ವಿರಾಜಪೇಟೆ, ಡಿ.07: (ಬಾಳೆಯಡ ಕಿಶನ್ ಪೂವಯ್ಯ) ಕರ್ನಾಟಕ ರಾಜ್ಯ ಒಕ್ಕಲಿಗರ ವಿಕಾಸ ವೇದಿಕೆ ನಡ್ತ್ನ 2024ನೇ ಕಾಲತ ಕನ್ನಡ ನಮ್ಮೆಲ್, ಟಿ.ಶೆಟ್ಟಿಗೇರಿರ ರೂಟ್ಸ್ ಎಜುಕೇಷನ್ ಟ್ರಸ್ಟ್ಲ್ ಓದಿಯಂಡುಳ್ಳ, ಬಲ್ಯಮೀದೇರಿರ ಧೃತಿಪೆಮ್ಮಯ್ಯ ಅಯಿಂಗಕ್, ಕಳಿರ ಕೋವುಲ್ ಮಾಡ್ನ ಸಅಧನೆಕ್ಕಾಯಿತ್ ಕನ್ನಡ ವಿಕಾಸ ರತ್ನ ಬಿರ್ದ್ ಬಳ್ಂಬುಚಿ.
ನಾಳಂಕೆ 30/11/2024ಲ್ ಮೈಸೂರ್ರ ಕನ್ನಡ ಸಾಹಿತ್ಯ ಭವನ, ನಾಲ್ವಡಿ ಕೃಷ್ಣರಾಜ ಒಡೆಯರ್ ಸಬಾ ಬಾಡೆಲ್ ನಡ್ಂದ ಆಯಿಮೆಲ್, ಸಾಹಿತಿ ಟಿ. ಸತೀಶ್ ಜವರೇಗೌಡ, ಕರ್ನಾಟ ರಾಜ್ಯ ಒಕ್ಕಲಿಗರ ವಿಕಾಸ ವೇದಿಕೆರ ರಾಜ್ಯ ಅಧ್ಯಕ್ಷೆ ಶ್ರೀಮತಿ ಹೆಚ್. ಎಲ್.ಯಮುನ ಅಯಿಂಗಡ ಕೈಲಿಂಜ ಈ ಬಿರ್ದ್ ಪಡ್ಂದಂಡ ಬಲ್ಯಮೀದೇರಿರ ಧೃತಿಪೆಮ್ಮಯ್ಯ, ಬಲ್ಯಮೀದೇರಿರ ಪೆಮ್ಮಯ್ಯ, ಶಬಾನಾದೇಚಮ್ಮ ಅಯಿಂಗಡ ಮೋವ.
