ವಿರಾಜಪೇಟೆ, ಮೇ,15(Nadubade News): ಕೇಳಿಪಟ್ಟ ಸಿನೇಮಾಕಾರ ಆಪಾಡಂಡ ಟಿ. ರಘು ಅಯಿಂಗಡ ನೆಪ್ಪುಲ್ ಕೊಡವಾಮೆರ ಕೊಂಡಾಟ (ರಿ) ಸಂಘಟನೆ ನಡ್ತ್ನ ಆನ್ಲೈನ್ ಪಾಟ್ ಪೈಪೋಟಿಲ್ ಚೆಟ್ಟಿರ ಗ್ರಂಥ ಕಾರ್ಯಪ್ಪ ಆದ್ಯ, ಬೊಳ್ಳಚೆಟ್ಟಿರ ಶರೀನ್ ಚಂಗಪ್ಪ ದಂಡನೇ, ಪಳಂಗಂಡ ಶಾನ್ ಸುಬ್ಬಯ್ಯ ಮೂಂದನೇ ಇನಾಂ ಪಡಂದಂಡಿತ್.
ಸಿನೇಮಾಕೋವುಲ್ ಕೊಡವಾಮೆನ ಕೊಂಡಾಡಿತ್ ಒಯಿಂಜ ಪೆರಿಯ ಜೀಂವಕ್ ಸ್ವರತೊಮ್ಮಾನ ಒಪ್ಪುಚಿಡೋಕ್ ಕೊಡವಾಮೆರ ಕೊಂಡಾಟ ಸಂಘಟನೆ ಈ ಕಾರ್ಬಾರ್ ನಡ್ತ್ನ ಈ ಪೈಪೋಟಿಲ್, ಅಣ್ಣಳಮಾಡ ನೀಮಾ ಜೋಯಪ್ಪ, ಬೊಳ್ಳಚೆಟ್ಟಿರ ದಿಲೀಪ್ ಕುಮಾರ್, ಬೊಳ್ಳಚೆಟ್ಟಿರ ಶರೀನ್ ಚಂಗಪ್ಪ, ಕೋಡಿಮಣಿಯಂಡ ತಕ್ಷಗಣಪತಿ, ಪುತ್ತಾಮನೆ ವಿದ್ಯಾ ಜಗದೀಶ್, ಕೊಟ್ಟ್ಕತ್ತಿರ ಪ್ರತೀಶ್ ಅಯ್ಯಪ್ಪ, ಕುಟ್ಟಂಡ ಸೋನು ಪೊನ್ನಮ್ಮ, ಮೇಚುವಂಡ ಪ್ರೇಕ್ಷ ಪೂವಮ್ಮ, ಬೊಟ್ಟೋಳಂಡ ನಿವ್ಯ ದೇವಯ್ಯ ,ಪಳಂಗಂಡ ಶಾನ್ ಸುಬ್ಬಯ್ಯ, ಅಮ್ಮಂಡ ಸ್ವಯಂ ಸೋಮಣ್ಣ, ಅಮ್ಮಣಿಚಂಡ ಮೋಹಿತ್ ಮುತ್ತಪ್ಪ, ಬೊಪ್ಪಂಡ ಸರಳಾ ಕರುಂಬಯ್ಯ, ಆಶಾ ರಾಮ್ಕುಮಾರ್, ಅಪ್ಪಂಡೇರಂಡ ಚಿರಾಯು ಕುಶಾಲಪ್ಪ,ಪಾಲೆಯಂಡ ಕಾವ್ಯ ದೇವಯ್ಯ ಚೋಕಂಡ ಚವೀಕ್ಷಾ ಚೋದಮ್ಮ,ಬೊಟ್ಟೊಳಂಡ ಶಾಂತಿ ಅಚ್ಚಯ್ಯ ಮಿನ್ನಂಡ ಚೆರಿ ಚೋಂದಮ್ಮ,ಚೇನಂಡ ರಘು ಉತ್ತಪ್ಪ, ಚೆಟ್ಟಿರ ಗ್ರಂಥ ಕಾರ್ಯಪ್ಪ, ಅರಮಣಮಾಡ ಬೋಪಣ್ಣ ಅಪ್ಪಂಡೇರಂಡ ಬಾಬಿ ರಜನೀಶ್ ಮಚ್ಚುರ ಶಾರದಾ ಅಪ್ಪಯ್ಯ ಕೂಡ್ನನಕೆ ಒಟ್ಟು 24 ಪಾಟ್ಕಾರ ಕೂಡಿಯಾಡಿತಿಂಜತ್.
ಕೇಳಿಪೋನ ಪಾಟ್ಕಾರಳಾನ ಚೇಂದಿರ ನಿರ್ಮಲ ಬೋಪಣ್ಣ, ಮಾಳೇಟಿರ ಅಜಿತ್ ಪೂವಣ್ಣ, ಮೇವಡ ಕಾವೇರಿ ಇವು ತೀರ್ಪುಕಾರಳಾಯಿತ್ ಕಾರ್ಬಾರ್ ಮಾಡ್ಚಿ. ಈ ಆಯಿಮೆಕ್ ಅಂಜಂಡ ಪ್ರಸನ್ನ ಈರಪ್ಪ ಅವು ದಿ. ಅಂಜಂಡ ಬೆಳ್ಯಪ್ಪ, ಸೀತಮ್ಮ(ಕೇಟೋಳಿರ) ಅಯಿಂಗ ನೆಪ್ಪುಲ್ ಇನಾಂ ಬೆಚ್ಚಿತ್. ಪೈಪೋಟಿಲ್ ಕೂಡಿಯಾಡ್ನ ಎಲ್ಲಾ ಪಾಟ್ ಕಾರಕೂ ನಲ್ಲಾಮೆರ ಓಲೆ ಪಿಂಞ ಇನಾಂ ಬಳಂಬುವ ಆಯಿಮೆನ ಸದ್ಯತೇ ಅರಿಚಿಡುವಾಂದ್ ಸಂಘಟನೆ ಅರಿಚಿಟ್ಟಿತ್.
ಪೈಪೋಟಿರ ಕಾರ್ಯಾಕಾರನಾಯಿತ್, ಕೊಡವಾಮೆರ ಕೊಂಡಾಟ ಸಂಘಟನೆರ ಕಾರ್ಯಕೂಟ್ಕಾರ ಅಜ್ಜಮಕ್ಕಡ ವಿನು ಕುಶಾಲಪ್ಪ ಅವು ಮೇನತ್ಲ್ ಕಾರ್ಬಾರ್ ಮಾಡ್ಚಿ.
