ನಾಪೋಕ್,ಜು.30; (nadubadenews): ನಾಪೋಕ್ ಕೊಡವ ಸಮಾಜ ಪೊಮ್ಮಕ್ಕಡ ಪರಿಷತ್‌ರ ಆದನೆಲ್‌ ತೀನಿ ಪೈಪೋಟಿ ಪಿಂಞ ಆಯಿಮೆ ಕಕ್ಕಡ 18ನೇ ಅಗಷ್ಟ್‌ 03ಲ್‌ ಸಮಾಜತ ಅಪ್ಪನೆರವಂಡ ಅಪ್ಪಚ್ಚ ಕವಿ ಬಾಡೆಲ್‌ ನಡ್ಪ.
ಅಂದ್‌ ಪೊಲಾಕ 1ಘಂಟೆಕ್‌ ಮೊಳಿಯಾಪ ಆಯಮೆ, ಬಾಳೆಯಡ ನಿಶಾಮೇದಪ್ಪ ಕೊರವುಕಾರಿ ನಾಪೋಕ್ ಕೊಡವ ಸಮಾಜ ಪೊಮ್ಮಕ್ಕಡ ಪರಿಷತ್‌ ಅಯಿಂಗಡ ಕೊರವುಕಾರಿಕೆಲ್‌, ಕಾಫಿಬೊಳೆಕಾರ್ತಿ ಬಿದ್ದಾಟಂಡ ಸುಮನ್‌ ಪ್ರದೀಪ್ ಅವು ಮೊಳಿ ಇಟ್ಟಕ, ತೀನಿರ ಆಯಿಮೆಕ್‌ ಮಣವಟ್ಟಿರ ಕಮಲ ಬೆಳ್ಯಪ್ಪ, ಮಾಜಿಕೊರವುಕಾರಿ ನೆಲಜಿ ಪೊಮ್ಮಕ್ಕಡ ಸಂಘ ಅವು ಮೊಳಿ ಇಡುವ.
ಬೆಂದುವಾಳಾಯಿತ್‌ ಕೋಡಿಮಣಿಯಂಡ ರಚನ ಕುಟ್ಟಪ್ಪ ನಿ. ವ್ಯವಸ್ಥಾಪಕಿ ಬ್ಯಾಂಕ್‌ ಆಫ್‌ ಮಹರಾಷ್ಟ್ರ, ನಾಪೋಕ್ ಕೊಡವ ಸಮಾಜ ಕೊರವುಕಾರ ಮುಂಡಂಡ ನಾಣಯ್ಯ ಅವು ಕೂಡಿಯಾಡ್‌ನಕ, ನರ್ಸಿಂಗ್‌ ಸುಪರಿಟೆಂಟ್‌ ಬಾಳೆಯಡ ರತಿಪೆಮ್ಮಯ್ಯ, ಡಾ. ಚಿಯಕ್‌ಪೂವಂಡ ಸವಿತ ಅಪ್ಪಚ್ಚು ಉಪನ್ಯಾಸಕಿ ಕಾವೇರಿ ಕಾಲೇಜ್‌ ಗೋಣಿಕೊಪ್ಪ ಅಯಿಂಗಳ ತೊಮ್ಮಾನ ಮಾಡುವ.
ಎಳ್ತ್‌ಕರ್ತಿ ಕರವಂಡ ಸೀಮಾಗಣಪತಿ ಅವು ʼಕಕ್ಕಡ ತೀನಿ ಬೋಜʼ ಎಣ್ಣುವ ವಿಚಾರ ಒಪ್ಪುಚಿಟ್ಟಕ, ನೂಪುಟ್ಟ್, ನಾಡ್‌ ಕೋಳಿಕರಿ, ಞಂಡ್‌ ಕರಿ, ಕೊಯಿಲೆ ಮೀನ್‌ ಕರಿ, ಬೈಂಬಳೆ ಕರಿ, ಮರಕೇಂಬು ಕರಿ, ಚುಟ್ಟ ಕೈಪುಳಿ ಪಜ್ಜಿ, ಚೆಕ್ಕೆಕುರು ಪಜ್ಜಿ, ಅಂಬಟ್ಟೆ ಪಾರ, ತಾತೆತೊಪ್ಪು ಬರ್ತದ್‌, ಬಾಳೆನುರ್ಕ್‌ ಪೈಪೋಟಿ ಅಲ್ಲತೆ ಚೋದ್‌ ಚೋದ್ಯ ಕೂಡ್‌ನನಕೆ ಪಲತರ ಕಳಿಕೂಟ್‌ ನಡ್ಪದುಂಡ್‌.
