ಸೂರ್ಲಬ್ಬಿ, ಏ.13; ಇತಿಹಾಸ, ಪೌರಾಣಿಕ ಕೇಳಿರ, ಅವ್ವೊ ಮೋಂವೊನಾಯಿ ನೆಲೆ ನಿಂದಿತುಳ್ಳ ಸೂರ್ಲಬ್ಬಿ ನಾಡ್ ಕಾಳತಮ್ಮೆರ ಕೇತ್ರಪ್ಪ ದ್ಯಾವಡ ಕಾಲತ ನಮ್ಮೆ ನಾಳೆ, 15/04/25ನೇ ತಿಂಗಳಾಚೆ ಪಾಕಿರ್ಲ್ ತೊಟ್ಟ್, 16ನೇ ಚೊವ್ವಾಚೆ ಪೊಲಾಕಕೆತ್ತನೆ ನಡ್ಪ.
ನಾಳೆ ಇರ್ಲ್ 1:00 ಗಂಟೆಂಜ ಬೊಳಕಾಟ್, 3:00ಗಂಟೆಕ್ ಮಾಮಂಗಳಾರತಿ, ಬಾಳ್ ಆಟ್, 6:00 ಗಂಟೆಕ್ ಪಟ್ಟಂಬರಕೆ, 8:00 ಗಂಟೆಕ್ ತೆಂಗೆ ಪೋರ್ ನಡ್ಪ.
ಬಾಳ್ ಆಟ್ ವಿಷೇಶ ಪಟ್ಟದ್:- ಇಲ್ಲಿ ನಡ್ಪ ಬೊಳಕಾಟ್ರ ನಡುಲ್ ಬಾಳ್ ಆಟ್ ಏರ ಖನಪಟ್ಟದ್ ಪಿಂಞ ಐತಿಹಾಸಿಕವಾನದ್. ಪಂಡ್ ಟಿಪ್ಪು ಸುಲ್ತಾನ್ರ ಕಳ್ಳ ಪಡೆ ಎಲ್ಲಾ ಊರ್ ನಾಡ್ಕೂ ನುಗ್ಗ್ನನಕೆ ಈ ಇಲಲಿಕೂ ಬಪ್ಪ, ಪಡೆಬಂದ ನ್ಯಾರತ್ ನಾಡ್ರ ಮುದ್ದಂಡ, ತಂಬುಕುತ್ತಿರ ಪಿಂಞ ಐರಿ ಒಕ್ಕಕ್ ಕೂಡ್ನ ಮೂಂದ್ ಅಜ್ಜಂಗ ಮಾತ್ರ ಪಡೆನ ಕಾಂಬ, ಬೋರೆ ನಾಡ್ಕಾರಕೆಲ್ಲ ವಿಚಾರ ಗೊತ್ತಾಯಿತ್, ಬಂದಿತ್ ಎತ್ತಣೆಕ್ ಈ ಮೂಂದ್ ಅಜ್ಜಂಗ ತೆಂಗೆ ಬಾಳೆಕೊಲೆ ಎಡ್ತಂಡ್ ನ್ಯಾರೆ ಕೇತ್ರಪ್ಪಂಡ ತಿರಿಕೆಕ್ ಓಡಿತ್, “ಕೇತ್ರಪ್ಪ ಹರೋ ಹರಾ….” ಎಣ್ಯಂಡ್ ಅರ್ಪತರೆ ಇಟ್ಟಂಡ್ ದೇವಳತ ಮೂಂದ್ ಸುತ್ತ್ ಬಪ್ಪ, ಅಕ್ಕಣೆ ದೇವಳತ ಎದಿಕೆರ ಚಿತ್ತಾಲ್ ಮರತಿಂಜ ತೇನ್ಪುಳ್ ಎದ್ದಿತ್ ತುರ್ಕ ಪಡೆರ ಮೀದಬೂವ, ಅದೇ ನ್ಯಾರಕ್ ಬೋರೆ ನಾಡ್ಕಾರಳೂ ಬಂದಿತ್ ಎತ್ತುವ, ಬಯ್ಯ ಮಾನಿ ಬೇಕೋವುಲ್ ಪಡೆ ನಡ್ಪ ಅಂದ್ ಪಡೆಲ್ ಒಕ್ಕ್ನ ಚೋರೆರ ಉಯ್ತ್ಕ್ ಇಂದೆಕೂ ಓರ್ ಮಾನಿಲ್ ಬೊಳೆ ಆಪುಲೆ. ನಾಡ್ರ ಬೀರಂಗಡ ಪೊಯ್ತ್ಕೂ, ತೇನ್ ಪುಳುರ ಕಡಿಕಲ್ಕೂ ಆವದಿಲ್ಲತ ಕಳ್ಳಪಡೆ ಓಡಿತ್ ಪಕ್ಕತ ಕೂಹೊಳೆರ ಬಲ್ಯೋರ್ ಕುಂಡ್ಕ್ ಬುದ್ದಿತ್ ಚತ್ತತ್, ಆ ಕುಂಡ್ಕ್ ಬಡುವ ಚತ್ತ ಕುಂಡ್(ಬಡ್ಸತ್ತ ಕುಂಡ್) ಎಣ್ಣಿತ್ ಕಾಕುವ. ಚತ್ತ ಆಯಿರಾರ್ ಶತ್ರುವಡ ಬಾಳ್ ಬರ್ಜಿನ ಬಯ್ಯಂಜಿ ನಾಡ್ಕಾರ ಆಂಜಿತ್ ಕೇತ್ರಪ್ಪಂಡ ಭಂಡಾರಕ್ ಒಪ್ಪುಚಿಟ್ಟತ್. ಅಕ್ಕತಿಂಜ ತೊಟ್ಟ್ ಇಂದಾಕಣೆಕೂ ಕಾಲೊಂಡೆಕೋರಮ ಕೇತ್ರಪ್ಪಂಡ ನಮ್ಮೆಲ್ ಈ ಬಾಳ್ನ ಎಡ್ತಂಡ್ ಆಡುವದ್ ಪದ್ದತಿ.
ಈ ಬೀರ್ಯಪಟ್ಟ ನಮ್ಮೆಕ್ ಭಕ್ತಮಾಜನ ಏರ ಕಣಕ್ಕಲ್ ಬಂದ್ ಕೂಡ್ಯಾಡಿತ್, ದ್ಯಾವಡ ಆರ ಪಡ್ಂದವಂಡೂಂದ್ ನಾಡ್ರ ತಕ್ಕಂಗ ಮುಕ್ಕಾಟಿಯ, ಆಡಳಿತ ಮಂಡಳಿ, ನಾಡ್ಕಾರಂಗ ಕೇಟoಡಿತ್.
