ಬೆಂಗಳೂರ್; ಜು.07;(nadubadenews): ಬಾಳ್‌ಬದ್‌ಕ್‌ಕಾಯಿತ್‌ ನಾಡ್‌ಬುಟ್ಟ್‌, ನೆಲೆತೇಡಿ ಪೋಯಿತ್‌ ಬೆಂಗಳೂರ್‌ಲ್‌ ತಾಂಗಿನಿಂದ, ಏಳ್‌ನಾಡ್‌ಕ್‌ ಅಡ್ಂಗ್‌ನ ಕೊಡವಡ ನೇರ್‌ ನಲ್ಲಾಮೆಕಾಯಿತ್‌ ಒಕ್ಕಟ್ಟ್‌ ಒತ್ತೋರ್ಮೆಕಾಯಿತ್‌, ಕೈಂಜ 39 ಕಾಲಬಯ್ಯ ಸ್ಥಾಪನೆ ಆನ, “ಏಳ್‌ ನಾಡ್‌ ಕೊಡವ ಸಂಘ -ಬೆಂಗಳೂರ್”ರ 39ನೇ ಒತ್ತೋರ್ಮೆ ಕೂಟ, ಸಂಗತ್‌ರ ಕೊರವುಕಾರ ಮಂಡಿರ ಸಿ. ಬೋಪಯ್ಯ ಅಯಿಂಗಡ ಕೊರವುಕಾರಿಕೆಲ್‌, ಖನಪಟ್ಟ ಬೆಂದು, ಉಪ ಅರಣ್ಯ ಸಂರಕ್ಷಣಾಧಿಕಾರಿ ಕೊಚ್ಚೆರ ನೆಹರು, ತೊಮ್ಮಾನಿತ ಬೆಂದು ಕೊಡವಾಮೆರ ಕೊಂಡಾಟ ಸಂಘಟನೆರ ಕೊರವುಕಾರ ಚಾಮೆರ ದಿನೇಶ್‌ಬೆಳ್ಯಪ್ಪ ಅಯಿಂಗಡ ಕೂಡ್‌ ಕೂಟತ್ ಕಕ್ಕಡ 18 (3/8/25)ನೇ ನಾರಾಚೆ ಬೆಂಗಳೂರ್ ವಸಂತ ನಗರತ್‌ ಉಳ್ಳ ಕೊಡವ ಸಮಾಜತ, ಫಿ.ಮಾ.ಕಾರ್ಯಪ್ಪ ಬಾಡೆಲ್‌ ನಡ್ಂದತ್.
ಆದ್ಯತ್‌ ಉಬ್ಬಕಂಡಿಲ್ ಬೆಂದುವಳ ಚೊಬ್ಬುನೀರಾಯಿ, ಬಂದಿರಾಂದ್‌ ತಕ್ಕಾರ ಮಾಡಿತ್, ದುಡಿಕೊಟ್ಟ್‌ ಬಟ್ಟೆಪಾಟಾಯಿತ್‌ ಬಾಡೆಕ್‌ ಕಾಕಿ ಕೂಟಿತ್‌, ದೇವಾನು ದೇವತೆಯಳೋ, ಮಾಗುರು ಕಾರೋಣಳೋ ತೊತ್ತಿತ್‌ ಕುತ್ತ್ಂಬೊಳ್ಚ ಕತ್ತ್‌ಚಿಟ್ಟಿತ್‌ ಆಯಿಮೆಕ್‌ ಮೊಳಿ ಇಟ್ಟಕ, ಬೊಕ್ತಂಡ ರೀಟಾಗಣೇಶ್‌ ಅವು ದೇವಳ ತುದ್‌ಚಿ ಪಾಡ್‌ಚಿ. ಚುಪ್ಪಿ ಕುಂಞಿ ಮಂದೆಯಂಡ ಸಮಿಕ್ಷ ರತನ್‌ ದೇವಾಟ್‌(ಭರತ್‌ ನಾಟ್ಯ) ಆಡಿತ್‌ ತಕ್ಕಾರ ಮಾಡ್‌ನಕ್‌, ಬಾಲಂಗಡ ಬೊಳಕಾಟ್‌, ಕೋಲಾಟ, ಕೋಲ್‌ಮುರಿ, ಪೊಮ್ಮಕ್ಕಡ ಉಮ್ಮತಾಟ್‌ ಆನದು ನಡ್ಂಡ ಆಯಿಮೆರ ಮೇತಟ್ಟ್‌ಲ್‌, ಕೊರವುಕಾರ, ಖನಪಟ್ಟ ಬೆಂದು, ತೊಮ್ಮಾನಿತ ಬೆಂದು ಕೂಡ್‌ನಕೆ ಸಂಘತ್‌ರ ಕೂಡ್‌ಕೊರವುಕಾರ ಐಮುಡಿಯಂಡ ಭೀಮಯ್ಯ, ಕಾರ್ಯಕಾರಿ ಓಡಿಯಂಡ ರೀನಚಂಗಪ್ಪ, ಲೆಕ್ಕಪಟ್ಟಿಕಾರ ಕನ್ನಿಗಂಡ ದೇವಯ್ಯ, ಕೂಟ್‌ಕಾರ್ಯಕಾರ ಗೌಡಂಡ ಕುಂಞಪ್ಪ, ಕೂಟ್‌ ಲೆಕ್ಕಪಟ್ಟಿಕಾರ ಪಳೆಯಂಡ ನಿಂಗಪ್ಪ ಅಯಿಂಗಳ ಮೇಗರೆಕ್‌ ಕಾಕಿ ಅಳ್ಪುಚಿಟ್ಟಿತ್‌, ಕಾರ್ಯಕಾರಿ ಓಡಿಯಂಡ ರೀನ ಚಂಗಪ್ಪ ಅವು ತಕ್ಕಾರ ಬಯಂದಕ, ಖನಪಟ್ಟ ಬೆಂದು ಕೊಚ್ಚೆರ ನೆಹರು ಅಯಿಂಗಡ ಬಾಳ್‌ ಬದ್‌ಕ್‌ರ ಅರಿವುನ ಮೋಟನಳ್ಳಿರ ಜೀವನ್‌ ಅವು ಮಾಡ್‌ನಕ, ತೊಮ್ಮಾನಿತ ಬೆಂದು ಚಾಮೆರ ದಿನೇಶ್‌ಬೆಳ್ಯಪ್ಪ ಅಯಿಂಗಡ ಬದ್‌ಕ್‌ರ ನಡೆನ ಮಿನ್ನಂಡ ಲಲಿತಕಾಳಯ್ಯ ಅವು ಮಾಡ್‌ಚಿ.
ತೊಮ್ಮಾನ ಪಡ್ಂದಂಡ್‌ ತಕ್ಕ್‌ ಪರ್ಂದ DFO ಕೊಚ್ಚೆರ ನೆಹರು ಅವು, ಮಕ್ಕಕ್‌ ನಲ್ಲಾ ವಿದ್ಯಾಬುದ್ದಿರ ಕೂಟ್‌ಕ್‌ ನಲ್ಲ ಸರ್ಕಾರಿ ಚಾಕ್ರಿಕ್‌ ಕೂಡೋನೆಕೆ ಒತ್ತಾಸೆ ಕೊಡ್ಕೋಂಡು ಆ ನ್‌ಟ್ಟ್‌ಲ್‌ ನೈಪಕ್‌ ನಂಗೆಲ್ಲರೂ ಕೈ ತೆಕ್ಕೊಂಡು. ನಾನು ನಾಡ ಕೈಲಾಪನಕೆ ಈ ಕಾರ್ಯಕ್‌ ಒತ್ತಾಸೆ ತಪ್ಪೀಂದ್‌ ಭರವಸೆರ ತಕ್ಕ್‌ ಪರ್ಂದತ್.
ತೊಮ್ಮಾನಿತ ಬೆಂದು ಚಾಮೆರ ದಿನೇಶ್‌ ಬೆಳ್ಯಪ್ಪ ಅವು ತಕ್ಕ್‌ ಪರಂದಿತ್‌, ಏಳ್‌ ನಾಡ್‌ ಎಣ್ಣೋದ್‌ ಕೊಡವಾಮೆರ ಗೂಡ್‌, ಪದ್ದತಿ ಪರಂಪರೆ ಆಯಿಮೆ ಕೊಯಿಮೆ ಪದ್ದತಿ ಪರಂಪರೆನ ಪಳಿಯಾಮೆನ ಉಳ್ತಿ ಬೊಳ್ತಿಯಂಡ್‌ ಬಂದ ನಂಗಡ ಪೆರಿಯೈಂಗಡ ನೈಪುನ ನಂಗ ಅರ್ಂಜಿತ್‌ ಮಿಂಞತ ಕ್‌ರ್ಂದಲೆಕೂ ಉಳ್ತಿ ಪೋಪನನೆಕೆ ಮಾಡೋಕ್‌ ನಂಗೆಲ್ಲರೂ ಕೈ ಕೂಡಿ ನೈಕೊಂಡು, ಪಳೆಯಾಮೆರ ಭೀರ್ಯಕ್‌ ಪೊಯ್ತಾಕತನ್ನಕೆ ನಂಗೆಲ್ಲರೂ ಒತ್ತ್‌ ನಿಕ್ಕೊಂಡೂಂದ್‌ ಎಣ್ಣ್‌ಚಿ.
ಆಯಿಮೆಲ್‌ ಕೂಡಿಯಾಡ್‌ನ ಬೆಂಗಳೂರ್ ಕೊಡವ ಸಮಾಜ ಬೆಂಗಳೂರ್ರ ಕೊರವುಕಾರ ಕರವಟ್ಟಿರ ಪೆಮ್ಮಯ್ಯ, ಕೂಡ್‌ಕೊರವುಕಾರಿ ಪಾಂಡಂಡ ಕಮಲ, ಕಾರ್ಯಕಾರ ಚಿರಿಯಪಂಡ ವಿವೇಕ್‌ ಮುತ್ತಣ್ಣ, ಕೂಡ್‌ನನಕೆ ಎಲ್ಲಾ ಕಾರ್ಯಕೂಡ್‌ಕಾರಕೂ ಪೂಚೆಟ್ಟಿಯೋಡೆ ತಕ್ಕಾರ ಬಯಂದಂಡತ್, ಈ ನ್ಯಾರತ್‌ ತಕ್ಕ್‌ ಪರಂದ ಕರವಟ್ಟಿರ ಪೆಮ್ಮಯ್ಯ ಅವು, ಪಂಡ್‌ ಕಾಲತ್‌ ನಂಗಡ ಪೆರಿಯವು, ಎಲ್ಲಾ ಆಯಿಮೆ ಕೊಯಿಕೂ ಯದ ಆಪನ್ನಕೆ ನಾಡ್‌, ಭಾಗ ಮಾಡಿತಿಂಜತ್‌, ಏದ ನಾಡೂ ಬೋರೆ ಬೋರೆ ಅಲ್ಲ, ನಂಗೆಲ್ಲರೂ ಒರೇ ಅವ್ವಂಡ ಮಕ್ಕಳಾಯಿತ್‌ ಅಂದರ್‌ ಇಂದೂ ಬಾಳಿ ಬದ್‌ಕಿಯಂಡುಂಡ್‌, ಇದ್‌ ಕಾಲ ಮಿಂಞಕೂ ಒಂದಾಯಿತೇ ಪೋಪನ್ನಕೆ ನಂಗೆಲ್ಲರೂ ಮೇನತ್‌ಟ್ಟಿತ್‌ ಒತ್ತೋರ್ಮೆ ಕಾತ್‌ ಬೆಚ್ಚವಂಡೂಂದ್‌ ಎಣ್ಣ್‌ಚಿ.
ಕೊರವುಕಾರ ಮಂಡಿರ ಬೋಪಯ್ಯ ತಾಂಡ ಕೊರವು ಕಾರಿಕೆರ ತಕ್ಕ್‌ ಪರ್ಂದಕ, ಬಾಳೆಯಡ ಕರುಣ್‌ಕಾಳಪ್ಪ, ಚಿರಿಯಪಂಡ ಸುರೇಶ್‌ ನಂಜಪ್ಪ, ಸರ್ಕಂಡ ಸೋಮಯ್ಯ, ಉಡುವೆರ ಸುರೇಶ್‌ ಅವು ತಕ್ಕ್‌ಪರಂದತ್.
ಇದೇ ನ್ಯಾರತ್‌ ಬವುಸ್‌ರ ಕ್ರಕೇಟ್‌ ಕಜಳಿಕಾರಿ ಓಡಿಯಂಡ ರೋಹಿಣಿ ದೇಚಮ್ಮ, ಹಾಕಿ ಕಳಿಕಾರಿ ನಾಪಂಡ ಸೌಮ್ಯ ಶ್ರೀ, 25ನೇ ಹಾಕಿ ನಮ್ಮೆನ ಅಂದೋಡೆ ಕೈಚ ಮುದ್ದಂಡ ರಶಿನ್‌ ಸುಬ್ಬಯ್ಯ, ಶಿಕ್ಷಣ ಪಿಂಞ ಬಯತಂಗಡ ಕಳಿಕೂಟತ್‌ ಕೇಳಿ ಎಡ್ತ ಪಾಸುರ ಇಂದಿರಾಮುತ್ತಣ್ಣ ಅಯಿಂಗಳ ವಸ್ತ್ರ ಒಡಿಕತ್ತಿ, ಪೂಚೆಟ್ಟಿ, ಪಣ್ಣ್‌ ಪಲಾರ ಆಯಿತ್‌ ತೊಮ್ಮಾನ ಮಾಡ್‌ನಕ್‌, ಕೈಂಜ ಓರಾಂಡ್‌ಲ್ ವಿದ್ಯಾಕೋವುಲ್‌ ಕೇಳಿ ಎಡ್ತ, ನಾಗಂಡ ಕೀರ್ತಾನ ಸುಬ್ಬಯ್ಯ, ನಾಪಂಡ ಭವ್ಯ, ಮಿನ್ನಂಡ ದೇಚಮ್ಮ, ನಾಪಂಡ ಸುಷ್ಮ, ಅಯ್ಯಲಪಂಡ ಹೊಯಾಲ್‌ ಅಯ್ಯಪ್ಪ, ಓಡಿಯಂಡ ವಿಲ್ಮ ದೇಚಮ್ಮ , ಅಜ್ಜಮಕ್ಕಡ ಪೂವಮ್ಮ, ಓಡಿಯಂಡ ಮನಶ್ವಿನಿ ಮುತ್ತಮ್ಮ, ಉಡುವೆರ ಅಚ್ಚಯ್ಯ, ಉಡುವೆರ ಶ್ರೇಯಾ, ತಂಬುಕುತ್ತಿರ ಕಾರ್ತಿಕ್‌ ಗಣಪತಿ, ಕನ್ನಿಗಂಡ ಗಣಪತಿ, ಮೋಟನಳ್ಳಿರ ಪ್ರಣಯ ಉತ್ತಪ್ಪ, ಮಲ್ಲಾಜಿರ ವಿಭು ಪೊನ್ನಣ್ಣ, ಬೊಕ್ತಂಡ ಪ್ರಜ್ಞ, ನಾಪಂಡ ದೀಕ್ಷ, ಮುದ್ದಂಡ ಸೋಮಯ್ಯ, ಮಿನ್ನಂಡ ಅನುಷ್ಯ, ಕನ್ನಿಗಂಡ ಲಿಖಿತ, ಅಯ್ಯಲಪಂಡ ಹೃತಿಕ್‌ ಕುಟ್ಟಪ್ಪ, ನಾಪಂಡ ದಿಯಾ ಈರಪ್ಪ, ಪುದಿಯತಂಡ ಯಶು ಅಪ್ಪಣ್ಣ, ಪುದಿಯತಂಡ ಯತಿನ್‌ ಅಯ್ಯಪ್ಪ, ಐಮುಡಿಯಂಡ ಕಾವೇರಿ, ಬೊಕ್ತಂಡ ಕೃತಿಕ, ಉದ್ದಿನಾಡಂಡ ಅಕ್ಷತಾಗಣಪತಿ, ಕನ್ನಿಗಂಡ ಯೋಗಿತ, ಮೇದುರ ಲಿಕಿತನಾಣಯ್ಯ, ಅಯಿಂಗಕ್‌ ಒತ್ತಾಸೆ ಪಣ ಬಳಂಬುಚಿ.
ಆಯಿಮೆರ ಆದಿ ತೊಟ್ಟ್‌ ಅಂತ್ಯಕೆತ್ತನೆ ನಾಗಂಡ ಕವಿತ ಪಿಂಞ ಮೋರ್ಕಂಡ ಸುರೇಶ್‌ ಅವು ಕುಯ್ಯಳೆ ಕೂಟ್‌ನಕ, ಆಖೀರಿಕ್ ಏಳ್‌ನಾಡ್‌ ಕೊಡವ ಸಂಘತ್‌ರ ಲೆಕ್ಕಪಟ್ಟಿಕಾರ ಕನ್ನಿಗಂಡ ದೇವಯ್ಯ ಅಯಿಂಗ ಬಂದ್‌ ಕೂಡ್‌ನ ಎಲ್ಲಾ ಬೆಂದು ಚಂಙಾದಿಯಳೊ ತೊತ್ತ್‌ ಬಯಂದಂಡತ್. ಇದಾನದು ಗೌಜಿ ಗದ್ದಳತ ಊಟೋಪಚಾರ, ಆಟ್‌ ಪಾಟ್‌, ಕಳಿ ತೆಳಿ ಮೇಂಗಿತ್‌, ಅಂದಾಜ್‌ 800+ ಆಮಕ್ಕ, ಪೊಮ್ಮಕ್ಕ, ಮಕ್ಕ ಮರಿಯಾಯಿ ಒತ್ತೋರ್ಮೆಲ್‌ ಎಲಂಗಿ ಕೂಡಿ ಪಿರ್ಂಜತ್.
