ಪಾಲಂಗಾಲ, ನ. 21: (ಕರಿನೆರವಂಡ ಡ್ಯಾನಿ ಕುಶಾಲಪ್ಪ) ಕಡಿಯತ್‌ ನಾಡ್‌, ಕರಡ ಕೊಡವ ಕಲ್ಬರಲ್ ಪಿಂಞ ರಿಕ್ರಿಯೇಷನ್ ಕ್ಲಬ್‌ರ ಆದನೆಲ್‌, ದಂಡನೇ ಕಾಲತ್ ಕಡಿಯತ್‌ನಾಡ್ ಕಪ್ ಹಾಕಿ ಪೈಪೋಟಿ ನಾಳೆಂಜ 24 ನಡ್ಪ. ಕರಡ ಸರಕಾರಿ ಹಿರಿಯ ಪ್ರಾಥಮಿಕ ಶಾಲಾ ಪರಂಬುಲ್‌, ನಡ್ಪಾಂದ್‌ ಕ್ರೀಡಾ ಸಮಿತಿರ ಕೊರವುಕಾರ ಮೇದುರ ಗಣುಕುಶಾಲಪ್ಪ ಅರಿಚಿಟ್ಟಿತ್.
ಆದ್ಯ ಕೊಡವ ಒಕ್ಕಡೊಕ್ಕಡ ಹಾಕಿ ನಮ್ಮೆ, ಪಾಂಡಂಡ ಕಪ್ ನಡ್ಂದ ಪೆರ್ಮೆರ ಸರಕಾರಿ ಸ್ಕೂಲ್‌ ಪರಂಬುಲ್‌ ನಡ್ಪ ಈ ಹಾಕಿ ಪೈಪೋಟಿಲ್‌ ಕಡಿಯತ ನಾಡ್‌ಕ್‌ ಅಡ್ಂಗ್‌ನ ತಂಡಕಾರಕ್‌ ಮಾತ್ರ ಕಳಿಪಕ್‌ ಅವಕಾಶ ಉಂಡ್‌, ಪೈಪೋಟಿಲ್‌ 10 ತಂಡಕಾರ ಕೂಡಿಕಳಿಪ. ಒಟ್ಟು 9 ಕಳಿಕಾರಡಾತ್‌, 3 ಬೆಂದು ಕಳಿಕಾರಕ್‌ ಅವಕಾಶ ಮಾಡಿಕೊಡ್ಪಾಂದ್‌ ಎಣ್ಣ್‌ಚಿ.
ತಾ. 22ನೇ ಪೊಲಾಕ 9 ಗಂಟೆಕ್‌ ಮುಖ್ಯ ಬೆಂದು, ನರಿಯಂದಡ ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಪೆಮ್ಮಂಡ ಕೌಶಿ ಕಾವೇರಮ್ಮ ಕಳಿಕೂಟಕ್‌ ಮೊಳಿ ಇಡುವ. ನರಿಯಂದಡ ಗ್ರಾ.ಪಂ. ಅಭಿವೃದ್ಧಿ ಅಧಿಕಾರಿ ಆಶಾ ಕುಮಾರಿ ಪಿಂಞ ಪ್ರಾಥಮಿಕ ಸ್ಕೂಲ್‌ರ ಮುಖ್ಯ ಶಿಕ್ಷಕಿ ಚೆಯ್ಯಂಡ ಲೀಲಾವತಿ ಅಪ್ಪಚ್ಚು, ಬೆಂದುವಳಾಯಿತ್‌ ಕೂಡಿಯಾಡುವಾಂದ್ ಗಣು ಕುಶಾಲಪ್ಪ ಅರಿಚಿಟ್ಟಿತ್.
ತಾ. 23 ರಂದ್ ನಡ್ಪಸೆಮಿಫೈನಲ್ ಪೈಪೋಟಿಕ್‌, ವೀರಾಜಪೇಟೆ ವೃತ್ತ ನಿರೀಕ್ಷಕ ಪೆಮ್ಮಚಂಡ ಅನೂಪ್ ಮಾದಪ್ಪ ಮೊಳಿ ಇಡುವ, ಗ್ರಾಮ ಪಂಚಾಯಿತಿ ಉಪಾಧ್ಯಕ್ಷ ಕೋಡಿರ ವಿನೋದ್ ನಾಣಯ್ಯ ಬೆಂದು ಆಯಿತಿಪ್ಪ, ತಾ. 24ಲ್‌ ನಡ್ಪ ಫೈನಲ್ ಪಿಂಞ ಆಖೀರಿ ಆಯಿಮೆರ ಕೊರವುಕಾರಿಕೆನ ಕೊಡವ ಕಲ್ಬರಲ್ ಪಿಂಞ ರಿಕ್ರಿಯೇಷನ್ ಕ್ಲಬ್ ಅಧ್ಯಕ್ಷ ಬೇಪಡಿಯಂಡ ಎಸ್. ಬಿದ್ದಪ್ಪ ಅವು ಎಡ್ತವ, ಖನ ಪಟ್ಟ ಬೆಂದುವಳಾಯಿತ್‌, ಮುಖ್ಯಮಂತ್ರಿಗಳ ಕಾನೂನು ಸಲಹೆಗಾರ ಪಿಂಞ ವೀರಾಜಪೇಟೆ ಶಾಸಕ ಅಜ್ಜಿಕುಟ್ಟಿರ.ಎಸ್. ಪೊನ್ನಣ್ಣ, ಕೊಡವ ಕಲ್ಬರಲ್ ಆ್ಯಂಡ್ ರಿಕ್ರಿಯೇಷನ್ ಕ್ಲಬ್ ಕ್ರೀಡಾಕೂಟ ಸಮಿತಿ ಅಧ್ಯಕ್ಷ ಮೇದುರ ಗಣು ಕುಶಾಲಪ್ಪ, ಕೊಡವ ಹಾಕಿ ಅಕಾಡೆಮಿ ಅಧ್ಯಕ್ಷ ಪಾಂಡಂಡ ಬೋಪಣ್ಣ, ಪಾಂಡಂಡ ಮೊಣ್ಣಪ್ಪ, ಬೊವೇರಿಯಂಡ ನಾಚಪ್ಪ, ದೈಹಿಕ ಶಿಕ್ಷಕ ನಂಬಿಯಪಂಡ ಅಪ್ಪಣ್ಣ ಪಿಂಞ ರಾಜಕೀಯ, ಸಾಮಾಜಿಕ ಮೂಪಂಗ ಕೂಡಿಯಾಡುವ.
ಗೆದ್ದೈಂಗಕ್‌ ಆದ್ಯ, 35 ಆಯಿರ ಪಣ ಪಿಂಞ ಟ್ರೋಫಿನ ಪಾಂಡಂಡ ಮೊಣ್ಣಪ್ಪ, ದಂಡನೇ 25 ಆಯಿರ ಪಿಂಞ ಟ್ರೋಫಿನ ಬೊವ್ವೇರಿಯಂಡ ನಾಚಪ್ಪ, ಮೂಂದನೆ 20 ಆಯಿರ ಪಿಂಞ ಟ್ರೋಫಿನ ನಂಬಿಯಪಂಡ ಅಪ್ಪಣ್ಣ ಅವು ಬೆಚ್ಚಿತ್. ಇದೂ ಅಲ್ಲತೆ ತರಾವರಿ ತಲಾ ಇನಾಂ ಕೂಡಿ ಇಪ್ಪಾಂದ್, ಕ್ಲಬ್ ಅಧ್ಯಕ್ಷ ಬೇಪಡಿಯಂಡ ಬಿದ್ದಪ್ಪ, ಲೆಕ್ಕಪಟ್ಟಿಕಾರ ಐತಿಚಂಡ ಪ್ರಕಾಶ್ ಕಾರ್ಯಪ್ಪ, ನಡಿಕೇರಿಯಂಡ ಪೂವಣ್ಣ, ನೆರಪಂಡ ವಾಸು ಕುಶಾಲಪ್ಪ, ಪಾಂಡಂಡ ಕಿಶನ್, ಕೋಡಿರ ಮೋಹಿತ್,ಐತಿಚಂಡ ಲೋಹಿತ್, ದಾದಾ ಅಯ್ಯಣ್ಣ ಪಿಂಞ ಕೂಟಾಳಿಯ ಅರಿವು ತಂದಿತ್.
