ಬೆಂಗಳೂರ್‌, ಜ: 09: ಉಲಗ ಕೇಳಿ ಪೋಯಿತುಳ್ಳ ಕೊಡವ ಹಾಕಿನ ಇಂಞಚ್ಚಕೂ ಎತ್ತರಕ್‌ ಪತ್ತ್‌ಚಿಡೋಕ್‌ ಎಲ್ಲಾರೀತಿರ ಒತ್ತಾಸೆನ ಸರ್ಕಾರ ತಪ್ಪಾಂದ್‌ ಮುಖ್ಯಮಂತ್ರಿ ಸಿದ್ದತರಾಮಯ್ಯ ಅವು ಭರವಸೆರ ತಕ್ಕ್‌ ಪರ್ಂದತ್. 24ನೇ ಕಾಲತ ಹಾಕಿ ನಮ್ಮೆಕ್‌ ಸರ್ಕಾರತೀಂಜ ಮಂಜೂರಾಯಿತಿಂಜ ಓರ್‌ ಕೋಟಿ ಉರ್ಪಿಯತ್‌ನ ಎಲ್.ಎ.ಸಿ. ಅಜ್ಜಿಕುಟ್ಟಿರ ಪೊನ್ನಣ್ಣ ಅಯಿಂಗಡ ಕೂಡೆ, ಇಂದ್‌ ಕುಂಡ್ಯೋಳಂಡ ಒಕ್ಕಕಾರಕ್‌ ಕೊಡ್ತಿತ್‌ ಅವು ತಕ್ಕ್‌ ಪರ್ಂದತ್.
ಭಾರತತೇ ಪುಟ್ಟ್‌ನ ಹಾಕಿ ಕಳಿನ ಇಂದ್‌ ಕೊಡವ ಒಕ್ಕಡೊಕ್ಕಡ ನಡುಲ್‌ ನಮ್ಮೆಆಯಿತ್‌ ನಡ್ತಿತ್‌, ಇಂದ್‌ ಲಿಮ್ಕಾ ಬುಕ್‌ ಆಫ್‌ ರೆಕಾರ್ಡ್‌ ಪಿಂಞ ಗಿನ್ನೆಸ್‌ ವರ್ಡ್‌ ರೆಕಾರ್ಡ್‌ಕ್‌ ದಾಖಲಾಯಿತುಳ್ಳದ್‌ ಕೊಡವ, ಕೊಡವು ಮಾತ್ರ ಅಲ್ಲ, ರಜ್ಯ ಪಿಂಞ ರಾಷ್ಟ್ರವೂ ಪೆರ್ಮೆಲ್‌ ಗ್ಯಾನಮಾಡ್ಯವಂತದ್ಂದ್‌ ಮೆಚ್ಚಿ ಪರ್ಂದತ್. ಇದ್‌ ಇಂಞಚ್ಚಕೂ ಕೇಳಿಲ್‌ ನಡ್ಪಕ್‌, ರಾಜ್ಯ ಸರ್ಕಾರ ಮಿಂಞಕೂ ಎಲ್ಲಾ ತರತ ಒತ್ತಾಸೆ ತಪ್ಪಾಂದ್‌ ಎಣ್ಣ್‌ಚಿ.
ಈ ನ್ಯಾರತ್‌ ಕೂಡಿಯಾಡಿತಿಂಜ ರಾಜ್ಯ ಸಭಾ ಸದಸ್ಯ ಅಜಯ್‌ ಮಾಖೇನ್‌ ಅವು, ಕೊಡವಡನ್ನತ ಚೆರಿಯ ಜನಾಂಗ ಎಲ್ಲಾ ಕೋವುಲೂ ಕೇಳಿ ಎಡ್ತಂಡುಳ್ಳದ್‌ ಇಡೀ ದೇಶಕೇ ಬಟ್ಟೆಬೊಳಿ, ನಂಗೆಲ್ಲರೂ ಈ ಚೆರಿಯ ಜನಾಂಗತ ಎಲ್ಲಾ ಬೋಡಿಕೆಕೂ ಒತ್ತಾಸೆ ಆಯಿತ್‌ ನಿಪ್ಪಾಂದ್‌ ಭರವಸೆರ ತಕ್ಕ್‌ ಪರ್ಂದತ್.
ಸಚಿವಂಗಳಾನ ಶರಣಪ್ರಕಾಶಪಾಟೀಲ್‌, ಭೈರತಿ ಸುರೇಶ್‌, ಸರ್ಕಾರತ ಮುಖ್ಯ ಕಾರ್ಯದರ್ಶಿ ಡಾ. ಶಾಲಿನೀ ರಜನೀಶ್‌, ಕೊಡವ ಹಾಕಿ ಅಕಾಡೆಮಿ ಕೊರವುಕಾರ ಪಾಂಡಂಡ ಬೋಪಣ್ಣಕುಟ್ಟಪ್ಪ, ಕುಂಡ್ಯೋಳಂಡ ಒಕ್ಕಕಾರ ಕೂಡ್ನನಕೆ ಖನಪಟ್ಟವು ಹಾಜರಿಂಜತ್.
