ಮಡಿಕೇರಿ, ಜು.31;(nadubadenews): ಮಡಿಕೇರಿ ಕೊಡವ ಸಮಾಜ , ಪೊಮ್ಮಕ್ಕಡ ಕೂಟ ಪಿಂಞ ಕೊಡವ ಸಮಾಜಕ್ ಅಡಂಗಿತುಳ್ಳ ಎಲ್ಲಾ ಕೇರಿಯಡ ಕೂಡ್ ಕೂಟಾದನೆಲ್, ಕಕ್ಕಡ 18ರ ಮಾರೀಪತ್ ಒತ್ತೋರ್ಮೆ ಕೂಟ, ಅಗಷ್ಟ್ 03ನೇ ನಾರಾಚೆ ಮಡಿಖೇರಿ ಕೊಡವ ಸಮಾಜ ಬಾಡೆಲ್ ನಡ್ಪ.
ಅಂದ್ ಪೊಲಾಕ 10ಘಂಟೆಕ್, ಸಮಾಜ ಕೊರವುಕಾರ ಮಂಡುವಂಡ ಮುತ್ತಪ್ಪ ಅಯಿಂಗಡ ಕೊರವುಕಾರಿಕೆಲ್, ಪೊಮ್ಮಕ್ಕಡ ಕೂಟತ ಕೊರವುಕಾರಿ ಕನ್ನಂಡ ಕವಿತ ಬೊಳ್ಳಪ್ಪ ಅಯಿಂಗಡ ಮೇಲ್ಮಾನಿಕೆಲ್ ಶುರುವಾಪ ಆಯಿಮೆಕ್, ಮುಖ್ಯ ಮಂತ್ರಿರ ಕಾನೂನ್ ಅರಿವುಕಾರ ಪಿಂಞ ವಿರಾಜಪೇಟೆ ಶಾಸಕ ಅಜ್ಜಿಕುಟ್ಟಿರ ಪೊನ್ನಣ್ಣ, ಮಡಿಕೇರಿ ಶಾಸಕ ಡಾ. ಮಂಥರ್ ಗೌಡ ಅವು ಮೊಳಿ ಇಡುವ. ಖನಪಟ್ಟಬೆಂದುವಳಾಯಿತ್, ಮಾಜೀ ಶಾಸಕಿ ಶಾಂತೆಯಂಡವೀಣಾ ಅಚ್ಚಯ್ಯ, ಸಮಾಜ ಸೇವಕಿಯಳಾನ ಅಜ್ಜಿಕುಟ್ಟಿರ ಕಾಂಚನ್ ಪೊನ್ನಣ್ಣ ಪಿಂಞ ದಿವ್ಯಾಮಂಥರ್ ಗೌಡ ಅವು ಕೂಡಿಯಾಡುವ.
“ಕಕ್ಕಡ ನಮ್ಮೆರ ಬೋಜ” ಎಣ್ಣುವ ವಿಚಾರತ್ ಉಪನ್ಯಾಸಕಿ ಅಜ್ಜಿಕುಟ್ಟಿರ ಸುನಿತಾ ಗಿರೀಶ್ ಅವು ವಿಚಾರ ಒಪ್ಪುಚಿಟ್ಟಕ, ಮದ್ದ್ಪಾಯಸ, ಮದ್ದ್ನೀರ್ಲ್ ಮಾಡುವ ತರಾವರಿ ತೀನಿ,ನಾಡ್ ಕುಮ್ಮುಕರಿ, ಬೈಂಬಳೆ ಕರಿ, ಮಾಂಗೆ ಕರಿ, ಮುದ್ರೆ ಕಣ್ಣಿ, ಞಂಡ್ ಕರಿ, ಕೋಳಿ ಕರಿ, ಪಂದಿಕರಿ, ಪಚ್ಚೆ ಕೊಯಿಲೆ ಮೀನ್ ಕರಿ, ಚಕ್ಕೆ ಕುರುಪಜ್ಜಿ, ಕೈಪುಳಿ ಪಜ್ಜಿ, ಕೂವಲೆ ಪುಟ್ಟ್, ಮರಕೇಂಬು ಪುಟ್ಟ್ ಪೈಪೋಟಿ ನಡ್ಪಾಂದ್ ಮಡಿಕೇರಿ ಕೊಡವ ಸಮಾಜ ಪೊಮ್ಮಕ್ಕಡ ಕಾರ್ಯಕಾರಿ ಕೂಪದಿರ ಜೂನವಿಜಯ್ ಅವು ಅರಿಚಿಟ್ಟಿತ್.
