ವಿರಾಜಪೇಟೆ,ಡಿ.05: ಪುತ್ತರಿ ದೇಶ ಕಟ್ಟ್ ಉಳ್ಳಾಂಗಾಯಿತ್ ಇದೇ 08/12/24ನೇ ನಾರಾಚೆ ಕರ್ನಾಟಕ ಕೊಡವ ಸಾಹಿತ್ಯ ಅಕಾಡೆಮಿರ ಆದನೆಲ್ ನಡ್ಕಂಡಿಂಜ, ತೋಕ್ ನಮ್ಮೆನ ಮಿಂಞಕ್ ತೆರ್ಕಿತ್ಂದ್ ಅರ್ಂಜಿಬಂದಿತ್.
ದೇಶ ಕಟ್ಟ್ ಎಣ್ಣುವದ್ ಇಡೀ ಕೊಡವು ದೇಶಕ್ಕೇ ಅಡ್ಂಗ್ನಂತದ್. ಕಾಲೋದಿ, ಪಾಡಿ ಇಗ್ಗುತಪ್ಪಂಡ ನಡೆಲ್ ಪುತ್ತರಿ ಕುರ್ಚಿತ್ ಆನದು, ಇಗ್ಗುತಪ್ಪಂಡ ಆದಿನೆಲೆ ಮಲ್ಮಕ್ ಪೋಯಿತ್, ಪುತ್ತರಿರ ಮೊಳಿಲಾಲೆ ದ್ಯಾವ ತಕ್ಕ ದೇಶ ಕಟ್ಟ್ ಇಡುವ. ಆ ಕೆಟ್ಟ್ ಪೋಲೆ ಮಿಂಞಕ್ ಇಗ್ಗುತಪ್ಪಂಡ ಕಲಾಡ್ಚ ನಮ್ಮೆಕೆತ್ತನೆ, ಪೊಮ್ಮಾಲೆ ಕೊಡವುದೇಶ ನುಪ್ಪತಂಜಿ ನಾಡ್ಲೂ, ಉಲಗತ್ಡಿಯ ಉಳ್ಳ ಕೊಡವಳೂ ಕಟ್ಟ್ ಪಟ್ಟಣಿಕ್ ಅಡಂಗಿತ್ ಇಕ್ಕೊಂಡೂಂದ್ ಪಂಡ್ಪೋಲೆತ ನೇಮ.
ದೇಶ ಕಟ್ಟ್ ನ್ಯಾರತ್, ನಟ್ಟಬೊಳೆ ಕೊಯ್ಯತೆ, ಕೊಲ್ಲ್ ಕೊಲೆ ಮಾಡತೆ, ತಿತ್ತ್ ಬೊಡಿಬೆಕ್ಕತೆ, ಬೋಂಡತಾನ ಪರಿಯತೆ, ಆಗತಾನ ಮಾಡತೆ, ನಾಯಾಟ್ ನಂಜಾಟ್ (ಬೋಟೆಕೂಟ್) ಪೋಕತೆ, ಕೊಂಬು ಕೊಟ್ಟ್, ಆಟ್ ಪಾಟ್, ಮಂಗಲ ಕಂಬಳ ನಡ್ತತೇ, ಚಾವು ಮಾದತ್ರನ್ನತಾನೂ ತೋಪರೆಲ್ ಕೈಚಂಡ್. ಅದ್ದಶುದ್ದತ್ ಇಕ್ಕಂಡಿಯದ್ ಕೊಡವ ಕುಲಕೂ, ಪಿಂಞ ಪುತ್ತರಿ ಕೈಪ ಎಲ್ಲಾರ್ಕೂ ನಲ್ಲದ್. ತಪ್ಪಿತ್ ನಡ್ಂದವಂಗ್ ಕಷ್ಟ ನಷ್ಟ ಬಂದದೂ ಸುಮಾರುಂಡ್.
ಅರಿವುರ ಕೊರುನುಂಡ್ ತಪ್ಪಿಪೋಯಿತಿಂಜ ನಡ್ಪುನ, ಇಕ್ಕ ಪುನಾದಿಯ ಎಲ್ಲಾರ್ಕೂ ಎಚ್ಚರ ಕೊಡ್ತಂಡ್, ಅರಿವು ಬೊಳ್ತಿಯಂಡುಳ್ಳಲ್ಲಿ, ಸರ್ಕಾರತ ಸಂಸ್ಥೆಯಾನ ಕರ್ನಾಟಕ ಕೊಡವ ಸಾಹಿತ್ಯ ಅಕಾಡೆಮಿ ತಾಂಡ ಆಯಿಮೆನ ಮಿಂಞಕ್ ತೆರ್ಕ್ನದ್ ನಲ್ಲ ಮೊಟ್ಟ್ ಪಿಂಞ ಎಲ್ಲಾರ್ಕೂ ಮಾದರಿ ಆಪನ್ನತದ್ಂದ್ ಅಖಿಲಕೊಡವ ಸಮಾಜ ಕಾರ್ಯಕಾರ ಕೀತಿಯಂಡ ವಿಜಯಕುಮಾರ್ ಎಣ್ಣಿತ್.