ನಾಡ್ಲ್ ನಾಳ್…18
ಕೈಂಜ ವಾರತಿಂಜ…
ನೀನ್ ಬಣ್ಣೆ ಪಣಿ ಕೈಯ್ಯಂಡ, ನಾನ್ ನೀಕ್ ದುಡ್ಡೂ, ಒರ್ ಬಲ್ಯ ಕೊಕ್ಕೆ ತಾತಿಯೂ ತಪ್ಪಿ”
ಕೀರಿ ಕ್ಣ್ಣಂಡ ಕಿರಿಲ್ ನೀರ್ ತುಳಿ ಕೆಟ್ಟಿತ್ ನಿಂದತ್.
“ನಾಡ ತಕ್ಕನ ನಂಬ್ರಾ… ನಾನ್ ತಪ್ಪ ಆ ಕೊಕ್ಕೆತಾತಿನ ಪೊಳ್ಚಕ ನೀಡಕ್ಕಂಗ್ ಬೋಂಡಿಯಾನ ಎಲ್ಲಾ ಮಾಲ್ಕ್ ಉಳ್ಳ ಪೌನ್ ಆತ್ಲೇ ಉಂಡ್. ಅದ್ ಪೆರ್ತ್ ಪಳೆಯ ಕಾಲತ್ರ ಕೊಕ್ಕೆತಾತಿ.”
“ನೀಡ ಅಮ್ಮಂಡದಾ…?”
“ಅಲ್ಲಪ್ಪ, ಅದೋರ್ ಬಲ್ಯ ಕತೆ. ಆ ಕೊಕ್ಕೆತಾತಿ ನಂಗಡ ಚೋಮಕ್ಕ ತಾಯಿರದ್.”
“ಉಯಿ ತಾಯಿ…” ನೆಟ್ಟಿತ್ ಪಾರ್ನ ಕೀರಿ ಕ್ಣ್ಣ, ಒರ್ ಗಳಿಗೆ ಎಲ್ಲಿಯೋ ನೋಟಿಯಂಡ್ ನಿಂದ್ ಪೋಚಿ. ಅಂವೊ ಮೆಲ್ಲೆ ಚಿಮ್ಮಂಡತ್ತಟಿ ತಿರಿತ್, “ಅಲ್ಲಾ ಚಿಮ್ಮಣಿಯಾ, ಕಾಲಕ್ ಬಯ್ಯ ಚತ್ತ್ ಪೋನ ಚೋಮಕ್ಕ ತಾಯಿರ ಕೊಕ್ಕೆತಾತಿ ಅದೆನ್ನನೆ ನೀಕ್ ಕ್ಟ್ಟ್ಚೀ?’ಂದ್ ಕೇಟತ್.
”ಅದೋರ್ ಬಲ್ಯ ಕತೇಂದ್ ಅಕ್ಕಲೇ ಎಣ್ಣಲ್ಲಾ ನಾನ್…!
ಹ್ಂ! ಅಂದ್ ಮೋರ್ಕುತ್ತಿರ ಒಳ್ಲ್ ತಾಯಿರ ಜಕ್ಕಿರ ಮಾಡ್ನ ಚೆಪ್ಪ್ ಪಣವೇ ಇಂಜಿತಿಕ್ಕು. ಆ ಮುದ್ಕಿ ಪೂತ್ ಬೆಚ್ಚದ್ ಈ ಆಸಾಮಿಕ್ ಎನ್ನನೆಯೋ ಕ್ಟ್ಟಿ ಪೋಯಿತಿಕ್ಕು. ಅಮ್ಮ ಡೇ…! ಅಂದ್ ಇಂವೊ ಮೋರ್ ಕುತ್ತಿ ಪೋರಿಯಂಡ್ ಓಡುವಕ ಓಣಿ ಉದ್ದಕ್ ಇವನ ದವುತಿಯಂಡ್ ಓಡ್ನಕಲೂ ಕ್ಟ್ಟ್ಲೆ. ಪೊಳೆಕರೆಕೆತ್ತನೆ ದಡಬಡಾ…ಂದ್ ದವುತಿಯಂಡ್ ಓಡಿಪೋಯಿತ್ ವಾಪಾಸ್ ಬಾತಲ್ಲಾ…. ನಂಗ ಮುಟ್ಟಾಳಂಗ. ಅಂದ್ ಇವಂಡ ಪಣಿ ಒರ್ಕಿರ್ತಿಂಜಕ ಇಂದ್ ನಾನೂ ಪಣಕಾರ ಆಯಿರಲುಯಿಂಜತ್. ಶಿವ್… ಶಿವಾ…”ಂದ್ ಕೈನ ಪುಡಿ ಮುರ್ಕಿಯಂಡತ್, ಕೀರಿ ಕ್ಣ್ಣ.
“ಎನ್ಂಗ್ರಾ ಕೀರಿ, ಒಮ್ಮಲೆ ಪಾಂಬು ಕಂಡ ಕೀರಿರನೆಕೆ ಕಳಿಪಿಯಾ?”
“ಅಲ್ಲಣ್ಣಯ್ಯಾ…. ನೀನ್ ದುಡ್ಡ್ ತಾತೇಂಗಿ ನಾಡ ಅಕ್ಕಯ್ಯನೂ ಬರ್ ವಡಿಯಂಡ ಕೈ ಪುಡ್ಚಿತ್ ಪೋಪದ್ ಎನ್ನನೆ ಇಕ್ಕೂಂದ್ ಸೊಪನ ಕಂಡಂಡಿಂಜ.”
“ನೀಕ್ ಆ ವಿಷಯತ್ ಪೋಡಿಯೇ ಬೋಂಡ. ನೀಡ ಅಕ್ಕಂಗ್ ಮಾಲ್ ಆಚೀಂದೇ ಗ್ಯಾನ ಮಾಡ್. ಎಲ್ಲಿಯಾಚೇಂಗಿ ಒರ್ ನಲ್ಲ ಕ್ಣ್ಣನ ಕಂಡಕ ನಾನೇ ತಂದ್ ಪರಂದ್ ನೋಟುವಿ.”
“ಅಲ್ಲ, ನಾನ್ ಕೇಟಾಂಗ್ ನೀನ್ ಒಂದೂ ಎಣ್ಣ್ಲೆಲ್ಲ ಅಣ್ಣಯ್ಯಾ. ಚೋಮಕ್ಕ ತಾಯಿರ ಪಣ ನೀಕ್ ಎನ್ನನೆ ಕ್ಟ್ಟ್ಚಿ. ಐನ್ ಮನೆನ ನೀನ್ ಎಕ್ಕಾಚೇಂಗಿ ಕಳ್ತಿಯಾ?”
“ಅಲ್ಲರಾ, ಕಳತತೇಂಗಿ ಕಟ್ಟುವಾಂದ್ ನೀಕ್ ದಾರ್ ಎಣ್ಣಿಯೆ?”
ಇಕ್ಕ ಮಾತ್ರ ಕೀರಿ ಕ್ಣ್ಣ ಬೆವ್ರಿ ಪೋಚಿ.
ಪಟ್ಟೆದಾರ ಸಂಶಯಪಟ್ಟ ಜಾಗತ್ನೆಲ್ಲ 1 ತಿಂಗತಿಂಜಿ ಕಳ್ತಿತ್ ಐನ್ಮನೆ ದುಂಬ ಪಾಳಾಯಿತಿಂಜಾನ ನೆನತಿಯಂಡತಂವೊ.
ಚಿಮ್ಮ ಇಕ್ಕ ಚೀರಿಯಂಡ್ ಅವಂಡ ಎದಿಕೆ ನಿಂದತ್. “ಎಣ್ಣ್…… ಐನ್ ಮನೆನ ಕಳತಕ ಚೋಮಕ್ಕ ತಾಯಿರ ಚೆಪ್ಪ್ ಕ್ಟ್ಟುವಾಂದ್ ನೀಕ್ ದಾರ್ ಎಣ್ಣಿಯೇ…?
ದಮ್ಮಯ್ಯ ಅಣ್ಣಯ್ಯಾ…. ಮಾತ್ರ ನೀನ್ ನನ್ನ ಪೊಜ್ಜಿರ್ತೆ. ನಾನ್ ಎಣ್ಣುವಿ, ಎಲ್ಲಾ ಎಣ್ಣುವಿ. ಆಚೇಂಗಿ ನೀನ್ ಮಾತ್ರ ಈ ವಿಷಯತ್ನ ದಾರ್ಕೂ ಎಣ್ಣಿರುವ ಕಾಗ. ಬೊರ್ತಂಡ್ ಎಣ್ಣ್ಚಿ, ಕೀರಿ.
“ಹ್ಂ ಬೆರಿಯ ಎಣ್ಣ್’ ರೇಗುವನೆಕೆ ಎಣ್ಣ್ಚಿ, ಚಿಮ್ಮ.
ಚೆನ್ನ ದಿನಕ್ ಬಯ್ಯ ಆ ಚೆಪ್ಪ್ ಪಣತ್ನ ತೇಡುವಕಾಯಿತ್ ಪಟ್ಟೆದಾರ ಚಿಟ್ಟಪ್ಪಯ್ಯ ಬೈಟಾಪಕ ನಾಡ ಕೈಲ್ ಐನ್ ಮನೆಲ್ ಚೋಮಕ್ಕ ತಾಯಿರ ಅಡಿಗೆ ಮನೆರ ಕಂಜಿಕಲ, ಒಲೆಕೆಟ್ಟ್, ಅರೆಪ ಕಲ್ಲ್ರ ಕಟ್ಟೆನೆಲ್ಲ ಕಳ್ಪ್ಚಿಟ್ಟತ್. ಅಲ್ಲಿ ಒಂದೂ ಕ್ಟ್ಟತಿಪ್ಪಕ ಸುತ್ತೋಡ್ ಸುತ್ತ ತೆತ್ತಿನೆಲ್ಲ ಕ್ಳಪ್ಚಿಟ್ಟತ್…” ಕೀರಿ ಮೊರೆ ಸ್ವರತ್ ಏಂಗ್ಚಿ.
“ನೀಡ ಚಿಟ್ಟಪಯ್ಯ ಪಿಂಞ ಎಂತೆಲ್ಲ ಕಿತಾಪತಿ ಮಾಡಿಯಂಡ್ ಉಂಡ್ರೇ…?”
“ನಾನ್ ಎಣ್ಣುಲೆ ಅಣ್ಣಯ್ಯಾ, ನಾಕ್ ಪೋಡಿ ಆಪ.”
“ನಾನ್ ಇಂಜ ಪಿಂಞ ನೀಕೆಂತರೇ ಪೋಡಿ. ಆ ಚಿಟ್ಟಪ್ಪಯ್ಯಂಡ ಸ್ವಂತ ವಿಷಯಕ್ ನಾನ್ ಮಂಡೆ ಇಡುಲೆ. ಆಚೇಂಗಿ ನಂಗಡ ಒಕ್ಕ ಮಕ್ಕಳ ಒಡ್ತ್ ಪಾಳ್ ಮಾಡುವನ್ನತ ಎನ್ನೇಂಗಿ ಪಣಿ ಕೆಜ್ಜಂಡಿಂಜಕ ನಾಕ್ ನೀನ್ ಎಣ್ಣಿತೇ ಎಣ್ಣಂಡು.”
“ಅಣ್ಣಯ್ಯಾ… ಆ ಚಿಟ್ಟಪ್ಪಯ್ಯ ಈ ಐನ್ಮನೆರ ಒಳ್ಬರಿಲ್ ಎಲ್ಲಾ ಪಡಿ ಕಿಡ್ಕೆರ ಪಾರ್ನ ಉತ್ತಿತ್ ಎಡ್ತಂಡಿತ್, ಬಾರಿಪಟ್ಟಿನ ಬಲ್ಚಂಡ್ ಪೋಪಕ್ಕೂ ಅವನೇ ಎಣ್ಣಿಯೆ.”
ಚಿಮ್ಮಂಡ ಮೇಲ್ ಉರ್ಂಜಂಡಿಂಜತ್,
“ಅಚ್ಚಿಕೇ ಅಲ್ಲ ಅಣ್ಣಯ್ಯಾ… ನಂಗಡ ಬನ್ಮನೆರ ಹಿತ್ತಲ್ ಮನೆದಳತ್ ಇಂಜ ಮರತ್ನೆಲ್ಲಾ ಅವನೇ ಕೆತ್ತಿತ್ ಖಾಲಿ ಮಾಡಿಯೆ.”
ನೇರ್, ಕುಂಡೋಣಿ ಇಳಂಜಿತ್ ಬೇಲ್ಕ್ ಎತ್ತಣೆಕ್ ಪೋಲ್ ಕೂಡ ತೂಡ್ ಎಡ್ತಂಡ್ ಪೋಪಚ್ಚಕ್ ಇರ್ಟ್ ಇಪ್ಪಯಿಂಜತ್ ಬಲ್ಯ ಬಲ್ಯ ಮರ ಒಂದಾಂಗೊಂದ್ ನೆಜ್ಜಿಯಂಡ್ ಐನ್ಮನೆರ ಸುತ್ತೋಡ್ ಸುತ್ತ್ ಒರ್ ತಂಪಾನ ಸ್ವರ್ಗ ಇಂಜತ್. ಆಚೇಂಗಿ ಇಕ್ಕ ಮಾಳ ಮಾಳ ಆಯಿತ್ ಒರ್ ತರ ಮೂಡ್ ಸೀಮೆರನೆಕೆ ಬೊಳಿ!”
ಆ ಮರತ್ನೆಲ್ಲ ಕೆತ್ತಿತ್ ಲೂಟಿ ಮಾಡಿಯೆ ಪಟ್ಟೆದಾರ ಚಿಟ್ಟಪ್ಪಂದ್ ಅರಿವದು ಚಿಮ್ಮಂಡ ಚೋರೆ ಕೊತ ಕೊತ ಕೊದ್ಚತ್.
“ಅಂವೊ ಈ ಮರತ್ನೆಲ್ಲಾ ಎಡ್ತಂಡ್ ಪೋಯಿತ್ ಎಂತ ಮಾಡುವರಾ?”
“ಅಣ್ಣಯ್ಯಾ…, ಚಿಟ್ಟಪ್ಪಯ್ಯಂಗ್ ಕೇರಳತ್ರ ಮರ ಕಳ್ಳಂಗಡ ಸಮ್ಮಂಧ ಉಂಡ್. ಚಾಂದ್ ಮರ, ಬೂಟಿ ಮರತ್ನೆಲ್ಲ ಊರ್ರ ದೇವಕಾಡ್ಂಜಿ ಕೆತ್ತಿತ್ ಕೇರಳಕ್ ಅಯಿಚಂಡುಂಡ್.”
ಓಹ್ ಇಗ್ಗುತಪ್ಪಾ…” ಎಣ್ಣಿತ್ ಒರ್ ಗಳಿಗೆ ಅಳ್ತ್ ಪೋಚಿ, ಚಿಮ್ಮ,
“ಅಣ್ಣಯ್ಯಾ…. ನಾಳೆ ಬೈಟಾಪಕ ಎಟ್ಟ್ ಗಂಟೆಕ್ ಕೇರಳತ್ರ ಒರ್ ಲಾರಿ ಮರ ದುಂಬ್ಚಿಟ್ಟಂಡ್ ಪೋಪಕ್ ಚಿಟ್ಟಪ್ಪಯ್ಯಂಡ ಮನೆಕ್ ಬಪ್ಪ. ಈ ಐನ್ಮನೆರ ಬೂಟಿರ ಬಾರಿನೆಲ್ಲಾ ನಾಳೆ ಲಾರಿಕ್ ಲೋಡ್ ಮಾಡುವ.”
“ನೋಟಪ್ಪ ಕೀರಿ, ಏರಿಯೇ ಎದ್ದಿತ್ ಬೇಲ್ನ ಮೇಂಜನೆಕೆ ನಂಗಡ ಪಟ್ಟೆದಾರ ಮಾಡಿಯಂಡುಂಡ್. ನಂಗೆಲ್ಲಾ ಎಂತಾಚೇಂಗಿ ಮಾಡಿತ್ ಈ ಅನ್ಯಾಯತ್ನ ತಡ್ಕಂಡು.”
“ಅಣ್ಣಯ್ಯಾ…. ನಂಗ ಒರ್ ಪ್ಲೇನ್ ಮಾಡನ. ನಾಳೆ ಬಪ್ಪಲ್ಲಾ… ಲಾರಿ ಅದ್ನ ತಡ್ತಿತ್ ಕಳ್ಳಂಗಕ್ ನಲ್ಲೋಣೆ ಬಾಟಿರುವಂಜಿ ಮರತ್ನ ಐನ್ ಮನೆಕೇ ಎಡ್ತ ಬಂದಿತ್ ಇಟ್ಟ್ರನ.”
“ವೆರಿ ಗುಡ್…., ನೀಡನೆಕೆ ಇಂಞೂ ನಾಲ್ ಬಾಲೆಕಾರ ಅನ್ಯಾಯತ್ರ ವಿರೋಧ ನಿಂದಕ ನಂಗಡ ಈ ಒಕ್ಕ ಇಡೀ ಕೊಡಗ್ಕೇ ಒರ್ ನಲ್ಲ ಒಕ್ಕ ಆಯಿತ್ ಕಾಂಬ್ಚಿಟ್ಟವ.”
“ಅಣ್ಣಯ್ಯಾ…. ನೀನ್ ನಾಳೆ ಸೆರೀ ಎಟ್ಟ್ ಗಂಟೆಕ್ ಚಿಟ್ಟಪ್ಪಯ್ಯಂಡ ಮನೆಂಜಿ ಬಲ್ಯ ರೋಡ್ಕ್ ಕೂಡುವಲ್ಲಾ, ಆ ಜಾಗತ್ರ ಚೆನ್ನ ಮಿಂಞಕ್ ಒರ್ ಲಕ್ಕೋಟೆ ಪಣ್ಣ್ ಮರ ಉಂಡ್ ನೋಟ್. ಅದ್ಂಡ ಪಕ್ಕ ನಿಂದಿತಿರ್. ನಾನ್ ನಾಡ ತಮ್ಮಣ ಪಿಂಞ ನಾಡ ಚೆರಿಯಪ್ಪಂಡ ಮಕ್ಕ ವಾಸು ಪಿಂಞ ಅರುಣನ ಕೂಟಿಯಂಡ್ ಬಪ್ಪಿ. ನಂಗ ಲಾರಿನ ತಡ್ಕ .”
ಚಿಮ್ಮಂಗ್ ಕೀರಿರ ಪ್ಲೇನ್ ಪೆರ್ತ್ ಕುಸಿಯಾಚಿ.
”ಅಕ್ಕುರೇ, ಇಂಞ ಮಿಂಞಕ್ ಕೇರಳತ್ರ ಲಾರಿ ಇನ್ನತ ಕೆಟ್ಟ ಪಣಿಕೆಲ್ಲ ಕೊಡಗ್ಕ್ ಬಪ್ಪಕಾಗ.”
“ಅಣ್ಣಯ್ಯಾ…, ನಾನ್ ಇಂದ್ ಅತ್ತಟಿ ನಾಡ ಮನೆಕ್ ಪೋಪಾನ ಕಂಡಕ ಚಿಟ್ಟಪ್ಪಯ್ಯ ಅವಂಡ ಕಳ್ಳ ವ್ಯವಹಾರಕ್ ಕಾಕುವ, ಇಂದ್ ನಾನ್ ನಿಂಗಡ ಮನೆಕ್ ಬರಡಾ?'”
“ಮನೆಕಾರಡ ಮನೆಕ್ ಬಪ್ಪಕ್ ದಾರಾಚೇಂಗಿ ಬರಡಾಂದ್ ಕೇಪರಾ? ಬಾ… ಆಚೇಂಗಿ ಈ ಪಟ್ಟಿ ಕಂಡಿರ ಎರತೆ ಪಣಿ ತೀತ್ರುವಂಜಿ ಪೋಕ.”
“ಆಚಣ್ಣಯ್ಯಾ…” ಎಣ್ಣ್ನ ಕೀರಿ ಬೆರಿ ಬೆರಿಯ ಪಣಿ ತೀತ್ರುವಂಜಿ -“ಅಣ್ಣಯ್ಯಾ, ನಾನ್ ಒಮ್ಮ ಅಂಗಡಿಕ್ ಪೋಯಿತ್ ಒರ್ ಕೆಟ್ಟ್ ಬೀಡಿ ಎಡ್ತಂಡ್ ಬಂದ್ರುವಿ. ನೀನ್ ಇಲ್ಲಿಯೇ ಇಪ್ಪಿಯಾ, ಅಲ್ಲಾ ಮನೆಕ್ ಪೋಯಿತಿಪ್ಪಿಯಾ?” ಕೇಟತ್.
“ಇಲ್ಲಿಯೇ ಇಪ್ಪಿ. ಬೆರಿಯ ಬಾ” ಎಣ್ಣಿತ್ ಕೀರಿನ ಅಯೆಚಿರುವಂಜಿ ಒರ್ ದಾಳಿಂಬೆನ ಕೊಜ್ಜಿತ್ ತಿಂಬಕ್ ಪೊರ್ಟ ಚಿಮ್ಮಂಗ್ ಮಕ್ಕಳ ಗ್ಯಾನಾಚಿ. ಅವಂಡ ಕಣ್ಣ್ಲ್ ನೀರ್ ದುಂಬ್ಚಿ. ದಾಳಿಂಬೆನ ಅನ್ನನೆ ಜೋಬ್ಲ್ ಇಟ್ಟಂಡ್ ಕೀರಿನ ಕಾತಂಡ್ ಅಳ್ತತ್.
ಕೀರಿ ಕ್ಣ್ಣ ಎದ್ದ್… ಬುದ್ದ್… ಪಟ್ಟೆದಾರಂಡ ಮನೆಕ್ ಪೋಯಿತ್ ತಾಂಡ ಪಿಂಞ ಚಿಮ್ಮಂಡ ತಕ್ಕ್ ಬಾಕ್ನೆಲ್ಲ ಪಟ್ಟೆದಾರಂಗ್ ಎಣ್ಣಿ ಕೊಡ್ತತ್.
ಪಟ್ಟೆದಾರ ತಾಂಡ ಬಲ್ಯ ಪೊಟ್ಟೆನ ಕುಸಿಲ್ ಕುಲ್ಕಿತ್ ತೆಳ್ಚಿರುವಂಜಿ ಕೀರಿಕ್ ದಂಡ್ ಜವಾಬ್ದಾರಿ ಕೊಡ್ತತ್.
ಒಂದ್; “ಬೈಟ್ ಚಿಮ್ಮಂಡ ಮನೆಲ್ ಒಳಿವಕ ಮೋರ್ಕುತ್ತಿರ ವಿವರ ಆರ್ಂಜಿತ್ ಎನ್ನನಾಚೇಂಗಿ ಅದ್ನ ಪಿಸ್ಕಿಯಂಡ್ ಬರಂಡು, ನಾಳೆ ಬೈಟಾಪಕ 8. ಗಂಟೆ ನೇರಕ್ ಸೆರಿಯಾಯಿತ್ ಚಿಮ್ಮನ ಉಪಾಯಮಾಡಿತ್ ಲಾರಿನ ತಡ್ಪಕ್ ಕೂಟಿಯಂಡ್ ಬರಂಡು.
“ಆಚಯ್ಯಾ’ಂದ್ ಎಣ್ಣ್ನ ಕೀರಿರ ಕೈಕ್ ನೂರಾಂಡ ನೋಟ್ ಕೊಡ್ತಿತ್ “ನೀನ್ ಉಸಾರ್ಲ್ ಬಂದಾಂಗ್” ಂದ್ ಎಣ್ಣ್ಚಿ, ಪಟ್ಟೆದಾರ.
ಕೀರಿ ಕೋಳಿ ಪುಡಿಪಕ್ ಪೊರ್ಟ ಕಾಡ್ ಕೀರಿರನೆಕೆ ಮೆಲ್ಲೆ ಚಿಮ್ಮಂಡ ಮನೆಕ್ ಪೊರ್ಟತ್.
ಐನ್ಮನೆಲ್ ಕೀರಿನ ಕಾತ್ ಕಾತ್ ಚೋತ್ ಪೋನ ಚಿಮ್ಮ, ಮೆಲ್ಲೆ ಮನೆಕ್ ಪೊರ್ಟತ್. ಚಿಮ್ಮ ಮನೆಕ್ ಎತ್ತುವಕ ಕೀರಿ ತಂಗವ್ವಂಡ ಗೋಸ್ ಮುಟ್ಟೆ ಪಲ್ಯ ಪಿಂಞ ಒಟ್ಟಿನ ಕೆಪ್ಪರ ಕೇತಿರುವಂಜಿ ಅದ್ದ್… ಇದ್ಂದ್ ಲೊಟ್ಟೆ ಬುಟ್ಟಂಡ್ ಅಳ್ತಿತಿಂಜತ್.
“ನೀ ಯಾಲೆರ ಬಂದ್ಟಿಯಾ. ನಾನ್ ನಿನ್ನ ಇಚ್ಚಕ್ ನೇರ ಅಲ್ಲಿ ಕಾತಿಯೆ” ಎಣ್ಣಿಯಂಡೇ ಒಳ್ಕ್ ನುಗ್ಗ್ಚಿ, ಚಿಮ್ಮ.
“ಅಣ್ಣಯ್ಯ…. ನಾನ್ ಅಂಗ್ಡಿಲ್ ಬೀಡಿ ಎಡ್ತಂಡ್ ತಿರುವಕ; ಅದಾ ಅಚ್ಚಿಕೇ ದೂರತ್ ಚಿಟ್ಟಪಯ್ಯ, ನನ್ನ ತೇಡಿಯಂಡೇ ಕಾಂಬಾ ಐನ್ ಮನೆರತ್ತಟಿ ಬಪ್ಪದ್ ಕಂಡ. ನಾನ್ ಪಾರಿತ್ ಅಚ್ಚಪ್ಪಯ್ಯಂಡ ಕರೆಕಾಡ್ ನುಗ್ಗ್ನಂವೊ ಇಲ್ಲಿಯೇ ಮಂಡೆ ಎಡ್ತಿಯೇ. ಹ್ಹಿ….ಹ್ಹೀ..!”
“ನಲ್ಲದ್ ಮಾಡಿಯಾ” ಂದ್ ಕೀರಿನ ಹೊಗಳ್ನ ಚಿಮ್ಮ, ಕ್ಣ್ಣಂಡ ಮನ್ಸ್ಸ್ನ ಚೆನ್ನಂಗೂ ನೊಂಬಲ ಮಾಡುವಕಾಗ ಪಾಪ ಬಡತನತ್ ಬೆಂಜಿತ್ ಬದ್ಕಿಯಂಡುಂಡ್ಂದ್ ಗ್ಯಾನ ಮಾಡಿತ್, ಬೈಟೆಕೂ ಕೀರಿನ ನಲ್ಲ ಚಾಯಿಲ್ ಉಪಚಾರ ಮಾಡ್ಚಿ.
ಬಾಕಿ ಮಿಂಞಕ್….
