ವಿರಜಪೇಟೆ, ಡಿ.26: ಕೊಡವ ಕೂಡ್ನನಕೆ, ಕೊಡಗ್ರ ಮಕ್ಕಕ್ ಅನುಕೂಲ ಅಪನ್ನಕೆ ಕೊಡವುಲ್ ಆರೋಡತ ಕೂಡೆ ಹಾಕಿ ತಾಲೀಮ್( ವಸತಿ ಶಿಕ್ಷಣ ಸಹಿತ ಹಾಕಿ ತರಭೇತಿ ಕೇಂದ್ರ) ಶುರಮಡುವ ಇರಾದೆ ಕೊಡವ ಹಾಕಿ ಅಕಾಡೆಮಿಕ್ ಉಂಡ್, ಈ ನ್ಟ್ಟ್ಲ್ ನಂಗ ಜಾಗ ಗುರ್ತ್ ಮಾಡಿತ್ ದಾಖಲ್ ಮಾಡುವ ಕಾರ್ಬಾರ್ ಮಾಡ್ಯಂಡೂಂದ್ ಕೊಡವ ಹಾಕಿ ಅಕಾಡೆಮಿ ಕೊರವುಕಾರ ಪಾಂಡಂಡ ಮೇದಪ್ಪ ಅವು ಇರಾದೆಪರ್ಂದತ್.
ಇಂದ್ ವಿರಾಜಪೇಟೆರ ಕೊಡವ ಸಮಾಜ ರಿಕ್ರಿಯೇಷನ್ ಕ್ಲಬ್ ಬಾಡೆಲ್ ನಡ್ಂದ ಹಾಕಿ ಅಕಾಡೆಮಿರ ಮಾಸಭೆರ ಕೊರವುಕಾರಿಕೆ ಎಡ್ತಂಡ್ ತಕ್ಕ್ ಪರ್ಂದ ಅವು, ಹಾಕಿನ ಕೊದ್ಚಿ ಕೊಂಡಾಡಿಯಂಡುಳ್ಳ ಕೊಡವ ಮಿಂಞತ ಕ್ರ್ಂದಲೆಕ್ ಇದೇ ಪುರ್ಡ್ನ ಕಾಟಿತ್ ಬುಡಂಡಿಯ ಅವಶ್ಯಕತೆ ಉಂಡ್. ಈ ನ್ಟ್ಟ್ಲ್ ಮೊಳಿಯಾನ ಕೊಡವ ಒಕ್ಕಡೊಕ್ಕಡ ಹಾಕಿ ನಮ್ಮೆ ಇಕ್ಕ 25ನೇ ಕಾಲಕ್ ಎತ್ತಿತ್, ಹಾಕಿರ ನಲ್ಲಾಮೆಕಾಯಿತ್ ನಂಗೆಲ್ಲರೂ ಕೂಡಿ ನೈಚಂಡ್ ಉಂಡ್. ಅದೇ ಪೋಲೆ ಮಿಂಞಕ್ ಇಂಞಚ್ಚಕೂ ಪುರ್ಡಾಯಿತ್ ಬೊಳ್ತೋಂಡುವೇಂಗಿ, ನಂಗಡ ಮಕ್ಕಕ್ ಕಳಿಪಕ್ ಬಟ್ಟೆಬೊಳಿ ಕ್ಟ್ಟೋಂಡು, ದೇಶ, ಅಂತರಾಷ್ಟ್ರೀಯ ಮಟ್ಟತೂ ನಂಗ ಏರ ಕಣಕಲ್ ಕೂಡಿಯಾಡೋನ್ನಕೆ ಆಂಡು, ಈಂಗಾಯಿತ್ ಕೊಡವ ಹಾಕಿ ಅಕಾಡೆಮಿ ಆರೋಡತ ಕೂಡೆ ತಾಲೀಮ್ ಅಕಾಡೆಮಿ ಸ್ಥಾಪನೆ ಮಾಡುವ ಇರಾದೆಲ್ ನೈಚಂಡುಂಡ್ ಆಪಚ್ಚಕ್ ತೊಡಿಕೆ ಈ ಕಾರ್ಬಾರ್ ಆಪಾಂದ್ ಎಣ್ಣ್ಚಿ.
ಮಿಂಞಕ್ ತಕ್ಕ್ ಪರ್ಂದ ಅವು, ಹಾಕಿ ನಮ್ಮೆರ ಕಾರೋಣ ಪಾಂಡಂಡ ಕುಟ್ಟಣಿ ಅಯಿಂಗಡ ನೆಪ್ಪುಲ್, ಚಾಂಪಿಯನ್ಸ್ ಟ್ರೋಪಿ ಕಳಿ ಪೈಪೋಟಿನ ಮುದ್ದಂಡ ಕಪ್ ಆನದೇ ನಡ್ತುವ ಇರಾದೆ ಉಂಡ್, ಈ ಪೈಪೋಟಿಲ್ ಕೈಂಜ 24 ಕಾಲತೊಟ್ಟ್ ಆಖೀರಿ ಪೈಪೋಟಿಲ್ ಕೂಡಿಯಾಡ್ನ ಒಕ್ಕಕಾರ ಮಾತ್ರ ಪೈಪೋಟಿಕ್ ಇಳಿವ, ಇದತಿಂಜ ಇಂಞ್ಞಚ್ಚಕೂ ಒಕ್ಕಕಾರಕ್ ಪುರ್ಡ್ ದಕ್ಕುವಾಂದ್ ಎಣ್ಣ್ಚಿ.
ಅಲ್ಲತೆ ಹಾಕಿ ನಮ್ಮೆಲ್ ಸುಮಾರ್ ಒಕ್ಕಕಾರಕ್ ಕೂಡಿಯಾಡುವ ಇರಾದೆ ಉಂಡೇಂಗೂ, ಕಳಿಕಾರ ಕಮ್ಮಿ ಉಳ್ಳಾಂಗಾಯಿತ್ ಬಯ್ಯಕ್ ನಿಪ್ಪ ಅಂತೈಂಗಕ್ ಅನುವಾಪನ್ನಕೆ ಕೊಡವ ಹಾಕಿ ಅಂಜಾಳ್ ಓರ ಒಕ್ಕತ ಕಳಿಕಾರಳನ್ನಕೆ ಕಳಿಪಕ್ ಅನುಕೊಡ್ಪ ಇರಾದೆಯೂ ನಂಗಡ ಮಿಂಞಲ್ ಉಂಡ್ಂದ್ ಎಣ್ಣ್ಚಿ.
ಇಕ್ಕಾಕಲೇ ಮಿಂಞತ ಎಟ್ಟ್ ಕಾಲಕ್ ನಮ್ಮೆ ನಡ್ತುವಕುಳ್ಳ ಒಕ್ಕಕಾರ ನಿರ್ಕಾಯಿತ್ ಆಂಡ ಮುಪ್ಪಡೆಕೂ ನಮ್ಮ ಕೈಪಕ್ ತಯಾರುಳ್ಳ ಒಕ್ಕಕಾರ ಅರ್ಜಿ ತಂದಂಡುಂಡ್ ಇದ್ ನೇರಾಯಿತೂ ನಂಗಕ್ ಹಾಕಿಕಾಯಿತ್ ನೈಪಕ್ ಇಂಞಚ್ಚಕೂ ಪುರ್ಡ್ ತಪ್ಪಾಂದ್ ಪಾಂಡಂಡ ಬೋಪಣ್ಣ ಎಣ್ಣ್ಚಿ.
ಕೈಂಜ ಕಾಲ ಹಾಕಿ ನಮ್ಮೆ ನಡ್ತಿತ್, ಉಲಗ ಕೇಳಿರ ಗಿನ್ನೀಸ್ ವರ್ಡ್ ರೆಕಾರ್ಡ್ ಮಾಡ್ನ ಕುಂಡ್ಯೋಳಂಡ ಒಕ್ಕಕಾರಳ ಆಕಾಡೆಮಿರ ಪರ, ಪಣ್ಣ್ ಫಲ ಕೊಡ್ತಿತ್ ತೊಮ್ಮಾನ ಮಾಡ್ಚಿ.
ಈ ಕಾಲ 25ನೇ ಕಾಲತ ನಮ್ಮೆ ನಡ್ತುವ ಮುದ್ದಂಡ ಒಕ್ಕಕಾಡ ತಯಾರಿನ ತೊಟ್ಟಿತ್ ಮುದ್ದಂಡ ರಶೀನ್ ಸುಬ್ಬಯ್ಯ ಅವು ತಕ್ಕ್ ಪರ್ಂದತ್.
ಅಕಾಡೆಮಿರ ಗೌರವ ಕಾರ್ಯಕಾರ ಮಾಳೇಟಿರ ಶ್ರೀನಿವಾಸ್, ಮುದ್ದಂಡ ದೇವಯ್ಯ, ಅಜ್ಜಿನಿಕಂಡ ಮಹೇಶ್ ನಾಚಯ್ಯ, ಕೀತಿಯಂಡ ಕಾರ್ಸನ್, ಪೈಕೆರ ಕಾಳಯ್ಯ, ಬಪ್ಪಕಾಲ ನಮ್ಮೆ ಕೈಪ ಚೇನಂಡ ಒಕ್ಕಕಾರ ಕೂಡ್ನನಕೆ ಖನಪಟ್ಟವು ಇಂಜತ್.
ಮಾಸಭೆರ ಆದಿಲ್ ಮಾಳೇಟಿರ ಅಜಿತ್ ಪೂವಣ್ಣ ಅವು ದ್ಯಾವಳ ತೊತ್ತ್ ಪಾಡ್ನಕ, ಕಾರ್ಯಾಧ್ಯಕ್ಷ ಮೇಕೇರಿರ ರವಿ ಅವು ತಕ್ಕಾರ ಬಯಂದತ್, ಉಪಾದ್ಯಕ್ಷ ಕುಕ್ಕೆರ ಜಯಚಿಣ್ಣಪ್ಪ ಅವು ಕೈಂಜ ಕಾಲತ ಅರಿವುನ ಓದ್ನಕ ಖಜಾಂಚಿ ಮಾರ್ಚಂಡ ಗಣೇಶ್ ಅವು ಲೆಕ್ಕ ಪಟ್ಟಿ ಒಪ್ಪುಚಿಟ್ಟತ್. ಕುಲ್ಲೇಟಿರ ಅರುಣ್ಬೇಬಾ ಅವು ತೊತ್ತ್ ಬಯಂದಂಡ್, ಚೆಪ್ಪುಡಿರ ಕಾರ್ಯಪ್ಪ ಅವು ಕುಯ್ಯಳೆ ಕೂಟ್ಚಿ.
