ವಿರಾಜಪೇಟೆ, ಜ.13: ಕೊಡವಾಮೆರ ಅವ್ವ ಸಂಸ್ಥೆ, ಮೂತ ಸಂಸ್ಥೆ ಎಣ್ಣುವ ಕೇಳಿರ ಅಖಿಲ ಕೊಡವ ಸಮಾಜ ತಾಂಡ ವೆಬ್ಸೈಟ್ನ, ಎಲ್.ಎ.ಸಿ. ಪಿಂಞ ವಿರಾಜಪೇಟೆ ಶಾಸಕ ಅಜ್ಜಿಕುಟ್ಟಿರ ಪೊನ್ನಣ್ಣ ಅವು ಬೊಳಿಬೂಕ್ಚಿ.
ವೆಬ್ಸೈಟ್ ಬೊಳಿಬೂಕಿತ್ ತಕ್ಕ್ ಪರ್ಂದ ಅಜ್ಜಿಕುಟ್ಟಿರ ಪೊನ್ನಣ್ಣ ಅವು, ಕೊಡವ ಎಣ್ಣಕ ಬೊರೀ ಓರ್ ಜನಾಂಗ ಮಾತ್ರ ಅಲ್ಲ ಇದೋರ್ ನಂಬಿಕೆ. ಇಡೀ ಉಲಗತ್ಡಿಯ ಕೊಡವ ಎಣ್ಣಕ ಓರ್ ನಂಬಿಕೆ ಗೌರವ ಉಂಡ್. ಅದನ ಬಳತಿಯವದ್, ಉಳ್ತಿಯವದ್ ನಂಗಡ ಕೈಲ್ ಉಳ್ಳದ್. ಇಂದ್ ಎಲ್ಲಾ ಕೋವುಲೂ ಕೊಡವಕ್ ಉಳ್ಳ ಖನ, ಮರ್ಯಾದಿರ ನೆಲೆ ಕಾಲ ಮುಂದಾರಕೂ ಇಪ್ಪನ್ನಕೆ ನಂಗೆಲ್ಲರೂ ನೈಕನಾಂದ್ ಎಣ್ಣ್ಚಿ.
ಪೆರಿಯ ಸಾಹಿತಿ, ಕರ್ನಾಟಕ ಕೊಡವ ಸಾಹಿತ್ಯ ಅಕಾಡಿಮಿರ ಮಾಜೀ ಕೊರವುಕಾರ ಬಾಚರಣಿಯಂಡ ಅಪ್ಪಣ್ಣ ಅವು ತಕ್ಕ್ ಪರ್ಂದಿತ್, ಕೊಡವಡ ನೇರ್ ನೆಲೆ ಬೇರ್ ಭೂಮಿ ಇದ್, ಇಲ್ಲಿಯತ ಪ್ರಕೃತಿರ ಕೂಡೇ ನಂಗ ಪುಟ್ಟಿಬೊಳ್ಂದವು ನಂಗ ಎಣ್ಣುವಾಂಗ್ ಬೋಂಡ್ಯ ದಾಕಲೆ ಉಂಡ್. ಆಚೇಂಗಿ ಚೆನ್ನಂಗ್ ಇತಿಹಾಸಕಾರ ನಂಗಡ ಇತಿಹಾಸತ್ನ ಅಯಿಂಗಡ ಮನಸ್ಕ್ ಬಂದನ್ನಕೆ ನಂಗಡ ಇತಿಹಾಸತ್ನ ಎಳ್ದ್ನದ್ ಸೆರಿಯಲ್ಲ. ಮೂಲ ಇತಿಹಾಸತ್ನ ಅರ್ಂಜಿತ್, ದಾಖಲ್ ಮಾಡುವ ಕಾರ್ಯಕ್ ಮೊಳಿಯಾಂಡೂಂದ್ ಎಣ್ಣ್ಚಿ.
ಆಯಿಮೆರ ಕೊರವುಕಾರಿಕೆ ವಹಿಸಿಯಂಡಿತಿಂಜ ಅಖಿಲ ಕೊಡವ ಸಮಾಜ ಕೊರವುಕಾರ, ದೇಶತಕ್ಕಂಗ ಪರದಂಡ ಸುಬ್ರಮಣಿ ಅವು ವೆಬ್ಸೈಟ್ರ ಕಲೆನೆಲೆ ಭೀರ್ಯ ಭಾಷೆನ ತೊಟ್ಟಿತ್ ತಕ್ಕ್ ಪರ್ಂದತ್.
ಒಕ್ಕಡ ಒಕ್ಕಟ್ಟ್ ತಕ್ಕಾಮೆರ ತಾಕತ್ತ್ ಎಣ್ಣುವ ಕೂತ್ರ ಕೂಡೆ ಬೊಳಿಕ್ ಬಂದಿತುಳ್ಳ ಅಖಿಲ ಕೊಡವ ಸಮಾಜ ವೆಬ್ ಸೈಟ್ಲ್, ನಮ್ಮೆ ನಾಳ್, ಆಯಿಮೆ ಕೊಯಿಮ್, ನಡ್ಪು ನಡೆ, ಪದ್ದತಿ ಪರಂಪರೆ, ಇತಿಹಾಸ, ಅನದ್ ಪೋನದ್, ತಿರಿಕೆ ದೇವನೆಲೆರ ಅರಿವು ಕೂಡ್ನಕೆ ಖನಪಟ್ಟ ಅರಿವು ತಿರುವ ಕೂಡಿತುಂಡ್.
ಅಖಿಲ ಕೊಡವ ಸಮಾಜ ಕಾರ್ಯಕಾರ ಕೀತಿಯಂಡ ವಿಜಯ ಕುಮಾರ್ ಅವು, ಕೂಡಿ ಬಂದ ಎಲ್ಲಾರ್ಕೂ ತಕ್ಕಾರ ಬಯಂದಂಡ್, ವೆಬ್ಸೈಟ್ರ ನೇರ್ ನಲ್ಲಾಮೆ ಅವಶ್ಯಪಟ್ಟ ಅರವಿ ಮಾಡ್ನಕ, ಕೂಡ್ಕಾರ್ಯಕಾರಿ ಮೂವೆರ ರೇಖಾಪ್ರಕಾಶ್ ಅವು ಬಯಂದ್ ಪರ್ಂದಿತ್, ತೌಂದಾರಿ ಮಾಳೇಟಿರ ಶ್ರೀನಿವಾಸ್ ಅವು ಕುಯ್ಯಳೆಕೂಟ್ಚಿ. ಆಯಿಮೆಲ್ ದೇಶ ತಕ್ಕಂಗ, ಅಖಿಲ ಕೊಡವ ಸಮಾಜ ಕೂಡ್ಕೂಟ್ಕಾರ ಅಜ್ಜಿಕುಟ್ಟಿರ ಸುಬ್ರಮಣಿ, ಲೆಕ್ಕಪಟ್ಟಿಕಾರ ಮಂಡೆಪಂಡ ಸುಗುಣಮುತ್ತಣ್ಣ, ಕೂಡ್ಕಾರ್ಯಾಕರ ನಂದೇಟಿರ ರಾಜಮಾದಪ್ಪ, ಬೋರೆ ಬೋರೆ ಕೊಡವ ಸಮಾಜ, ಸಂಘಟನೆಯಡ ಮೂಪಂಗ ಕೂಡಿಯಾಡಿತಿಂಜತ್