nadubade news, ಅ.14, ತಲೆಕಾವೇರಿ: ಕಾಲೋರಂಡಕ್ಕೋರಮ ತೇರ್ಥ ರೂಪಿಣೀ ಆಯಿತ್ ಬಪ್ಪ, ಅವ್ವ ಕಾವೇರಿನ ಕಾಂಬಕ್ ಮಕ್ಕಡ ತಯಾರಿ ಬಾರೀ ಜೋರಾಯಿತೇ ನಡ್ಂದಂಡುಂಡ್. ಇಂಞಿ ಬರೀ ಮೂಂದೆ ದಿನತ್ ತುಲಾ ಚಂಗ್ರಾಂದಿ, ಶಂಬೋಶಿವ ಮಾದೇವಂಡ ನೆತ್ತಿ ಕಣ್ಣ್ ಸೂರಿಯ, ತುಲಾ ರಾಶಿಕ್ ಎತ್ತೋಕ, ಕಾವೇರಮ್ಮೆ ಮಾತಾಯಿ ಆದ್ಯ ಕನ್ನಿ ಕಾವೇರಿಲೂ, ಅಲ್ಲಿಂಜ ತಲೆಕಾವೇರಿಲೂ ತೇರ್ಥರೂಪಿ ಆಯಿತ್ ಉಕ್ಕಿಬಂದಿತ್, ಪಂಡಾಯಿರ ಕಾಲ ಬಯ್ಯ ತಾಂಡ ಮಕ್ಕಕ್ ತಂದ ತಕ್ಕ್ಪೋಲೆ ನಲ್ಲರಿವುರ ಆಶೀರ್ವಾದತ್ ಬಟ್ಟೆಬೊಳಿ ಕಾಟುವ. ಇನ್ನನೆ ಕೊದಿಲ್ ಉಕ್ಕಿ ಬಪ್ಪ ಅವ್ವ ಈಯಾಂಡ್ ಅಕ್ಟೋಬರ್ 17ನೇ ಪೊಲಾಕ 7.40 ಘಂಟೆಕ್ ತಲೆಕಾವೇರಿಲ್ ಎದ್ದ್ ಬಪ್ಪೀಂದ್ ಇಕ್ಕಾಕಲೇ ತಾಂಡ ಮಕ್ಕಳ ಕಾಕಿತೆಣ್ಣಿತ್.
ಆ ಪೋಲೆ, ಅವ್ವನ ಕಾಂಬ ಕೊದಿ ಆಸೆಲ್ ಮಕ್ಕಳೂ, ಕಾಡ್ ಪೋಲೆ ಕೂಡಿತ್ ತಳಿಯತಕ್ಕಿ ಬೊಳಕ್ಕಾಯಿ, ಕೊಟ್ಟ್ ಮೊಟ್ಟ್ ಪಾಟಾಯಿ, ಒತ್ತೋರ್ಮೆ ಒಂದಾಯಿ ಅವ್ವನ ಕಾಕಿ ಪಾಡಿಯಂಡ್, ಅರ್ಪತರೆಯಾಯಿ ಪೋಯಿತ್, ಅವ್ವ ಬಪ್ಪ ನ್ಯಾರಕ್, ಕಟ್ಟೆರುಪು ಸಾಲೋಡೆ, ಉದ್ದಕೆಟ್ಟಿ ಕೂಡಿ ನಿಪ್ಪಕ್, ಎಲ್ಲಾ ಜೋಡೂ ಕೂಟ್ಯಂಡುಂಡ್.
ಕೂಟ್ಕ್ ಸರ್ಕಾರವೂ ತಾಂಡ ಮೇಲ್ಮಾನಿಕೆಲುಳ್ಳ ತಲೆಕಾವೇರಿ ಕ್ಷೇತ್ರ ಪಿಂಞ ಪಾಂಡತುಳ್ಳ ಭಘಂಡಂಡ ಕ್ಷೇತ್ರತೂ ಎಲ್ಲಾ ಜೋಡ್ ಕೂಟೋಕ್, ನೈಚಂಡುಂಡ್. ವಿರಾಜಪೇಟೆ ವಿಧಾನ ಸಭಾ ವ್ಯಾಪ್ತಿಕ್ ಬಪ್ಪ ತಲೆಕಾವೇರಿ ಕ್ಷೇತ್ರತ್ ನಮ್ಮೆ ಅಂದೋಡೆ ಕೈಪಕ್ ಏದೇ ಕೊರು ಬರತನ್ನಕೆ ಕಾತವಕ್ ಇಕ್ಕಾಕಲೇ ಶಾಸಕ ಅಜ್ಜಿಕುಟ್ಟಿರ ಪೊನ್ನಣ್ಣ ಅವು ಎಲ್ಲಾ ಕೋವುರ ಅಧಿಕಾರಿಯಕ್ ಅಪ್ಪಣೆ ಮಾಡಿತ್ ಕೂಟ್ಕ್ ಇದಂಗ್ ಬೋಂಡಿಯಾನ ಪಣಕಾಸ್ಕಾಯತ್, ಸರ್ಕಾರತಿಂಜ 75 ಲಕ್ಷ ಪಣತ್ನೂ ಬುಡ್ಗಡೆ ಮಾಡಿಕೊಡ್ತಿತ್.
ಚಂಗ್ರಾಂದಿಕೊತ್ತ ಎಲ್ಲಾ ಆಯಿಮೆರ ಕೊರುನೂ ತಾನೇ ಎಡ್ತಂಡಿತುಳ್ಳ ಶಾಸಕ ಪೊನ್ನಣ್ಣ ಅವು ಇಕ್ಕಾಕಲೇ, ಕ್ಷೇತ್ರಕ್ ಪೋಪ ಬಟ್ಟೆಲ್ ಅಂಡ ಕಾಡ್ ನೀಕಿತ್, ಕುಂಡ್ ಕುಡು ಮುಚ್ಚೋಕ್ ಎಣ್ಣ ಪೋಲೆ, ಮಳೆರ ನಡುಲೂ ಅಧಿಕಾರಿಯ ಸಿಬ್ಬಂದಿಯ ಏರ ಮೇನತ್ಲ್ ಕಾರ್ಬಾರ್ ನೀಸಿಯಂಡುಂಡ್. ಎಡೆಬುಡತೆ ಪೊಜ್ಜಂಡುಳ್ಳ ಮಳೆನುಂಡ್ ಥಾರ್ ಇಟ್ಟಿತ್ ಮುಚ್ಚಿನ ಕುಂಡ್ ಓರಂದ್ ಜಾಗತ್ ಎದ್ದ್ ಬಂದಂಡುಂಡೇಂಗೂ ಅದನ ಪುನಾದ್ಯ ತೊಡಿಕೆ ಮುಚ್ಚಿತ್ ಸೆರಿಕೂಟೋಕ್ ಸಂಬಂದಪಟ್ಟ ಎಲ್ಲಾರು ಕೈ ತೆಕ್ಕಿತ್ ಇಳ್ಂಜಿತ್.
ಈ ಕುರಿ ಪೊಲನ್ಯಾರ್ತೆ ತೇರ್ಥ ಬಪ್ಪಾನುಂಡ್, ಜನಕ್ ಏದೇ ತರತ ತೊಂದರೆ ತಾಪತ್ರೆ ಆಕತನ್ನಕೆ ನೋಟ್ಯವಕ್ ಸಮ್ಮಂದ ಪಟ್ಟಯಿಂಗಕ್ ಎಣ್ಣಿತುಳ್ಳ ಶಾಸಕಂಗ, ಬೋಂಡ್ಯಾನ ಪೋಲೀಸ್ ಸಿಬ್ಬಂದಿ, ಸ್ವಯಂಸೇವಕಂಗ, ಆರೋಗ್ಯ ಇಲಾಖೆರ ಸಿಬ್ಬಂದಿಯಳ ತಯಾರಿಲ್ ಇಪ್ಪನ್ನಕೆ ಅಪ್ಪಣೆ ಮಾಡ್ನದಲ್ಲತೆ, ಅವ್ವನ ಕಾಂಬಕ್ ಬಂದವು ಎನ್ನೇಂಗಿ ಕಯ್ಯತಾನಲ್ಲಿ, ಅಯಂಗಳ ಆಸ್ಪತ್ರೆಕ್ ಕಾಕ್ಯಪೋಪಕ್, ಅನುವಾಪನ್ನಕೆ ದಂಡ್ ಅಂಬುಲೆನ್ಸ್ನ ತಯಾರಾಯಿತಿಪ್ಪಕ್ ಎಣ್ಣಿತ್.
ಪಾಂಡ(ಭಾಗಮಂಡಲ)ತಿಂಜ ತಲೆಕಾವೇರಿಕ್ ಪೋಪೈಂಗಕ್ ಅನುವಾಪನ್ನಕೆ ಈ ಕುರಿಯೂ ಸರ್ಕಾರಿ ಬಸ್ಸ್ರ ಬಣ್ಣೆ ಸೇವೆ ಇಪ್ಪಾನುಂಡ್ ಭಕ್ತ ಮಾಜನ ಆಪಚ್ಚಕ್ ತಂಗಡ ವಾಹನತ್ನ ಪಾಂಡತೇ ಬೆಚ್ಚಿತ್, ತಲೆಕಾವೇರಿಕ್ ಬಸ್ಸ್ಲ್ ಪೋಪಂಜಿ, ರಸ್ತೆಲ್ ಆಪ ಅಡೆತಡೆನ ನೀಕೋಕ್ ಸಾಕಾರ ತರೋಂಡೂಂದ್ ಕೇಟಂಡಿತ್.
ಈ ಎಲ್ಲಾಂಡ ಕೂಟ್ಕ್ ಎಲ್ಲಾ ಇಲಾಖೆರ ಕೂಟ್ಕ್ ಆಯಾ ಇಲಾಖೆರ ಮೂಪಂಗ, ಎಲ್ಲಾ ಅಧಿಕಾರಿಯ ಕೂಡ್ನನಕೆ ಇಡೀ ಜಿಲ್ಲಾಡಳಿವೇ ಅಂದ್ ತಲೆಕಾವೇರಿ ಕ್ಷೇತರತ್ ಇಂಜಿತ್. ಅವ್ವಂಡ ಆಯಿಮೆಲ್ ಎಳ್ಳಚ್ಚಕೂ ಕೊರು ಬರತನ್ನಕೆ ಕಾತ್ ನೋಟ್ಯವನ್ನಕೆ ಕಟ್ಟಪ್ಪಣೆ ಮಾಡಿತ್.
ಕಾಲೋದಿರನ್ನಕೆ ಈ ಕುರಿಯೂ ಭಗಂಡ ಕ್ಷೇತ್ರತಿಂಜ ತಲೆಕಾವೇರಿಕೆತ್ತನೆ, ಕಾನಡೆಲ್ ಪೋಪ ಆಯಿರಾಯಿರ ಭಕ್ತಂಗಕ್ ಎದೂ ಕೊರು ಬರತನ್ನಕೆ, ಸರ್ಕಾರಿ ಬಸ್ಸ್ಂಜ ತೊಟ್ಟ್, ಬಟ್ಟೆ ಬೊಳಿ ಕೂಡ್ನನಕೆ ಎಲ್ಲಾ ರೀತಿರ ವ್ಯವಸತೆನ ಮಾಡೋಕ್ ಜಿಲ್ಲಾಡಳಿತಕ್ ಎಣ್ಣ್ನದಲ್ಲತೆ ಕಾಲೋದಿರನ್ನಕೆ ಈ ಕಾಲವೂ ಶಾಸಕಂಗ ಮಾಜನಡ ಕೂಡೆ ಕನಡೆಲ್ ಪೋಪದುಂಡ್.
ಕೊಡಗು ಏಕೀಕರಣ ರಂಗಕಾರ ಕಾಲೋದಿರನ್ನಕೆ ಈಯಾಂಡೂ ಕೂಡಿ, ಅವ್ವಂಡಲ್ಲಿಕ್ ಬಪ್ಪ, ಎಲ್ಲಾ ಭಕ್ತ ಮಾಜನಕ್ ಕೂಳ್ದಾನ ಮಾಡುವಕ್ ಎಲ್ಲಾ ಜೋಡ್ ಕೂಟಿತ್, ತಯಾರಾಯಿತ್, ಇವು ಚಂಗ್ರಾಂದಿಂಜ ತೊಟ್ಟ್ ಕಿರ್ ಚಂಗ್ರಾಂದಿಕೆತ್ತನೆ ಓರ್ ತಿಂಗ ಇವು ಎಡೆಬುಡತೆ ಎಲ್ಲಾ ಮಾಜನಕೂ ಕೂಳ್ದಾನ ಮಾಡುವ.
ಅವ್ವ ಕಾವೇರಿನ ಕಾಂಬ ಇರಾದೆಲ್ ಮಕ್ಕ ಕುಂಡಿಕೆ, ಕೊಳತ ಪಕ್ಕ ನುಗ್ಗಿ ಪೋಪದ್ ಸಾಮಾನ್ಯ, ಆಚೇಂಗಿ ಭದ್ರತೆರ ದೃಷ್ಟಿಲ್, ಪೊಲೀಸ್ ಇಲಾಖೆ, ಸ್ವಯಂ ಸೇವಕಂಗ ತಡ್ಕಂಡಿಯಾಪ, ಎಲ್ಲಾರೂ ಒಮ್ಮಕ್ಕೆ ನುಗ್ಗಿರತೇಂಗಿ, ಕೊಳತ ಪಕ್ಕ ಎಲ್ಲಾರೂ ನಿಪ್ಪದ್ ಕಷ್ಟಾಪ ಅನ್ನನಾಯತ್, ಸುತ್ತೂ ಬೇಲಿ ಕೆಟ್ಟಿತ್ ತಡ್ಕಂಡಿಯಾಪ, ಅನ್ನನಾಯಿತ್, ತಕ್ಕಮುಕ್ಕಾಟಿಯ, ನಿರ್ಕಾನ ಪಾಟ್ಕಾರ, ತಳಿಯತಕ್ಕಿ ಬೊಳಕ್ ಪುಡ್ಚ ಪೊಮ್ಮಕ್ಕ, ಪಾಸ್ ಉಳ್ಳ ಸ್ವಯಂಸೇವಕಂಗ, ಬುಟ್ಟಿತ್ ಬಾಕಿ ಉಳ್ಳವು ಕೊಡಿಯೇ ನಿಂದಿತ್ ಅವ್ವನ ಕಾಕಿ ಕೊಂಡಾಡಿಯಂಡ್, ಆಶೀರ್ವಾದ ಪಡ್ಂದಂಡಕ, ನಂಗಡವ್ವಂಡ ನೆಲೆಲ್, ನಲ್ಲೋರ್ ಆಯಿಮೆ ನಡ್ತೋಕ್ ಸರ್ಕಾರತ ಕೂಡೆ ನಂಗಡದೂ ಸಾಕಾರ ಇಂಜನ್ನೆಕಾಪ.
