ಸೂರ್ಲಬ್ಬಿ, ಡಿ.03: ಆದಿ ಕೇಳಿ ಉಳ್ಳ ಸೂರ್ಲಬ್ಬಿ ನಾಡ್ರ ಶ್ರೀ ಸುಬ್ರಯ್ಯ ತಿರಿಕೆಲ್ ಕಾಲತ ಷಷ್ಠಿ ಪೂಜೆ 07/12/24ನೇ ಚೆನಿಯಾಚೆ, ಪೊಲಾಕ 09 ಘಂಟೆಕ್, ಶುರುವಾಪ ಷಷ್ಠಿ ಪೂಜೆ ಮಜ್ಜಣ 01 ಘಂಟೆಕೆತ್ತನೆ ಇಪ್ಪ. 01 ಘಂಟೆಕ್ ಪಲಾರ, ಪ್ರಸಾದ ಬಳಂಬುವ ಆಯಿಮೆ ನಡ್ಪಾಂದ್, ಸೂರ್ಲಬ್ಬಿನಾಡ್ ನಾಲ್ಗುಡಿ ದೇವುಮಳಾನ, ಕಾಳತಮ್ಮೆ, ಕೇತ್ರಪ್ಪ, ಸುಬ್ರಯ್ಯ ಮಂಜುನಾಥ ದೇವಸ್ತಾನ ಸಮಿತಿರ ಆಡಳಿತ ಮಂಡಳಿ ಪಿಂಞ ತಕ್ಕ ಮುಕ್ಕಾಟಿಯ ಅರಿಚಿಟ್ಟಿತ್.
ಆದಿ ಸುಬ್ರಯ್ಯ ಪಂಡಾಯಿರ ಕಾಲ ಬಯ್ಯ ಕ್ಬ್ಬೂಮಿಕ್ ಇಳ್ಂಜಿ ಬಂದಿತ್, ತಾರಾಕಾಸುರನ ಕೊಂದಿತ್, ಕಾಲತ ಪೋಕೋಲೆ, ಆದಿ ಕುಕ್ಕೆಲ್ ಆದಿನೆಲೆಗೊಂಡಿತ್, ಅಲ್ಲಿಯತ ಮೂಲ ತಕ್ಕಾಮೆ ಕೆಜ್ಜಂಡಿಂಜ ಒಕ್ಕ, ತಾಂಡ ನೆಲೆ ಬುಟ್ಟ್ ಬಂದದು, ತಾನೂ ನೆಲೆ ತೇಡಿ ಬಂದಿತ್, ಆದ್ಯ ಕುಂಬಡಿಲ್ ನೆಲೆನೋಟಿತ್, ಅಲ್ಲಿಂಜ ಎದ್ದಿತ್, ಸೂರ್ಲಬ್ಬಿರ ಪಡಿಞಾರ್ ಮೋಳ್ಲ್ ಮುಟ್ಟತ ಕೇಕ್ಲ್ ಸ್ಥಾನ ನೆಲೆ ನಿಂದ ಸುಬ್ರಯ್ಯ. ಏರ ಕೇಳಿ ಪಟ್ಟದೂ, ಕಾರ್ಯಬೀರ್ಯ ಕಲೆ ನೆಲೆ ಉಳ್ಳ, ಈ ಸುಬ್ರಯ್ಯಂಡ ನಡೆಕ್, ಷಷ್ಟಿಪೂಜೆಕ್ ಬಪ್ಪ ಭಕ್ತ ಮಾಜನ, ನೇಮಕೊತ್ತನ್ನಕೆ ಏರ ಮೇನತ್ಲ್, ಅದ್ದಶುದ್ದತ್ ಬಂದಿತ್, ದೇವಡ ಆರ ಬೋಡ್ಯವಂಡೂಂದ್, ತಕ್ಕ ಮುಕ್ಕಾಟಿಯ, ಕಾರ್ಯಕೂಡ್ಕಾರಂಗ ಪಿಂಞ ಅಂಜಿಕೇರಿ ನೂರೊಕ್ಕ ಅಡಂಗಿತುಳ್ಳ ಸೂರ್ಲಬ್ಬಿ ನಾಡ್ಕಾರ ಕೇಟಂಡಿತ್.
