ವಿರಾಜಪೇಟೆ, ನ. 29: ಬಪ್ಪಕ ಪುತ್ತರಿ ಬಣ್ಣತೇ ಬಾತ್‌, ಪೋಪಕ್ಕ ಪುತ್ತರಿ ಎಣ್ಣತೇ ಪೋಚಿ…. ಎಣ್ಣೋ ಬಾಯಿತೊರೆಪೋಲೆ ಈ ಕಾಲತ ಪುತ್ತರಿ ನಮ್ಮೆ ಪೊವುದ್‌ರ ಕಟ್ಟ್‌ ಇಂದ್ಂಜಿ ಮೊಳಿಯಾಯಿತ್. ಆ ಪೋಲೆ, ಡಿಸೆಂಬರ್‌ 14 (ಬಿರ್ಚ್ಯಾರ್‌ 29) ಬೈಟ್‌ ದೇಶಕಾರ ಮಾಜನ, ಅಂದ್‌ ಬೈಟ್‌ 7.50ಕ್‌ ನೆರೆ ಕಟ್ಟಿತ್‌, 8.50ಕ್‌ ಕದ್‌ ಕೊಜ್ಜಿತ್‌, 9.50ಕ್‌, ಪಚ್ಚೆತಂಬುಟ್ಟ್‌ ಪಲಾರ ಎಡ್ತವಲೂಂದ್‌ ನಾಳ್‌ ನ್ಯಾರ ಕುರ್ಚಿತ್.
ಇಂದ್‌ ಪಾಡಿ ಶ್ರೀ ಇಗ್ಗುತಪ್ಪ ತಿರಿಕ್‌, ದೇವ ತಕ್ಕ, ದೇಶತಕ್ಕ, ನಾಡ್‌ ತಕ್ಕ, ಮುಕ್ಕಾಟಿಯಡ ಮುಂಬುಲ್‌, ಕವಡೆಬೆಚ್ಚ ಅಮ್ಮಂಗೇರಿ ಕಣಿಯಂಗ, ಪುತ್ತರಿರ ನಾಳ್‌ ನ್ಯಾರ ತಿರ್ಂಜಾನ, ದೇಶಮಿಂಞಕ್‌ ಸಾರಿತೆಣ್ಣಿತ್.
ಆಪೋಲೆ ಇಗ್ಗುತಪ್ಪ ತಿರಿಕೆಕ್‌ ಮಾತ್ರ ಒಪ್ಪನ್ನತ ದ್ಯಾವ ಪೊವುದ್‌, ಡಿಸೆಂಬರ್‌ 14ನೇ ಬೈಟ್‌ 7.30ಕ್‌ ನೆರೆ ಕೆಟ್ಟೋ, 8.30ಕ್‌ ಕದ್‌ ಎಡ್ಪೊ, 9.30ಕ್‌ ಪಲಾರ ಎಡ್ತವೋ, ಅದಾನದು 7.50ಕ್‌ ನೆರೆ ಕಟ್ಟಿತ್‌, 8.50ಕ್‌ ಕದ್‌ ಕೊಜ್ಜಿತ್‌, 9.50ಕ್‌, ಪಚ್ಚೆತಂಬುಟ್ಟ್‌ ಪಲಾರ ಎಡ್ತವ. ಅದೇ ಪೋಲಲೆ ಇಂದ್‌ ಇಗ್ಗುತಪ್ಪಂಡ ಆದಿ ನೆಲೆ ಮಲ್ಮತ್‌ ಪುತ್ತರಿರ ಮೊಳಿಲಾಲೆ ದೇಶಕೆಟ್ಟ್‌ ಬೂವ. ಈ ಕಟ್ಟ್‌ ಇಡೀ ಕೊಡವು ದೇಶಕ್ಕೇ ಕೂಡಿತಿಪ್ಪಾನುಂಡ್‌ ಮಾಜನ ನೇಮಕೊತ್ತಿತ್‌ ನಡ್ಂದವಂಡೂಂದ್‌ ಅರಿಯವು, ಪೆರಿಯವು ಅರಿಚಿಟ್ಟಿತ್.
ಪಂಡ್ ಕಾಲತ ನಡ್ಪೋಲೆ, ಕ್‌ಗ್ಗಟ್ಟ್‌ ನಾಡ್‌ರ ಚೆನ್ನ ನಾಡ್‌ ಕೇರಿಕಾರ, ಪೊವುಲ್ ಕದ್‌ ಎಡ್ಪ ಪದ್ದತಿ ಉಂಡ್. ಅಶ್ವಿನಿ ನಕ್ಷತ್ರತ ಆಧಾರತೇ ನಡ್ಪು ಆಚೇಂಗೂ, ಈ ನಾಡ್‌ಕಾರ ಪೊವುಲ್ ಕದ್‌ ಎಡ್ಪ. ಆಪೋಲೆ, ಅಂಜಿಗೇರಿ ನಾಡ್‌ಲ್‌, 14/12/24ನೇ ಚೆನಿಯಾಚೆ ಪೊಲಾಕ 10.3ಲಿಂಜ 11.30ರ ಒಳಿಯ ಕದ್‌ ಎಡ್ತಕ, ತಾವಳಗೇರಿ ಮೂಂದ್‌ ನಾಡ್‌ಲ್‌, 14ನೇ ನಾಳಂಕೆ ಪೊವುಲ್ ಕದ್‌ ಎಡ್ಪ. ಪತ್ತ್‌ಗೆಟ್ಟ್‌ ನಾಡ್‌ಕಾರ ಆದಿನೆಲೆ ಕುಟ್ಟತ ಮಲೆಲ್‌, ದಾರೆ ಬೆಚ್ಚಿತ್‌, ಕೊಟ್ಟಗೇರಿ ಮಾವಿಷ್ಣು ನಡೆಲ್‌, ಕದ್‌ ಎಡ್ಪ ನ್ಯಾರನ 03/12/24ನೇ ಚೊವ್ವಾಚೆ ಕುರಿಪದುಂಡ್. ಈ ಎಲ್ಲಾ ನಾಡ್‌ಲ್‌ ಬೈಟ್‌ ಇಗ್ಗುತಪ್ಪಂಡ ಕಟ್ಟ್‌ಕೊತ್ತನ್ನಕೆ ಕದ್‌ ಎಡ್ಪವೂ ಉಂಡ್.
ಕಳಿ ಕಳಿ ನಟ್ಟಾನ, ಪೊಲಿಪೊಲಿ ಕೊಜ್ಜಿ, ಚೆಂಬಂದುಡಿಕೊಟ್ಟಿ ಒಕ್ಕಳ ಪಾಡಿ, ಪೂವೆಲಂಗೊ ಮಂದ್‌ಲ್‌ ಕೋಲಾಟ್‌ ಕೈಚಿ, ಏಳಕ್ಕಿ ತಂಬುಟ್ಟ್‌, ತೇನ್‌ ನೆಯ್ಯಿ ಕೂಟಿ, ಊರ್‌ರ ಒರ್ಪುಕ್‌ ಓರ್ಮೆನ ಕೈಚಿ, ಕೂಡೋಂಗು ಕಳಿಪಾಂಗು ನಲ್ಲೋರ್‌ ನಮ್ಮೆ, ಆಡೋಂಗು ಪಾಡೊಂಗು ನಲ್ಲೋರ್‌ ನಮ್ಮೆ, ದಮ್ಮಯ ಪುತ್ತರಿ ಒಮ್ಮಲೂ ಪೋತೇ….. ಎಣ್ಣಿಯಂಡ್‌ ಕೊದಿ ಕೊಣಿಲ್‌ ಕೈಪ ಪುತ್ತರಿನ ಅದದ್‌ ಮೂಲ ನಡೆಪೋಲೆ, ಒಂದಾಯಿ ಒತ್ತೋರ್‌ಮೆಲ್‌ ಕೈಪನ್ನೆಕಾಡ್….
