Nadubadenews, ಸಂಪಾದಕೀಯ, ಅ.24: ಕೊಡವಾಮೆರ ಪೋಕ್ಲ್, ಕಾವೇರಮ್ಮೆಯೇ ಆದಿಮೂಲ. ಅವಡ ನೇರ್ ನಡೆನುಡಿನ ನಡ್ತುವದೇ ಎಂಗಡ ಆದ್ಯ ಮೊಟ್ಟ್. ಕೊಡವನಾಯಿತ್ ಪುಟ್ಟ್ನ ಪ್ರತಿಯೊಬ್ಬಂಗೂ ಕಾವೇರಮ್ಮೆಯೇ ಆದಿ, ಕಾವೇರಮ್ಮೆಯೇ ಅಂತ್ಯ. ಇನ್ನನಾಯಿತ್ ಕಾವೇರಮ್ಮೆಕೊತ್ತ ನಡ್ಪು ಏದೇದ್ ಎಂತಂಗ್ಂದ್ ಅರಿಯಂಡಿಯದ್ ಆದ್ಯ.
ಈ ವಿಚಾರತ್ ನಾನ್ ಕೈಂಜ ಅಂಜಾರ್ ನಾಳ್ಂಜ, ಕೊಡವುರ ಮೂಲೆ ಮೂಲೆಲ್ ಸುಮಾರ್ ಇರುವಾದಂಗೂ ಏರ ಪೆರಿಯವು, ಅರಿಯೈಂಗಳ ಕೇಟರ್ಂಜಲ್ಲಿ ಪಿಂಞ ನಾಕ್ ಗೊತ್ತಿಂಜಪೋಲೆ, ಕಾವೇರಮ್ಮೆರ ನಡ್ಪು ಎನ್ನನೆ ಏದೇದ್ ಎಣ್ಣುವಾನ, ಇಲ್ಲಿ ಬಳಂಬಿಯವಕ್ ಕೈ ತೆಕ್ಕಿಯೆ. ಪಂಡಾಯಿರತೊಟ್ಟ್ ನಡ್ಂದ ಆಯಿಮೆ ಕೊಯಿಮೆ ಎಡೆಲ್ ತುಂಡಿತ್, ತಪ್ಪಿ ಪೋನಲ್ಲಿ, ಇಪ್ಪರಕ್ ಉಳ್ಳ ಮೋಲಿಯಕೇ ಆಡ್, ಕ್ಕ್ಕ್ರಂಗಕೇ ಆಡ್ ಏದೂ ಸೆರಿಯಾಯಿತ್ ಇನ್ನನೇಂದ್ ಎಣ್ಣುವಕಾಪುಲೆ. ಇದಂಡಾಬರಿಕ್ ಸೆರಿಯಾನ ಅರಿವು ದಾರ್ಕೇಂಗಿ ಉಂಡೇಂಗಿ, ಅವು ಅದನ ಅರಿಕೆ ಮಾಡ್ನಕ, ಅವ್ವ ಕಾವೇರಿರ ಕೋಪುನ ಕೊಂಡಾಡುವಕ್ ನಂಗಕೆಲ್ಲಾರ್ಕೂ ಬಟ್ಟೆಬೊಳಿಯಾಕೂ.
ಆ ಪೋಲೆ ಕಾವೆರಮ್ಮಕ್ ಪಾಲಕ್ಕಿ ಬೈವಾಡ್ ಪೋಪದ್ ಎನ್ನಂಗ್ ಪಿಂಞ ಎನ್ನನೆ ಅದಂಡ ನಡೆ ನುಡೀಂದ್ ಅರ್ಂಜಿ ನೋಟನ.
ಕೊಡವಡ ಕುಲದೇವಿ ಅವ್ವ ಕಾವೇರಿ. ಸಾಕ್ಷಾತ್ ಆದಿ ಮಾತೆ ಸೃಷ್ಟಿ ಮಾತೆ, ಆಧಿ ಶಕ್ತಿ ಪಾರ್ವತಿರ ಅಂಶತ್ ಪುಟ್ಟಿತ್, ಲೋಪಾಮುದ್ರೆ ಎಣ್ಣಿತ್ ಪೆದ ನೇಡಿತ್, ಅಸುರಂಗಳ ಅಡ್ಕಿತ್, ಬೊಮ್ಮಂಡ ದತ್ತ್ಮೋವಳಾಯಿತ್. ಕಾಲನ್ನನೆ ಪೋಪಕ್ಕ, ಲೋಗೊದ್ದಾರಕ್ಕಾಯಿತ್ ಕ್ಬ್ಬೂಮಿಕ್ ಬಂದಿತ್, ನೀರಾಯಿತ್ ಒಕ್ಕಿತ್, ಕೋಟಿ ಜೀಂವ ರಾಶಿಯಕ್ ತಂಪು ತಣು ಆಯಿತ್ ಬಾಳ್ ನೆಲೆ ಕೊಡ್ಕೊಂಡು ಎಣ್ಣುವ ಇರಾದೆಲ್, ಜಬ್ಬೂಮಿರ ಮೀದಲ್ ದೇವಲೋಗಕ್ ಸೆಮ್ಮಾನ(ಸೆರಿಯಾನ) ನೇರ್ ನೆಲೆ ಏದ್ಂದ್ ಬೇರಗೊಂಡ್(ಗ್ಯಾನ ಮಾಡಿತ್) ನೋಟ್ನಲ್ಲಿ, ದೇವಮಲೆ ಪೊಮ್ಮಾಲೆ, ತುಂಬೆಮಲೆ ಕೊಡಿಮೀದ ಮಾದೇವಂಡ ಆದಿನೆಲೆ, ತಾನೆ ಕೆಜ್ಜ ಸೃಷ್ಟಿಲ್ ದೇವುಮಡ ಕಾರ್ಯಬೀರ್ಯತುಳ್ಳ, ಪೊಮ್ಮಲೆ ಕೊಡವುಲ್ ಆದಿಮೂಲ ಕೊಡವಡ, ಅವ್ವನಾಯಿ ನಿಕ್ಕೋಂಡು ಎಂದ್ ಮನಕೊಂಡಲ್ಲಿಕ್, ಸೃಷ್ಟಿರ ಬಿದಿಪೋಲೆ(ನೇಮಪೋಲೆ), ಕಾಲ ನ್ಯಾರ ಬಪ್ಪಕ್ಕ, ಪೊಮ್ಮಾಲೆ ಮಲೆ ಮೀದ ಸ್ಕಂದಕಾಡ್(ಪಾಂಡತಿಂಜ ಬ್ರಹ್ಮಗಿರಿ ಸಾಲ್) ಕೊಡಿ ಮೀದ, ಬೊಮ್ಮಗಿರಿ(ಬ್ರಹ್ಮಗಿರಿ) ಮೋಳ್ರಡಿಯ, ಕವೇರ ಮಾಮುನಿರ ತಪಸ್ಸ್ಕೊತ್ತ ಮೊಳಿಯಾಯಿ, ನಾಲ್ ಮಂಡೆ ಬೊಮ್ಮನ್ ಲೋಪಮುದ್ರೆ ತಾಯಿನ ಕವೇರಂಗ್ ಮೊವಳಾಯಿ ಕೈನೀಟ್ ಕೊಡ್ತತ್.
ಅಂದ್ ತೊಟ್ಟ್ ಮುಂದಾರ ಕಾಲಕೊತ್ತ ಪೋಕೋಲೆ, ಕಾವೇರಮ್ಮೆ ಮಾತಾಯಿ, ನೀರಾಯಿತ್ ಒಕ್ಕುವಳ ಕಾಲನ್ಯಾರ ಬಂದಲ್ಲಿ, ತಾನ್ ಕೊದ್ಚಿ ಕೊಂಡಾಡಿತ್, ಕೊಡಿನೇತ್ನ ಕೊಡವಕ್ ತಂದ ತಕ್ಕ್ ಪೋಲೆ, ಕಾಲೋರಂಡೆಕ್ ಓರಮ್ಮ ತೇರ್ಥರೂಪಿಯಾಯಿ ಬಪ್ಪಿಂದೂ, ನಾನ್ ಉದ್ಚಿ ಬಂದ್ ಎದ್ದ್ ನೋಟೋ ಕಾಲನ್ಯಾರತ್, ನಾಡ ಮಕ್ಕಳಾನ ನಿಂಗ ಮೂಲಕೊತ್ತ ಉಡುಪಾಯಿಯಿ, ದುಡಿ, ತಾಳ ತೊಣೆಯಾಯಿ, ಕೊಟ್ಟ್ ಪಾಟ್ ಸೆಮ್ಮಾಯಿ, ತಳಿಯತಕ್ಕಿ ಬೊಳಕಾಯಿ, ಪಾಲಕ್ಕಿ ಬೈವಾಡಾಯಿತ್ ಬಂದ್ ನಿಂದ್ ಕಾಂಗೋಂಡೂ ಎಣ್ಣಿತ್ ಮುತ್ತಪ್ಪಣೆ ಮಾಡಿತಿಂಜತ್. ಆಪೋಲೆ ನಂಗ ಕೊಡವ, ಕಾಲೋರಂಡೆಕ್ಕೋರಮ, ತಿಂಗ ತೊಲೀರಾಲ್ ಶಂಬೋಶಿವ ದೇವಂಡ, ನೆತ್ತಿ ಕಣ್ಣ್ ಸೂರಿಯ ತುಲಾ ರಾಶಿಕ್ ಎತ್ತೋಕ, ಕಾವೇರಮ್ಮೆ ಮಾತಾಯಿ ಉಕ್ಕಿಮರ್ಂಜಿ ಬಪ್ಪಕ್ಕ, ಆರ(ಆಶೀರ್ವಾದ) ಬೋಡಿಕೊವ್ವಕ್, ಅವ್ವತಂದ ಒಕ್ಕಣೆಪೋಲೆ ತಪ್ಪತೇ ನಡ್ಂದಂಡ್ ಬಾತ್.
ನಡ್ತಿಯಂಡಿಂಜ ನಡೆನುಡಿ, ಕಾಲ ಪೋಕ್ಕ್ ಕೆಣ್ಂಜಿತ್, ಏರಿತುಂಡ್ನ ಬೇಲ್ ಪೋಲೆ ತುಂಡಿ ಪೋಚಿ. ತಪ್ಪಿಪೋನ ಕೊಳ್ಕೆನ ಪುನಾ ಕೂಟಿ ನೆಜ್ಜಿತ್, ತಪ್ಪತೇ ನಡ್ತಿಯಂಡ್ ಪೋಪಕ್, ಚೆನ್ನಂಗ್ ಕಾಲಕಿಪ್ಪರ ಕೊಡವ ಮಾಜನ ಕೈತೆಕ್ಕಿತ್ ನಿಂದಿತ್.
ಇನ್ನನೆ ಮೊಳಿಯಾನ ನಡ್ಪುಲ್, ಪಾಲಕ್ಕಿ ಬೈವಾಡ್ ಕೂಡಿ ಒಂದ್. ಅಂದಕ ಪಾಲಕ್ಕಿ ಬೈವಾಡ್ ಪಂಡ್ ಇಂಜತಾ ಕೇಟಕ, ಅಕ್ಕು, ಪಂಡ್ ಪಾಲಕ್ಕಿ ಬೈವಾಡ್, ಕಾವೇರಮ್ಮೆರ ಮಡ್ಕ್ ಎಲ್ಲಾ ಒಕ್ಕತ, ಮನೆ ಮನೆಂಜನೂ ಬಪ್ಪಯಿಂಜತ್. ಒಕ್ಕಕೊತ್ತ ಬೈವಾಡ್, ನಾಡ್ ಕೇರಿಕೊತ್ತ ಬೈವಾಡ್, ಪಟ್ಟಂಬರಿಕೆಕೊತ್ತ ಬೈವಾಡ್ ಎಣ್ಣಿಯಂಡ್ ಬಪ್ಪೈಂಜತ್. ಇದನೇ ನೈವೇದ್ಯ ಮಾಡಿತ್, ಪ್ರಸಾದ ಆಯಿತ್ ಬಂದೈಂಗಕೆಲ್ಲ ಬಳ್ಂಬೊದಿಂಜತ್.
ಬೈವಾಡ್ ಪೋಪಕ ಎನ್ನೆಲ್ಲ ಇಪ್ಪ, ಎಂತೆಲ್ಲ ನಡ್ಪೂಂದ್ ಅರ್ಂಜಂಡ್ ಪೋನಕ, ಬೈವಾಡ್ರ ಆಯಿಮೆ ಮೊಳಿ ಆಪದ್ ಕಾವೇರಮ್ಮೆರ ದೇಶ ಕೆಟ್ಟ್ ಬುದ್ದಲ್ಲಿಂಜ. ಕಾವೇರಮ್ಮೆಕ್ ಎಂತ ದೇಶಕೆಟ್ಟ್ ಕೇಟಕ, ನಾನ್ ಅರ್ಂಜನ್ನಕೆ ಕೊಡವಕ್ ನಂಗಡ ನಾಡ್ಕೇರಿರ ನಮ್ಮೆ ಕೆಟ್ಟ್ ಅಲ್ಲತೆ, ಒಟ್ಟು ಆರ್ ದೇಶ ಕೆಟ್ಟ್ ಉಂಡ್. ಆಚೆಂಗಿಂದ್ ನಂಗ ಒಂದಾನೂ ನಡ್ತುಲೆ. ಈ ಆರ್ ಕೆಟ್ಟ್ಲ್ ಕಾವೇರಮ್ಮೆರ ಕೆಟ್ಟೂ ಒಂದ್.
ಕಾವೇರಮ್ಮೆರ ಕೆಟ್ಟ್ ಬೂವದ್, ಚಂಗ್ರಾಂದಿಕ್ 14 ನಾಳ್ ಮಿಂಞ ಪಾಂಡತುಳ್ಳ ಭಗಂಡ ಕ್ಷೇತ್ರತ ತಕ್ಕ, ದೇವಬನತ್(ದೇವಳಕ್ ಕೂಡ್ನ ತೊಡಿಯತ್) ಬಾಳೆಕೊಲೆ ಕೆತ್ತಿತ್, ಮಾದೇವ ಮಾತಾಯಿನೂ, ಕಾವೇರಮ್ಮೆನೂ ತೊತ್ತಿತ್ ಬಾಳೆಕೊಲೆನ ತೂಕಿಬೆಪ್ಪ(ಈ ಕಾರ್ಯಕೂ ಬೋರೆ ಕ್ರಮ ಉಂಡ್) ಅಂದ್ಂಜಿ ಕೊಡವು ದೇಶತ್ ಕಾವೇರಮ್ಮೆರ ನಮ್ಮೆ ಕೆಟ್ಟ್ ಬುದ್ದತ್. ಅಂದ್ ತೊಟ್ಟ್ ಬುಂದಾರ ತೇರ್ಥ ಉಕ್ಕಿ ಬಪ್ಪಲ್ಲಿಕೆತ್ತನೆ, “ಆಣ್ ಪೊಣ್ಣ್ ಎಡಮೇಂಗತೆ, ಎರ್ಚಿ ಮೀನ್ ತಿಂಗತೆ, ತಿತ್ತ್ ಬೊಡಿ ಬೆಕ್ಕತೆ, ಜೀಂವ ಜಂತು ಕೊಲ್ಲತೆ, ಪಚ್ಚೆ ಮರ ಕೆತ್ತತೆ, ಓಡ್ಲ್ ಬರ್ಕತೆ, ತೆಂಗೆ ಪೊಜ್ಜಿತ್ ಒಡ್ಕತೆ, ಮಂಗಲ ಕಂಬಳ ಮಾಡತೆ, ಕೆಟ್ಟ್ಕ್ ನಿಪ್ಪದ್ ಪಂಡೇತ ನಡ್ಪು. ಬಯ್ಯಂಜಿ ಈ ಕೆಟ್ಟ್ ತಾವು ನಾಡ್ಕ್ ಮಾತ್ರಾಂದ್ ಆಚಿ. ಆಚೇಂಗಿ ಇಕ್ಕ ದಾರೂ ಇಪ್ಪದ್ ಕಮ್ಮಿ. ಈ ಕೆಟ್ಟ್ಕ್ ಕೊಡವ ತಪ್ಪತೇ ಇಕ್ಕಂಡಿಯದ್ ಏರ ಅವಶ್ಯ.
ಇನ್ನನೆ ಕಾವೇರಮ್ಮೆರ ಕೆಟ್ಟ್ ಬುದ್ದಲ್ಲಿಂಜ ಬೈವಾಡ್ ಎಡ್ಪೈಂಗ ತಪ್ಪತೇ ಈ ಕೆಟ್ಟ್ಕ್ ನಿಕ್ಕೋಂಡು. ಅಂದ್ ತೊಟ್ಟ್ ಮುಂದಾರ ತಾಯಿಕ್ ಬೈವಾಡ್ ಒಪ್ಪುಚಿಡೋಲ್ಲಿಕೆತ್ತನೆ ಇವು ಅಂದಿ ಮುಂದಿಲ್ ಪಚ್ಚೆ ನೀರ್ ಕುಳ್ಚಿತ್ ನೆಲ್ಲಕ್ಕಿ ನಡುಬಾಡೆಲ್ ಮೊಂಬೊಳ್ಚ ಕತ್ತ್ಚಿಟ್ಟಿತ್, ಕಾರೋಣಂಗಳೋ, ಮಾತಾಯಿ ಮಾದೇವನೂ ಬೋಡಿ ತುದಿಕೊಂಡು. ಬೈಟ್ ನೆಲ್ಲಕ್ಕಿರಡಿಲ್ ಇಲ್ಲೇಂಗಿ ಕನ್ನಿ ಕೋಂಬರೆಲ್, ಕಿನ್ನೋಲೆ ಪಲಂಬು ಇಟ್ಟಂಡ್ ಬುದ್ದವಂಡು. ಕಾಲ್ಕ್ ಎಕ್ಕಡ ಇಡುವನ್ನೆಕಿಲ್ಲೆ, ಮಂಡೆಲ್ ಎಂತಾನೂ ಪೊರ್ಪನ್ನೆಕಿಲ್ಲೆ, ಕಳ್ಳ್ ಪುಳಿ, ಎರ್ಚಿ ಮೀನ್ ತಿಂಬನ್ನಕಿಲ್ಲೆ, ಕೊಡವುರ ಗಡಿ ದಾಟಿತ್ ಪರ ಊರ್ ನಾಡ್ಕ್ ಪೋಪನ್ನೆಕಿಲ್ಲೆ. ಬಾಯಿಲ್ ಕೆಟ್ಟ ತಕ್ಕಾಡ್, ವಾಕ್ ವನೆಯಾಡ್ ಬಪ್ಪನ್ನೆಕಿಲ್ಲೆ. ಆ ನಾಳ್ಲ್ ಸಾಕ್ಷಾತ್ ತಾಯಿನೇ ಅಯಿಂಗಡ ಕೂಡೆ ಇಪ್ಪ, ಅವು ಎಣ್ಣದೆಲ್ಲ ಆಯಿಪೋಪ ಎಣ್ಣುವ ಪೋಡಿ ಉಂಡ್.
ಈ ಪೋಲೆ ಕೆಟ್ಟ್ ಪಟ್ಟಣಿಕ್ ನಿಂದಿತ್ ಚಂಗ್ರಾಂದಿಕ್ ಮುಪ್ಪಡೆ, ತಾಂಡ ಒಕ್ಕಮನೆಂಜ ತಲೆಕಾವೇರಿಕ್ ನಡ್ಪಕ್ ಎಚ್ಚಕ್ ನಾಳ್ ಬೋಂಡುವೋ, ಅಚ್ಚಕ್ ನಾಳ್ ಮುಪ್ಪಡೆ, ಪೊಲಾಂಜತೆಕ್ ಕಾಕೆ ಪಕ್ಷಿ ಏವಾಂಗ್ ಮುಪ್ಪಡೆ, ಅಲ್ಲೇಂಗಿ ಒಯ್ಪತ್ ಕಾಕೆ ಪಕ್ಷಿ ಅಡ್ಂಗ್ನ ಪಿಂಞ ಪಚ್ಚೆ ನೀರ್ಲ್ ಕುಳ್ಚಿತ್, ಬೊಳ್ತ ಕುಪ್ಯ ಇಟ್ಟಿತ್( ಬಲ್ತೆ ಕೈನ ಕುಪ್ಯತ ಪೊರ್ಮೆ ಇಡುವ, ಎನ್ನಂಗೆಣ್ಣಕ, ಅಂದ್ ಕಾಲತ್ ಕುಪ್ಯ ಮಾತ್ರ ನಂಗಡ ಪೊರಪಾಡ್ ಅದ್ ಬುಟ್ಟ್ ಬೋರೆ ಬಟ್ಟೆ ಬರಿ ಇಂಜಿಲೆ, ಅನ್ನನಾಯಿತ್ ಬೈವಾಡ್ ಎಡ್ಪವನ ಎಲ್ಲಾಡ ನಡುಲ್ ಎದ್ದ್ ಕಾಂಗೋಂಡು, ತಟ್ಟ್ ಮುಟ್ಟಾನ ಪೊಮ್ಮಕ್ಕ, ಪೊಲೆ ತಲೆ ಆನವು, ದೂರನೀಂಗಿ ನಿಪ್ಪಕ್ ಅನುವಾಡ್ ಎಣ್ಣುವಾಂಗ್ ಇನ್ನನೆ ಮಾಡುವಲೋ, ಇಲ್ಲೇಂಗಿ ಕುಪ್ಯನ ಮುಡ್ಚಿತೂ ಕೆಟ್ಯವಲು(ನಡುಕತ್ತನೆ ಮಾತ್ರ ಕುಪ್ಯ ಇಟ್ಟಿತ್ ಕೊಡಿ ತಡಿನ ಬೆತ್ತಲೆ ಬುಡುವೊ) ಬಯ್ಯ ಪಂಚೆ, ಲುಂಗಿಂದೆಲ್ಲ ಬಂದಪಿಂಞ ಅದನ ಸುತ್ಯಂಡ್, ಕುಪ್ಯನ ತೆರ್ಪ ಮಾಡ್ಚಿ) ಚಾಲೆ ಕೆಟ್ಟಿತ್, ಮಂಡೆಕ್ ವಯ್ತ್ರ ಕೆಟ್ಟಿತ್(ಮಂಡೆತುಣಿ ಆನಕ, ಕೆಟ್ಟ್ನದ್ ಉತ್ತಿ ಪೋಕೂ ಎಣ್ಣುವಂಗಾಯಿತ್ ವೈತ್ರನೇ ಕೆಟ್ಟುವೋ) ನೆಲ್ಲಕ್ಕಿಕ್ ಬಂದಿತ್(ಅಕ್ಕಣೆ ಮನೆರ ಪೊಮ್ಮಕ್ಕ ಮನೆ ಬಾಡೆ ಒಡ್ಕಿತ್, ಅದ್ದಶುದ್ದ ಕೆಜ್ಜಿತ್, ಬೊಳ್ಚಕತ್ತ್ಚಿಟ್ಟಿತಿರೋಂಡು) ಮೊಂಬೊಳ್ಚ ಮಿಂಞಲ್, ಒಕ್ಕಮಕ್ಕಳ ಕಾಕಿತ್, ತಾಂಡ ಬಲತೆ ಕೈಯ್ಯಿನ ಎಡ್ತೆ ಎದೆಕ್ ಒತ್ತಿತ್ ಪುಡ್ಚಂಡ್, ಇನ್ನನೆ ನೇರ್ಚೆ ಕೆಟ್ಟೋಂಡು..,
“ಒಕ್ಕಡ ಮಾಗುರು ಕಾರೋಣರೇ, ಮಾತಾಯಿ, ಮಾದೇವರೇ, ಕೂಡಿ ನಿಂದ ಒಕ್ಕಡ ಅರಿಯವು, ಪೆರಿಯೊರೇ, ಕಾವೇರಮ್ಮೆ ತಾಯಿರ ದೇಶ ಕಟ್ಟ್ ಬುದ್ದಲ್ಲಿಂಜ ತೊಟ್ಟ್, ಇಂದಾಕಣೆ ನಾನ್ ಪಂಡಿಯ ನಡೆಪೋಲೆ ಕಟ್ಟ್ ಪಟ್ಟಣಿಕ್ ನಿಂದಿತ್, ಆಜಾರ ನಡ್ತಿತ್, ಇಂದಿಕ್ಕ ಪಾಲಕ್ಕಿ ಬೈವಾಡಾಯಿತ್ ಮಾತಾಯಿರ ಮಡ್ಕ್ ಕಾನಡೆಲ್ ಪೋಯಂಡುಳ್ಳ, ನಾನಿಲ್ಲಿಂಜ ಪೋರ್ಟಲ್ಲಿಂಜ ತೊಟ್ಟ್, ಬೈಪಿರ್ಂಜಿ ಬಂದಿತ್ ಈ ಮಣ್ಣ್ಮನೆಕೇರಿತ್, ನೆಲ್ಲಕ್ಕಿಲ್ ಕೈಮಲಂಗಿ ತೊಕ್ಕಣೆಕೂ, ನಾನ್ ಮಾಡುವ ಕಾರ್ಯತೂ, ಪೊರ್ಪೋರ್ ಪೊರೆಲೂ, ಪರಿಯೋರ್ ತಕ್ಕ್ಲೂ, ನಡ್ಪೋರ್ ನಡೆಲೂ, ಅಳ್ಪೋರ್ ಅಳ್ಕಲ್ಲೂ, ಒಂದ್ ತೊಟ್ಟ್ ನೂರೋಳ ಎಳ್ಳಚ್ಚಕೂ ಕೊರು ಬರತನ್ನಕೆ ಕಾತ್ ರಕ್ಷೆ ಮಾಡ್ಯವದೇ ಅಲ್ಲತೆ, ನಾಡ ಈ ಪೋಕ್ರ ನಡೆಲ್ ಅರಿಯತೆ, ತಿರಿಯತೆ, ಎನ್ನೇಂಗಿ ತಪ್ಪುನೆಪ್ಪು ಆಯಿ ಪೋನಕ ತಪ್ಪುಕೊಪ್ಪು ಮಾಡಿತ್, ಕಾತ್ ರಕ್ಷೆ ಮಾಡಿತ್, ಒಕ್ಕ ಮಕ್ಕಳ, ಎತ್ತ ಕಡ್ಚಳೋ, ತೋಟ ತೊಡಿಯನೂ, ಬೇಲ್ ಬಾಣೆನೂ, ಪಂದಿ ಕೋಳಿನೂ, ನಾಯೀ ಪೂಞೆನೂ ಕೂಡಿ, ಒಂದ್ ತೊಟ್ಟ್ ನೂರೋಳ ಕಾತ್ ರಕ್ಷೆ ಮಾಡುವದ್ ಮಾತಾಯಿ ಮಾದೇವಂಗೂ, ಮಮ್ಮರ್ಂಜ ಗುರುಕಾರೋಣಂಗಕೂ ಕೂಡಿತುಂಡ್” ಎಣ್ಣಿತ್ ಬೋಡ್ಯಂಡ್, ನೆಲ್ಲಕ್ಕಿ ಬಾಡೆಲ್ ಕಿನ್ನೋಲೆ ಪಲಂಬುಟ್ಟ್, ಬೊಳ್ಳ್ಡ್ಡ್ರ ಮುಕ್ಕಾಲಿ ಮೀದಲ್, ಬೊಳ್ಚ ಕತ್ತ್ಚಿಟ್ಟ್ ಬೆಕ್ಕೋಂಡು.
ಇದಾನದು ಮಿಂಞಲೆ ಕುಂಬಾರ ಕೇರಿಂಜ ಎಣ್ಣಿತ್ ಮಾಡ್ಚಿಟ್ಟ ಕುಡಿಕೆ( ಈ ಕುಡಿಕೆಕ್ ತಿತ್ತ್ ಕಂಡಿತಿಪ್ಪಕಾಗ, ಬೇವುಚಿಟ್ಟಿತಿಪ್ಪಕ್ಕಾಗ, ಪಚ್ಚೆ ಮಣ್ಣ್ಲ್ ಕವೇರಮ್ಮೆರ ಬೈವಾಡ್ಕ್ಂದೇ ಏರ ಮೇನತ್ಲ್ ತಯಾರಾನದ್ ಆಯಿತಿರೋಂಡು.)ಕ್ ಮೂಂದ್ ಸೇರ್ ಅಕ್ಕಿ ಇಟ್ಟಿತ್, ಅದಂಡ ನಡುಮದ್ಯೆ, ಜುಟ್ಟ್ ಉಳ್ಳ ತೆಂಗೆನ, ಜುಟ್ಟ್ ಮರಿಯ ಆಯಿತ್ ಕುತ್ತಿ ಬೆಚ್ಚಿತ್, ಅದಂಡ ಮೂಂದ್ ಬರೀಲ್, ಮೂಂದ್ ಅಚ್ಚಿ ಕರ್ತ ಬೆಲ್ಲ ಬೆಚ್ಚಿತ್, ಓರ್ ಕ್ಂಡಿಕ್ ಅಕ್ಕತಾನೆ ಕರ್ಂದ ಪಯ್ಯುರ ಪಾಲ್ ಬೂಕಿತ್ ಬಾಯ್ಪೊದ್ ಕೆಟ್ಟಿ ಬೆಚ್ಚಿತ್, ಇಂಞೋರ್ ಬರೀಲ್ ಚೆರಿಯ ಮೋಪೆಲ್ ಬೋಣ್ಣೆ ನೆಯ್ಯಿ ಇಟ್ಟಿತ್ ಬಾಯ್ಪೊದ್ ಕೆಟ್ಟಿತ್, ಬೆಕ್ಕೋಂಡು. ಒಟ್ಟಾರೆ ಅಂಜಿ ತರತ ಸಾಮಾನ್ ಇಡೋಂಡು, ಇದಂಡ ಕೂಟ್ಕ್, ಬಾಳೆಪಣ್ಣ್, ಕೊಡಿಯಲೆ, ಅಡಿಕೆ, ಪೂವು ಇಚ್ಚಾಕಾನ ಕೂಟಿತ್ ಒಯಿಂಬದ್ ತರತ್ನೂ ಬೋಂಡೇಂಗಿ ಕೂಟ್ಯವಲು, ಇದಲ್ಲತೆ ಕೊಡವಡ ನಲ್ಲಾಂಗೂ ತೀಯಾಂಗೂ ವೀಳ್ಯ ಕೊಡ್ಪ ನಡೆಪೋಲೆ ಓರ್ ಬರೀಲ್ ಕೊಡಿಯಲೆ ಟಡಿಕೆನೂ ಬೆಕ್ಕೋಲು. ಎಲ್ಲಾನ ಕುಡಿಕೆರ ಒಳ್ಕ್ ಇಟ್ಟಿತ್, ಕುಡಿಕೆರ ಬಾಯಿ ಕೆಟ್ಟಿತ್, ಪುನಾದ್ಯ ನೆಲ್ಲಕ್ಕಿನ ತೊತ್ತಿತ್, ಬೈವಾಡ್ ಪೊರ್ಪವನೂ ಕೂಡಿತ್ ಮೂಂದಾಳ್ ಇಲ್ಲೇಂಗಿ ಅಂಜಾಳ್ ಕೂಡಿತ್ ಕುಡಿಕೆನ ಮಂಡೆಕ್ ಬೆಕ್ಕೋಂಡು. ಕುಡಿಕೆರ ಅಡಿಕ್ ಮಂಡೆಕ್ ತೊಂಬುಡ ಬೆಚ್ಚವಂಡು(ತೊಂಬುಡ ಬೋಳ್ತ ಬಟ್ಟೆರದೇ ಆಯಿತಿರೋಂಡು), ಬಟ್ಟೆಕುಳ್ಳ ಕೂಪತ್ತಿ, ತೂಡ್, ಕೂಟ್ಕ್ ಬಪ್ಪ ಒಕ್ಕ ಮಕ್ಕಳ ಕಾಕ್ಯಂಡ್ ಪೊರ್ಡೋಂಡು.
ಬೈವಾಡ್ ಪೋರ್ನಂವೊ ಮಂಡೆಲ್ ಬೆಚ್ಚಲ್ಲಿಂಜ, ಕಾವೇರಿರ ಮಡ್ಲ್ ಬೆಪ್ಪಲ್ಲಿಕೆತ್ತನೆ ತಕ್ಕ್ ಪರಿಯತೆ ಬಾಯಿ ಪೊತ್ಯಂಡ್ ಇಪ್ಪದ್ ನಲ್ಲದ್. ಬೈವಾಡ್ ಮಂಡೆಲ್ ಇಂಜಕ್ಕ ಅವು ಪರ್ಂದ ಎಲ್ಲಾ ತಕ್ಕೂ ನೇರಾಪ, ಎನ್ನೇಂಗಿ ಅಪ್ಪಿತಪ್ಪಿತ್ ಬೋಂಡತದ್, ಕೆಟ್ಟ ತಕ್ಕ್ ಪರ್ಂದ್ ಪೋನಕ, ಕಷ್ಟಾಕೂ ಎಣ್ಣುವಾಂಗ್ ಬಾಯಿ ಬುಡತೇ ಇಂಜಚ್ಚಕ್ ನಲ್ಲದ್. ಓರ್ ಸಮಯ ಅಂವೊಂಗ್ ಎನ್ನೇಂಗಿ ಅವಶ್ಯ ಉಂಡೇಂಗಿ ಕೈ ಸನ್ನೆಲ್ ಕೇಕೋಂಡು. ಮೆಲ್ಲೆ ಬಾಯಿ ತಕ್ಕ್ಲೂ ಕೇಕೋಲು. ಮಂಡೆಲಿಪ್ಪ ಬೈವಾಡ್ನ ಏದೇ ಏತುಲೂ ನೆಲಕ್ ಬೆಪ್ಪನ್ನೆಕಿಲ್ಲೆ. ಅಳ್ಕೊಂಡು, ವರೋಂಡೂಂದ್ ಕಂಡಕ, ತಡಿರ ಮೀದನೇ ಬೆಚ್ಚವಂಡು. ಒಂದ ಎರಡತನ್ನತ ಕಾರ್ಯ ಉಂಡೇಂಗಿ ಕೂಟ್ಲ್ ಅದ್ದಶುದ್ದತ್ ಉಳ್ಳೈಂಗಡ ಕೈಕ್ ಕೊಡ್ತಿತ್ ಪೋಂಡು, ಕಾರ್ಯ ಕೈಂಜದು ಕುಳ್ಚಿತೇ ಪುನಾದ್ಯ ಬೈವಾಡ್ ಪೋರೋಂಡು. ಇನ್ನನೆ ಪೋಯಿತ್ ಪಾಂಡಕ್ ಎತ್ತ್ನಪಿಂಞ, ಬೈವಾಡ್ ಪೋರ್ನವು ಸಂಘಮತ್ ಕುಳಿಕೋಂಡೂಂದ್ ಇಲ್ಲೆ. ಅನುಕೂಲ ಉಂಡೇಂಗಿ(ಬೈವಾಡ್ನ ಬೋರೆವು ಪುಡ್ಚಂಡಕ) ಕುಳಿಕೋಲು. ಇಲ್ಲೇಂಗಿ ಕಾಲ್ ಮೂಡ್ ಕತ್ತಿಯಂಡ್, ನಾಗಬನಕ್ ಬಲಗೊಂಡ್, ಭಗಂಡನ ತೊತ್ತಿತ್, ಕಾವೇರಿಕ್ ಎತ್ತಿತ್, ಕೊಳಕಾಲೆ ಇಳ್ಂಜಿತ್, ಕುಂಡಿಕೆ ಮಿಂಞಲ್ ನಿಕ್ಕೋಂಡು. ದೇವತಕ್ಕ ಬೈವಾಡ್ ಕೇಟವಂಡು, ಬೈವಾಡ್ ಕೊಡ್ತವು ಮೂಮ ಮುಳಿತೇವಂಡು. ಅಕ್ಕಣೆಕ್ ತಕ್ಕ, ಬೈವಾಡ್ರ ಕಟ್ಟ್ನ ಉತ್ತಿತ್ ಮೂಂದ್ ಪುಡಿ ಅಕ್ಕಿನ ಮಡ್ಕ್ಟ್ಟ್ ಕೊಡ್ಕೊಂಡು(ಈ ಅಕ್ಕಿನ ಬೊಳ್ತ ವೈತ್ರತ್ ಕಟ್ಟಿತ್ ತಾನೇ ಪುಡ್ಚವಂಡು). ಬಯ್ಯಕ್ ಮನೆಕ್ ಬಂದಿತ್ ಬಂದಿತ್, ಪಾಯಸ ಮಾಡಿತ್, ಮೀದಿ ಬೆಚ್ಚಿತ್ ಉಂಗೋಂಡು. ಓರಬ್ಬ ಕುಡಿಕೆರ ಬದ್ಲ್ ಪುದಿಯದಾಯಿತ್ ನೆಜ್ಜ ಪಚ್ಚನೂ ಬಳಕೆ ಮಾಡುವ. ಇಲ್ಲೇಂಗಿ ಬಾಳೆ ಎಲಕಂಡನ ಬಾಟಿತ್, ಅದಂಗ್ ಬೈವಾಡ್ ಇಟ್ಟಿತ್, ವೈತ್ರತ್ ಕಟ್ಟಿಯಂಡೂ ಪೋಕೊಲು. ಇದ್ ಬೈವಾಡ್ರ ಆದಿ ಮೂಲತ್ ಕ್ಟ್ಟ್ನ ಅರಿವು.
ಇದಲ್ಲತೆ ಶಿವಪಾದ್ರೆಕೂ ಬೈವಾಡ್ ಪೋಪೈಂತ್. ಅಂದ್, ಪಾಂಡತ್ ಬಾರೀ ಬಲ್ಯ ಬಾಳೋಪಾಟ್ ಪೈಪೋಟಿ ಆಪೈಂತ್, ಅಂದ್ ಇರ್ಪೊಲ್ಚೆಕ್ ಪಾಂಡತ ಪಟ್ಟಿಲ್ ಬಲ್ಯ ತಿತ್ತ್ಗುಡ್ಡೆ ಇಟ್ಟಿತ್, ಆಂಡ ಸುತ್ತೂ ಆಟ್ ಪಾಟ್ ನಡ್ಪಯಿಂಜತ್. ಅಲ್ಲಿ ಗೆದ್ದವು ಬಾಳೋಪಾಟ್ರ ಬಂಬಂಗ ಎಣ್ಣುವ ಬಿರ್ದ್ ಪಡೆವೈಂತ್ಲೋ, (ಇದಂಡ ಬೈವಾಡ್ ನಡ್ಪು ಬೋರೆ ತರ ಉಂಡ್. ಅನ್ನನೆ ಇಗ್ಗುತಪ್ಪನೂ ಕೂಡ್ನನಕೆ, ಬೋರೆ ಬೋರೆ ದೇವಳಕೂ ಬೈವಾಡ್ ಪೋಪ ಒಂದೊಂದಾಂಡ ನಡ್ಪೂ ಓರೋರ ತರ ಉಂಡ್) ಬಯ್ಯ ಇವೆಲ್ಲ ತನ್ನಾಲೆ ನಿಂದ್ ಪೋಚಿ. ಓರಂದ್ ಜಾಗತ್ ಚೆನ್ನಂಗ್ ನಡ್ಂದಂಡೂ ಉಂಡ್.
ಅಂದ್ ನಂಗಡ ಇನ್ನತ ನಡೆನುಡಿ ನಿಂದಾಂಗ್ ಏತು ಎಂತಾಯಿತಿಕ್ಕೂಂದ್, ನಂಗಕೆಲ್ಲ ಅರಿವುಂಡ್. ಪೋಡಿ ತೂರಿ ಒಬ್ಬ ನಂಗಡ ಅಜ್ಜಂಗಳ ಎದ್ಪುಡುವಕ್ ತಾಕತಿಲ್ಲತೆ, ಚದಿಲ್ ಮಂಡೆಕೆತ್ತ್ನ ಪಿಂಞ ಇಡೀ ಕೊಡವ ಕುಲವೇ ಅಡಿಕೊಡಿ ಆಯಿಪೋಚಿ. ಅಂದಿಂಜ ನಂಗಡ ಮೂಲಕೊತ್ತ ಪದ್ದತಿರ ನಡ್ಪೂ ಕೊಂಡಿ ತಪ್ಪಿ ಪೋಚಿ…
ಸುಮಾರ್ ನಾನೂರಂಞೂರ್ ಕಾಲ ಬಯ್ಯ ತಪ್ಪಿ ಪೋನ, ನಂಗಡ ಅವ್ವ ಕಾವೇರಿರೋ ನಂಗಡೋ ಒತ್ತೋರ್ಮೆರ ಕೊಂಡಿ, ಇಕ್ಕ ಎಟ್ಟ್ ಪತ್ತ್ ಕಾಲತೊಟ್ಟ್ ಒಂದೋಂದೇ ಕೂಡಿಯಂಡುಂಡ್. ಈ ಪೋಲೆ ಪಂಡ್ ಮನೆ ಮನೆಂಜ ಮೊಳಿಯಾಪೈಂಜ ಕಾನಡ್ಪು, ಇಂದ್ ಪಾಂಡತಿಂಜ ಪೊರ್ಡುವನ್ನೆಕಾಯಿತ್. ಅನ್ನನೇ ಪಂಡ್ ಮನೆ ಮನೆಂಜ ಪೊರ್ಡೊಯಿಂಜ ಬೈವಾಡ್, ಕೈಂಜ ಮೂನಾಲ್ ಕಾಲತೊಟ್ಟ್ ಪಾಂಡತಿಂಜ ಎಲ್ಲಾ ಒಕ್ಕಡೊಕ್ಕಡ ಪರ ಒಂದಾಯಿತ್ ಪೊರ್ಟಂಡುಂಡ್.
ಪಂಡೇತ ನಡೆಪೋಲೆ ಪೂರ್ತಿ ಮಾಡೋಕ್ ಕಯ್ಯುಲೆ. ಪಂಡೆತ ನಡ್ಪುನ ಕಂಡರ್ಂಜವಾಡ್, ಎಳ್ದಿಬೆಚ್ಚದಾಡ್ ಇಲ್ಲೆ. ಆಚೇಂಗೂ ಕಥೆರ ರೂಪತ್, ಅರಿಯವು, ಪೆರಿಯವು, ಬಾಯಿಂಜ ಬಾಯಿಕ್ ಬಂದಾನ ತಂದ ಅರಿವುನ ಅರ್ಂಜಂಡೂ, ದ್ಯಾವಡ ಅನುವಾದ ಎಡ್ತಂಡೂ, ತಪ್ಪುನ ಕೋಪುನ ತಪ್ಪತನ್ನಕೆ ಪೋತುವಕ್ ಪತ್ತ್ ಕೈ ಕೂಡಿ ಪನ್ನೊಂದಾಯಿ ನೈಚಂಡುಂಡ್.
ಈ ನೈಪುರ ಒರ್ಪು ಮಿಂಞಕ್ ಕಾಲ ನೂರಾಯಿರಕ್ಕೂ, ಮಾಮೇರ್ ಪೋಲೆ ಎದ್ದೆಲಂಗಿತ್, ಕೊಡವಾಮೆ ನೇರಿ ಬಾವಡ್ಂದ್ ಮಾತಾಯಿ ಮಾಗುರುನ ತೊತ್ತ್ ಬೋಡ್ಯಂಡ್, ನಾಡ ಈ ಅರಿವುಲೆನ್ನೆಂಗಿ ತಪ್ಪು ನೆಪ್ಪು ಉಂಡೇಂಗಿ, ಕೂಟಿ ಕಳಿವದ್ ಉಂಡೇಂಗಿ ಅರಿಕೆ ಮಾಡೋಂಡೂಂದ್ ಮಾಜನಡಲ್ಲಿ ಕೇಟವಿ.
