1996ಲಿಂಜ ಮೈಸೂರ್‌ಲ್‌ ಕಾರ್ಯ ನೀಸಿಯಂಡುಳ್ಳ ಕೊಡವ ಧೀನಬಂದು ಚಾರಿಟೇಬಲ್ ಟ್ರಸ್ಟ್, ಈ ಕುರಿ, 2024ಲ್‌ ಪಿ.ಯು.ಸಿ. ರ ಕೊಡಿಕ್‌ ಓದಿಯಂಡುಳ್ಳ ಗರೀಬ ಕೊಡವ ಮಕ್ಕಡ ಅರ್ಜಿಕಾಕಿತ್.
ಅರ್ಜಿನ, ಎ4 ಪಾಳೆಲ್‌, ಕೊಡವ, ಕನ್ನಡ, ಇಂಗ್ಲೀಷ್‌ ಪಾಜೆಲ್‌ ಸ್ವಂತ ಎಳ್ದೋಂಡು, ಒಕ್ಕಪೆದ, ಆಳ್‌ಪೆದ, ಅಪ್ಪ ಅವ್ವಂಡ ಪೆದ, ವಿಳಾಸ ಪೂರ್ತಿ ಎಳ್ದೊಂಡು. ಕೈಂಜ ಪರೀಕ್ಷೆಲ್‌ 50% ಫಲಿತಾಂಶ ಎಡ್ತಿತಿರೋಂಡು, ಬಿ.ಪಿ.ಎಲ್. ಕಾರ್ಡ್‌ ಇಂಜಿತೇ ಇಕ್ಕೋಂಡು. (ಅಪ್ಪವ್ವ ಇಲ್ಲತ ಅಲ್ಲೇಂಗಿ, ಊನಕಾರ ಮಕ್ಕಕ್‌ ಇದತಿಂಜ ಮಾಪಿ ಉಂಡ್)
ಅರ್ಜಿಲ್‌ ಮಕ್ಕಡ ಮನೆರ ಪರಿಸ್ಥಿತಿ, ಅಪ್ಪ ಅವ್ವ ಇಲ್ಲೇಂಗಿ, ಇಂಜಿತೂ ಆರೋಗ್ಯತ್‌ ಇಲ್ಲೇಂಗಿ, ಮಕ್ಕಕ್‌ ಎನ್ನೇಂಗಿ ತೊಂದರೆ ತಾಪತ್ರೆ ಉಂಡೇಂಗಿ, ವಿವರನ ಬುಡ್ತಿತ್‌ ಎಳ್ದೋಂಡು.
ಅರ್ಜಿರ ಕೂಡೆ, ಬಿ.ಪಿ.ಎಲ್. ಕಾರ್ಡ್‌ ನಕಲ್, ಮಾರ್ಕ್‌ ಕಾರ್ಡ್‌ ನಕಲ್, ಇಕ್ಕ ಓದಿಯಂಡುಳ್ಳ ಕಾಲೇಜ್‌ ಸಂಸ್ಥೆಲ್‌ ಫೀಸ್‌ ಕಟ್ಟ್‌ನ ರಸೀತಿ ನಕಲ್, ಅಲ್ಲೇಂಗಿ ಮುಕ್ಯಸ್ಥಂಗಡ ಅಧೀಕೃತ ಕಾಗದ, ಅರ್ಜಿ ಇಡುವೈಂಡ ಬ್ಯಾಂಕ್‌ ಪುಸ್ತಕತ ಆದ್ಯ ಪಾಳೆ ನಕಲ್ ಕೂಟಿತ್‌ ಇಕ್ಕೊಂಡು.
ಕಾಲೇಜಿಲೇ ಅಲ್ಲತೆ, ಚಾಕ್ರಿಕೊತ್ತನ್ನಕೆ, ರಕ್ಷಣಾಪಡೆಕ್‌ ಕೂಡೋಕ್‌ ತಯಾರಿ, ನರ್ಸಿಂಗ್‌, ಡಿಪ್ಲಮೊ, ಐ.ಟಿ.ಐ. ಬೋರೇದೇಂಗಿ ಪೈಪೋಟಿ ಪರೀಕ್ಷೆಕ್‌ ತಯಾರಿ ಮಾಡ್ಯಂಡುಳ್ಳವೂ ಅರ್ಜಿ ಇಡೋಲು. ಇವು, ಪಡ್ಚಂಡುಳ್ಳ ಸಂಸ್ಥೆಕ್‌ ಕಟ್ಟ್‌ನ ರಸೀತಿ ನಕಲ್, ಸಂಸ್ಥೆರ ಕಾಗದ, ಪಡ್ಚಂಡುಳ್ಳ ವಿಷ್ಯ ಅರಿವುನ ಚುರ್‌ಕಿತ್‌, ಬುಡ್ತಿತ್‌ ಅರಿಚಿಡೋಂಡು.
ಆಂಜ ಮಕ್ಕಡ ವಿವರನ ಮಾಧ್ಯಮತ್‌ ಪ್ರಕಟ ಮಾಡುವ, ಎಚ್ಚಕ್‌ ಮಕ್ಕಕ್‌, ಎಚ್ಚಕ್‌ ಪಣ ಸಾಯ ಮಾಡೋಂಡೂಂದ್‌ ಟ್ರಸ್ಟ್‌ಕ್‌ ಬಂದ ಪಣ ಸಾಯತ ಆಧಾರತ್‌ ಟ್ರಸ್ಟ್ ನಿರ್ಕ್‌ ಮಾಡುವ.
ಅರ್ಜಿ ಒಪ್ಪುಚಿಡೋಕ್‌ ಆಖೀರಿ ನಾಳ್: 31/10/2024
ಅರ್ಜಿ ಎತ್ತ್‌ಚಿಡಂಡಿಯ ವಿಳಾಸ : ಕೊಡವ ದೀನಬಂಧು ಚಾರಿಟೇಬಲ್ ಟ್ರಸ್ಟ್(ರಿ), ಕೊಡವ ಸಮಾಜ ಕಟ್ಟಡ, ಜನರಲ್ ಕೆ ಎಸ್ ತಿಮಯ್ಯ ರಸ್ತೆ, ವಿಜಯನಗರ 1ನೇ ಹಂತ, ಮೈಸೂರು-570017.
ಎನ್ನೇಂಗಿ ಅರಿವು ಬೋಂಡೇಂಗಿ, ಗೌ. ಕಾರ್ಯದರ್ಶಿ ಪಟ್ಟಡ ಎ. ಜಯಕುಮಾರ್ (ಫೋನ್: 9480665525) ಅಲ್ಲೇಂಗಿ ಟ್ರಸ್ಟಿ ಚೆಂಬಂಡ ಜಿ. ಸೋಮಣ್ಣ (ಫೋನ್: 8050752585) ಅಯಿಂಗಳ ಕಾಕಿತ್ ಕೇಕೋಲು.
ಏದೇ ಘಳಿಗೆಲ್‌ ನಿಂಗಳಿಂಜ ಎನ್ನೇಂಗಿ ಅರಿವು ಬೋಂಡುವೇಂಗಿ, ಟ್ರಸ್ಟ್ಂಜ ಫೋನ್ ಮಾಡ್‌ನಕ್ಕ ನಿಂಗ ತಪ್ಪತೆ ಒತ್ತ ವಿವರನ ತಕ್ಕೋಂಡು. ಪೂರ್ತಿ ವಿವರ ಇಲ್ಲತ ಅರ್ಜಿನ ಟ್ರಸ್ಟ್ ಒತ್ತವುಲೆ. ಅಭಿಮಾನಿ ಮಾಜನಡ ಪ್ರಮಾಣಿಕ ನೈಪುರ ಸಾಯತ್‌ನ ನಂಗೆಲ್ಲ ಸೆರಿಯಾಯಿತ್‌ ಬಳಸಿಯವನಕೆ ಆಂಡೂಂದ್‌ ಟ್ರಸ್ಟ್ರ ಅಧ್ಯಕ್ಷ ಕಟ್ಟೆರ ಕಾರ್ಯಪ್ಪ ಅವು ಕೇಟಂಡಿತ್.
