ವಿರಾಜಪೇಟೆ, ಏ.22: (ಅರಿವು, ಚೇಂದಂಡ ಶಮ್ಮಿಮಾದಯ್ಯ) ಎಡೆನಾಲ್ ನಾಡ್ಕ್ ಅಡ್ಂಗ್ನ ಬೊಳ್ಳಾನೆ ಬೊಳಿಯೂರ್ಂದ್ ಕೇಳಿ ಪೋನ, ಚೆಂಬೆಬೊಳಿಯೂರ್ರ ಪದ್ರಾಳಮ್ಮೆ ತಾಯಿರ ಬೋಡ್ ನಮ್ಮೆ ನಾಳೆ 23 ತೊಟ್ಟ್ 25ಕೆತ್ತನೆ ನಡ್ಪ.
ಕಾಲೋದಿರನ್ನಕೆ ಈಯಾಂಡೂ ಬಿಶುರಂದ್ ಕಟ್ಟ್ ಬುದ್ದಿತುಳ್ಳ ಪದ್ರಾಳಮ್ಮೆಂದೇ ಕೇಳಿ ಪೋಯಿತುಳ್ಳ ಭದ್ರಕಾಳಿರ ನಮ್ಮೆನ ಬೊಳಿಯೂರ್ಕಾರ ಪೀಲಿಯಾಟ್ರ ಲೆಕ್ಕತ್, ಇಂದ್ ಪಟ್ಟಣಿ ಕೈಂಜಿತ್, ಬೈಟಾಪಕ ಪಟ್ಟಣಿ ಮಾತಿತ್ ಆನದು, ಬೈಟ್ ಪಣಿಕಂಗ ಪದ್ರಾಳಮ್ಮೆರ ತೆರೆ ಕಟ್ಟಿತ್, ತಿರಿಕೆಲ್ ಮಾಲವಂಡ ಚೋರೆ ಬೋಕಿತ್, ಅಲ್ಲಿಂಜ ಬಲಿಬೇಂಗುವ. ನಾಳೆ(23/4/25) ಮಜ್ಜಣತ್ರ ಮೀದ, ಬೊಳಿಯೂರ್ಕ್ ಅಡಂಗ್ನ ಮೂಂದ್ ಕೇರಿಂಜ (ನಡಿಕೇರಿ, ಪೊದಕೇರಿ, ಪೊದಕೋಟೆ) ಮೂಂದ್ ಕುದ್ರೆ ಪೊರ್ಟಿತ್, ಬಾಳೋಪಾಟಾಯಿತ್, ಅಂಬಲತ್ ಕೂಡಿತ್, ಅಲ್ಲಿಂಜ ದೇವಳಕ್ ಪೋಯಿತ್ ಮೂಂದ್ ಸುತ್ತ್ ಆಡಿತ್ ಕುದ್ರೆ ಉತ್ತುವ. ಅದಾನದು ಬೋಡ್ ಕಳಿ ಮೊಳಿಯಾಪ. ಕಳಿ ಪೊರ್ಟವು ಆದ್ಯ ಕಲ್ಲ್ತಿರಿಕೆ ಈಶ್ವರ ದೇವಸ್ತಾನಕ್ ಪತ್ತಿತ್, ಅಲ್ಲಿಂಜ ಬೈಟ್ಡಿಯ ಊರ್ರ ಎಲ್ಲಾ ಮನೆಮನೆಕೂ ಪೋಪ. ಮತ್ಯಾಂದ್ ಮಜ್ಜಣಕೆತ್ತನೆಯೂ ನಡ್ಪ ಬೋಡ್ಕಳಿಲ್ ಆದ್ಯ ದೋಳ್ ಪಾಟ್ಕಾರ (ತಾಲಿ ಪಾಟ್) ಎಲ್ಲಾ ಮನೆಕೂ ಪತ್ತ್ನ ಪಿಂಞ ಮಾತ್ರ ಕಳಿ ಪತ್ತಿತ್, ಊರ್ರ ಎಲ್ಲಾ ಮನೆ ತೀಂದಿತ್, ದೋಳ್ಕಾರ ಬಂದಪಿಂಞ ಎಲ್ಲರೂ ಅಂಬಲತ್ ಕೂಡಿತ್, ಅಲ್ಲಿಂಜ ಪದ್ರಾಳಮ್ಮೆರ ನಡೆಲ್ ಕಳಿಮರಿಯುವ.
25/4/25ನೇ ಬೊಳ್ಯಾಚೆ, ಮಜ್ಜಣತ ಮೀದ, ಮೂಂದ್ ಕೇರಿಂಜ ಮೂಂದ್ ಚೂಳೆ ಕಟ್ಟಿತ್, ಕೊಟ್ಟ್ ಪಾಟಾಯಿತ್ ಅಂಬಲಕ್ ಬಂದಿತ್ ಪದ್ರಾಳಮ್ಮೆ ತಿರಿಕೆಲ್ ಮೂಂದ್ ಸುತ್ತ್ ಆಡಿತ್ ಪಿರಿಯುವ. ಅಲ್ಲಿಂಜ ತೆಂಗೆಪೋರ್ ಇಪ್ಪ. 26/4/25ಕ್ ಕಳಮಡ್ಕೋ ಪಿಂಞ ಆಕೀರಿ ಪೀಲಿಯಾಟ್, ಪ್ರಸಾದಬಳಂಬಿತಾನದು ಈ ಕಾಲತ ನಮ್ಮ ಆಕೀರಾಪ.
