ವಿರಾಜಪೇಟೆ, ಅ.27: ಕೊಡವಡಲ್ಲಿ ಪಿಂಡ ಬೆಪ್ಪ ಎಣ್ಣುವ ಪದ್ದತಿಯೇ ತಪ್ಪು. ನಂಗಡ ಏದೇ ನಲ್ಲಾಂಗೂ ತೀಯಾಂಗೂ ನಂಗಡ ಅರಿಯವು ಪೆರಿಯವೇ ನಿಂದಿತ್ ನಡ್ತುವೊ ಅಲ್ಲತೆ, ನಂಗಡ ಆಯಿಮೆಕ್ ಬೋರೆ ದಾರ್ನೂ ಕೂಟುಲೆ. ಆಚೇಂಗಿ ಪಂಡೇತ ನಡ್ಪುನ ಕರೆಕ್ಟ್ಟ ನಂಗ ಭಾಗಮಂಡಲ ಸಂಗಮತ್ ಪಿಂಡ ಬೆಪ್ಪ ಎಣ್ಣುವ ಪದ್ದತಿನ ಬಾರೀ ಕಾಲ ಮುಪ್ಪಡೇ ಶುರುಮಾಡಿತ್. ಆಚೇಂಗಿ ಅದ್ ಮೂಲಕೊತ್ತ ನಡೆ ಅಲ್ಲ ಎಣ್ಣುವಾನ ಕಲ್ಯಾಟ ಅಜ್ಜಪ್ಪ ಬೊಳಿಕ್ ಬಂದಲ್ಲಿ, ಅರಿಕೆ ಮಾಡ್ನ ಪೋಲೆ ನಡುಬಾಡೆ ಸಂಪಾದಕ ಚಾಮೆರ ದಿನೇಶ್ ಬೆಳ್ಯಪ್ಪ ಅವು ಆದ್ಯ ನಡ್ತಿತ್, ಈ ವಿಚಾರತ್, ನಡುಬಾಡೆ ಸಂಪಾದಕೀಯತ್ ವಿವರೋಡೆ ಬೊಳಿ ಪಡ್ತಿತಿಂಜತ್.
ಈ ಅರಿವು ಕಂಡ, ಕ್ಗ್ಗಟ್ಟ್ ನಡ್ರ ತೊಡನಾಡ್ಕ್ ಅಡ್ಂಗ್ನ ನಾಲ್ಕೇರಿಕಾರಳಾನ, ತಿಂಗಕೋರ್ ಮೊಟ್ಟ್ ತಲೆಕಾವೇರಿಕ್ ನಡ್ಪುರ ಮೂಪ, ಮಲ್ಲಪನೆರ ವಿನು ಚಿಣ್ಣಪ್ಪ ಅವು ಸಂಸಾರೋಡೆ ಸಂಗಮಕ್ ಪೋಯಿತ್, ಕಲ್ಯಾಟಜ್ಜಪ್ಪಂಡ ಒಕ್ಕಣೆಪೋಲೆ ಎಡೆಬೆಚ್ಚಿತ್ ಕಾವೇರಿಕ್ ಒಪ್ಪುಚಿಟ್ಟಿತ್, ಭಗಂಡೇಶ್ವರತೂ, ಅವ್ವ ಕಾವೇರಿರ ನಡೆಲೂ ಪೂಜೆ ಕೈಪಂಜಿ, ಕಾರೋಣಳ ಕಾಕ್ಯಂಡ್ ಮನೆಕ್ ಬಂದಿತ್ ಮೀದಿ ಬಿಚ್ಚತ್.
ಎಂದೋ ತುಂಡಿ ಪೋನ ನಂಗಡ ಪಳಿಯಾಮೆರ ಕೊಯ್ಮೆನ ಒಂದೊಂದಾಯತ್ ಕೂಡಿ ನಡ್ತಿಯಂಡ್, ಪುನಾದ್ಯ ಕೊಡವಾಮೆರ ಮೂಲ ಬೆರ್ ಕೊಡಿನೇರಿ ಬಾವನೆಕಾಡ್, ಕಾಲ ಮುಂದಾರಕ್ ಎಲ್ಲ ಕೊಡವಳೂ ಮೂಲ ಆಜಾರಕೊತ್ತ್ ನಡ್ಪನ್ನಕೆಕಾಡ್ಂದ್ ಬಯಂದಂಡ್ ಈ ದಂಡ್ ಸಂಸಾರಕ್ , ಮಾತಾಯಿ ಮಾದೇವನೂ ಮಾಗುರುಕಾರೋಣಳೂ ನಂದ್ ಮಾಡಡ್ ಎಣ್ಣಿತ್ ಬೋಡ್ಯವ….