ವಿರಾಜಪೇಟೆ, ಅ.26: ಕೊಡವಡಲ್ಲಿ ಪಿಂಡ ಬೆಪ್ಪ ಎಣ್ಣುವ ಪದ್ದತಿಯೇ ತಪ್ಪು, ನಂಗಡ ಏದೇ ನಲ್ಲಾಂಗೂ ತೀಯಾಂಗೂ ನಂಗಡ ಅರಿಯವು ಪೆರಿಯವೇ ನಿಂದಿತ್, ಪದ್ದತಿ ನಡ್ತುವೊ ಅಲ್ಲತೆ, ನಂಗಡ ಆಯಿಮೆಕ್ ಬೋರೆ ದಾರ್ನೂ ಕೂಟುಲೆ. ಪಂಡೇತ ನಡ್ಪುನ ಕರೆಕ್ಟ್ಟ ನಂಗ ಭಾಗಮಂಡಲ ಸಂಗಮತ್ ಪಿಂಡ ಬೆಪ್ಪ ಎಣ್ಣುವ ಪದ್ದತಿನ ಬಾರೀ ಕಾಲ ಮುಪ್ಪಡೇ ಶುರುಮಾಡಿತ್. ಆಚೇಂಗಿ ಅದ್ ಮೂಲಕೊತ್ತ ನಡೆ ಅಲ್ಲ ಎಣ್ಣುವಾನ ಕಲ್ಯಾಟ ಅಜ್ಜಪ್ಪ ಬೊಳಿಕ್ ಬಂದಲ್ಲಿ, ಅರಿಕೆ ಮಾಡ್ನ ಪೋಲೆ ನಡುಬಾಡೆ ಸಂಪಾದಕ ಚಾಮೆರ ದಿನೇಶ್ ಬೆಳ್ಯಪ್ಪ ಅವು ಆದ್ಯ ನಡ್ತಿತ್, ಈ ವಿಚಾರತ್, ನಡುಬಾಡೆರ ನಾಡ್ ನಡೇಲ್ ವಿವರೋಡೆ ಬೊಳಿ ಪಡ್ತಿತಿಂಜತ್.
ಈ ಅರಿವು ಕಂಡ ಅಮ್ಮತ್ತಿ ಒಂಟಿಯಂಗಡಿಕಾರಳಾನ ಬೊಪ್ಪಂಡ ಮಹೇಂದ್ರ ಪಿಂಞ ಚೆಂಬೆಬೊಳಿಯೂರ್ ಕಾರಳಾನ, ಮಂಡೇಪಂಡ ರೇಶುಕಾರ್ಯಪ್ಪ ಅವು ಸಂಸಾರೋಡೆ ಸಂಗಮಕ್ ಪೋಯಿತ್, ಕಲ್ಯಾಟಜ್ಜಪ್ಪಂಡ ಒಕ್ಕಣೆಪೋಲೆ ಎಡೆಬೆಚ್ಚಿತ್(ಪಟ್ಟಮ ಇಲ್ಲತೆ) ಕಾವೇರಿಕ್ ಒಪ್ಪುಚಿಟ್ಟಿತ್, ಭಗಂಡೇಶ್ವರ ಪಿಂಞ ಅವ್ವ ಕಾವೇರಿರ ನಡೆಲೂ ಪೂಜೆ ಕೈಪಂಜಿ, ಕಾರೋಣಳ ಕಾಕ್ಯಂಡ್ ಮನೆಕ್ ಬಂದಿತ್ ಮೀದಿ ಬಿಚ್ಚತ್.
ಎಂದೋ ತುಂಡಿ ಪೋನ ನಂಗಡ ಪಳಿಯಾಮೆರ ಕೊಯ್ಮೆನ ಒಂದೊಂದಾಯಿತ್ ಕೂಡಿ ನಡ್ತಿಯಂಡ್, ಪುನಾದ್ಯ ಕೊಡವಾಮೆರ ಮೂಲ ಬೆರ್ ಕೊಡಿನೇರಿ ಬಾವನೆಕಾಡ್. ಕಾಲ ಮುಂದಾರಕ್ ಎಲ್ಲ ಕೊಡವಳೂ ಮೂಲ ಆಜಾರಕೊತ್ತ್ ನಡ್ಪನ್ನಕೆ ಆಡ್ಂದ್ ಬಯಂದಂಡ್ ಈ ದಂಡ್ ಸಂಸಾರಕ್ , ಮಾತಾಯಿ ಮಾದೇವನೂ ಮಾಗುರುಕಾರೋಣಳೂ ನಂದ್ ಮಾಡಡ್ ಎಣ್ಣಿತ್ ಬೋಡ್ಯವ….