ಮರಗೋಡ್, ಸೆ.26: ಕೊಡವುರ ಪೆದ ಪೋನ ಚಿತ್ರ ಕುರಿಕಾರ ಐಮಂಡ ರೂಪೇಶ್ ನಾಣಯ್ಯ ಅಯಿಂಗಕ್, ರಾಷ್ಟ್ರಮಟ್ಟತ ಹೈಲೀ ಕಮಾಂಡೇಬಲ್ ಬಿರ್ದ್ ಪಡ್ಂದಂಡಿತ್. ರಾಜಸ್ಥಾನತ, ಜೋದ್ಪುರತುಳ್ಳ ರಾಜಮಾತಾ ಕೃಷ್ಣ ಕುಮಾರಿ ಸ್ಕೂಲ್ಲ್ ನಡ್ಂದ, ಈಸ್ಟರ್ನ್ ಫೌಂಡೇಶನ್ ಆಫ್ ಆರ್ಟ್ಸ್ ಆ್ಯಂಡ್ ಕಲ್ಟರ್(ಇಫ್ ಎಸಿ) ನಡ್ತ್ನ ಅಖಿಲ ಭಾರತ 8ನೇ ಕಾಲತ ಕಲಾಪ್ರದರ್ಶನತ್ ರೂಪೇಶ್ ನಾಣಯ್ಯ ಅವು, ಈ ಬಿರ್ದ್ನ ಕೇಟಂಡತ್. ಈ ಚಿತ್ರ ಕುರಿ ಪೈಪೋಟಿಲ್ ದೇಶತ ಬೋರೆ ಬೋರೆ ಜಾಗತಿಂಗ ಸುಮಾರ್ 300ಕೂ ಏರ ಕಲಾವಿದಂಗ ಕೂಡಿಯಾಡಿತಿಂಜತ್ , ಒಟ್ಟು ಮೂಂದ್ ಸುತ್ತ್ಲ್ ನಡ್ಂದ ತೀರ್ಪುಗಾರಿಕೆಲ್, ಐಮಂಡ ರೂಪೇಶ್ ನಾಣಯ್ಯ ಅವು, ನೀರ್ ರಂಗ್ರ ಚಿತ್ರಕುರಿಕ್ ಹೈಲೀ ಕಮಾಂಡೇಬಲ್ ಬಿರ್ದ್ ಪಡ್ಂದಂಡತ್.
ಆಯಿಮೆಲ್ ನಿವೃತ್ತ ಪ್ರೊಫೆ ಸರ್ ಶಿವ ಜೋಷಿ, ರಾಜಸ್ಥಾನ ಹೈಕೋರ್ಟ್ ಪೆರಿಯ ವಕೀಲ ವಿಕಾಸ್ ಬಾಲಿಯಾ, ಪೆರಿಯ ಕಲಾವಿದ ಲಾಲ್ ಸಿಂಗ್ ಭಾಟಿ, ಜೈಪುರ ಅಮಿಟಿ ವಿಶ್ವವಿದ್ಯಾಲಯತ ಪ್ರೊಫೆಸರ್ ರಾಧೆ ಶ್ಯಾಮ್, ಪೆರಿಯ ಕಲಾವಿದ ಅಮಿತ್ ಕಾಲಾ ಪಿಂಞ ಯತೀಶ್ ಕಾಸರಗೋಡು ಅವು ಕೂಡಿಯಾಡಿತಿಂಜತ್.
ಕೊಡವುವರ, ಮರಗೋಡ್ ಐಮಂಡ ಒಕ್ಕಕ್ ಕೂಡ್ನ, ಐಮಂಡ ದಿ. ಗೌರಮ್ಮ ಪಿಂಞ ನಾಣಯ್ಯ ಅಯಿಂಗಡ ಮೋಂವೊನಾನ ರೂಪೇಶ್ ಅವು, ಚಾಮರಾಜೇಂದ್ರ ಅಕಾಡೆಮಿ ಆಫ್ ವಿಷುಯಲ್ ಆರ್ಟ್ಸ್ (CAVA)- ಮೈಸೂರು 1995-2000 ಕಲಾ ಪದವಿ ಪಡ್ಂದಿತ್, ಇಕ್ಕಾಕಲೇ ಬೀರ್ಯಪಟ್ಟ ಪಟ್ಟ ಕೊಡವ ಪಡೆಯಾಳಿಯ ಕೂಡ್ನನಕೆ ತರಾವರಿ ಚಿತ್ರ ಕುರ್ಚಿತ್ ದೇಶ ವಿದೇಶ ಮಟ್ಟತ್ ಕೇಳಿ ನೇಡಿತ್. ಪೊಣ್ಣ್ ಪ್ರೀತಾ, ಮೋಂವೊ ಅರ್ಜುನ್ ತಿಮ್ಮಯ್ಯ ಸಂಸಾರತ ಕೂಡೆ ಮರಗೋಡ್ಲ್ ನೆಲೆ ನಿಂದಿತ್. ( ಐಮಂಡ ರೂಪೇಶ್ ನಾಣಯ್ಯ ಅಯಿಂಗಡ ಕಲಾ ಸಾಧನೆರ ವಿವರ ಮಿಂಞಕ್ ಪ್ರಕಟಾಪ)
ಐಮಂಡ ರೂಪೇಶ್ ನಾಣಯ್ಯ
