Nadubadenews, ಅ.10: ಕೊಡಗ್‌ ಡಿಸಿಸಿ ಬ್ಯಾಂಕ್‌ರ ಮಾಜಿ ಅಧ್ಯಕ್ಷ, ಪೆದಪೋನ ವಕೀಲ ಪಿಂಞ ನೋಟರಿ ಆಯಿತಿಂಜ ಮಾತಂಡ ರಮೇಶ್‌ ಅವು ಇಂದ್‌ ತಾಂಡ 75ನೇ ಬಯತ್‌ಲ್‌ ಒಯಿಂಜಿ ಪೋಯಿತ್.
ಮೈಸೂರ್‌ಲ್‌ ಬಯತ್‌ಕೊತ್ತ ತೊಂದರನುಂಡ್‌ ತಡಿಬುಟ್ಟ ಮಾತಂಡ ರಮೇಶ್‌ ಅವು, ಕೊಡಗ್‌ ಡಿಸಿಸಿ ಬ್ಯಾಂಕ್‌ರ ಅಧ್ಯಕ್ಷನಾಯಿತ್‌ ಸುಮಾರ್‌ 17+ ಕಾಲ ಕಾರ್ಬಾರ್‌ ಮಾಡಿತ್‌, ಬ್ಯಾಂಕ್‌ರ ಕೇಳಿಕ್‌ ನೈಚಿತಿಂಜ, ಪೆರಿಯ ಸಾಕಾರಿ ನಾಯಕನೂ ಆಯಿತಿಂಜದಲ್ಲತೆ, ಕೊಡಗ್‌ ಜಿಲ್ಲಾಪಂಚಾಯತ್‌ ಸದಸ್ಯನಾಯಿತೂ, ರಾಜಕೀಯ ನಾಯಕನಾಯಿತೂ, ಪಲತರ ಸಾಮಾಜಿಕ ಕೋವುಲ್‌ ನೈಚಿತಿಂಜ, ಸಾಧು ಸ್ವಾಭಾವಕ್‌ ಕೇಳಿ ಪೋನ ಇಯಂಗಡ ಚಾವುತಡಿನ ಬೊಳ್ಳ್‌ ಮಾಡ್‌ಲ್‌ ಉಳ್ಳ ಮನೆಲ್‌ ಕೂಟಿತ್‌, ನಾಳೆ ಬೊಳ್ಳ್‌ಮಾಡ್‌ ಒಕ್ಕ ಕ್ಯಾಕೊಳತ್‌ ಆಖಿರಿ ಕಾರ್ಬಾರ್‌ ನಡ್ತುವಾಂದ್‌ ಮೋಂವೊ ಡಾ. ಮಾತಂಡ ಅಯ್ಯಪ್ಪ ಅವು ಅರಿಚಿಟ್ಟಿತ್.
ಎಲ್ಲಾರ್ಕೂ ಬೋಂಡ್ಯವನಾಯಿತ್‌ ಇಂಜ, ಮಾತಂಡ ರಮೇಶ್‌ ಅಯಿಂಗಡ ಚಾವು ಕೊಡವುರ ಸಹಕಾರಿ ಕೋವುಕ್‌ ಬಲ್ಯೋರ್‌ ನಷ್ಟ. ಇಯಂಗಡ ತಡಿ ಬುಟ್ಟ ಜೀಂವಕ್‌ ಸ್ವರ್ಗ ದಕ್ಕಡ್ಂದ್‌, ಕೊಡಗ್‌ ಕಾಫಿ ಬೊಳೆಕಾರಡ ಸಂಘತ ಅಧ್ಯಕ್ಷ ಮುದ್ದಂಡ ದೇವಯ್ಯ ಕೂಡ್‌ನನ್ನಕೆ, ಬೋರೆ ಬೋರೆ ಮೂಪಂಗ ಬೇಜಾರ್‌ ಪರ್ಂದಿತ್.
