ಬೆಂಗಳೂರ್, ನ.15: ಕರ್ನಾಟಕ ರಾಜ್ಯ ಕ್ರಿಕೆಟ್ರ, 15 ಬಯತ್ರೊಳಿಯತ ಕೂಟಕ್ ಮೂಲತ್ ಸೂರ್ಲಬ್ಬಿಕಾರಳಾನ, ಬೆಂಗಳೂರ್ಲ್ ಓದಿಯಂಡುಳ್ಳ ಓಡಿಯಂಡ ರೋಹಿಣಿ ದೇಚಮ್ಮ ಆಯ್ಕೆ ಆಯಿತ್.
ನವೆಂಬರ್ 21ಲಿಂಜ 29ಕೆತ್ತನೆ ಉತ್ತರಖಂಡ್ಲ್ ನಡ್ಪ, ಅಂತರರಾಜ್ಯ ಕ್ರಿಕೇಟ್ ಕಳಿಕೂಟತ್ ಕಳಿಪ, ಕರ್ನಾಟಕತ ಪರ 15 ಕಳಿಕಾರಿಯಡ ಕೂಟ್ಲ್ ಓಡಿಯಂಡ ರೋಹಿಣಿದೇಚಮ್ಮ ಕೂಡಿಯಾಡುವ. ಈ ಪೈಪೋಟಿಲ್ ಗೆದ್ದಕ, ಮಿಂಞಕ್ ಇದೇ ಕೂಟ್ಕಾರ ಜೈಪುರತ್ ನಡ್ಪ ಕ್ರಿಕೇಟ್ ಕಳಿಕೂಟತ್ ಕೂಡಿಯಾಡುವದುಂಡ್.
ಕರ್ನಾಟಕ ಇನ್ಸ್ಟಿಟ್ಯೂಟ್ ಆಫ್ ಕ್ರಿಕೆಟ್(KIOC)ಲ್ ತರಬೇತಿ ಪಡ್ಂದಂಡುಳ್ಳ, 13 ಬಯತ್ರ ಈ ಮೂಡಿ ಕುಂಞಿ, ಬೆಂಗಳೂರ್ರ ಜವಾನ್ಸ್ ಕ್ಲಬ್ರ ಪರ ಕಳ್ಚಂಡುಂಡ್. 2023ಲ್ ನಡ್ಂದ ಬೆಂಗಳುರ್ ಕೊಡವ ಸಮಾಜ ಅಂತರ ಸಂಘ ಕ್ರಿಕೇಟ್ ಪೈಪೋಟಿಲ್ ನಲ್ಲ ಬವುಸ್ರ ಕಳಿಕಾರಿ ಎಣ್ಣುವ ಬಿರ್ದ್, 2024ಲ್ ಇದೇ ಕಳಿ ಕೂಟತ್, ಇಡೀ ಕಳಿಕೂಟತ ಪೊಮ್ಮಕ್ಕಡ ಪರ, ನಲ್ಲ ಕಳಿಕಾರಿ ಎಣ್ಣುವ ಬಿರ್ದ್ ಪಡ್ಂದಂಡಿತ್. ಅಲ್ಲತೆ 2023ಲ್ ನಡ್ಂದ ಕೊಡವ ಒಕ್ಕಡೊಕ್ಕಡ ನಡುರ ಅರಮಣಮಾಡ ಕ್ರಿಕೇಟ್ ಕಳಿನಮ್ಮೆಲ್ ಇಡೀ ಕಳಿಕೂಟತ ಪೊಮ್ಮಕ್ಕಡ ಪರ, ಬವುಸ್ರ ಕಳಿಕಾರಿ ಎಣ್ಣುವ ಬಿರ್ದ್ನೋ ಪಡ್ಂದಂಡಿತ್.
ಸೂರ್ಲಬ್ಬಿಕಾರಳಾನ, ರಾಜ್ಯ ಮಟ್ಟತ ಕಬಡ್ಡಿ ಕಳಿಕಾರ, ನಲ್ಲೋರ್ ಕ್ರಿಕೇಟ್ ಕಳಿಕಾರನೂ ಆನ, ಓಡಿಯಂಡ ಸತಿಯೋಗೇಶ್ ಪಿಂಞ ಸರಿತ (ತಾಮನೆ: ಅಡ್ಡಂಡ (ಸೂರ್ಲಬ್ಬಿ)) ದಂಪತಿಯಡ ಮೋವಳಾನ ರೋಹಿಣಿ ದೇಚಮ್ಮ, ಬೆಂಗಳೂರ್ ಇಂದಿರಾ ನಗರತುಳ್ಳ ಪ್ರಿಸ್ಟಿನ್ ಪಬ್ಲಿಕ್ ಸ್ಕೂಲ್ಲ್ 8 ಕ್ಲಾಸ್ಲ್ ಓದಿಯಂಡುಂಡ್. ಇವಡ ತಮ್ಮ, ಇದೇ ಸ್ಕೂಲ್ಲ್ 6ನೇ ಕ್ಲಾಸ್ಲ್ ಓದಿಯಂಡುಳ್ಳ, ರೋಹನ್ ದೇವಯ್ಯನೂ KIOCಲ್ ತರಭೇತಿ ಪಡ್ಂದಂಡುಂಡ್.