ನಾಡ್ ನಡೆ (ಸಂಪಾದಕೀಯ): ಕೊಡವ ಸಂಘ ಜೀವಿಯ, ಎಂದೆಕೂ ಒತ್ತೆ ಬಾಳ್ ಕೊಡವಳಿಂಜ ಕಯ್ಯುಲೆ. ಪಂಡಾಯಿರ ಕಲತೊಟ್ಟ್ ಇಂದಾಕಣೆಕೂ ಕೊಡವ ಕೂಡ್ ಕೂಟತೇ ಬಾಳ್ನವು. ಇದಂಗ್ ಸಾಕ್ಷಿ ಪಂಡ್ಂಜೇ ಬಂದ ಒಕ್ಕ ಪದ್ದತಿಂಜ ತೊಟ್ಟಕ, ಇಂದೆತ ಸಮಾಜ, ಸಂಘ, ಸಂಸ್ಥೆನ ಕೆಟ್ಯಂಡ್ ಒಬ್ಬಂಗೊಬ್ಬಂಗ್ ತೊಣೆ ಆಯಂಡೇ ಕೂಡಿ ಬಾಳಿಯಂಡುಳ್ಳದ್. ಅನ್ನನೇ ಅಂದ್ ತೊಟ್ಟ್ ಇಂದಾಕಣೆಕೂ ಕೊಡವ ತಂಗಡ ಒಕ್ಕಕ್, ಊರ್, ಕೇರಿಕ್, ನಾಡ್, ದೇಶಕ್ ಮೂಪಂಗಳ, ತಕ್ಕಂಗಳ, ಕೊರವುಕಾರಂಗಳ ಏಪೋಕ, ಪ್ರಜಾ ಪ್ರಭುತ್ವ ಮಾದರಿಲೇ ನಡ್ತಿಯಂಡ್ ಬಂದದ್ ಇಂಞೋರ್ ಪೆರ್ಮೆ.
ಇಂದ್ ಪ್ರಪಂಚತ್ ಪ್ರಜಾ ಪ್ರಭುತ್ವ ಭಾರೀ ಕೇಳಿ ಪೋನನ್ನತ ಆಡಳಿತ ವ್ಯವಸ್ತೆ. ತಂಗಕ್ ಬೋಂಡಿಯಾನ ಮೂಪನ ಅಥವಾ ನಾಯಕನ ಅಲ್ಲೇಂಗಿ ಮುಂದಾಳ್ನ ನಂಗಳೇ ಆಂಜಿ ನಿರ್ಕ್ ಮಾಡ್ಯವ ವ್ಯವಸ್ಥೆ ಪಂಡ್ಂಜೇ ಕೊಡವಡಲ್ಲಿ ಇಂಜತ್.
ಸಾಮಾನ್ಯವಾಯಿತ್ ನೋಟಿ ಕಾಂಬನ್ನಕೆ ದಂಡನೇ ಶತಮಾನತ್ ಅಥೇನ್ಸ್ಲ್ ಆದ್ಯ ಪ್ರಜಾಪ್ರಭುತ್ವ ಮೊಳಿಯಾಚೀ ಎಣ್ಣುವ ದಾಖಲೆ ದಕ್ಕುವ. ಅಲ್ಲಿಂಜ 05-06ನೇ ಶತಮಾನತ್ ಯುರೋಪ್ ಭಾಗತ್ ಪ್ರಜಾಪ್ರಭುತ್ವ ಬೊಳಿಕ್ ಬಾತ್. ಅದಾನದು ಉಲಗತ ಬೋರೆ ಬೋರೆ ಜಾಗತ್ ನೆಲೆಕಂಡತ್ಂದ್ ಸುಮಾರ್ ಇತಿಹಾಸಕಾರಂಗ ಎಳ್ದಿತ್. ಆಚೇಂಗಿ ಈ ಎಲ್ಲಾಂಗೂ, ಎಚ್ಚಕೋ ಆಯಿರ ಕಾಲ ಬಯ್ಯ, ಕೊಡವುಮಲೆರ ಕೊಡವಡಲ್ಲಿ ಈ ಮಾದರಿರ ಪ್ರಜಾ ಪ್ರಭುತ್ವ ವುವಸ್ಥೆ ಇಂಜತ್. ನಂಗ ಅಂದ್ ಎಳ್ತ್ ರೂಪತ್ ದಾಖಲ್ ಮಾಡಿ ಬೆಕ್ಕತದ್ ಇಂದ್ ಇತಿಹಾಸ ಪುಟತ್ಲ್ ನಂಗ ಮಾಜಿ ಪೋಪಕ್ ಮೂಲ.
ಪಂಡ್ಂಜೇ ಕೊಡವ ಒಕ್ಕ ವ್ಯವಸ್ಥೆಂಜ ನಡಂದ್ ಬಂದ, ಈ ಪ್ರಜಾ ಪ್ರಭುತ್ವ ಮಾದರಿಲೇ ನಂಗಡ ಒಕ್ಕ ಮೂಪನಾನ ಕೊರವುಕಾರನ ನೇಮಕ ಮಾಡೋಯಿಂಜತ್. ಎಚ್ಚಕೋ ಒಕ್ಕತ್ ಬಯತ್ಲ್ ಪೆರಿಯಂವೊಂಗಿಂಜ, ವಿಚಾರತ್ ಅರ್ಂಜಂವೋ ಒಕ್ಕ ಕೊರವುಕಾರನಾನ ದಾಖಲ್ ಉಂಡ್. ಇಂದೆತ ಪಟ್ಟೆದಾರ ವ್ಯವಸ್ಥಲೂ, ತಕ್ಕಾಮೆರ ವ್ಯವಸ್ಥೆಲೂ ಪೆರಿಯಂವೊಂಗಿಂಜ ಅಳಿಯವು ಜವಾಬ್ದಾರಿ ಎಡ್ತಂಡ ದಾಖಲ್ ದಕ್ಕುವ. ಅರಿಯಂವೊನೇ ಪೆರಿಯಂವೊ ಎಣ್ಣುವ ಪಳಂಜೊಲ್ಲ್ ಕೂಡಿ ಇದನೇ ಸಾರಿತೆಣ್ಣುವ.
ಇನ್ನನೆ ಪಂಡ್ ಕೊಡವಡಲ್ಲಿಯೇ ಆದ್ಯ ಮೊಳಿಯಾನ ಈ ಪ್ರಜಾಪ್ರಭುತ್ವ ವ್ಯವಸ್ಥೆ, ಇಂದ್ ಕೊಡವ ಸಮಾಜತ ಕೊರವುಕಾರಿಕೆಕೂ, ಚುನಾವಣೆ, ಒಪ್ಪಚಾರತ್ ಚೀಟಿ ನೇತುವಾಂಡ ರೂಪತ್ ನಡ್ಂದಂಡ್ ಉಂಡ್. ಇದ್ ಎಂದೆಕೂ ನಡ್ಕೊಂಡು.
ಕೊಡವ ಸಮಾಜತಂತ ಜವಾಬ್ದಾರಿರ ಜಾಗತ್ ಬಂದ್ ಅಳಪವು, ತಾನ್ ಎಚ್ಚಕ್ ಅರ್ಹ ಎಣ್ಣೊಂಗಿಂಜ ಎಚ್ಚಕ್ ಜನಕ್ ನಾನ್ ಆ ಪದವಿಕ್ ಪೋಪದ್ ಕುಶಿ ಉಂಡ್ಂದ್ ನೋಟ್ಯವದ್ ಓರ್ ಬರಿಲಾನಕ, ನಾಳೆ ನನ್ನ ಈ ಜಾಗತ್ ಅಳ್ಪುಚಿಟ್ಟ ಜನ ಕೊಸ್ನೆ ಮಾಡೂ ಎಣ್ಣುವ ಓರ್ ನೆಟ್ಟಾಮೆ ಎಕ್ಕಲೂ ಮನತ್ ಇಂಜಂಡ್, ಅದೇ ನೆಟ್ಟಲ್ ನಲ್ಲ ಕಾರ್ಯ ಮಾಡೋಕ್ ಏತು ಆಕೂ. ಓರ್ ಜಾಗಕ್ ದಂಡಾಳ್ರ ನಡುಲ್ ಒಪ್ಪಚಾರಕ್ ಬಂದಿತ್, ಚೀಟಿ ಎಡ್ಪಂತ ಸಂದರ್ಭ ಬಂದಕಲೂ, ಒಬ್ಬನೊಬ್ಬ ಕೇಪ, ಅಂವೊಂಗಿಂಜ ನಾನ್ ಕಮ್ಮಿ ಆಪಕ್ಕಾಗ ಎಣ್ಣುವ ಪೈಪೋಟಿ, ಜನಾಂಗ ಬೊಳ್ಚೆರ ನ್ಟ್ಟ್ಲ್ ನಲ್ಲ ಮೊಟ್ಟಾಕು.
ಇದೇದೂ ಇಲ್ಲತೆ ಒಬ್ಬನೇ ನ್ಯಾರೆ ಏದೇ ಜಾಗಕ್ ಏಪುಚೇಂಗಿ ನಾಳೆ ನಾನೇ ರಾಜ, ನಾ ಮಾಡ್ನದೇ ಸೆರೀಂದ್ ಬಿಗ್ರ್ದಿ ಕಾಟೋದಲ್ಲತೆ, ದಾರೇಂಗಿ ಕೊಸ್ನೆ ಮಾಡೋಕ್ ಪೋನಕ, ತಿರಿತ್ ಪರಿಯೋಕೋರ್ ಏತು ಆಕು. ಅನ್ನನಾಯಿತ್ ಸಮಾಜತಂತ ಮೂತ ಜಾಗತ್ ಚುನಾವಣೆ ಇಲ್ಲೆಂಗಿ ಚೀಟಿ ಎಡ್ತಿತ್ ಏಪೋದ್ ಒತ್ತ ಕ್ರಮ.
ಆಚೇಂಗಿ, ಏದೇ ಸಂಘ, ಸಂಸ್ಥೆ, ಸಮಾಜಕ್, ನಾನ್ ಜವಾಬ್ದಾರಿಲ್ ಅಳಪಕ್ ಬಪ್ಪೀಂದ್ ಓಂಗಿ ನಿಪ್ಪವು ಆದ್ಯ ಅರಿಯೋಂಡ್ಯದ್, ಆ ಜಾಗ ನಂಗಡ ನಾಳ್ ಕೈಪಕುಳ್ಳ ತಣುರ ಬಿಡಾರಂದೋ, ಇಲ್ಲೆ ಅಧಿಕಾರತ ಬಿಗ್ರ್ದಿ ಕಾಟೋಕುಳ್ಳ ಬೀರ್ಯಂದೋ ಅಲ್ಲ.
ಇಂದೇತ ಕಾಲ ಪರಿಸ್ಥಿತಿಲ್ ಓರ್ ಸಮಾಜ ಎಣ್ಣಕ ಅದ್ ಜನಾಂಗತ ಬೇರ್, ನೇರ್ ನೆಲೆ. ಅಲ್ಲಿ ಬರೀ ಮಂಗಲ ಕಂಬಳ, ಪುತ್ತರಿ ಚಂಗ್ರಾಂದಿ ಮಾತ್ರ ನಡ್ಪದಲ್ಲ, ಅಲ್ಲಿ ಇಡೀ ಜನಾಂಗತ ಬವುಸ್, ಬಾಳ್ ಉಂಡ್ ಎಣ್ಣುವಾನ ಆದ್ಯ ಅರ್ಂಜಿತ್, ಬೇರ್ಚಿಟ್ಟಿತ್ ನನ್ನುಂಡ್ ಆ ಜವಾಬ್ದಾರಿಕೆನ ನೀಸೋಕ್ ಕಯ್ಯುವಾಂದ್ ತಿರ್ಂಜಿತ್ ನಿಪ್ಪದ್ ನಲ್ಲದ್.
ಏದೇ ಓರ್ ಚುನಾವಣೆಕ್ ನಿಂದವು ನಾಡ ಬೆಂದುಂದೋ, ಊರ್, ನಾಡ್ಕಾರ, ಸಂಘ, ಕೂಡ್ಕಾರ, ಸಿನೇತ, ಜೊತೆಕಾರ ಎಣ್ಣುವ ಮುಲಾಜಿಕ್ ನಾನ್ ಅಯಿಂಗಡ ಪರ ಎಣ್ಣುವಾಂಗ್ಂಜಿ ನಾಳೆ ನಾಡ ಜನಾಂಗಕ್ ಇಯಂಗಳಿಂಜ ಎಂತಾಕೂಂದ್ ಅರ್ಂಜಿತ್ ಏಪೋದ್ ಕಾರೋಣ ಮೆಚ್ಚುವ ಕಾರ್ಯ.
ಕೆಲಸ ಕಾರ್ಯತ್ಂಜ ನಿವೃತ್ತಿ ಆನಪಿಂಞ ನಾಳ್ಕೈಪಕಾಯಿ ಜವಾಬ್ದಾರಿಕ್ ಬಪ್ಪೈಂಗ, ರಾಜಕೀಯ ಪಕ್ಷತ್ರ ನಳತಡಿ ಬಪ್ಪೈಂಗ, ವ್ಯಾಪಾರ ವ್ಯಾವಹಾರ ಬೋಳ್ತಿಯವಕಾಯಿತ್ ಬಪ್ಪೈಂಗ, ನೇರಾಯಿತೂ ಸಮಾಜತ ನಲ್ಲಾಮೆಕಾಯಿ ನೈಪಕ್ ಬಪ್ಪಯಿಂಗ, ಇನ್ನನೆ ಸುಮಾರ್ ತರಾವರಿ ಏತು ಬೆಚ್ಚಂಡೇ ಚುನಾವಣೆರನ್ನತ ಜಾಗಕ್ ಬಪ್ಪವು ಉಂಡ್. ಇದತ್ ನಂಗಡ ಆಯ್ಕೆ ದಾರ್, ದಾರ್ ಬಾತೇಂಗಿ ಬವುಸ್ಲ್ ನಂಗಡ ನೇರ್ ನಲ್ಲಾಮೆ ಮೇರ್ಕ್ ಏರಿ ಬೊಳಿಯೂ ಎಣ್ಣುವಾನ ಅರ್ಂಜಿತ್ ನಂಗ ದಾರ್ಕ್ ಬಾವುಟ ಪುಡಿಕೊಂಡೂ ಎಣ್ಣುವಾನ ಆದ್ಯ ಗ್ಯಾನ ಮಾಡ್ಯಂಡಕ, ನಂಗಡ ಬವುಸ್ರ ನಾಳೆ ನಂದಾಯಿತಿಕ್ಕೂ.
ಚುನಾವಣೆ ಎಣ್ಣೋಕ, ಪರ ವಿರೋದ್, ನಲ್ಲಾಮೆ, ಕ್ಳಾಮೆ ಎಲ್ಲಾ ಉಳ್ಳದೆ. ಆಚೇಂಗಿ 15-20 ನಾಳ್ ನಡ್ಪ ಈ ಬಿರ್ಸ್ರ ಉಯ್ತ್ಕ್ ಕೆಣ್ಂಜಿತ್, ನಂಗ ನಂಗಳೇ ಕುತ್ತ ಪರ್ಂದಂಡ್, ಪೇಯಿ ಕಳ್ಚಕ ಮತ್ಯಾಂದ್ ನಂಗೆಲ್ಲ ಒರೇ ಕೊಡೆರೊಳ್ಲ್ ಒಂದಾಯಿ ನಿಕ್ಕೊಂಡು ಅಂದಕ ಮಾತ್ರ, ಸಮಾಜ ವ್ಯವಸ್ಥೆ, ಸಂಘ ಬಾಳ್ ಎಣ್ಣುವಾಂಗ್ ಕಲೆಬೆಲೆ ಬಪ್ಪ.
ನಂಗಡ ಸಮಾಜಕಾಯಿತ್ ನೇರ್ ನಲ್ಲಾಮೆಲ್ ನೈಪೈಂಗಳ ಆಂಜಿ ಎಡ್ಪದೇ ನಂಗಡ ನೇರಾನ ಮೇನತ್. ಇದನೇ ಪಂಡಾಯಿರ ಕಾಲತಿಂಜ ನಂಗಡ ಅಜ್ಜ ಅಜ್ಜಂಗಳೂ ಬಾಳಿಯಂಡ್ ಬಂದ್ಯದ್.
ಮಿಂಞಕ್ ಬಪ್ಪ ನಂಗಡ ಸಮಾಜ, ಸಂಘ ಸಂಸ್ಥೆರ ಚುನಾವಣಾ ಕಾಲತೂ, ನಂಗೆಲ್ಲಡ ಮನತ್, ಆದ್ಯ ನಂಗಡ ಮೇನತ್(ಜವಾಬ್ದಾರಿ) ಎಂತಾ ಎಣ್ಣುವದ್ ಅರಿವುಲುಂಡೇಂಗಿ, ಬವುಸ್ಲ್ ನಂಗಡ ಮಕ್ಕ ಮಕ್ಕಡ ಕಾಲಕೂ ಕೊಡವಾಮೆ ಒಬ್ಬುಲಿ ಒಂದಾಯಿತ್ ಮೋಳ್ಕೇರಿ ನಿಕ್ಕೂ….
ಬಾಳ್ ಬಾಳೆನ್ನಡ ಪೊಮ್ಮಾಲೆ ಬಾಳೋ, ಪೊಮ್ಮಾಲೆ ಮೀದಲ್ ಕೊಡವಾಮೆ ಬಾಳೋ….
