ಅಮ್ಮತ್ತಿ, ಮಾ.19: ಉಲಗ ಪೊಮ್ಮಕ್ಕಡ ನಾಳ್ರ ಮಾರೀಪತ್ ಅಮ್ಮತ್ತಿ ಕೊಡವ ಸಮಾಜ ಪೊಮ್ಮಕ್ಕಡ ಕೂಟತಿಂಜ ತರಾವರಿ ಆಯಿಮೆ ಕೊಯಿಮೆ ಅಂದೋಡೆ ನಡ್ಂದತ್.
ನಾಳಂಕೆ 16.03.2025ನೇ ನಾರಾಚೆ ಪೊಲಾಕ 10 ಗಂಟೆ0ಜ ಬೈಟಾಪಕ 05 ಗಂಟೆಕೆತ್ತನೆ ಅಮ್ಮತ್ತಿ ಕೊಡವ ಸಮಾಜಬಾಡೆಲ್, ಪೊಮ್ಮಕ್ಕಡ ಕೂಟತ ಕೊರವುಕಾರಿ ಚಂಬಾಂಡ ರೇಷ್ಮಾ ಭೀಮಯ್ಯ ಅಯಿಂಗಡ ಕೊರವುಕಾರಿಕೆಲ್ ನಡ್ಂದ ಆಯಿಮೆಲ್, ಆದ್ಯತ್ ಅಮ್ಮತ್ತಿ ಕೊಡವ ಸಮಾಜ ಕೊರವುಕಾರ ಐನಂಡ ಪ್ರಕಾಶ್ ಪಿಂಞ ಕಾರ್ಯಕಾರ ಪಟ್ಟಡ ಧನು ಉತ್ತಯ್ಯ ಆವು ನೆಲ್ಲಕ್ಕಿಲ್ ದೇವಳ ತೊತ್ತಿತ್ ಒಕ್ಕಣೆ ಕಟ್ಟಿತ್ ಕಾರ್ಬಾರ್ಕ್ ಆದ್ಯ ಮೊಳಿ ಇಟ್ಟತ್. ಪುಚ್ಚಂಡ ಲಲಿತಅಪ್ಪಚ್ಚು ಅಯಿಂಗ ದೇವಳ ಬೋಡಿತ್ ಪಾಡ್ನಕ, ಕೊರವು ಕಾರಿ ಚಂಬಂ,ಡ ರೇಶ್ಮ ಭೀಮಯ್ಯ ಅವು ಎಲ್ಲಾರನೂ ತಕ್ಕಾರ ಮಾಡ್ಚಿ. ಖನಪಟ್ಟ ಬೆಂದುವಳಾಯಿತ್, ಜಮ್ಮಡ ಪ್ರೀತ್ ಅಪ್ಪಯ್ಯ ಬೇರೆರಾ ಪೂನಂ ಭೋಜಣ್ಣ ಅಯಿಂಗ, ಕುತ್ತ್ಂಬೊಳ್ಚ ಕತ್ತ್ಚಿಟ್ಟಿತ್ ಕಾರ್ಬಾರ್ಕ್ ಮೊಳಿ ಇಟ್ಟತ್.
ಇದಾನದು ಫಲತರ ಆಟ್ ಪಾಟ್, ಕಳಿ ತೆಳಿ ಪೈಪೋಟಿ ನಡ್ಂದತ್. ಪಂಡ್ಕಾಲತ್ ಪೊಮ್ಮಕ್ಕಡ ಪೊರಪಾಡ್ ಪೈಪೋಟಿಲ್ ಪೊಮ್ಮಕ್ಕ ದುಂಬ ಪುರ್ಡ್ಲ್ ಕಾಡಿಯಾಡಿತಿಂಜತ್. ಪೊಮ್ಮಕ್ಕಡ ಚೆರ್ನಾಟಕ, ಆಟ್ ಕೂಡಿತಿಂಜ ಎಲ್ಲಾಡ ಮನ ತಂಪು ಮಾಡ್ಚಿ. ಗೆದ್ದೈಂಗಕ್ ಇನಾಮ್ ಬಳಂಬುವೋ ಖನ ಪಟ್ಟೈಂಗಡ ತಕ್ಕ್ ಬಾಕ್ ಆನದು ಗೌಜಿರ ಊಟೋಪಚಾರ ಇಂಜತ್. ಪೊಮ್ಮಕ್ಕಡ ಕೂಟತ್ ಉಪಾಧ್ಯಕ್ಷೆ ಮೊಳ್ಳೆರ ಜಾನ್ಸಿಅಪ್ಪಚ್ಚು, ಕಾರ್ಯಕಾರಿ ಕುಟ್ಟಂಡ ರೇಖಜಗನ್, ಲೆಕ್ಕಪಟ್ಟಿಕಾರಿ ಪುಚ್ಚಂಡ ಲಲಿತ ಅಪ್ಪಚ್ಚು, ನಿರ್ದೇಶಕಿಯಳಾನ ಮೂಕೋಂಡ ವೀಣಾದೇವಯ್ಯ, ನೆಲ್ಲಮಕ್ಕಡ ಆಶಾಬೆಳ್ಳಿಯಪ್ಪ, ನೆರಪಂಡ ಪ್ರಭಾಕಾರ್ಯಪ್ಪ, ಕೇಚಂಡ ಅನಿತಾಕುಶಾಲಪ್ಪ, ಐನಂಡ ಇಂದಿರಾಐಯ್ಯಪ್ಪ, ಐನಂಡ ಝೀನಾಕಿರಣ್, ನಿರ್ದೇಶಕಿ ಕೊಡವ ಸಮಾಜ ಅವೂ ಅಲ್ಲತೆ ಖನಪಟ್ಟವು ಕೂಡಿಯಾಡಿತ್, ಕಾರ್ಬಾರ್ ಅಂದೋಡೆ ನಡ್ಪಕ್ ಒತ್ತಾಸೆ ತಾತ್.
ಆಖೀರಿಕ್ ಕೊಡವ ಸಮಾಜತ ನಿರ್ದೇಶಕಿ ಪಿಂಞ ಪೊಮ್ಮಕ್ಕಡ ಸಂಘತ ನಿರ್ದೇಶಕಿಯೂ ಆನ ಕುಟ್ಟಂಡ ರೀಟಾಚಿಣ್ಣಪ್ಪ ಅವು ಕೂಡಿ ಬಂದ ಎಲ್ಲಾರ್ನೂ ತೊತ್ತ್ ಬಯಂದಕ, ಕೊಡವ ಸಮಾಜ ಪಿಂಞ ಪೊಮ್ಮಕ್ಕಡ ಸಂಘತ ನಿರ್ದೇಶಕಿಯೂ ಆನ ಕೋಡಿಮಣಿಯಂಡ ಅಶ್ವಿನಿ ಗಣಪತಿ ಕಾರ್ಬಾರ್ಲ್ ಅಂದೋಡೆ ಕುಯ್ಯಳೆ ಕೂಟ್ಚಿ.
ಅಮ್ಮತ್ತಿ ನಾಡ್ಕ್ ಅಡ್ಂಗ್ನ ಪೊಮ್ಮಕ್ಕ ಏರ ಕಣಕ್ಲ್ ಕೂಡಿಯಾಡಿತ್ ಆಯಿಮೆನ ಗೌಜಿಲ್ ಕೈಚತ್ಂದ್ ಅಮ್ಮತ್ತಿ ಕೊಡವ ಸಮಾಜ ಒಮ್ಮಕ್ಕಡ ಕೂಟತ್ರ ಕಾರ್ಯಾಕಾರಿ ಕುಟ್ಟಂಡ ರೇಖಜಗನ್ ಅವು ಅರಿಚಿಟ್ಟಿತ್.