ಕುಂಜೇರಿ, ಡಿ.15: (ಮಂಞಿರ ಕುಟ್ಟಪ್ಪ) ಕುಂದ್ಕಿಂಜ ಬಲ್ಯ ಕುಂದುಂಡ್, ನಡೆಕಿಂಜ ಬಲ್ಯ ನಡ್ಪುಂಡ್ ಉಣ್ಣುವದ್ ಪಳಂಜೊಲ್ಲ್ ಅನನ್ನೇ ಆದಿ ಮೂಲ ಬುಡಕೆಟ್ಟ್ ಸಂಸ್ಕೃತಿರ ಆರಾಧಕಂಗಾಳಾನ ಕೊಡವಕೂ ತಂಗಡದೇ ಆನ ಆಯಿಮೆ ಕೊಯಿಮೆ ಉಂಡ್. ಅದತೂ ಆಯಾಯ ಊರ್ ನಾಡ್ಲ್ ನಡ್ಪ ಪದ್ದತಿ ಪರಂಪರೆ ಒಂದಾಂಗೊಂದ್ ಮೀತದ್. ಬೇರಗೊಂಡ್ ಅರಿವನ್ನತದ್. ಅಂತಾ ನಡೆನುಡಿ ಉಳ್ಳ ಕೊಯಿಮೆಲ್ ಕಡಿಯತನಾಡ್, ಕುಂಜಿಲಗೇರಿ ಊರ್ರ ಶ್ರೀ ಆದಿ ಬೊಟ್ಲಪ್ಪ ದ್ಯಾವಡ ನಮ್ಮೆ ಕೋಪು ಏರ ವಿಶೇಷ ಪಟ್ಟದಾಯಿತುಂಡ್.
ಪಂಡ್ ರಾಮಾಯಣ ಕಾಲತ್ ನಡ್ಂದ ಪಡೆಲ್, ಲಕ್ಷ್ಮಣ ಪೊಯ್ತಾಯಿತ್ ಸೊಯ ತಪ್ಪುನಲ್ಲಿ, ಅಂವೊ ಹುಷಾರಕೋಂಡುವೇಂಗಿ ಸಂಜೀವಿನಿ ಮದ್ದ್ ಬೋಂಡೂಂದು ಅಂದೇತ ಬೈಸ್ಯ(ವೈದ್ಯ) ಎಣ್ಣುವಕ ಮದ್ದ್ ಮರ ತೇಡ್ಯಂಡ್ ಪೋನ ಹನುಮಂತ ಗ್ಡ ಕಿಟ್ಟತೆ, ಇಡೀ ಕುಂದ್ನೇ ಅಳ್ಕಿತ್ ನೇತಿಯಂಡ್ ಬಪ್ಪ. ಅನನ್ನೆ ನೇತ್ಯಂಡ್ ಬಪ್ಪಕ ಇರ್ಲ್ ಕೈಂಜಿತ್ ಬೊಪ್ಪಾಪ ನ್ಯಾರತ್ ಕೂಳಿ ಕೂವ. ಕೋಳಿ ಕೂವಾನ ಕೇಟ ಹನುಮಂತ ಕುಂದ್ನ ಅಲ್ಲಿಯೇ ಇಳ್ಪಿತ್ ಬೆಪ್ಪ. ಅನ್ನನೆ ಇಳ್ಪಿತ್ ಬೆಚ್ಚ ಕುಂದೇ, ನಂಗ ಇಕ್ಕ ಎಣ್ಣುವಕ್ ಪೊರ್ಟ ಕುಂಜಿಲಗೇರಿರ ಏಕಶಿಲಾ ಬೆಟ್ಟ.
ಕುಂದ್ಲ್ ಪಂಡ್ ಸಾಕ್ಷಾತ್ ಮಾದೇವನೇ ಪ್ರತ್ಯಕ್ಷ ಆಪಂಜಿ ಕೊಡವಕ್ ನಲ್ಲರಿವು ಕೊಡ್ತಿತ್ಂದ್ ಜಾನಪದ ಕಥೆ ಎಣ್ಣುವ. ಇದಂಡ ಸಾಕ್ಷಿ ಆಯಿತ್ ಇಲ್ಲಿ, ಮಾದೇವ ಬೊಟ್ಲಪ್ಪನಾಯಿತ್ ನೆಲೆ ನಿಂದಿತ್. ಕೂಡೆ ಮಾತಾಯಿ ಪಾರ್ವತಿ ಪಿಂಞ ಆಂಜನೇಯ ದ್ಯಾವಳೂ ಸ್ಥಾನನೆಲೆಕೊಂಡಿತ್. ಕುಂದ್ರ ಕೊಡೀಲ್ ಏದೇ ಆದುನಿಕ ಸೌಕರ್ಯ ಇಲ್ಲತೆ, ಮೂಲ ಪ್ರಕೃತಿರ ಬೋಜಕೊತ್ತನ್ನಕೆ ಉಳ್ಳ ಈ ಸ್ಥಾನ ನೆಲೆರ ಅಡಿಲ್ ಬೊಟ್ಲಪ್ಪಂಡ ದೇವಸ್ತಾನ ಮಾಡಿತ್. ಕಾಲೋದಿ ಬಿರ್ಚಾರ್ ಆಖೀರಿಕ್ ಕಾಲತ ನಮ್ಮೆ ನಡ್ಪ ಈ ತಿರಿಕೆಲ್, ಆಂಗಿಂಜ ಓರ್ ತಿಂಗ ನಾಳ್ ಮಿಂಞ ಕುಂದ್ ಕೊಡಿಲುಳ್ಳ ಆದಿ ನೆಲೆಲ್ ನಿತ್ಯ ಪೂಜೆ ಶುರುವಾಪ. ಆದಿ ನೆಲೆಲ್ ಕಾಲಕ್ ಓರ್ ತಿಂಗ ಮಾತ್ರ ನಿತ್ಯ ಪೂಜೆ ಆನಕ, ಕ್ದಲ್ ಉಳ್ಳ ತಿರಿಕೆಲ್ ಕಾಲ ಇಡೀ ನಿತ್ಯ ಪೂಜೆ ನಡ್ಪ.
ಬಿರ್ಚಾರ್ ಆಖೀರಿ ಎಣ್ಣಕ ಡಿಸೆಂಬರ್ 15ನೇ ನಾಳಂಕೆರಂದ್ ಬಲ್ಯ ನಮ್ಮೆ, ಈ ನಮ್ಮೆಕ್ ಪೊಣ್ಣಾಳ್ ಆದ್ಯ ಪೂಜೆಕ್ ಪೋಪದ್ ಓರ್ ವಿಶೇಷ. ಕುಯ್ಯ ಕೊಡ್ಪವು ನಮ್ಮೆಕ್ ಓರ ತಿಂಗ ಮಿಂಞಂಜೇ ಶುದ್ದ ಮುದ್ರಿಕೆಲ್ ಇಂಜಿತ್, ನಮ್ಮೆರಂದ್ ಪೊಲಾಕ, ಕಾಕೆ ಪಕ್ಷಿ ಏವಾಂಗಿಂಜ ಮಿಂಞ (ಬ್ರಾಹ್ಮೀ ಮೂರ್ತ) ಪೊಮ್ಮಕ್ಕ ಕುಳ್ಚಿತ್ ಬೊಳ್ತ ಪೊಡಿಯ ಉಡ್ತಿತ್, ಓರ್ ಪಚ್ಚತ್ ಅಕ್ಕಿ, ಬೆಲ್ಲ, ತೆಂಗೆ, ಬಾಳೆ ಪಣ್ಣ್ ಎಡ್ತಂಡ್, ಮಂಡೆಲ್ ಬೆಚ್ಚಂಡ್ ಕಾಲ್ಬಟ್ಟೆಲ್ ನಡ್ಂದಂಡ್ , ಕುಂದ್ ಪತ್ತಿತ್ ಪೋಪ, ಜೊತೆಲ್ ಸಾಯಕ್ ಆಮಕ್ಕಳೂ ಪೋಪ. ಕೊಡಿಕ್ ಪತ್ತಿತ್ ತಂಗಳೇ ಒಲೆ ಇಟ್ಟಿತ್, ಪಾಯಸ, ಕಾಫಿ ಮಾಡಿತ್, ಬಾಳೆ ಪಿಂಞ ಅಕ್ಕಿ ಪೊಡಿನ ಕಲ್ಂದಿತ್, ಓಡ್ ಪುಟ್ಟ್ ಮಾಡಿತ್, ಕೂಳ್, ಪಾರ ಕೂಟಿತ್, ತೆಂಗೆಕ್ ಮಂಜ ಮೆತ್ತಿತ್ ಅದತ್ ತಿರಿ ಕತ್ತ್ಚಿಟ್ಟಿತ್ ಬೊಟ್ಲಪ್ಪಂಗ್ ನೈವೇದ್ಯ ಮಾಡುವ. ಇದನೇ ಕುಯ್ಯ ಕೊಡ್ಪ ಎಣ್ಣುವ. ಕೂತಂಡ ಇಲ್ಲೇಂಗಿ ಮುಂಡಂಡ ಒಕ್ಕಡ ತಕ್ಕಾಮೆಲ್ ನಡ್ಪ ಈ ಕುಯ್ಯ ಕೊಯಿಮೆಲ್ ಊರ್ ಕೇರಿಕ್ ಅಡ್ಂಗ್ನ, ಅಲ್ಲಪ್ಪಿರ, ಕೂತಂಡ, ಚೊಟ್ಟೆರ, ಚೀಯಾಂಡಿರ, ಕುಳಿಯಕಂಡ, ವಲ್ಲಂಡ ಒಕ್ಕಕಾರ ತೆರಿಗೆ ಕುಯ್ಯ ಕೊಡ್ತಕ, ತಾಮನೆ ಮೂಡಿಯ ಭಕ್ತಿ ಕುಯ್ಯ, ಬೋರೆ ಪೊಮ್ಮಕ್ಕ ಪರಕೆ ಕುಯ್ಯ ಕೊಡ್ಪ.
ಇದಾನದು ಅಂದ್ ಪೊಲಾಕ ಸುಮಾರ್ 08 ಗಂಟೆ ನ್ಯಾರಕ್ ದ್ಯಾವಡ ತಡ್ಂಬು ಪೊರ್ಮೆಬಪ್ಪ. ಸುಮಾರ್ ಮಜ್ಜಣ 12 ಘಂಟೆ ನ್ಯಾರಕ್, ಊರ್ಕಾರ ಕೊಟ್ಟ್ಮೊಟ್ಟಾಯಿತ್, ಬಟ್ಟೆಪಾಟಾಯಿತ್, ಕೂತಂಡ, ಬಟ್ಟಕಾಳಂಡ, ಮುಂಡಂಡ ಒಕ್ಕಕಾರಡ ಎತ್ತ್ ಪೋರಾಟಾಯಿತ್ ಕುಂದ್ ಪತ್ತಿ ಬಂದಿತ್, ದೇವ ತಡ್ಂಬು ಎಡ್ತಂಡ್ ಆಡಿತಾನದು, ಕೂಡ್ನ ಭಕ್ತಂಗಕ್ ಪ್ರಸಾದ ಪಲಾರ ಬಳಂಬಿತ್, ಪಟ್ಟಂಬರಿಕೆ ಬೇಂಗಿತ್ ಕಾಲತ ನಮ್ಮೆನ ಕೈಚವ.
ಪಂಡ್ 200 ಒಕ್ಕ ಇಂಜ ಕುಂಜೇರಿ(ಕುಂಜಿಲಗೇರಿ) ಊರ್ಲ್ ಇಕ್ಕ, ಕೂತಂಡ, ಮುಂಡಂಡ, ಅಲ್ಲಪ್ಪಿರ, ಚೊಟ್ಟೆರ, ಚೀಯಾಂಡಿರ, ಕುಳಿಯಕಂಡ, ವಲ್ಲಂಡ, ಬಟ್ಟಕಾಳಂಡ, ಮುಕ್ಕಾಟಿರ, ಪೊಂಜಂಡ, ಚರ್ಮಂಡ ಇಗ್ಗುಡ, ಪಟ್ಟಚಾರಿರ, ನೀಲುಮಾಡ್, ಮನೆತನಕ್ ಕೂಡ್ನವು ನಮ್ಮೆ ನಡ್ತುವ.
ಇತಿಹಾಸ ಕೇಳಿರ ಪಿಂಞ ಪುರಾಣ ಕಥೆರ ಹಿನ್ನಲೆ ಉಳ್ಳ ಈ ಕುಂಜಿಲಗೇರಿ ಬೊಟ್ಲಪ್ಪಂಡ ಕುಯ್ಯನಮ್ಮೆ ಇಂದೆಕೂ ತಾಂಡ ಬೀರ್ಯತ್ನ ಕಾತ್ ಬೆಚ್ಚಂಡ್, ಮೂಲ ಕಲೆ ನೆಲೆನ ನಡ್ತಿಯಂಡುಳ್ಳದ್ ಕಾಲ ಮುಂದಾರಕೂ ಊರ್ ನಾಡ್, ದೇಶಕ್ ಬಟ್ಟೆಬೊಳಿಯಾಕಡ್.