ವಿರಾಜಪೇಟೆ,ಡಿ.12: ಭಾರತೀಯ ಪಾಜೆ ನಾಳ್‌ ಪಿಂಞ ತಮಿಳ್ ಮಾಕವಿ ಭಾರತೀಯಾರ್‌ ಅಯಿಂಗಡ 143ನೇ ನಾಳ್‌ರ ಮಾರೀಪತ್‌, ತಮಿಳ್ ನಾಡ್‌ರ ರಜಭವನತ್‌ ನಡ್ಂದ ಆಯಿಮೆಲ್‌ ಕೊಡವ ಸಾಹಿತಿ, ಕೊಡವ ಸಾಹಿತ್ಯ ಅಕಾಡೆಮಿರ ಮಾಜೀ ಸದಸ್ಯೆ, ಗೋಣಿಕೊಪ್ಪ ಕಾವಾರಿ ಕಾಲೇಜ್‌ ಉಪನ್ಯಾಸಕಿ ಡಾ. ಮುಲ್ಲೇಂಗಡ ರೇವತಿಪೂವಯ್ಯ ಅಯಿಂಗಕ್‌ ತಮಿಳ್ ನಾಡ್‌ ರಾಜ್ಯಪಾಲ ಶ್ರೀ ಎನ್. ಆರ್. ರವಿ ಅವು ತೊಮ್ಮಾನ ಮಾಡಿತ್‌, ಮರ್ಯಾದಿ ಕಾಟ್‌ಚಿ.
ಪಂಡೇತ ತಮಿಳ್ ಗ್ರಂಥ ತಿರುಕುರಳ್ನ ಕೊಡವ ಪಾಜೆಕ್‌ ತರ್ಜುಮೆ ಮಾಡ್‌ನ ಸಾಧನೆಕ್ಕಾಯಿತ್‌ ಡಾ. ಮುಲ್ಲೇಂಗಡ ರೇವತಿ ಪೂವಯ್ಯ ಅಯಿಂಗಕ್‌ ಈ ತೊಮ್ಮಾನ ದಕ್ಕ್‌ಚಿ. ಇವು ಪತ್ರಕರ್ತ, ಸಮಾಜಸೇವಕ ಮುಲ್ಲೇಂಗಡ ಮಧೋಷ್‌ಪೂವಯ್ಯ ಅಯಿಂಗಡ ಪೊಣ್ಣ್‌ ಪಿಂಞ ನಾಲ್ಕೇರಿ, ಚೆಪ್ಪುಡಿರ ಸನ್ನು ಮುದ್ದಪ್ಪ ಪಿಂಞ ನಳಿನಿ ದಂಪತಿಯಡ ಮೋವ.
