ನಡಿಕೇರಿ, ಡಿ.16: ಕೊಡವ ಪದ್ದತಿ ಪರಂಪರೆ, ಸೂರ್ಯ ಚಣ್ಣೂರ ಇಪ್ಪಲ್ಲಿಕೆತ್ತನೆಯೂ ಎದ್ದೆಲಂಗಿ ಬೊಲೀವಾತ್‌ ಸಂಶಯ ಇಲ್ಲೆ, ಆ ನ್‌ಟ್ಟ್‌ಲ್‌ ನಂಗೆಲ್ಲರೂ ಇಂಞಚ್ಚಕೂ ಮೇನತ್‌ಟ್ಟಿತ್‌ ನೈಕನಾಂದ್‌, ಕ್‌ಗ್ಗಟ್ಟ್‌ ನಾಡ್‌ ಪೆರಯ ನಾಗರೀಕಂಗಡ ವೇದಿಕೆರ ಮೊಳಿಕಾರ, ಕೇಳಿ ಪೋನ ಸಮಾಜಸೇವಕ್‌, ಸುವರ್ಣಕರ್ನಾಟಕ ರಾಜ್ಯೋತ್ಸವ ಬಿರ್‌ದ್‌ ಪಡ್ಂದ ಕಾಟಿಮಾಡ ಜಿಮ್ಮಿ ಅಣ್ಣಯ್ಯ ಅವು ಪೆರ್ಮೆ ಪಟ್ಟತ್.
ಪುತ್ತರಿ ಮಾರೀಪತ್‌, ನಡಿಕೇರಿಲ್‌ ನಡ್ಂದ ಒತ್ತೋರ್ಮೆ ಕೂಟತ್‌, ನಡಿಕೇರಿ ಊರ್‌ಕಾರಳುಂಡ್‌ ತೊಮ್ಮಾನ ಪಡ್ಂದಿತ್‌ ತಕ್ಕ್‌ ಪರ್ಂದ ಅವು, ಅಂದೋರ್‌ ಕಾಲತ್‌ ಕೊಡವಾಮೆನ ತಾಂದಂಡುಂಡ್‌ ನೆಲಪತ್ತಿ ಪೋಚೀ ಎಣ್ಯಂಡ್‌ ಎಲ್ಲರೂ ಬೇರ ಪಟ್ಟಂಡಿಂಜತ್‌. ಆಚೇಂಗಿ ಇಂದ್‌ ಕಾಲತ್‌ ನೋಟ್‌ನಕ ಬಾಲೆಕಾರ ಮಕ್ಕ ಅದತೂ ಓರ್‌ ನಾಡ್‌ರ ಕೊಡವ ಮಾಜನ ಕೊಡವಾಮೆನ ಕೊದ್‌ಚಿ ಕೊಂಡಾಡುವದ್‌ ಕಾಂಬಕ, ಬವುಸ್‌ಲ್‌ ಕೊಡವಾಮೆ ಎದ್ದೆಲುಂಗುವಾತ್‌ ಸಂಶಯವೇ ಇಲ್ಲೆ ಇದಂಗ್‌ ಇಂದ್‌ ನಡ್ಂದ ನಡಿಕೇರಿ ಊರ್‌ಕಾರಡ ಪುತ್ತರಿ ಒತ್ತೋರ್ಮೆ ಕೂಟವೇ ಸಾಕ್ಷೀಂದ್‌ ಎಣ್ಣ್‌ಚಿ.
ಕೊಡವಡ ಬೀರ್ಯ ಪಟ್ಟ ಕೋಲಾಟ್‌, ಉಮ್ಮತಾಟ್‌, ಉರ್‌ಟಿ ಕೊಟ್ಟ್‌ ಆಟ್‌, ಪರೆ ಕಳಿ ಕೂಡ್‌ನನಕೆ, ಕೊಡವ ಆಟ್‌ ಪಾಟ್‌ ನಡಿಕೇರಿಲ್‌ ಎಲಂಗಿ ಕಂಡದಲ್ಲತೆ, ಕುಪ್ಯಚಾಲೆಲ್‌ ಬೀರ್ಯಪಟ್ಟ ಆಮಕ್ಕ, ಉದ್ದಕೈ ಕಳಕುಪ್ಯತೋಡೆ ಎದ್ದೆಲಂಗ್‌ನ ಪೊಮ್ಮಕ್ಕ, ಊರ್‌ರ ಎಲ್ಲಾ ಒಕ್ಕ ಮಕ್ಕಳೂ ಕೂಡಿತ್‌ ಕೈಚ ಈ ಒತ್ತೋರ್ಮೆ ಕೂಟ ಎಲ್ಲಾ ಊರ್‌ ಕೇರಿ ನಾಡ್‌ಕೂ ಬಟ್ಟೆಬೊಳಿಯಾಡ್ಂದ್‌ ಕಾಟಿಮಾಡ ಜಿಮ್ಮಿ ಅಣ್ಣಯ್ಯ ಅವು ನಲ್ಲಾಮೆ ಬಯಂದಂಡತ್.
ನಡಿಕೇರಿ ಊರ್‌ ಕೊರವುಕಾರ, ಕೋಳೆರ ರಾಜಾನರೇಂದ್ರ ಅಯಿಂಗಡ ಕೊರವುಕಾರಿಕೆಲ್‌ ನಡ್ಂದ ಆಯಿಮೆಲ್‌ ಗೌಜಿ ಗದ್ದಳತ್ ನಮ್ಮೆ ಕೈಚತ್
