ಬೆಂದೋಲೆ: (ಎಳ್ತ್- ಅಂಜಪರವಂಡ ರಂಜು ಮುತ್ತಪ್ಪ, ನಾಲ್ನಾಡ್) ಇಗ್ಗುತಪ್ಪಂಡ ನಮ್ಮೆ ಕೆಟ್ಟ್ ಎಣ್ಣಕ ದೇಶ ಕೆಟ್ಟ್. ನೆಲ್ಲ್ ಬೊಳೆ’ರ ದೇವ. ಎಲ್ಲಾ ನಲ್ಲ ಕಾರ್ಬಾರ್’ಲ್ ಇಗ್ಗುತಪ್ಪನ ತೊತ್ತಿತೇ ಮೊಳಗಿ ಇಡುವೋ. ದೇಶಕೆಟ್ಟ್’ರ ವಿಶಯತ್ ಜನಕ್ ಅರಿವಿಕೆ ಇಂಜ್’ಲೆ. ಇಕ್ಕ ಕಾಲ ದಂಡ್ ಕಾಲತ್ಂಜ ಸಾಮಾಜಿಕ ಮಾಧ್ಯಮತ್’ನುಂಡ್ ಜನಡ ಅರಿವಿಕೆಕ್ ಎತ್ತಿಯಂಡುಂಡ್. ಇನ್ನನಿಪ್ಪಕ, ಕೇಳಿ ಪಟ್ಟ ಚೆನ್ನ ಮುಕ್ರಿಯಳುಂಡ್ ಅಚಾತುರ್ಯ ನಡ್ಂದಂಡುಂಡ್. ಗೊತ್ತಿಲ್ಲತೆಯೋ , ಗೊತ್ತಿಂಜಿತೋ ಎನ್ನೋ.
ಪಂಡ್ಂಜೇ ಇಂದಾಕಣೆಕೂ, ಎಲ್ಲಾ ಊರ್ ನಾಡ್ಲ್ ನೇಮಕೊತ್ತನ್ನನೆ ದೇವ ಕೆಟ್ಟ್ ಇಟ್ಟಿತ್ ನಮ್ಮೆ ನಡ್ತುವ. ಅದದ್ ಊರ್’ಲ್ ಕೆಟ್ಟ್’ರ ನೇಮ ಪಾಲನೆ ಮಾಡುವ. ಇದ್ ಎಲ್ಲಾಕೂ ಅರ್ಂಜದೇ. ಅದೇ ಪೋಲೆ ಕೊಡಗ್’ರ ಕುಲದೇವಿ ಕಾವೇರಮ್ಮೆರ ತೀರ್ಥೋದ್ಭವತಂದೂ, ತೊಲಿಯಾರ್ ತಿಂಗತೂ ಉಳ್ಳ ನಡ್ಪುನ ಎಲ್ಲಾರೂ ಶ್ರದ್ದೆಲ್ ನಡ್ತುವ. ಅನ್ನನೇ ಅಪ್ಪಂಡ ಸ್ಥಾನತ್ ಉಳ್ಳ ಇಗ್ಗುತಪ್ಪಂಡ ನಮ್ಮೆ ನಡ್ತುವಕ ಎನ್ನಂಗ್ ಈ ಅಚಾತುರ್ಯ?
ಬಾಳ್’ಗೊಡ್ ಕೊಡವ ಸಮಾಜ ಒಕ್ಕೂಟ ತ್ ಕೊಡವ ಆಟ್ ಪಾಟ್ ಪೈಪೋಟಿ ಆನಕೊ, ದೇಶ ಕೆಟ್ಟ್ ಇಟ್ಟ ಪಿಂಞ ಎಲ್ಲಾ ನೇರತೂ ಆಟ್,ಪಾಟ್ ಎಡ್ಪನ್ನನೆ ಇಲ್ಲೆ. ನಂಗ ಪುತ್ತರಿಕ್ ಮುಪ್ಪಡೆ, ಈಡ್ ಮಂದ್ಲ್ ಮೂಂದ್ ನಾಳ್ ಮುಪ್ಪಡೆ ಈಡ್ ತೊರಂದಿತ್ ಈಡ್ ಎಡ್ಪ. ಎಣ್ಣಕ ಮಂದ್ಲ್ ಕೋಲಾಟ್ ಬೊಳಕಾಟ್ ಆಡುವ, ಅದು ಬೈಟಾನದು ಮಾತ್ರ. ಅಲ್ಲಿ ಮಕ್ಕ ಆಟ್ ಪಡಿಪಕೂ ಅವಕಾಶ ಮಾಡಿಕೊಡಪಕಾಯಿತೆ ಬೈಟ್ ಆಡೊ.
ಸಂಸ್ಕೃತಿ ಕ ಆಟ್ ಪಾಟ್ ರ ವಿಷಯ ಎಡ್ತಂಡಕ ಪಡಿಪುಕ್ ಒತ್ತಾಸೆ ಕೊಡ್ತನ್ನಕೆ ಆಪದೆನ್ನೊ ನೇರ್, ಆಚೆಂಗಿ ಅದ್ ಪುತ್ತರಿಕ್ ಮುಪ್ಪಡೆ, ಕೆಟ್ಟ್ನಿರ್ಕ್ ಇಪ್ಪಕ, ಬೈಟ್ ಮಾತ್ರ ಆಡೋಂಡು, ಅಲ್ಲತೆ ಪೊವುಲ್ ಆಡುವನ್ನನೆ ಇಲ್ಲೆ. ಪುತ್ತರಿ ಕೈಂಜ ಪಿಂಞಚ್ಚಿಕೆ, ಪೊವುಲ್ ಆಡುವೊ ನಡ್ಪು, ಇನ್ನನಿಪ್ಪಕ ಕೊಡವ ಸಮಾಜ ಒಕ್ಕೂಟತ್ರ ಕೊರವುಕಾರಂಗಕ್ ಇಂಞು ಪುತ್ತರಿ ದೇಶ ಕೆಟ್ಟ್ರ ಅರಿವಿಕೆ ಬಂದಿತ್ಲೆಂದಾನಕ, ನಿಂಗ ನಂಗಡ ಕೊಡವ ಸಮಾಜಕೆಲ್ಲ ತಲೆ ಬಲ್ಯಯಂವೊಂದೆಣ್ಣಕ ಎಂಥ ಅರ್ಥ..?
ನಿಂಗ ನಂಗಡ ಪದ್ದತಿ ಇಡ್ಕೆಟ್ಟ್ರ ನಡ್ಪುಕೊತ್ತ್ ನಡಂದಿತ್ಲೆಂದಾನಕ ನಂಗ ದಾರೂ ಬೋರೆ ಕೊಡವ ಸಮಾಜತ್ರ ಮೀದ ತಕ್ಕ್ ಪರಿವನ್ನಕೆ ಇಲ್ಲೆ…! ಮೂಪವನೆ ಎಲ್ಲಾರೂನೊ ನಡ್ಪುಕೊತ್ತ್ ನಡ್ಪನ್ನನೆ ಮಾಡಂಡು. ಎನ್ನಂಗೆಣ್ಣಕ ನಂಗಡ ಪದ್ಧತಿ, ನಡುಪು ,ತೊಡುಪುಕ್ ಅಚ್ಚಕ್ ಬೀರ್ಯ ಉಂಡ್.
ಪುತ್ತರಿ ಕೆಟ್ಟ್ಲ್ ತೋಕ್ ಮುಟ್ಟುವನ್ನಕೆ ಇಲ್ಲೆ . ಪಂಡೆತವು ಪರಂದಾನ ಕೇಟದ್ ಇಕ್ಕಲು ಗೇನ ಉಂಡ್. ಮನೆರ ಕಂಡಿಕಾಲೆ ಜಾತಿಯ ಓಡೊ ಇಂಜತ್ಲೋ..! ಎಣ್ಣಕ ನಂಗಡ ಇಡ್ಕಟ್ಟ್ಕ್ ಅಚ್ಚಕೋರ್ ಬೀರ್ಯ ಇಂಜತ್ಂದ್ ಅರಿವಾಪಲ. ಒಂದಂತೂ ನಂಗಳ ಕೇಪ ಚೋದ್ಯ ಕಾಡ್ ಜಾತಿಯಕೂ (ಪ್ರಾಣಿಯ) ದೇಶ ಕೆಟ್ಟ್ ರ ಅರಿವು ಬಪ್ಪ ಇಂಜಾತಾಂದ್….?
ಎಂಥೊ ಕೂಡವಾಮೆಕೊತ್ತ್ ಕೊಡವ ಇಡ್ಕಟ್ಟ್ಲ್ ನಡ್ಪು ನಡತಿಯಂಡಿಂಜ ನಾಡ್ ಕಾರಕ್ ಮಾತ್ರ ಅರಿಂಜಿತಿಂಜ ದೇಶ ಕೆಟ್ಟ್ರ ನಿರ್ಕ್ ನೇಮ, ಕೈಂಜ ಕಾಲತ್ಂಜ ಎಲ್ಲಾಕೂ ಅರಿವಾಯಂಡುಂಡ್, ಇಂಞೊರ್ ಒಂದ್ ದಂಡ್ ಕಾಲತ್ ಎಲ್ಲಾ ಸೆರಿಯಾಯಿತೆ ಸೆರಿಯಾಪ ಎಣ್ಣೊದ್ ನಾಡ ನಂಬಿಕೆ…
ಕಡೆಕೋರ್ ತಕ್ಕ್:
ನಿಂಗ ನಂಗಡ ಕೊಡವಾಮೆಕ್ ಒತ್ತ್ ನಡ್ಕಂಡಿಯ ಒಕ್ಕೂಟ, ಸಮಾಜ, ಸಂಘ, ಸಂಸ್ಥೆಲ್ ಒಬ್ಬನ ಮೂಪನಾಯಿತ್ ಅಳ್ಪುಚಿಡುವಾಂಗ್ಂಜ ಮಿಂಞ ಗೇನ ಮಾಡಂಡಿಯೇ ಒಂದೆ ಅಂವೊ ಕೊಡವಾಮೆಕ್ ಎಂಥ ಮಾಡಿಯೆ..? ಕೊಡವಾಮೆರ ಅರಿವು ಉಂಡಾ? ನಂಗಡ ಜಾನಪದ ಆಟ್ ಪಾಟ್, ನಲ್ಲಾಮೆ, ಕೆಟ್ಟಾಮೆಲೂ, ನಡ್ಪು, ಪದ್ದತಿ ಗೊತ್ತುಂಡಾ? ಕೊಡಗ್’ರ ಇತಿಹಾಸತ್ರದೂ, ಪುರಾಣತ್ರೋ ಕನಿಷ್ಠ ಜ್ಞಾನ ಉಂಡಾಂದ್..!
