಆ ತಂಬುಟ್ಟ್ನ ಕುತ್ತ್ಗಂಜಿಕ್ ಇಟ್ಟಿತ್ ಆರ್ ತಿಂಗ ಬೆಚ್ಚಕೋ, ಚೋದ್ ಏರ ಆಯಂಡೇ ಪೋಪ ಅಲ್ಲತೆ ಪಾಳಾಪುಲೆ. ಅದೇ ಅಂದ್ ಅಲ್ಲತೆ ಬೋರೇ ಏದೇ ದಿನ ಇನ್ನನೆ ಪಚ್ಚೆ ತಂಬುಟ್ಟ್ ಮಾಡ್ನಕ, ದಂಡ್ ಮೂಂದ್ ನಾಳ್ಲೇ ಪುಳಿ ಬಂದಿತ್ ಪಾಳಾಪ. ಈ ಪಚ್ಚೆ ತಂಬುಟ್ಟ್ನ ಪುತ್ತರಿರಂದ್ ಬುಟ್ಟಕ ಕೋಟೆಬೆಟ್ಟ ಬೊಟ್ಟಲಪ್ಪಂಡ ನಮ್ಮೆಲ್ ಮಾಡೋಲು, ಅಂದ್ ಕಲ್ಂದ ತಂಬುಟ್ಟ್ ಕೂಡೀ ಪಾಳಾಪುಲೆ ಎಣ್ಣುವ ನಂಬಿಕೆ ಉಂಡ್.
ಇನ್ನನೆ ಮಾಡುವ ತಂಬುಟ್ಟ್ಕ್ ಪಯ್ಯುರ ನೆಯ್ಯಿ ಇಟ್ಟಂಡ್ ತಿಂಬ ಚೋದ್ ಏದ್ ಸೆವನ್ ಸ್ಟಾರ್ ಅಲ್ಲ ಹಂಡ್ರೆಡ್ ಸ್ಟಾರ್ ಉಳ್ಳ ಹೋಟೇಲ್ಲೂ ದಕ್ಕುಲೆ.
ಪಂಡೆಲ್ಲ ಮನೆ ಮನೆಲೂ ಪಾನಿ ಲೆಕ್ಕತ್ ಇಡ್ಚಿತ್ ಪೊಡಿ ಮಾಡಿತ್ ತಂಬುಟ್ಟ್ ಕಲ್ಪಯಿಂಜತ್. ಎಲ್ಲಡ ಮನೆ ಮನೆಕ್ ಪೋಯಿತ್ ತಂಬುಟ್ಟ್ ತಿಂಬದೇ ಓರ್ ನಮ್ಮೆ(ಇದ್ ಅಯಿಂಬದ್ ನೂರ್ ಕಾಲತ ಕತೆ ಅಲ್ಲ, ಪತ್ತ್ ಪದ್ನಂಜಿ ಕಾಲಬಯ್ಯ ನಂಗಳೇ ಮಾಡ್ನದ್, ಕಲ್ಂದದ್, ತಿಂದದ್, ಆರಾರ್ ತಿಂಗ ಬೆಚ್ಚ ಅನುಭವತ ತಕ್ಕಿದ್). ಇಂದ್ ತಂಬುಟ್ಟ್ಕ್ ಇಡಿಪವೂ ಇಲ್ಲೆ, ಅಚ್ಚಕ್ ಕಲ್ಂದಿತ್ ಬೆಚ್ಚಕ ತಿಂಬವು ಮಿಂಞಲೇ ಇಲ್ಲೆ. ಆಚೇಂಗೂ ಉಳ್ಳಚ್ಚಕ್ ಪದ್ದತಿನ ಪಾಳಾಕತೆ, ನಡ್ತಿಯಂಡ್ ತೋಪರೆ ಆಚೇಂಗೂ ಪೋತ್ಯಂಡ್ ಪೋಯಂಡ್ ಉಂಡ್ ಎಣ್ಣೊದೇ ಓರ್ ಪೆರ್ಮೆ.
