ಮೈಸೂರ್, ಮೆ.07: (ನಡುಬಾಡೆ ನ್ಯೂಸ್):- ಕೊಡವ ಮಕ್ಕ ಕಳಿ ತೆಳಿರ ಕೂಟ್ಕ್ ಬಾಳ್ರ ಬವುಸ್ಕೂ ಏತುವಾಪನ್ನಕೆ ತಯಾರಿ ಮಾಡ್ಯವಂಡೂ, ಹಾಕಿ ಕೂಡ್ನನಕೆ ಎಲ್ಲಾ ಕಳಿಲೂ ಬದ್ಕ್ ಪಿಂಞ ಬವುಸ್ ಉಂಡೇಂಗೂ ಎಲ್ಲಾರ್ಕೂ ಇಲ್ಲಿ ಚಾಕ್ರಿ ಕ್ಟ್ಟೋದ್ ಕಷ್ಟ. ಕಳಿಕಳಿತೆಳಿರ ಕೂಟ್ಲೇ ಚಾಕ್ರಿಕ್ ಒಪ್ಪನ್ನತ ತಯಾರಿನೂ ಮಕ್ಕ ಕಾಲೇಜ್ ಬದ್ಕ್ಲ್ ಇಪ್ಪಕಲೇ ಒತ್ತ ತಯಾರಿ ಮಾಡ್ಯವಂಡೂಂದ್, ಕೇಳಿಪೋನ ಸಮಾಜ ಸೇವಕ, ಬ್ಲೂಡಾಟ್ ಕಂಪೆನಿರ ನಿವೃತ್ತ ಪೆರಿಯ ಉಪಾಧ್ಯಕ್ಷ ಪಿಂಞ ಬೆಂಗಳೂರ್ರ ಉದ್ಯಮಿ ಬಾಳೆಯಡ ಕರುಣ್ಕಾಳಪ್ಪ ಅವು ಕೆಮಿ ತಕ್ಕ್ಪರ್ಂದತ್. ಕೊಡವ ಸ್ಟೂಡೆಂಟ್ಸ್ ಅಸೋಸಿಯೇಷನ್ ಮೈಸೂರ್ರ ಆದನೆಲ್ ಹಾಕಿ ಕಳಿ ನಮ್ಮೆಲ್ ಖನ ಪಟ್ಟಬೆಂದುವಾಯಿತ್ ಕೂಡಿಯಾಡ್ನ ಅವು, ಇಂದ್ ನಂಗಡಲ್ಲಿ ಸರ್ಕಾರಿ ಚಾಕ್ರಿಕ್ ಪೋಪನ್ನತ ಮಕ್ಕ ಕಮ್ಮಿ ಆಯಿತ್, ಅದತೂ IAS,KAS, IPS, IFSರನ್ನತ ಅಧಿಕಾರಿ ಆಪದ್ ದುಂಬಾ ಕಮ್ಮಿ ಆಯಿ ಪೋಯಿತ್. ಕೂಟ್ಕ್ ಡಿಫೆನ್ಸ್ ಫೋರ್ಸ್ರ ಅಧಿಕಾರಿಯಾಪಲ್ಲಿಯೂ ನಂಗ ಕಮ್ಮಿ ಆಯಂಡುಂಡ್, ಇದನೆಲ್ಲ ನೋಟಿತ್ ಮಕ್ಕಕ್ ಇಕ್ಕಿಂಜನೇ ತರಭೇತಿ, ತಾಲೀಮ್ ಅಭ್ಯಾಸ ಮಾಡೋ ಗ್ಯಾನ ಮಾಡಂಡಿಯದ್ ಅವಶ್ಯ ಎಣ್ಣ ಅವು, ಕಳಿ ತೆಳಿ ನಮ್ಮೆ ನಾಳ್ ಎಚ್ಚಕ್ ಅವಶ್ಯವೋ ಚಾಕ್ರಿರ ಅರಿವು ಕೊಡ್ತಿತ್ ಬಟ್ಟೆಬೊಳಿ ಕಾಟೋದೂ ಅಚ್ಚಕೇ ಅವಶ್ಯ. ಈ ನ್ಟ್ಟ್ಲ್ ನಂಗೆಲ್ಲರೂ ಗ್ಯಾನ ಮಾಡಿತ್ ಒತ್ತ ತಯಾರ್ ಮಾಡ್ಯವದ್ ಏರ ಅವಶ್ಯಾಂದ್ ಎಣ್ಣ್ಚಿ.
ಇದೇ ಮೇ 3 ಪಿಂಞ 4ಲ್ ಮೈಸೂರ್ಲ್ ನಡ್ಂದ ಈ ಕಳಿ ನಮ್ಮೆಕ್ KSA ಕೊರವುಕಾರಿ ಮೊಟ್ಟೆಯಂಡ ಇಶಾನಿಕುಟ್ಟಪ್ಪ ಅಯಿಂಡ ಕೊರವುಕಾರಿಕೆಲ್, ಮೈಸೂರ್ ಕೊಡವ ಸಮಾಜದ ಕೊರವುಕಾರ ಪೊಂಜಂಡ ಗಣಪತಿ, ಜಭ್ಭೂಮಿ ಚಾರಿಟೇಬಲ್ ಟ್ರಸ್ಟ್ ಲೆಕ್ಕಪಟ್ಟಿಕಾರ ಜಮ್ಮಡ ಅಯ್ಯಣ್ಣ, ಬೃಂದವನ್ ಆಸ್ಪತ್ರೆಯ ಡೈರೆಕ್ಟರ್ ಡಾ. ಮಾತಂಡ ಅಯ್ಯಪ್ಪ ಅವು ಮೊಳಿ ಇಟ್ಟತ್.
ಈ ಪೈಪೋಟಿಲ್ ಒಟ್ಟು 24 ಪಡೆಕಾರ ಕೂಡಿಯಾಡಿತ್ ಪಡೆಪೊತ್ತಲ್ಲಿ ಆಕ್ಸಿಲರೇಟರ್ HC ಆದ್ಯ, ಬೊಟ್ಟಿಯತ ನಾಡ್ ದಂಡನೆ, ಬ್ಲೇಜ್ A ಮೂನಾಡ್, ಮೂಂದನೇ ಇನಾಂ ಪಡ್ಂದಂಡತ್
ಆಯಿಮೆ ಆಖೀರಿ ಕಾರ್ಬಾರ್ಲ್ ಖನಪಟ್ಟ ಬೆಂದುವಳಾಯಿತ್, ಶಾಸಕ ಅಜ್ಜಿಕುಟ್ಟಿರ ಪೊನ್ನಣ್ಣ ಅಯಿಂಗಡ ಪೊಣ್ಣ್, ಸಮಾಜ ಸೇವಕಿಯೂ ಆಯಿತುಳ್ಳ, ಅಜ್ಜಿಕುಟ್ಟಿರ ಕಾಂಚನ್ ಪೊನ್ನಣ್ಣ ಸೇಪಿಯಂಟ್ ಕಾಲೇಜ ಡೀನ್ ಶ್ರೀಮತಿ ಸುಜಾತ ಮುತ್ತಣ್ಣ, ಸಮಾಜ ಸೇವಕಂಗಳಾನ ಚೇಂದಂಡ ಶಮ್ಮಿಮಾದಯ್ಯ, ಬಟ್ಟಿರ ಬೋಜಣ್ಣ, ಮಂಞಿರ ಕುಟ್ಟಪ್ಪ ಅವು ಕೂಡಿಯಾಡಿತಿಂಜತ್.
ಈ ನ್ಯಾರತ್ ಮೈಸೂರು ಯೂನಿವರ್ಸಿಟಿ ಹಾಕಿ ಕೋಚ್ ಆರ್ ಅಶೋಕ್, ಬೊಳಿಯಾಡಿರ ಚೇತನ್ ಸುಬ್ಬಯ್ಯ, ಮುಕ್ಕಾಟಿರ ಕಾರ್ತಿಕ್ ನಂಜಪ್ಪ, ಮಂಡೇಪಂಡ ಕೃಪನ್, ಮಂಡೇಪಂಡ ಜಾಸ್ಮಿನ್ ಕಾವೇರಮ್ಮ CEO, Growthzone Company UAE ಪಿಂಞ ಮೊಣ್ಣಂಡ ತಸ್ಮೈ ಕಾರ್ಯಪ್ಪ – professional motorcycle racer ಇಯಂಗಳ ತೊಮ್ಮಾನ ಮಾಡ್ಚಿ.
ಮೈಸೂರ್ ಕೊಡವ ಸ್ಟುಡೆಂಟ್ ಅಸೋಷಿಯೇಷನ್ರ ಕೊರವುಕಾರಿ ಮೊಟ್ಟೆಯಂಡ ಇಶಾನಿ ಕುಟ್ಟಪ್ಪ, ಕೂಡ್ ಕೊರವುಕಾರ ತೀತರಮಾಡ ತನುಶ್ ಗಣಪತಿ, ಕಾರ್ಯಾಕಾರ ಮಂಡೇಟಿರ ದೇಗುಲ್ ಗಣಪತಿ, ಕೂಡ್ ಕಾರ್ಯಕಾರಿ ಮೂಕೊಂಡ ಸಂಜನ ದಮಯಂತಿ ಲೆಕ್ಕಪಟ್ಟಿಕಾರ ಅಲ್ಲಾರಂಡ ಕಾರ್ಯಪ್ಪ, ಕೂಡ್ ಲೆಕ್ಕಪಟ್ಟಿಕಾರಿ ಪುಚ್ಚಿಮಂಡ ದಿಪ್ಸಿಕಾ ದೇಚಮ್ಮ, ಆಟ್ಪಾಟ್ರ ಮೂಪ ಕುಂಡ್ಯೋಳಂಡ ಅಯ್ಯಪ್ಪ, ಪೊಮ್ಮಕ್ಕಡ ಆಟ್ಪಾಟ್ರ ಕೊರವುಕಾರಿ ಕಲಿಯಂಡ ರಿಚಪೂವಮ್ಮ ಕೂಟ್ಕಾರಂಗ ಹಾಕಿ ನಮ್ಮೆನ ಗೌಜಿಲ್ ನಡ್ತ್ಚಿ.
