ತೂಚಮಕೇರಿ, ನ.18: (ಅಣ್ಣಿರ ಹರೀಶ್‌ ಮಾದಪ್ಪ) ಕೊಡವ ಲಗಾಯತ್ಂಜೇ, ನೈಪು, ನಲ್ಲರಿಕೆಕ್‌ ಪೆದ ಪೋನೈಂಗ, ನಂಗಡ ಪೆರಿಯವು ನೇಡಿತಂದ ನಲ್ಲರಿಕೆಯೇ ಇಂದ್‌ ನಂಗಕ್‌ ಬಟ್ಟೆಬೊಳಿ ಆಯಿತುಂಡ್. ಇದ್‌ ಮಿಂಞಕ್‌ ನಂಗಡ ಮಕ್ಕ ಮರಿಮಕ್ಕಡ ಕಾಲಕೂ, ಇನ್ನನೇ ಬೊಳ್ಂದ್‌ ನೇಡಿಂಯಂಡ್‌ ಪೋಂಡೂಂದ್‌, ಮುಖ್ಯಮಂತ್ರಿರ ಕಾನೂನ್‌ ಅರಿವುಕಾರ, ವಿರಜಪೇಟೆ ಶಾಸಕನೂ ಆನ, ಅಜ್ಜಿಕುಟ್ಟಿರ ಪೊನ್ನಣ್ಣ ಅವು ಕೆಮಿ ತಕ್ಕ್ ಪರ್ಂದತ್. ನಿನ್ನಾಂದ್‌, ಕರ್ನಾಟಕ ಕೊಡವ ಸಾಹಿತ್ಯ ಅಕಾಡೆಮಿ ಪಿಂಞ ಪೆಮ್ಮಂಡ ಒಕ್ಕಡ ಕೂಡ್‌ ಕೂಟತ್‌, ಪೊನ್ನಂಪೇಟೆ ಪಕ್ಕತ ತೂಚಮಕೇರಿಲ್‌ ನಡ್ಂದ “ಪೆಮ್ಮಂಡ ಒಕ್ಕೊರ್ಮೆ” ಎಣ್ಣುವ ಆಯಿಮೆಲ್‌ ಕೂಡಿಯಾಡಿತ್‌ ತಕ್ಕ್ ಪರ್ಂದತ್. ಪಂಡ್‌ ನಂಗಡ ಅಜ್ಜ ತಾಯಿಯಳಿಂಜ ತೊಟ್ಟ್‌, ನಂಗಡ ಅಪ್ಪ ಅವ್ವ ಕಾಟಿತಂದ ನಲ್ಲರಿಕೆ, ನೈಪುರ ಬಟ್ಟೆಲ್‌ ನಂಗ ಇಂದ್‌ ನಡ್ಂದಂಡ್ ಉಂಡ್. ಓರ್‌ ವ್ಯಕ್ತಿ ಮಾಡ್‌ನ ನಲ್ಲ ಕಾರ್ಯತ್‌ರ ಸಾಧನೆಂಜ ನಂಗಡ ಜನಾಂಗಕೂ ಪೆರ್ಮೆ ಬಪ್ಪ. ಅಂದ್‌ ಪೆರಿಯೈಂಡ ಆ ಪೋಲೆತ ನೈಪುರ ಫಲತ್‌, ನಂಗಳ ಇಂದ್‌ ಎಲ್ಲಲ್ಲಿಯೂ ಪೆರ್ಮೆಲ್‌ ಕೊಂಡಾಡುವನ್ನಕೆ ಮಾಡಿತ್. ಮಿಂಞಕ್‌ ನಂಗಡ ಮಕ್ಕಕೂ ನಂಗ ಈ ಪೋಲೆತ ನೈಪುನೇ ಕಾಟಿ ಕೊಡ್ಕಂಡಿಯ ಅವಶ್ಯಕತೆ ಉಂಡ್ ಎಣ್ಣದಲ್ಲತೆ, ನಂಗ ಎಲ್ಲಿ ಎಚ್ಚಕೇ ದೂರತ್‌, ಚಾಕ್ರಿ ಮಾಡ್ಯಂಡುಂಡೇಂಗೂ, ನಂಗಡ ಮೂಲ ನೆಲೆನ ಮರ್ಕತನ್ನಕೆ, ಕಾಲಕೊಮ್ಮ ಆಚೇಂಗೂ ನಾಡ್‌ಮನೆಕ್‌ ಬಂದ್‌ ಪೋಪನ್ನತ ಅಬ್ಯಾಸತ್‌ನ ನಂಗಡ ಮಕ್ಕಕ್‌ ಎಣ್ಣಿಕೊಡ್ಕೊಂಡೂ ಎಣ್ಣ್‌ಚಿ.
ಖನಪಟ್ಟ ಬೆಂದುವಾಯಿತ್‌ ಕೂಡಿಯಾಡಿತಿಂಜ, ಜಿಲ್ಲಾ ಗ್ಯಾರೆಂಟಿ ಅನುಷ್ಟಾನ ಸಮಿತಿ ಅಧ್ಯಕ್ಷ ತೀತಿರ ಧರ್ಮಜ ಉತ್ತಪ್ಪ ಅವು, ಕೊಡವ ಪದ್ದತಿ ಸಂಸ್ಖೃತಿನ ಉಳ್ತಿ ಬೊಳ್ತುವ ನ್‌ಟ್ಟ್‌ಲ್‌ ನಂಗೆಲ್ಲರೂ, ಜಾತಿ ಭೇದ ಬುಟ್ಟಿತ್‌, ಒಂದಾಯಿ ನೈಕೋಂಡು ಎಣ್ಣ್‌ಚಿ.
ಆಯಿಮೆರ ಕೊರುವುಕಾರನಾಯಿತ್‌ ತಕ್ಕ್ ಪರ್ಂದ ಅಜ್ಜಿನಿಕಂಡ ಮಹೇಶ್‌ ನಾಚಯ್ಯ ಅವು, ನಂಗಕ್‌ ಪೆರಿಯೈಂಗಳಿಂಜ ಬಂದ ಪದ್ದತಿ ಪರಂರೆನ ಉಳ್ತಿ ಬೊಳ್ತಿಯಂಡ್‌ ಪೋಪಲ್ಲಿ ಐನ್ಮನೆರ ನಣೈಪು ಭೀರ್ಯ ಪಟ್ಟದ್. ಇದನ ಇಂಞಚ್ಚಕಂಊ ಬಲ ಕೂಟಿತ್‌ ಒತ್ತಾಸೆ ಕಾಟುವ ನ್‌ಟ್ಟ್‌ಲ್‌ ಅಕಾಡೆಮಿ ಒಕ್ಕೋರ್ಮೆಕ್‌ ಮೊಳಿ ಇಟ್ಟಿತ್. ಕೊಡವ ಎಣ್ಣೋದೋರ್‌ ಚಿತ್ತಾಲ್‌ ಮರ ಆನಕ, ಎಲ್ಲಾ ಭಾಷಿಕ ಜನಾಂಗಕಾರಳೂ ಇದಂಡ ಕೊಂಬೆ ಉಳ್ಳನ್ನಕೆ, ಎಲ್ಲರೂ ಒಂದಾಯಿ ನಡ್ಂದ್ ನೈಚಕ ಮಾತ್ರ, ಕೊಡವ ಪದ್ದತಿ ಸಂಸ್ಕೃತಿ ಉಳಿವ ಎಣ್ಣ್‌ಚಿ. ಕೊಡವಾಮೆ ಉಳಿಯೋಂಡುವೇಂಗಿ ಆದ್ಯ ನಂಗಡ ತಕ್ಕ್ ಉಳಿಯೊಂಡು, ನಂಗಡ ತಕ್ಕ್‌ನ ನಂಗಳೇ ಬುಟ್ಟಿತ್‌ ಬೋರೆ ತಕ್ಕ್ ಪರಿವಕಾಗ. ನಂಗಡ ತಕ್ಕ್‌ನ ಉಳ್ತುವಕಾಯಿತ್‌ ನಂಗ ಒಂದಾಯಿತ್‌ ನೈಕನಾಂದ್‌ ಎಣ್ಣ್‌ಚಿ.
ಪೆಮ್ಮಂಡ ಐನ್ಮನೆಲ್‌ ನಡ್ಂದ ಆಯಿಮೆಲ್‌, ಒಕ್ಕಕಾರ, ತಾಮನೆ ಮೂಡಿಯ, ಸಂಸಾರ, ಊರ್‌ ಕೇರಿ, ನಾಡ್‌ರ ಮಾಜನ, ಕೊಡವ ಸಾಹಿತ್ಯ ಅಕಾಡೆಮಿರ ಸದಸ್ಯಂಗ ಕೂಡಿಯಾಡಿತಿಂಜತ್.
ಆದ್ಯತ್‌, ಕೊಟ್ಟ್‌ ಪಾಟ್‌, ತಳಿಯಕ್ಕಿ ಬೊಳಕೋಡೆ, ಒಡ್ಡೋಲಗ ಸಮೇತ, ಬೆಂದುವಳ ವಾಡೆಂಜ ಬಾಡೆಕ್‌ ಕಾಕ್ಯಬಂದಿತ್‌ ತಕ್ಕಾರ ಬಯಂದತ್. ಪೆಮ್ಮಂಡ ಪೊಮ್ಮಕ್ಕಡ ಉಮ್ಮತಾಟ್, ಊರ್‌ ಕಾರಡ ಬೊಳಕಾಟ್,ತೋರ ಕಾರಳಾನ, ಗೋಪಮ್ಮ ಕೂಟ್‌ ಕಾರಡ ಉರುಟಿಕೊಟ್ಟ್ ಆಟ್ ಕೂಡ್‌ನೈಂಗಡ ಮನ ತಣು ಮಾಡ್‌ಚಿ.
ಆಮಕ್ಕಕ್‌ ಪೊಡಿಯ ಮಡ್ಕೋ, ಆಂಜಡ್‌ತ್‌ ತಕ್ಕ್ ಪರಿಯೋ, ಪೊಮ್ಮಕ್ಕಕ್‌ ಚಾಲೆ ಮಡ್ಕೊ, ಕೊಡವ ತಕ್ಕ್‌ಲ್‌ ಓದುವ ಪಿಂಞ ವಾಲಾಗತಾಟ್ ಪೈಪೋಟಿ ನಡ್ಂದತ್. ಪೆಮ್ಮಂಡ ಒಕ್ಕ ನಡ್ಂದ್ ಬಂದ ಇತಿಹಾಸತ್‌ನ ಇಂದಿರ ಬೋಪಣ್ಣ ಒಪ್ಪುಚಿಟ್ಟತ್.
ಕೊಡವ ಸಾಹಿತ್ಯ ಅಕಾಡೆಮಿಯ ಮೂತಿಂಗ ಸಂಚಿಕೆ “ಕೊಡವಾಲೆ”ನ ಶಾಸಕ ಪೊನ್ನಣ್ಣ ಅವು ಬೊಳಿ ಪಡ್ತ್‌ಚಿ.
ಅಕಾಡೆಮಿರ ಪರ ಶಾಸಕ ಪೊನ್ನಣ್ಣ ಅಯಿಂಗಳ ತೊಮ್ಮಾನ ಮಾಡ್‌ನಕ. ಸುವರ್ಣ ಕರ್ನಾಟಕ ಪ್ರಶಸ್ತಿ ಪಡಂದ ಸಮಾಜ ಸೇವಕ ಕಾಟಿಮಾಡ ಜಿಮ್ಮಿ ಅಣ್ಣಯ್ಯ, ಮಾಜಿ ಸೈನಿಕ ಮೂಕಳಮಾಡ ಅರಸು ನಂಜಪ್ಪ, ಪೊಯ್ಯೇಟಿರ ಲತಾ ಲಾಲು ಕರುಂಬಯ್ಯ, ಚಿಂಡಮಾಡ ವಿಮಲ ರಮೇಶ್, ಪೆಮ್ಮಂಡ ಅರಸು, ಪೆಮ್ಮಂಡ ಬಿ. ಅಯ್ಯಪ್ಪ, ಪೆಮ್ಮಂಡ ಮಿಟ್ಟು ದೇವಯ್ಯ, ಅಲ್ಲಪಂಡ ರಾಣಿ ಗಣೇಶ್, ಪಿ.ಬಿ. ಜಾನ್ಸಿ, ಚಿಂಡಮಾಡ ಬೋಪಯ್ಯ, ಅಜ್ಜಿಕುಟ್ಟಿರ ಬಿ. ಭೀಮಯ್ಯ, ಪೆಮ್ಮಂಡ ಎಂ. ಅಪ್ಪಯ್ಯ,ಪೆಮ್ಮಂಡ ದೀಪು ರವೀಂದ್ರ, ಕೊಡವ ಸಾಹಿತ್ಯ ಅಕಾಡೆಮಿ ಮಾಜಿ ಅಧ್ಯಕ್ಷ ಪೆಮ್ಮಂಡ ಕೆ. ಪೊನ್ನಪ್ಪ, ಒಕ್ಕತ ಕೊರವುಕಾರ ಪೆಮ್ಮಂಡ ಪಿ. ಅರುಣ ಅಯಿಂಗಳನೂ ಒಕ್ಕತ ಪರ ತೊಮ್ಮಾನ ಮಾಡ್‌ಚಿ.
ಪೆಮ್ಮಂಡ ಪುಷ್ಪ ಡಾಲಿ ದ್ಯಾವಳ ತೊತ್ತ್‌ ಪಾಡ್‌ನಕ, ಪೆಮ್ಮಂಡ ಪೊನ್ನಪ್ಪ ತಕ್ಕಾರ ಬಯಂದತ್. ಆಟ್ ಪಾಟ್‌, ತೆಳಿರ ಕೂಡೆ, ಗೌಜಿ ಗದ್ದಳ ಇಂಜತ್.
